ᒪᑭᕝᕕᒃ ᑐᓴᕐᑎᓯᒍᑎᓂᒃ ᖃᒻᒥᓂᑕᐅᓂᕐᐹᓂᒃ ᓄᐃᑦᓯᕗᑦ ᑐᒃᑐᐃᑦ ᓇᒧᖕᖓᑕᕐᓂᖏᑦ ᐱᓪᓗᒋᑦ
ᑰᑦᔪᐊᒥᑦ, ᓇᑦᔪᐃᔭᕐᕕᒃ 13, 2026 – ᒪᑭᕝᕕᒃ ᐊᑐᐃᓐᓇᖑᕐᑎᓯᓯᒪᕗᖅ ᑐᓴᕐᑎᓯᒍᑎᓕᐊᒍᓯᒪᔪᓂᒃ ᓄᓇᕕᒻᒥᐅᑦ ᐃᓄᐃᑦ ᖃᐅᔨᒪᔭᖏᑦ ᑐᒃᑐᐃᑦ ᓇᒧᖕᖓᑕᕐᓂᖏᑦ ᐱᓪᓗᒋᑦ, ᐊᓪᓗᕆᐊᕐᓂᓯᐊᒍᓚᖓᒻᒪᑦ ᐃᓄᐃᑦ ᖃᐅᔨᒪᔭᒥᑎᒍᑦ ᑐᓴᐅᒪᑎᑦᓯᓯᐊᖁᒧᑦ ᑐᒃᑐᓕᕆᓂᕐᒥᒃ ᑲᒪᒋᔭᖃᕐᐸᓕᐊᒍᒪᓂᕐᒥᓂᒃ, ᖃᐅᔨᓴᖃᑦᑕᕈᒪᒧᑦ ᑐᑭᑖᕋᓱᐊᕈᑎᖃᖃᑦᑕᕈᒪᒧᓪᓗ ᓄᓇᕕᒻᒥ.
ᐊᐱᕐᓱᑕᐅᖃᑦᑕᑎᓪᓗᒋᑦ ᐊᒥᓲᓈᕐᑎᑐᑦ ᓄᓇᕕᒻᒥ ᓄᓇᓕᓐᓃᑐᑦ, ᑐᓴᕐᑎᓯᒍᑎ ᐅᑲᐅᓯᕐᑕᖃᕐᐳᖅ ᐃᓄᐃᑦ ᖃᐅᔨᒪᔭᖏᓐᓂᒃ ᑕᑯᖃᑦᑕᓯᒪᔭᖏᓐᓂᓗ ᑐᒃᑐᐃᑦ ᓇᒧᖕᖓᑕᕐᓂᖏᑦ ᐱᓪᓗᒋᑦ, ᓇᔪᓲᖏᓐᓂᓗ, ᓯᓚᑦᑕᓗ ᐊᓯᑦᔨᑕᕐᓂᖓᓂᒃ, ᐊᓐᓂᑐᕋᓱᐊᕐᓂᐊᓲᓂᓪᓗ ᓱᕐᕋᑕᐅᓯᒪᒍᑎᒋᓲᖏᓐᓂᓗ ᐊᕙᑎᑦᑎᓄᑦ ᑐᒃᑐᐃᑦ ᐃᓄᓐᓄᓗ.
ᓄᓇᕕᒻᒥᐅᓄᑦ ᐃᓄᓐᓄᑦ, ᑐᒃᑐᐃᑦ ᐅᒪᔪᒍᓗᑐᐃᓐᓇᐅᖏᓪᓚᑦ. ᐱᓪᓚᕆᐊᓘᒻᒥᓱᑎᒃ ᓂᕿᑦᓴᖃᑦᓯᐊᕆᐊᖃᕐᓂᒧᑦ, ᐃᓕᕐᖁᓯᕐᒧᑦ, ᐅᖃᐅᓯᕐᒧᑦ, ᐃᓕᑕᕐᓇᐅᑎᑦᑎᓄᑦ ᐃᓄᓐᓄᓗ ᓄᓇᒧᑦ ᐱᑐᑦᓯᒪᒍᑎᐅᑦᓱᑎᒃ.
ᐋᑕᒥ ᑎᓖᓪ-ᐊᓚᑯ, ᐊᖓᔪᕐᖄᑉ ᑐᖓᓕᖓ ᑲᒪᒋᔭᑦᓴᖃᕐᓱᓂ ᐆᒪᔪᓕᕆᓂᕐᒧᑦ, ᐊᕙᑎᓕᕆᓂᕐᒧᑦ ᖃᐅᔨᓴᕐᓂᒧᓪᓗ ᐊᓪᓚᕕᒻᒥᒃ ᒪᑭᕝᕕᒥ, ᐅᖃᐅᓯᖃᕐᓂᖁᖅ ᑐᓴᕐᑎᓯᒍᑎᐅᑉ ᐱᓪᓚᕆᐅᒋᐊᖓᓂᒃ:
“ᓄᓇᕗᑦ ᐊᓯᑦᔨᕙᓪᓕᐊᒪᑦ, ᑐᒃᑐᐃᑕᐅᖅ ᐊᓯᑦᔨᕙᓪᓕᐊᒥᔪᑦ. ᐃᓄᐃᑦ ᐃᓱᒫᓗᒍᑎᖃᓲᒍᓕᕐᑐᑦ ᐊᕐᕌᒍᕐᓂ ᐊᒥᓱᓂ, ᐃᑭᓕᕙᓪᓕᐊᓂᕃᑦᓱᑎᒃ ᑐᒃᑐᓂᒃ ᓂᐸᖃᕈᑎᖃᕐᓱᑎᓪᓗ ᑐᑭᑖᕈᑕᐅᔪᑦ ᐱᓯᒪᖁᑦᓱᒋᑦ ᐃᓄᐃᑦ ᖃᐅᔨᒪᔭᖏᓐᓂᑦ ᐊᑑᑎᓯᒪᔭᖏᓐᓂᓗ. ᑖᒃᓇ ᑐᓴᕐᑎᓯᒍᑎ ᑐᑭᒧᐊᒍᑎᑦᓴᐅᖁᔭᕗᑦ ᐱᓇᓱᐊᕐᑕᐅᔪᑦᓴᓂᒃ ᑭᖑᕚᑦᓴᕗᑦ ᖃᐅᔨᒪᓛᕐᒪᑕ, ᐊᖑᓇᓱᑉᐸᓂᐊᕐᒪᑕ ᐅᐱᒋᔭᖃᕐᓗᑎᓪᓗ ᑐᒃᑐᓂᒃ ᓄᓇᕕᒻᒥᐅᑦ ᐃᓄᐃᑦ ᑌᒪᖕᖓᓂᑐᖃᖅ ᑌᒣᓲᒍᓯᒪᒻᒪᑕ.”
ᐋᑕᒥ ᓇᑯᕐᒦᓂᕐᒥᔪᖅ ᐃᓄᒻᒪᕆᓐᓂᒃ, ᐊᖑᓇᓱᑦᑎᓂᒃ ᓄᓇᓕᓐᓃᑐᓂᓪᓗ ᐱᕕᑦᓴᖃᑦᓯᐊᓂᕐᒪᑕ ᖃᐅᔨᒪᔭᒥᓂᓪᓗ ᑐᓴᕐᑕᐅᑎᑦᓯᓱᑎᒃ ᖃᐅᔨᓴᕐᓂᖃᕐᑎᓗᒍ.
ᑖᓐᓇ ᑐᓴᕐᑎᓯᒍᑎ ᑐᑭᓯᑎᑦᓯᒍᑕᐅᖃᑕᐅᕗᖅ ᐅᖄᖃᑎᒌᒍᑎᖃᕐᐸᑐᓂᒃ ᑐᒃᑐᐃᑦ ᐱᐅᓕᐊᑦᓯᐊᑕᐅᒋᐊᖃᕐᓂᖏᓐᓂᒃ, ᑲᒪᒋᔨᖃᕆᐊᖃᕐᓂᖏᓐᓂᒃ ᐃᑉᐱᒋᔨᖃᕆᐊᖃᕐᓂᖏᓐᓂᓗ ᓄᓇᕕᒻᒥ ᖁᑉᐹᒍᑦᑕᐅᖅ ᓲᖑᓯᑎᑦᓯᒋᐊᕐᓂᐅᓱᓂ ᐃᓄᐃᑦ ᓯᕗᓕᕐᓂᖏᓐᓂᒃ ᐆᒪᔪᐃᑦ ᐊᐅᓚᑕᐅᒍᓯᖏᓐᓂᒃ ᓴᐳᑦᔨᓂᕐᒥᓗ ᐃᒻᒥᓂᒃ-ᐊᐅᓚᑦᓯᒍᓐᓇᓯᕙᓪᓕᐊᒍᒪᓂᕐᒥᒃ.
ᐊᖑᕕᒐᒃᑯᑦ ᒪᑭᕝᕕᓗ ᐱᓇᓱᖃᑎᒌᒍᑎᖃᕐᐳᑦ ᓄᓇᕕᒻᒥ ᑐᒃᑐᓂᒃ ᓴᐳᒻᒥᒍᑎᑦᓴᓂᒃ ᐸᕐᓀᕈᑎᒥᒃ, ᓄᓇᕕᒻᒥᐅᓄᑦ-ᓯᕗᓕᕐᑕᐅᓗᓂ ᐊᐅᓚᑦᓯᒍᓯᓕᐊᒍᕙᓪᓕᐊᔪᒥᒃ ᐃᓂᓪᓚᑎᕆᒍᑎᑦᓴᓕᐊᒍᓚᖓᔪᒥᒃ ᑐᖕᖓᕕᒋᓗᒋᑦ ᐃᓄᐃᑦ
ᐱᓪᓚᕆᖁᑎᖏᑦ, ᓯᕗᓪᓕᐅᔭᐅᖁᔭᖏᑦ ᖃᐅᔨᒪᔭᖏᓪᓗ ᖁᑉᐹᒍᑦᑕᐅᖅ ᓴᐳᑦᔨᒍᑎᐅᓂᐊᕐᓗᓂ ᐊᑯᓃᑦᑐᒧᑦ ᑐᒃᑐᙯᓐᓇᕈᒪᓂᕐᒥᒃ ᑭᖑᕚᑦᓴᕗᑦ ᐃᓱᒪᒋᓗᒋᑦ.
ᓄᓇᕕᒻᒥᐅᑦ ᐃᓄᐃᑦ ᖃᐅᔨᒪᔭᖏᑦ ᑐᒃᑐᐃᑦ ᓇᒧᖕᖓᑕᕐᓂᖏᑦ ᐱᓪᓗᒋᑦ, ᑐᓴᕐᑎᓯᒍᑎ ᑕᑯᒋᐊᕋᑦᓴᐅᕗᖅ ᖃᕆᑕᐅᔭᒃᑯᑦ:
–30 –
ᐅᖄᕕᐅᒍᓐᓇᑐᖅ:
Katharine Morrill
ᑐᓴᐅᒪᖃᑎᒌᑦᑎᓯᓂᕐᓂᒃ ᑐᑭᒧᐊᑦᑎᓯᔨ, ᒪᑭᕝᕕᑯᓐᓂ
ᖃᕆᑕᐅᔭᑎᒍᑦ ᑐᕌᒍᑎᖓ ᐊᓪᓚᕕᐅᒍᒪᑐᐊᕈᓂ: kmorrill@makivvik.ca ᖃᕆᑕᐅᔭᑎᒍᑦ ᑕᑯᒐᓱᐊᕐᑕᐅᒍᓐᓇᒥᔪᑦ ᐅᕘᓇ: www.makivvik.ca
ᒪᑭᕝᕕᒃ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕐᓯᒪᓂᖓᓄᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᐅᑎᖃᕐᓱᓂ ᑮᓇᐅᔭᕐᑖᕆᔭᐅᓯᒪᔪᓂᒃ ᑲᒪᔨᐅᑦᓱᓂ ᐃᓄᐃᑦ ᓄᓇᕕᒻᒥᐅᑦ ᑮᓇᐅᔭᕐᑖᕕᓂᖏᓐᓂᒃ ᐊᖏᖃᑎᒌᓐᓂᐅᓯᒪᔪᖅ ᔦᒥᔅ ᐯᒥ ᑯᐯᒃᓗ ᑕᕐᕋᐊᓂ ᑮᓇᐅᔭᕐᑖᕈᑕᐅᓚᐅᕐᓯᒪᒻᒪᑦ. ᒪᑭᕝᕕᒃᑯᑦ ᑮᓇᐅᔦᑦ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕋᓱᐊᕈᑎᓂᓪᓗ ᑲᒪᒋᔭᖃᓲᑦ ᐊᒻᒪᓗ ᐱᕈᕐᓭᒐᓱᐊᕐᓱᑎᒃ ᐃᓄᓐᓄᑦ ᐊᐅᓚᑕᐅᓗᑎᒃ ᑮᓇᐅᔭᓕᐅᕋᓱᐊᕈᑎᖏᓐᓂᒃ, ᐊᔪᕐᓴᑐᓂᓪᓗ ᐃᑲᔪᕐᓯᒪᐅᑎᖃᕋᓱᐊᓱᒍᑦᓱᑎᒃ , ᐊᒻᒪᓗ ᐃᓕᓐᓂᐊᑎᑦᓯᒐᓱᐊᕐᐸᓱᑎᒃ ᐃᓄᓐᓂᒃ