ᔭᓄᐊᕆ 19, 2017 – ᑰᒃᔪᐊᖅ, ᓄᓇᕕᒃ – ᒪᑭᕝᕕᒃ ᐊᓪᓚᖁᑎᓕᐅᕈᑎᖃᕐᓯᒪᓕᕐᖁᖅ ᐃᕐᖃᑐᐃᕕᑎᒍᑦ ᕿᒥᕐᕈᒍᑎᕕᓂᐅᔪᓂᒃ ᐱᒐᓱᒍᑎᓕᐅᕐᓱᓂ ᐃᓕᖓᔪᓂᒃ ᓇᓄᐃᑦ ᓇᓐᓄᑕᐅᒍᓐᓇᑐᑦ ᐅᓄᕐᓂᖏᓐᓅᓕᖓᔪᓂᒃ ᑐᑭᑖᕈᑎᕕᓂᖏᓐᓂᒃ ᓄᓇᕗᑦ ᑲᕙᒪᖓᑕᓗ ᐊᒻᒪᓗ ᑲᓇᑕᐅᑉ ᑲᕙᒪᖓᑕ (ᑲᕙᒪᑐᖃᒃᑯᑦ) ᑐᑭᑖᕈᑎᕕᓂᖏᓐᓂᒃ ᐆᒃᑐᐱᕆ 2016-ᒥ ᓱᕐᕃᓂᖃᓚᖓᑦᓱᑎᒃ ᓇᓐᓄᑕᐅᒍᓐᓇᑐᑦ ᖃᑦᓯᐅᓂᖏᓐᓂᒃ, ᐊᒻᒪᓗ ᐅᓄᕐᓂᓕᐅᕐᑕᐅᒪᖏᑐᑦ ᖃᓄᐃᓪᓗᐊᑎᒋᓗᒋᑦ ᐱᔭᐅᒍᓐᓇᐅᑎᖏᓐᓂᒃ “ᓇᓄᐃᑦ ᓄᓇᖃᕐᑐᑦ ᑕᓯᐅᔭᕐᔪᐊᑉ ᓯᕿᓂᐊᓂ” ᓄᓇᕕᐅᑉ ᑕᕆᐅᖁᑎᖓᑕ ᓄᓇᖁᑎᖏᓐᓂ. ᓄᓇᕗᑦ ᐊᕙᑎᓕᕆᓂᕐᓄᑦ ᑐᕐᖃᑕᕐᕕᖓᑦ ᔫ ᓴᕕᒃᑲᑕᖅ ᑐᓂᔨᒍᑎᖃᓚᐅᔪᕗᖅ ᑐᑭᑖᕈᑎᒥᓂᒃ ᐆᒃᑐᐱᕆ 6, 2016-ᒥ. ᑲᕙᒪᑐᖃᒃᑯᑦ ᑐᕐᖃᑕᕐᕕᖓᑦ ᐊᕙᑎᓕᕆᓂᕐᓄᓗ ᓯᓚᐅᓪᓗ ᐊᓯᑦᔨᓂᖓᓄᑦ ᑲᑎᕆᓐ ᒪᒃᑭᐊᓇ ᑐᑭᑖᕈᑎᒥᓂᒃ ᓄᐃᑦᓯᑎᓪᓗᒍ ᐆᒃᑐᐱᕆ 19, 2016-ᒥ.
ᒪᑭᕝᕕᐅᑉ ᐳᕐᑐᓂᕐᓴᖓ ᐊᖓᔪᕐᖄᖓᑕ ᑐᖓᓕᖓ ᐋᑕᒥ ᑎᓪᓖᓪ ᐊᓚᑯ ᐅᖃᓚᐅᕐᑐᖅ ᐃᒫᒃ, “ᑕᒪᕐᒥᒃ ᓄᓇᕗᑦᓗ ᑲᕙᒪᑐᖃᒃᑯᓗ ᑐᕐᖃᑕᕐᕕᒋᒃ ᐱᔭᑦᓴᖁᑎᖃᕐᑐᐃᓇᐅᕘᒃ “ᐱᕕᓕᒫᒥᒍᑦ ᑐᑭᑖᕈᑎᓕᐅᕆᐊᖃᓕᑐᐊᕈᑎᒃ ᐃᓱᒪᖃᕆᐊᖃᕐᓱᑎᒃ” ᐃᓄᑐᐃᓐᓀᑦ ᖃᐅᔨᒪᔭᑐᖃᖏᓐᓂᒃ, ᑕᒪᑐᒥᖓᓗ ᑕᒪᕐᒥᒃ ᐊᑑᑎᔭᖃᓚᐅᖕᖏᓛᒃ. ᑖᒃᑯᐊ ᑐᑭᑖᕈᑎᒋᒃ ᐊᖏᔪᒥᒃ ᖁᓅᒻᒥᕈᑎᒋᓚᐅᕐᑖᑲ. ᓲᓱᒋᔭᖃᓚᐅᕋᑎᓪᓗ ᓄᓇᕕᒻᒥᐅᑦ ᐃᓄᐃᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓐᓂᒃ ᐊᖏᖃᑎᒌᓯᒪᒍᑎᖏᓐᓂᒃ ᑐᑭᑖᕋᓱᓕᕐᓱᑎᒃ ᖃᑦᓯᑦ ᓇᓄᐃᑦ ᓇᓐᓄᑕᐅᒍᓐᓇᓛᕐᒪᖔᑕ, ᐊᒻᒪᓗ ᐅᓄᕐᓂᓕᐅᕐᑕᐅᒪᖏᑐᑦ ᖃᓄᐃᓪᓗᐊᑎᒋᓗᒋᑦ ᐱᔭᐅᒍᓐᓇᐅᑎᖏᓐᓂᒃ.”
“ᓂᑦᔮᒍᑎᖃᕐᐳᒍᑦ ᐱᔪᓐᓇᐅᑎᑕᕆᓯᒪᔭᑦᑎᓂᒃ ᓄᓇᕕᒻᒥᐅᑦ ᐃᓄᐃᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓐᓂᒃ ᐊᖏᖃᑎᒌᓯᒪᒍᑎᖏᓐᓃᑐᓂᒃ ᑭᓯᑦᔪᑎᖃᕐᓱᑎᒃ 5-ᒥᒃ, ᐅᖃᕐᓯᒪᒻᒪᑕ ᓂᕐᔪᑎᓂᒃ ᑲᒪᒋᔭᖃᕐᓂᓄᑦ ᐱᓇᓱᒍᑎᑦᓴᓂᒃ ᓄᓇᕕᐅᑉ ᑕᕆᐅᖁᑎᒥᓂ ᓄᓇᖁᑎᖏᓐᓂ.” ᐅᖃᓚᐅᕐᑐᖅ ᐊᖓᔪᕐᖄᑉ ᑐᖓᓕᖓ ᐊᓚᑯ. “ᐅᑉᐱᕆᔭᖃᓪᓚᕆᑦᓱᑕᓗ ᑐᕐᖃᑕᕐᕖᒃ ᑐᑭᑖᕕᓂᖏᑦ ᒪᓕᑦᓯᒪᖕᖏᒋᐊᖏᒃ ᒪᓕᒐᖃᕐᑎᓯᒍᑎᐅᔪᓂᒃ ᐱᕕᑭᑦᑑᑎᑦᓯᒍᑎᑦᓴᓱᑎᒃ ᓄᓇᕕᒻᒥᐅᑦ ᐃᓄᐃᑦ ᐊᓐᓂᑐᐊᖃᕈᓐᓇᐅᑎᖏᓐᓂᒃ ᐅᖃᕐᑕᐅᒪᔪᓂᒃ ᓄᓇᕕᒻᒥᐅᑦ ᐃᓄᐃᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓐᓂᒃ ᐊᖏᖃᑎᒌᓯᒪᒍᑎᖏᓐᓂ. ᐊᒻᒪᓗᒋᐊᓪᓚᒃ, ᐅᑉᐱᕆᔭᖃᑦᓯᐊᒥᑦᓱᑕ ᑐᕐᖃᑕᕐᕖᒃ ᑐᑭᑖᖏᑦ ᑐᖕᖓᕕᖃᕐᓯᒪᒋᐊᖏᑦ ᐊᒥᓱᐃᓂᒃ ᐃᒣᕐᖁᒫᕐᓯᒪᒍᑎᑐᐃᓐᓇᓂᒃ ᐊᑑᑎᖃᖕᖏᑐᓂᓪᓗ ᐃᓱᒪᑦᓴᓯᐅᕈᑎᖃᕐᓯᒪᓂᖏᓐᓂᒃ, ᐃᓱᒪᑦᓴᓯᐅᕈᑎᖃᕐᓯᒪᑦᓯᐊᖏᒋᐊᖏᓪᓗ ᐱᓇᓱᒍᑎᑦᓴᓕᐊᖑᒪᔪᓂᒃ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᖕᖓᔨᖏᓐᓄᑦ.”
ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᖕᖓᔨᖏᑦ ᑖᒃᑯᐊᖑᑦᓱᑎᒃ ᓇᓗᓀᕐᑕᐅᒪᒻᒪᑕ ᑲᒪᔨᒋᔭᐅᓪᓚᕆᓚᖓᑎᓪᓗᒋᑦ ᓂᕐᔪᑏᑦ ᑲᒪᒋᔭᐅᒋᐊᖃᕐᓂᖏᓐᓄᑦ ᓄᓇᕕᐅᑉ ᑕᕆᐅᖁᑎᒥᓂ ᓄᓇᖁᑎᖏᓐᓃᑐᓂᒃ, ᑭᓯᐊᓂ ᑐᑭᑖᕈᑎᒋᖃᑦᑕᓂᐊᕐᑕᖏᑦ ᐊᖏᕐᑕᐅᖄᖏᓐᓇᕆᐊᖃᕐᓂᐊᓱᑎᒃ ᑲᕙᒪᐅᔪᑦ ᑐᕐᖃᑕᕐᕕᖏᓐᓄᑦ. 2012-ᖑᑎᓪᓗᒍ ᑲᕙᒪᑐᖃᒃᑯᑦ ᐊᕙᑎᓕᕆᓂᕐᓄᑦ ᑐᕐᖃᑕᕐᕕᖓᑦ ᐊᑕᓐᓂᐅᕕᖃᓚᐅᔪᕗᖅ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᖕᖓᔨᖏᓐᓂᑦ ᓄᐃᑦᓯᖁᑦᓱᒋᑦ ᑲᒪᒋᔭᖃᕐᑎᐅᓂᕐᓄᑦ ᒪᓕᒐᖁᑎᑦᓴᓂᒃ ᐃᓕᖓᓗᑎᒃ ᓇᓄᕐᓄᑦ ᓄᓇᕕᐅᑉ ᑕᕆᐅᖁᑎᒥᓂ ᓄᓇᖁᑎᖏᓐᓃᑐᓄᑦ, ᐃᓚᐅᑎᓪᓗᒋᑦ ᐃᓂᓪᓓᓯᒪᒍᑎᑦᓭᑦ ᓇᓐᓄᑕᐅᒍᓐᓇᑐᑦ ᐅᓄᕐᓂᖓᓐᓂᒃ. ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᖕᖓᔨᖏᑦ ᐃᓄᓕᒫᓂᒃ ᑐᑭᓯᓂᐊᕐᕕᖃᓕᓚᐅᔪᔪᑦ ᓄᐊᑦᓯᓯᑦᓱᑎᓪᓗ ᐃᓄᑐᐃᓐᓀᑦ ᖃᐅᔨᒪᔭᑐᖃᖏᓐᓂᒃ ᐃᓕᖓᔪᓂᒃ ᓇᓄᕐᓄᑦ ᑕᒪᓐᓇᓗ ᐱᓇᓱᐊᓚᐅᔪᕙᖓᑦ ᑐᑭᑖᕈᑎᒥᓂᒃ ᑐᓂᔨᓚᐅᖕᖏᓂᕐᒥᓂ ᑐᕐᖃᑕᕐᕕᒧᑦ ᔪᓓ 2015-ᒥ. ᑐᑭᓯᑎᑕᐅᒪᓕᑐᐊᕋᒥᒃ ᑐᓂᔨᒍᑎᕕᓂᖏᑦ ᐊᖏᕐᑕᐅᓂᖕᖏᒋᐊᖏᑦ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑲᑎᖕᖓᔨᖏᑦ ᐃᓱᒪᑦᓴᓯᐅᕈᑎᖃᕆᐊᓪᓚᓯᓚᐅᔪᕗᑦ ᑐᑭᓯᒪᒍᑎᓕᒫᓂᒃ ᐊᑐᓕᕐᓱᑎᒃ ᑭᖑᓂᐊᒍᓪᓗ ᑐᑭᑖᕈᑎᒥ ᑭᖑᓪᓕᐹᖏᓐᓂᒃ ᑐᓂᔨᑦᓱᑎᒃ ᑏᓯᒻᐱᕆ 2015-ᒥ. ᐆᒃᑐᐱᕆ 2016-ᖑᓕᕐᑎᓗᒍ ᑕᒪᕐᒥᒃ ᑐᕐᖃᑕᕐᕖᒃ ᐊᓯᑦᔨᑎᕆᓂᖃᓕᓚᐅᔪᕘᒃ ᓄᓇᕕᒻᒥ ᑕᕆᐅᕐᒥᐅᑕᓕᕆᔨᒃᑯᑦ ᑐᑭᑖᕈᑎᕕᓂᖏᓐᓂᒃ.
ᒪᑭᕝᕕᒃ ᑐᕐᖃᑕᕐᕖᓄᑦ ᐊᓯᑦᔨᑎᕆᒍᑎᐅᔪᕕᓂᕐᓂᒃ ᓈᒻᒪᒋᔭᖃᖕᖏᓚᖅ, ᓯᖁᑦᑎᕆᓂᖃᕐᓯᒪᒻᒪᑕ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᔪᓐᓇᐅᑎᑕᕆᓯᒪᔭᖏᓐᓂᒃ, ᓯᖁᒥᑦᓯᒥᑦᓱᑎᓪᓗ ᓄᓇᕕᒻᒥᐅᑦ ᐃᓄᐃᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓐᓂᒃ ᐊᖏᖃᑎᒌᓯᒪᒍᑎᖏᓐᓃᑐᓂᒃ. ᐳᕐᑐᓂᕐᓴᐅᓱᓂ-ᐊᖓᔪᕐᖄᑉ ᑐᖓᓕᖓ ᐋᑕᒥ ᑎᓪᓖᓪ ᐊᓚᑯ ᐅᖃᕐᑐᖅ ᐃᒫᒃ “ᓇᓄᐃᑦ ᐃᓄᖁᑎᒃᑲᓄᑦ ᐃᓗᕐᖁᓯᑦᑎᒍᑦ ᐱᒻᒪᕆᐊᓘᕗᑦ ᐊᕐᕋᒍᓂᓪᓗ ᐊᒥᓱᒐᓵᓗᓐᓂ ᐊᓐᓂᑐᐊᖃᓲᑐᖃᐅᕗᒍᑦ ᑕᒫᓂ ᓄᓇᖁᑎᑦᑎᓂ. ᐱᔪᓐᓇᐅᑎᑦᑎᓂᒃ ᐊᕐᓴᑕᐅᑦᑌᓕᓂᒃᑯᓗ ᐱᒐᓱᒍᑎᖃᕈᒪᓂᑦᑎᒍᓪᓗ, ᒪᑭᕝᕕᒃ ᐃᓱᒪᖃᕐᐳᖅ ᐃᕐᖃᑐᐃᕕᑎᒍᑦ ᑭᓯᐊᓂ ᑲᒪᒋᐊᓚᖓᓕᕐᓗᓂ ᓱᕐᖁᐃᑐᒥᒃ ᓄᓇᕕᒻᒥᐅᑦ ᐃᓄᑐᐃᓐᓀᑦ ᐱᑎᑕᐅᒍᓐᓇᖁᓪᓗᒋᑦ ᓈᒻᒪᕕᐅᓂᕐᒥᒃ ᓇᓪᓕᖁᐊᕆᔭᐅᔪᓂᓪᓗ ᑲᒪᒋᔭᐅᖃᑕᐅᓂᑦᓴᑎᓐᓄᑦ ᐱᔪᓐᓇᐅᑎᑦᑎᒍᑦ ᐱᓯᒪᑦᓱᑎᒋᑦ ᓄᓇᕕᒻᒥᐅᑦ ᐃᓄᐃᑦ ᓄᓇᓂᒃ ᐃᓐᓄᐃᓯᒪᓇᓱᒍᑎᒥᓐᓂᒃ ᐊᖏᖃᑎᒌᓯᒪᒍᑎᖏᑎᒍᑦ”.
-30-
ᑐᑭᓯᒋᐊᒃᑲᓂᕐᕕᓴᖅ:
ᒍᐃᓕᐋᒻ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᓂᕐᓄᑦ ᐊᑕᐅᑦᓯᑯᕐᑎᓯᔨ ᑐᓴᕋᑦᓴᓂᐊᕐᑐᓕᕆᔨᐅᑦᓱᓂᓗ
ᒪᑭᕝᕕᒥ
ᐅᖄᓚᐅᑎᖓ: 819-964-2925
wtagoona@makivik.org
www.makivik.org
ᒪᑭᕝᕕᒃ ᐱᕙᓪᓕᐊᑎᑦᓯᓂᕐᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᕙᓪᓕᐊᑎᑦᓯᒍᑎᓂᒃ.