ᓯᑦᑎᒻᐱᕆ 8, 2016 – ᑰᑦᔪᐊᖅ, ᑯᐯᒃ – ᓄᓇᕕᒻᒥᐅᑦ ᐃᓄᐃᑦ ᓯᕗᓕᕐᑎᖏᑦ ᓄᐃᓂᖃᓕᓚᐅᕐᒥᔪᑦ ᓂᕆᐅᓐᓂᖃᑦᓯᐊᓕᕐᓱᑎᑦ ᐃᓪᓗᐃᓂᐊᕐᓂᐅᑉ ᐋᕐᕿᒋᐊᕈᑎᑦᓴᖏᓐᓂᒃ ᑲᑎᒪᑦᓯᔪᕕᓂᐅᑦᓱᑎᑦ ᑯᐯᒃᑯᑦ ᒥᓂᔅᑕᖏᓐᓂᒃ ᒫᑎᓐ ᑯᐊᑑ, ᔨᐊᕗᕆ ᑭᐊᓕ ᐊᒻᒪᓗ ᐅᖓᕙᒥ ᑭᒡᒐᑐᕐᑎᒋᔭᐅᔪᖅ ᑲᑎᒪᕕᕐᔪᐊᒧᑦ ᔮᓐ ᐴᓭ. ᐅᖃᓕᒪᐅᑎᔪᕕᓃᑦ ᓯᑦᑎᒻᐱᕆ 1, 2016 ᑲᑎᕕᒃ ᓄᓇᓕᓕᒫᑦ ᑲᕙᒪᖓᑕ (KRG) ᑲᑎᒪᕕᖓᓂᒃ ᐃᓄᐃᑦ ᓯᕗᓕᕐᑎᖏᓐᓂᒃ ᑭᒡᒐᑐᕐᑐᓂᒃ ᑎᒥᐅᔪᓂᒃ ᐱᓇᓱᐊᕐᑕᖃᕐᑐᓂᒃ ᐃᓪᓗᓕᕆᓂᕐᒥᒃ ᓄᓇᕕᒻᒥᐅᑦ ᐃᓄᖏᓐᓄᑦ – ᔫᐱ ᑕᕐᕿᐊᐱᒃ, ᐊᖓᔪᕐᖄᖅ ᒪᑭᕝᕕᑯᓐᓄᑦ, ᔨᐊᓂᕗ ᒪᓂᒃ, ᑐᑭᒧᐊᑦᑎᓯᔨ ᑲᑎᕕᒃ ᓄᓇᓕᓕᒫᑦ ᑲᕙᒪᖓ (KRG); ᓘᓯ ᖁᒫᓗᒃ, KRG-ᑯᑦ ᑐᑭᒧᐊᑦᑎᓯᔨᐅᑉ ᑐᖓᓕᖓ; ᐊᒻᒪᓗ ᑖᓂᐊ ᐅᕝᕙᐅᑦ, ᐊᖓᔪᕐᖄᖅ ᐃᓪᓗᓕᕆᔨᒃᑯᓄᑦ (KMHB). ᐱᓇᓱᑦᑎᐅᔪᑦ ᐃᓄᐃᑦ ᑎᒥᐅᔪᖁᑎᖏᓐᓄᑦ ᐊᒻᒪᓗ ᑯᐯᒃᑯᑦ ᑭᒡᒐᑐᕐᑎᖏᑦ ᐁᓯᒪᖃᑕᐅᓚᐅᕐᑐᑦ.
ᒫᑎᓐ ᑯᐊᑑ ᑯᐯᒃᑯᑦ ᒥᓂᔅᑕᕆᔭᖓ ᓄᓇᓕᐅᔪᓂᒃ ᐊᒻᒪᓗ ᓄᓇᐅᑉ ᓇᔪᕐᑕᐅᓂᖓᓂᒃ, ᐃᓄᐃᑦ ᐊᑦᑕᓀᑦᑐᒦᑎᑕᐅᓂᖏᓐᓄᑦ, ᒥᓂᔅᑕᕆᔭᐅᔪᖅ ᒫᓐᑐᔨᐊ ᓄᓇᖓᓂᒃ ᐊᒻᒪᓗ ᐃᓪᓗᓕᕆᔨᕐᔪᐊᑯᓄᑦ Société d’Habitation du Québec (SHQ). ᔨᐊᕗᕆ ᑭᐊᓕ ᒥᓂᔅᑕᕆᔭᐅᔪᖅ ᓄᓇᖃᕐᖄᓯᒪᔪᓕᕆᓂᕐᒧᑦ.
ᐃᓄᐃᑦ ᓯᕗᓕᕐᑎᖏᑦ ᑲᑎᒪᓂᕐᒥᒃ ᓇᓗᓀᕐᓯᓯᒪᓚᐅᕐᑐᑦ ᐱᑦᔪᑕᐅᓗᐊᖕᖑᐊᑐᓂᒃ ᖃᓄᐃᓕᖓᓂᖓᓄᑦ ᒫᓐᓇᐅᔪᖅ ᐃᓪᓗᐃᓂᐊᕐᓂᖅ ᓄᓇᕕᒻᒥ, ᑌᓗᐊᖕᖑᐊᓱᒍ ᐅᓄᕐᓯᒋᐊᕐᑕᐅᓯᒪᓂᖏᑦ ᐃᓪᓗᐃᑦ ᐊᑦᑕᑐᕈᑎᖏᑦᑕ ᐊᑭᖏᑦ ᐱᕕᑦᓭᕈᑦᑎᓯᓚᕿᓯᒪᔪᖅ ᐊᒥᓱᓂᒃ ᐃᓄᓐᓂᒃ ᒪᑭᑕᒐᓱᐊᕐᓂᑯᑦ. ᐃᓪᓗᓕᕆᔨᕐᔪᐊᑯᑦ ᐅᓄᕐᓯᒋᐊᕆᓯᒪᒻᒪᑕ ᐊᑦᑕᑐᕈᑏᑦ ᐊᑭᖏᓐᓂᒃ 8%-ᒧᑦ ᐊᕐᕌᒍᑕᒫᑦ 2010-ᒥᓂᑦ. ᐊᑦᑕᑐᕐᓃᑦ ᒪᕐᕈᕕᓪᓗᐊᑐᒥᒃ ᐅᓄᕐᓯᒋᐊᕐᓯᒪᔪᑦ 2005-ᒥᓂᑦ. ᐱᑕᖃᑦᓯᐊᖏᓐᓂᑯᖓᓄᑦ ᐊᐅᓚᑦᓯᐊᕈᓐᓇᑐᒥᒃ ᐊᓂᕐᕋᒥᒃ ᓇᒻᒥᓂᖃᕐᓂᐅᑉ ᐱᓇᓱᐊᕐᑕᐅᓂᖓᓂᒃ ᐱᕕᑦᓴᖃᕐᑎᓯᖕᖏᓚᕿᔪᖅ ᐃᓄᓐᓂᒃ ᐊᑭᓕᕐᑐᐃᓯᐊᕐᑐᒥᒃ ᐱᓇᓱᒐᓖᑦ ᓂᐅᕕᕋᓱᐊᕐᖃᔭᖕᖏᓚᕿᔪᑦ ᓇᒻᒥᑦᓴᒥᓂᒃ ᐃᓪᓗᒥᒃ ᐊᒥᓱᓂᒃ ᓄᕐᖃᖓᒍᑎᑦᓴᖃᒧᑦ ᓴᓇᒋᐊᓕᓐᓄᑦ, ᑮᓇᐅᔭᓕᕆᓂᒃᑯᑦ ᐊᒻᒪᓗ ᐊᐅᓚᑦᓯᒋᐊᖃᕐᓂᑯᑦ ᓇᒻᒥᓂᖅ ᐃᓪᓗᖃᕐᕈᓂ ᓄᓇᕕᒻᒥᒃ. ᑭᖑᓪᓕᐸᐅᑎᓪᓗᒍ, ᑮᓇᐅᔭᖅ ᐱᑦᔪᑕᐅᒻᒥᔪᖅ ᒫᓐᓇ ᓴᓇᔭᐅᔪᓄᑦ 60-ᓄᑦ ᐃᓪᓗᓴᓄᑦ ᐊᑐᐃᓐᓇᐅᒋᐊᓖᑦ ᐃᑎᕐᑕᐅᓂᑦᓴᒥᓄᑦ ᕿᑎᖕᖑᓕᕐᐸᑦ 2016-ᒥᑦ ᐃᓚᐅᑎᓪᓗᒋᑦ 10 ᐃᓄᑐᙯᑦ ᐊᓂᕐᕋᖏᑦ, ᐊᒻᒪᓗ ᐊᒥᓱᒋᐊᓪᓓ 140-150 ᐃᓪᓗᓭᑦ ᐱᔭᕇᕐᓯᒪᒋᐊᓖᑦ ᕿᑎᖕᖑᖓᓄᑦ 2017 ᐱᕕᑦᓴᖃᓚᕿᔪᑦ ᐃᓪᓗᓕᐅᕐᓂᓴᔪᓕᖓᔪᓄᑦ $50-million-ᓄᑦ ᑐᓴᕐᑎᓯᒍᑎᐅᓚᐅᔪᔪᑦ ᑲᕙᒪᑐᖃᕐᑯᓄᑦ ᐁᕆᓕᐅᑎᓪᓗᒍ ᑲᕙᒪᑐᖃᕐᑯᑦ ᑮᓇᐅᔭᖏᑦᑕ ᑐᕌᒐᖏᓐᓂᒃ ᑐᓴᕐᑎᓯᓂᖃᕐᑎᓗᒍ.
“ᑐᓴᕆᐊᖓ ᐊᓕᐊᒋᓚᐅᕐᑕᕋ ᒥᓂᔅᑕ ᑯᐊᑑ ᐊᑐᕐᑎᓗᒍ ᐅᖃᐅᓯᕐᒥᒃ ‘ᐱᒋᐊᑦᓯᐊᓂᖅ’ ᓇᓗᓀᕐᓯᑎᓪᓗᒍ ᖃᓄᐃᓘᕋᓱᐊᕐᓂᒥᓂᒃ ᐋᕐᖀᒐᓱᐊᕐᓂᒥᓂᒃ ᒫᓐᓇᐅᔪᖅ ᐱᓀᓗᑕᐅᔪᒥᒃ,” ᐅᖃᕐᑐᖅ ᔫᐱ ᑕᕐᕿᐊᐱᒃ. “ᐊᖏᖃᑎᖃᖕᖏᓂᕐᒦᑎᓪᓗᑕ ᐃᓪᓗᓕᕆᔨᕐᔪᐊᑯᓐᓂᒃ ᐃᓚᖓᒍᑦ. ᒥᓂᔅᑕ ᑯᐊᑑ ᓄᐃᑦᓯᓚᐅᕐᑐᖅ ᑐᑭᓯᒪᓂᕐᒥᓂᒃ ᖃᓄᐃᓕᖓᖃᑎᖃᕐᓂᑎᓐᓂᒃ ᑎᒥᐅᔪᒥᒃ, ᐊᒻᒪᓗ ᓄᐃᑦᓯᓱᓂ ᐋᖀᒍᑎᑦᓴᒥᒃ, ᑭᖑᕙᒋᐊᕆᑐᐃᓐᓇᖏᑦᓱᓂ.”
“ᑲᑎᓯᓚᐅᕐᓱᑕ ᑯᐊᑑᒥᑦ ᐊᒻᒪᓗ ᑭᐊᓕᒥᑦ, ᐱᔭᖃᕐᓂᐊᑐᕆᑦᓯᐊᖁᒍᑦ ᐋᕐᖀᓂᕐᒥᒃ ᐃᓪᓗᓕᕆᓂᐅᑉ ᐊᖏᖃᑎᒌᓐᓂᖓᑕ ᐊᐴᒪᒍᑕᐅᓂᖓᓂᒃ ᑯᐯᒃᑯᑦ ᑲᕙᒪᖓᓄᑦ ᐊᒻᒪᓗ ᓂᕆᐅᒋᔭᖃᕐᓱᑕ ᐅᖃᓕᒪᖃᑎᖃᓛᒋᐊᑦᑎᓂᒃ ᐊᖏᖃᑎᒌᒐᓱᐊᕐᑎᓂᒃ ᑎᒃᑯᐊᑕᐅᕐᖃᒥᐊᐅᔪᓂᒃ. ᑭᓯᐊᓂᓕ, ᐱᔭᑦᓴᓕᐹᓘᖏᓐᓇᑐᖅ ᐊᒻᒪᓗ ᐅᑉᐱᕈᓱᓐᓂᒥᒃ ᐱᕈᐃᒋᐊᓪᓛᒋᐊᖃᕐᓱᑕ ᐃᓚᐅᔪᖁᑎᑦᑎᓂᒃ. ᐃᓅᒐᓱᐊᕐᓂᐅᑉ ᖃᑦᓯᕌᕐᓂᖓᑕ ᖃᐅᔨᓴᕐᑕᐅᓂᖓ ᑐᓂᔭᐅᓂᖃᓛᕐᑐᖅ ᑕᒡᒐᓂ ᐅᑭᐊᑦᓴᒥ ᐊᒻᒪᓗ ᓱᕐᖁᐃᑐᒥᒃ ᓇᓗᖕᖏᓚᖓ ᓄᕐᖃᕆᐊᒍᑎᖏᑦ ᓄᐃᑦᓯᓯᐊᓛᕆᐊᖏᓐᓂᒃ ᓄᓇᕕᒻᒥᐅᑦ ᐊᕐᓱᕉᑎᒋᔭᖏᓐᓂᒃ ᐊᒻᒪᓗ ᓱᕐᖁᐃᓯᓚᖓᑦᓱᓂ ᐃᓱᒫᓘᑎᑦᓯᓂᒃ ᐃᓪᓗᐃᓂᐊᕐᓂᒥᒃ. ᐊᖏᖃᑎᒌᒍᑎᒋᓚᐅᕐᒥᔭᕗᑦ ᐊᑦᑕᑐᐊᑦ ᐊᑭᖏᑦ ᓯᕗᓪᓕᐸᐅᑦᔭᐅᒋᐊᖃᕐᓂᖏᑦ ᑲᒪᒋᔭᖃᕆᐊᓕᓕᒫᓄᑦ ᐊᒻᒪᓗ ᑲᑦᓱᙰᓐᓂᖃᕐᓱᑕ ᐅᐃᒪᓇᕐᑐᒥᒃ ᐋᕐᕿᒋᐊᕈᑎᑦᓴᖃᕆᐊᖃᕐᓂᖓᓂᒃ”, ᐅᖃᕐᑐᕕᓂᖅ KRG-ᑯᑦ ᑐᑭᒧᐊᕐᑎᓯᔨᖓ ᔨᐊᓂᕗ ᒪᓂᒃ.
“ᐃᓄᐃᑦ ᓇᒻᒥᓂᑦ ᐃᓪᓗᓴᕐᒥᓂᒃ ᓂᐅᕕᕈᒪᔪᑦ,” ᐅᖃᕐᑐᖅ KMHB-ᑯᑦ ᐃᓪᓗᓕᕆᔨᒃᑯᑦ ᐊᖓᔪᕐᖄᖓ ᑖᓂᐊ ᐅᕝᕙᐅᑦ.“ ᑭᓯᐊᓂ ᑮᓇᐅᑦᔭᓵᕆᔭᐅᔪᑦ ᓱᓇᐅᒐᓛᖕᖏᑐᑦ ᒫᓐᓇ, ᐊᑦᑕᑐᕈᑏᑦ ᐊᑭᖏᑦ ᓂᕆᔪᐹᓘᒻᒪᑕ ᐃᓄᐃᑦ ᐊᑭᓕᕐᑐᑕᐅᒍᑎᖏᓐᓂᒃ, ᐊᒻᒪᓗ ᑕᒪᓐᓇ ᐱᕕᑦᓴᖃᕐᑎᓯᕐᖃᔭᕋᓂ ᐃᓄᓐᓂᒃ ᓴᓂᕐᕙᐃᒐᓱᐊᕐᓂᒥᒃ ᑮᓇᐅᔭᓂᒃ ᓂᐅᕕᕈᑎᑦᓴᒥᒃ ᐃᓪᓗᒥᒃ. ᐱᓀᓗᑕᒻᒪᕆᖃᕐᑐᖅ ᐋᕐᕿᑕᐅᑦᓴᐅᑎᒋᒋᐊᓕᓐᓂᒃ ᐅᐃᒪᓇᕐᑐᒥᒃ.”
ᐅᖄᓚᐅᑎᒃᑯᑦ ᐅᖃᓕᒪᖃᑎᒌᕐᖃᒥᐅᑎᓪᓗᒋᒃ ᒪᑭᕝᕕᑯᑦ ᐊᖓᔪᕐᖄᖓ ᔫᐱ ᑕᕐᕿᐊᐱᒃ ᐊᒻᒪᓗ ᐱᓕᑉ ᑰᓕᐋᑦ, ᑯᐯᒃᑯᑦ ᐊᖓᔪᕐᖄᖓ, ᑯᐯᒃᑯᑦ ᐊᖓᔪᕐᖄᖓ ᑌᓯᓛᕐᓂᐊᓂᕋᕐᑐᕕᓂᖅ ᐊᖏᖃᑎᒌᑦᑎᓴᒥᒃ ᐃᒻᒥᒍᕐᑐᒥᒃ ᐃᓪᓗᓕᕆᔨᕐᔪᐊᑯᓐᓄᑦ.
“ᑯᐯᒃᑯᑦ ᐊᖓᔪᕐᖄᖓ ᑰᓕᐋᑦ ᓄᐃᓂᐊᕐᓂᕋᑕᖓ ᐊᖏᖃᑎᒌᒐᓱᐊᕐᑎ ᐊᑎᖓ ᑌᔭᐅᒐᔭᕐᑐᖅ ᑕᒪᑦᓱᒥᖓ ᐋᕐᖀᒐᓱᐊᕐᓂᒥᒃ ᓄᓇᕕᒻᒥᐅᓄᑦ ᐃᓄᓐᓄᑦ. ᑐᕐᖃᑕᕐᕕᑰᒃ ᑯᐊᑑ ᑭᐊᓕᓗ ᐊᑎᖓᓂᒃ ᓄᐃᑕᐅᒋᐊᕕᓐᓂᕃᓯᒪᔫᒃ, ᐊᒻᒪᓗ ᑖᓐᓇ ᐱᓇᓱᒍᑎᖃᑦᓯᐊᖑᓱᑦᓱᓂ ᑐᑭᑖᕆᒍᓐᓇᓂᕐᒥᒃ ᒫᓐᓇᐅᔪᖅ ᐃᓪᓗᐃᑦ ᐊᑭᒋᔭᖏᓐᓂᒃ, ᐊᒻᒪᓗ ᐅᐃᒪᓇᕐᑐᒥᒃ ᐱᕙᓪᓕᐊᑎᑦᓯᓂᕐᒥᒃ ᓄᑖᒥᒃ ᐃᓄᐃᑦ ᓇᒻᒥᓂᖅ ᐃᓪᓗᑖᕐᓂᒧᑦ ᐱᓇᓱᐊᕐᑕᐅᓂᖓᓂᒃ. ᓇᑯᕆᓗᐊᖕᖑᐊᓚᐅᕐᑕᕋ ᑐᕃᓐᓇᕕᖃᕈᓐᓇᖃᑦᑕᓚᖓᓕᕋᑦᑕ ᓄᑖᒥᒃ ᐊᖏᖃᑎᒌᒐᓱᐊᕐᑎᒥᒃ ᐊᒻᒪᓗᒋᐊᓚᖅ ᒥᓂᔅᑕ ᑯᐊᑑ ᑐᑭᓯᒪᓂᖃᑦᓯᐊᓕᕐᓱᓂ ᐅᕙᑦᑎᓂᒃ ᐱᑦᔪᑎᒋᑦᓱᒋᑦ ᓵᖕᖓᖃᑦᑕᓯᒪᓕᕐᑕᕗᑦ, ᐊᒻᒪᓗ ᓵᖓᑦᓯᒍᑎᒋᕙᑦᑕᕗᑦ ᐃᓪᓗᓕᕆᔨᕐᔪᐊᑯᓄᑦ,” ᐅᖃᕐᑐᕕᓂᖅ ᔫᐱ ᑕᕐᕿᐊᐱᒃ.
ᐃᓱᒪᒋᑦᓱᒍ ᐅᐃᒪᓇᕐᓂᖓᑕ ᐱᓇᓱᐊᕐᑕᐅᔫᑉ, ᓯᕗᓪᓕᐹᒥᒃ ᑲᑎᓐᓂᓴᖏᑦ ᐊᖏᖃᑎᒌᒐᓱᐊᕐᑎᐅᑉ ᐊᒻᒪᓗ ᐃᓄᐃᑦ ᑭᒡᒐᑐᕐᑎᖏᑦ ᐃᓪᓗᓕᕆᓂᐅᑉ ᒥᑦᓵᒍᑦ, ᐃᓚᐅᑎᓪᓗᒋᑦ ᐱᓇᓱᑦᑎᖏᑦ ᒪᑭᕝᕕᑯᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᒻᒪᓗ ᐃᓪᓗᓕᕆᔨᒃᑯᑦ ᑲᑎᒪᓛᕐᓂᐊᑐᑦ ᓯᑦᑎᒻᐱᕆᐅᑉ ᓄᖕᖑᖓᓂᒃ ᓄᓇᕕᒻᒥᑦ.
-30-
ᖃᐅᔨᒋᐊᕕᒃ:
ᒍᐃᓕᐊᒻ ᑕᑰᓐᓈ
ᑐᓴᐅᒪᖃᑎᒌᑦᑎᓯᔨ ᐊᒻᒪᓗ ᑐᓴᕋᑦᓴᓂᐊᕐᓂᓕᕆᔨ
(819) 964-2925
wtagoona@makivik.org
ᔮᓐ-ᐱᓕᑉ ᑑᐳᐊ
ᑐᓴᐅᒪᖃᑎᒌᑦᑎᓯᓂᕐᒥᒃ ᑐᑭᒧᐊᕐᑎᓯᔨ
ᐊᐅᓚᑦᓯᓂᓕᕆᓂᐅᑉ ᐱᒍᑦᔨᕕᖓ
ᑲᑎᕕᒃ ᓄᓇᓕᓕᒫᑦ ᑲᕙᒪᖓ
(819) 964-2961 ext. 2219
jpdubois@krg.ca
ᒫᕆ-ᑯᕆᔅᑏᓐ ᕚᓂᐁ
ᑐᓴᐅᒪᖃᑎᒌᑦᑎᓯᔨ
ᐃᓪᓗᓕᕆᔨᒃᑯᑦ
(819) 964-2000 ext. 276
mcvanier@omhkativikmhb.qc.ca