ᑰᒃᔪᐊᖅ, ᑯᐯᒃ, ᓯᑉᑎᒻᐱᕆ 12, 2016 –ᐊᖏᖃᑎᒌᒍᑎᖃᓚᐅᕐᑎᓗᒋᑦ ᑲᑎᕕᒃ ᓄᓇᓕᓕᒫᑦ ᑲᕙᒪᒃᑯᓗ ᒪᑭᕝᕕᑯᓪᓗ, ᐅᕐᓱᐊᓗᐃᑦ ᐊᑭᖃᕐᐸᑐᑦ 40-ᓴᓐᓯᓂᒃ ᓖᑕᑕᒫᑦ ᐃᓕᖓᑦᓱᓂ ᐃᓄᑐᐃᓐᓇᓄᑦ ᐱᕙᓪᓕᖁᑎᑕᕐᑕᑐᓄᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂ ᓱᕐᕋᓂᖃᓚᖓᖕᖏᓚᖅ ᑕᒡᒐᓂ ᐊᕐᕌᒍᒥ ᑕᒪᓐᓇ ᐅᓄᕐᓯᒋᐊᕐᑎᓯᖏᓐᓂᖅ ᐱᒋᐊᕐᕕᖃᓛᕐᓗᓂ ᓯᑉᑎᒻᐱᕆ 1, 2016-ᒥᑦ. ᐊᒻᒪᓗᒋᐊᓪᓚᑕᐅᖅ, ᐅᕐᓱᐊᓗᐃᑦ ᐊᑭᖏᑦ ᐃᓄᕐᓴᕆᐊᕐᓯᒪᓕᕐᑎᓗᒋᑦ ᑲᓇᑕᒥ ᑌᒣᓚᐅᕐᓱᑎᓪᓗ ᐊᕐᕌᒍᓚᐅᕐᑐᒥ, ᐅᕐᓱᐊᓗᓐᓂᒃ ᐊᑭᓕᐅᕆᓯᒪᒍᑏᑦ ᐃᓕᖓᔪᑦ ᑰᒃᔪᐊᒥᐅᓄᓪᓗ ᓄᓇᕕᐅᓪᓗ ᓄᓇᓕᓕᒫᖏᓐᓄᑦ ᐃᓄᕐᓴᕆᐊᕐᑎᑕᐅᓚᐅᔪᒋᕗᑦ ᐱᒋᐊᕐᕕᓕᐅᑎᕕᖃᕐᓱᑎᒃ ᓯᑉᑎᒻᐱᕆ 1-ᒥᒃ.
ᐅᕐᓱᐊᓗᐃᑦ ᐅᓄᕐᑐᓂᒃ ᐊᑭᖃᕐᑎᑕᐅᕙᓐᓂᖏᑦ ᓄᓇᕕᒻᒥ ᐱᑦᔪᑎᖃᕐᐳᑦ, ᐃᓚᖓᒍᑦ, ᐊᑭᓕᕐᑐᐊᖃᕐᓂᓂᒃ ᐅᕐᓱᐊᓘᑉ ᐅᓯᔭᐅᒍᑎᖏᓐᓂᒃ ᓯᕿᓂᕐᒥᑦ ᓄᓇᕕᐅᑉ ᓄᓇᖏᓐᓄᑦ ᐊᒻᒪᓗ, ᐃᓚᖓᒍᑦ ᑮᓇᐅᔭᕐᑐᕈᑕᐅᒋᐊᓪᓚᓲᖑᓂᖏᓐᓂᒃ ᑮᓇᐅᔭᖃᕐᑎᓯᒍᑎᑎᒎᕐᑐᓂᒃ ᐊᕐᕌᒍᑕᒫᑦ ᐅᕐᓱᐊᓗᖃᕐᑎᓯᒍᑎᓅᓕᖓᔪᓂᒃ. ᑲᕙᒪᑐᖃᒃᑯᓗ ᓄᓇᓕᕐᓚᐅᓗ ᐊᑭᓕᕐᑐᐃᑎᑦᓯᒍᑎᖏᑦ ᑖᒃᓯᓂ ᐃᓚᐅᑎᑕᐅᓲᖑᒻᒪᑕ ᐅᓯᔭᐅᒍᑎᖏᓐᓄᓗ ᑮᓇᐅᔭᕐᑐᕈᑕᐅᓂᖏᓐᓄᓗ ᐊᕐᕌᒍᑕᒫᑦ ᐅᕐᓱᐊᓗᖃᕐᑎᓯᒍᑎᐅᓲᑦ. ᑲᕙᒪᑐᖃᒃᑯᓗ ᓄᓇᓕᕐᓚᐅᓗ ᑲᕙᒪᖓᑕ ᑖᒃᓯᑎᒍᑦ ᐊᑭᓕᕐᑐᐃᑎᑦᓯᒍᑎᖏᑦ ᐊᑭᓕᑦᓴᓕᐅᕈᑎᐅᕚᓪᓗᓲᖑᒻᒪᓃᒃ ᐅᓯᔭᐅᓚᐅᕐᑎᓗᒍᓗ ᑮᓇᐅᔭᕐᑐᕈᑎᑎᒍᓪᓗ ᐊᑭᐅᔪᑎᒍᑦ ᐅᐃᒍᑕᕆᒍᑕᐅᓱᖑᑦᓱᑎᒃ ᐊᑭᓕᕐᑕᐅᔪᓄᑦ ᐅᕐᓱᐊᓗᓕᕆᔨᒃᑯᓄᑦ ᓄᓇᓕᐅᔪᓂ.
“ᐅᕐᓱᐊᓗᓐᓂᒃ ᐱᓇᓱᒍᑎᖃᕐᓃᑦ ᐱᑕᖃᕐᑎᓯᓱᖑᕗᑦ ᑐᑭᖃᑦᓯᐊᒪᕆᑦᑐᒥᒃ ᓴᐳᑦᔨᓯᒪᓂᕐᒥᒃ ᐊᓐᓇᐅᒪᒍᑎᑦᓴᓯᐅᕆᐊᖃᕐᐸᓱᑎᒃ ᐊᓐᓂᑐᕋᓱᑦᑎᓂᒃ ᐃᑲᔪᕐᓯᒪᒍᑎᐅᒐᒥᒃ ᒪᙯᑉᐸᑐᓂᓪᓗ ᐃᖃᓪᓕᐊᐸᑦᑐᓂᓪᓗ ᑖᒃᑯᐊ ᐱᒻᒪᕆᐊᓗᒻᒪᓃᒃ ᓄᓇᕕᒻᒥᐅᓄᑦ ᐃᓄᑐᐃᓐᓇᓄᑦ. ᐅᕐᓱᐊᓘᑉ ᐊᑭᑐᔫᓂᖏᑦ ᓄᓇᖁᑎᑦᑎᓂ ᐊᖏᔪᒥᒃ ᓵᖕᖓᔭᑦᓴᐅᕙᒻᒪᑕ ᐳᕿᐊᓱᖕᖏᓚᖓᓗ ᑲᔪᓯᔪᒥᒃ ᐱᒐᓱᒍᑎᕗᑦ ᐊᖏᔪᒥᒃ ᓱᕐᕃᓂᖃᕐᓂᐊᕆᐊᖏᑦ”, ᓚᑦᓱᓂ ᐅᖃᕐᑐᖅ ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ ᓯᕗᓕᕐᑎᖓ ᔨᐊᓂᕗ ᒪᓂᖅ.
“ᑐᓵᕙᑦᑕᑲ ᐃᓄᐃᑦ ᐅᕙᑦᑎᓂᒃ ᐅᖃᐅᑦᔨᑎᓪᓗᒋᑦ ᐃᓅᓯᕐᒥᓂ ᐃᓱᐊᖁᑎᓂᒃ ᐊᑭᓕᕐᑐᐃᒐᓱᒋᐊᒥᒃ ᑕᕐᕋᒥ ᐊᑭᑐᔫᐊᓗᓐᓂᒃ ᐊᕐᑐᓴᕐᓱᑎᒃ ᐊᑭᓕᕐᑐᐃᓂᕋᕐᑎᓗᒋᑦ ᐅᕐᓱᐊᓗᓐᓂᓗ ᒪᙯᒍᑎᑦᑎᓂᒃ ᐃᖏᕐᕋᑎᑦᓯᒍᑎᑦᓴᑐᐊᕗᑦ ᑕᒪᑐᒧᖓ ᑮᓇᐅᔭᕐᑐᒪᕆᓐᓂᒧᑦ ᐃᓚᐅᔪᒻᒪᕆᐅᑦᓱᓂ” ᐅᖃᕐᑐᖅ ᒪᑭᕝᕕᐅᑉ ᐊᖓᔪᕐᖄᖓ ᔫᐱ ᑕᕐᕿᐊᐱᒃ, “ᑲᔪᓯᓗᑕ ᖃᐅᔨᒐᓱᖏᓐᓇᖃᑦᑕᓚᖓᕗᒍᑦ ᖃᓄᐃᓘᕐᓗᑕ ᐃᓄᒃᒍᑎᑦᓭᑦ ᐊᑭᖏᓐᓂᒃ ᑲᑕᑦᑎᓯᒋᐊᕋᔭᕐᒪᖔᑦᑕ. ᑕᒪᓐᓇᓗ ᐱᑦᔪᔨᒍᑎᒋᒋᐊᖃᕐᓱᑎᒍᑦ ᐃᓚᐅᔫᖃᑎᒌᑦᑐᖁᑎᑦᑎᓄᑦ.”
ᐅᕐᓱᐊᓗᐃᑦ ᐊᑭᖏᓐᓂᒃ ᐱᓇᓱᒍᑎᑖᕆᓯᒪᓂᖅ ᐃᓚᒋᔭᐅᔪᖅ ᐱᖓᓲᔪᕐᑐᓄᑦ ᓄᓇᓕᓕᒫᑎᒍᑦ ᐃᓄᒃᒍᑎᑦᓴᓂᒃ ᐊᑭᑐᓗᐊᔨᐊᖃᕐᓂᓄᑦ ᐱᓇᓱᒍᑎᓕᐊᖑᒪᔪᓄᑦ ᐊᑐᓕᕐᑎᑕᐅᓚᐅᕐᓯᒪᑦᓱᑎᒃ 2007-ᒥ. ᐊᓯᖏᑦ ᐱᓇᓱᒍᑎᑦᓴᓕᐊᖑᒪᔪᑦ ᐃᓚᖃᕐᑐᑦ ᓂᕿᓂᓪᓗ ᐊᓯᖏᓐᓂᓗ ᐱᑕᑲᓪᓚᕆᒋᐊᓕᓐᓂᒃ ᐱᓇᓱᒍᑎᑕᕆᒍᑎᐅᒪᔪᓂᒃ, ᖃᖓᑦᑕᐅᑏᑦ ᐊᑭᖏᑕ ᐃᓄᕐᓴᕆᐊᕐᑕᐅᒍᑎᖏᓐᓂᒃ, ᐃᓪᓗᐃᑦ ᐱᐅᒃᑯᑎᖏᓐᓂᓗ ᐊᓐᓂᑐᐊᖃᕋᓱᒍᑎᐅᑦᓱᑎᓪᓗ ᐱᐅᒃᑯᑐᓂᒃ ᐱᓇᓱᒍᑎᖃᕐᓂᓄᑦ, ᓂᕐᑐᐃᓐᓇᓂᓪᓗ ᓄᓇᓕᓐᓂ ᓴᐳᒻᒥᒍᑎᓂᒃ ᐱᓇᓱᒍᑎᖃᕐᓂᓄᑦ ᐃᓄᑐᖃᐅᔪᓪᓗ ᐃᑲᔪᕐᑕᐅᒍᑎᒋᐊᓂᕐᑕᖏᓐᓂᒃ ᐱᓇᓱᒍᑎᓄᑦ. ᑕᒪᒃᑯᐊ ᒪᓕᒐᖁᑎᖏᑕ ᐊᑐᕐᑕᐅᒍᑎᖏᒍᓐᓇᑕᖏᑦ ᖃᖓᑐᐃᓐᓇᖅ ᐋᕐᕿᒋᐊᕐᑕᐅᓂᖃᕈᓐᓇᑐᑦ ᐊᑐᕈᓐᓀᑎᑕᐅᓂᖃᕐᓗᑎᓪᓗᓃᑦ. ᐊᕐᕌᒍᓂ ᐊᓂᒍᐊᔪᓂ, ᐃᓘᓐᓈᑎᒃ ᑕᑉᐱᑯᐊ ᐱᓇᓱᒍᑎᑦᓴᓕᐊᖑᒪᔪᓗᒫᑦ ᓈᒻᒪᒋᔭᐅᑦᓯᐊᑐᒻᒪᕆᐊᓘᕙᑉᐳᑦ ᓄᓇᕕᒻᒥᐅᓄᑦ.
ᑐᑭᓯᒋᐊᒃᑲᓂᕈᑎᖃᕈᒪᔪᑦ ᐃᓕᖓᔪᓂᒃ ᐅᕐᓱᐊᓗᓐᓂᒃ ᐱᓇᓱᒍᑎᓄᑦ ᐃᓚᐅᑎᓪᓗᒋᑦ ᐱᕙᓪᓕᖁᑎᑕᕐᑕᑐᑦ ᐊᑭᑭᓕᒋᐊᕐᑎᓯᒍᑎᑦᓴᒥᓐᓂᒃ ᓯᒃᑭᑖᐱᖏᓐᓄᑦ, ᖃᕆᑕᐅᔭᒃᑯᑦ ᑕᑯᒋᐊᕈᓐᓇᐳᑦ ᐅᕙᓂ http://www.krg.ca/en/cost-of-living-program. ᓓᓇ ᑯᔩ ᒪᑭᕝᕕᑯᓐᓂ ᐱᓇᓱᑦᑐᖅ ᖃᐅᔨᒋᐊᕐᕕᐅᒍᓐᓇᐳᖅ ᐱᑦᔪᑎᓕᓐᓄᑦ ᐱᕙᓪᓕᖁᑎᑕᕐᑕᑐᑦ ᐊᑭᑭᓕᒋᐊᕐᑎᓯᒍᑎᑦᓴᒥᓐᓂᒃ ᓯᒃᑭᑖᐱᖃᕐᑎᑕᐅᒍᑎᖏᓐᓂᒃ (ᐱᒐᓱᒍᓐᓇᐅᑎᓕᓐᓄᑦ, ᐊᓯᐅᔨᔪᕕᓂᕐᓄᑦ ᐅᕝᕙᓗᓐᓃᑦ ᓯᒃᑭᑖᐱᖕᒥᓂᒃ ᑎᓪᓕᒐᐅᔨᐊᓕᕕᓂᕐᓄᑦ ᐅᕙᓂ lagrey@makivik.org ᐅᕝᕙᓘᓐᓃᑦ ᐅᖄᓚᕕᒋᓗᒍ ᐅᕙᓂ 1 800 361 7052.
-30-
ᑐᓴᐅᒪᑎᑦᓯᔩᑦ:
ᔮᓐ-ᕕᓕᑉ ᑑᐳᐊ
ᑐᓴᖃᑦᑕᐅᑎᒍᑎᓕᕆᓂᕐᓄᑦ ᐊᑕᐅᑦᓯᑯᕐᑎᓯᔨ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
ᐅᖄᓚᐅᑎᖓ 819-964-2961, ᓵᖓᓃᑦᑐᖅ 2219
media@krg.ca
www.krg.ca
ᒍᐃᓕᐋᒻ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᓂᕐᓄᑦ ᐊᑕᐅᑦᓯᑯᕐᑎᓯᔨ ᐊᒻᒪᓗ ᑐᓴᕋᑦᓴᓂᐊᕐᑎᓕᕆᔨᐅᑦᓱᓂᓗ
ᒪᑭᕝᕕᒃ
ᐅᖄᓚᐅᑎᖓ 819-964-2925
wtagoona@makivik.org
www.makivik.org
ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐃᓄᓕᒫᓄᓕᖓᑦᓱᓂ ᐱᓇᓱᒐᖃᕐᕕᐅᕗᖅ ᓴᕐᕿᑎᑕᐅᓂᖃᕐᓯᒪᑦᓱᓂ 1978-ᖑᑎᓪᓗᒍ ᑐᖕᖓᕕᒋᑦᓱᒋᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᐅᒪᔪᑦ. ᑖᓐᓇ ᐱᓇᓱᒐᖃᕐᕕᖁᑕᐅᔪᑦ ᐊᖓᔪᕐᖃᐅᕕᖃᕐᐳᖅ ᑯᐯᒃ ᑕᕐᕋᖓᑕ 55 ᖁᓛᓕᒫᒋᔭᖓᓂᒃ ᐃᓕᖓᑎᓪᓗᒋᑦ ᓄᓇᓖᑦ ᑲᕙᒫᐱᖏᑕ ᐊᐅᓚᑕᖏᓐᓄᑦ, ᐊᐅᓚᒍᑎᓅᓕᖓᔪᓄᑦ, ᐊᕙᑎᒨᓕᖓᔪᓄᑦ, ᐳᓖᓯᖃᕐᑎᓯᓂᕐᓄᑦ, ᐱᓇᓱᒐᓴᓕᕆᓂᕐᓄᑦ, ᐱᓇᓱᑦᑎᓂᒃ ᐱᒋᐅᕐᓴᑎᑦᓯᓂᕐᓄᑦ, ᑮᓇᐅᔭᑎᒍᑦ ᐃᑲᔫᑎᓕᕆᓂᕐᓄᑦ, ᕿᑐᕐᖓᐅᔪᑦ ᐯᕆᑕᐅᒋᐊᖃᕐᓂᖏᓐᓄᑦ, ᓄᑕᐅᓯᓕᕈᓐᓇᑐᓂᒃ ᐱᑦᓴᑖᕐᕕᓕᕆᓂᕐᓄᑦ, ᓄᓃᑦ ᐊᑐᕐᑕᐅᓂᑦᓴᖏᑕ ᐊᑐᐃᓐᓇᕈᕐᑎᑕᐅᒍᑎᖏᓐᓄᑦ, ᐃᓄᓕᒫᑦ ᖃᓄᐃᖕᖏᓯᐊᕐᑐᒦᒋᐊᖃᕐᓂᖏᓐᓄᑦ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᐅᒍᓐᓇᑐᓂᒃ ᐱᕙᓪᓕᐊᑎᑦᓯᒍᑎᖃᕐᓂᓄᑦ.
ᒪᑭᕝᕕᒃ ᐱᕙᓪᓕᐊᑎᑦᓯᓂᕐᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᕙᓪᓕᐊᑎᑦᓯᒍᑎᓂᒃ ᐃᑲᔪᕐᓯᒪᓂᕐᒥᒍᑦ ᓴᕐᕿᑎᑕᐅᓕᕐᑐᓂᒃ ᐃᓄᑐᐃᓐᓇᓄᑦ ᐱᓇᓱᒐᖁᑕᐅᓂᐊᕐᑐᓂᒃ ᓄᓇᕕᒥ. ᒪᑭᕝᕕᒃ ᖁᕝᕙᑎᕆᔨᐅᕗᑦ ᐃᓄᐃᑦ ᐃᓗᕐᖁᓯᖓᑕᓗ ᐅᖃᐅᓯᖓᑕᓗ ᐊᓯᐅᕙᓪᓕᐊᑎᑕᐅᑦᑌᓕᒋᐊᖃᕐᓂᖏᓐᓂᒃ ᐃᓚᐅᒻᒥᑎᓪᓗᒋᑦ ᖃᓄᐃᖕᖏᓯᐊᕐᑐᓴᐅᓂᖏᑦ, ᐊᔪᕐᓴᓂᖃᖕᖏᑑᔪᑦᓴᐅᓂᖏᓪᓗ ᐃᓕᓐᓂᐊᑎᑕᐅᑦᓯᐊᕆᐊᖃᕐᓂᖏᓐᓂᓗ ᐃᓄᑐᐃᓐᓀᑦ ᓄᓇᓕᒻᒥᓂ.