ᑰᔾᔪᐊᒥ-ᐅᑦᑑᐱᕆ 27, 2017 – ᓄᓇᕕᐅᑉ ᓯᕗᓕᕐᓯᔨᖏᑦ ᑐᖕᖓᓱᑦᑎᓯᓚᐅᕐᐳᑦ ᑯᐯᒃᑯᑦ ᐊᖓᔪᕐᖄᖓᓂᒃ ᐱᓕᑉ ᑯᐃᔮᕐᒥᒃ ᐃᓄᐃᑦ ᓄᓇᖓᓄᑦ ᓄᓇᕕᒻᒧᑦ ᐃᑉᐸᓴᐅᓚᐅᕐᑐᒥ. ᑖᓐᓇ ᓯᕗᓪᓕᐹᒥ ᑯᐯᒃᑯᑦ ᐊᖓᔪᕐᖄᖓᓂᒃ ᐳᓛᕆᐊᕐᑐᖃᓚᐅᕐᑐᖅ ᓂᕈᐊᕐᑕᐅᓕᓚᐅᕐᓯᒪᒐᒥᓂᑦ. ᑖᓐᓇ ᑯᐯᒃᑯᑦ ᐊᖓᔪᕐᖄᖓᑦ ᒪᓕᑦᑕᐅᓚᐅᕐᑐᖅ ᑐᕐᖃᑕᕐᕕᖓᓄᑦ ᑲᒪᒋᔭᖃᕐᑐᒧᑦ ᓄᓇᖃᕐᖄᓯᒪᔪᓕᕆᓂᕐᒥᒃ ᔨᐊᕗᕆ ᑭᐊᓕᒧᑦ, ᑐᕐᖃᑕᕐᕕᖓᓄᑦ ᐆᒪᔪᓕᕆᓂᕐᒧᓗ ᒥᕐᖑᐃᓯᕐᕕᓕᕆᓂᕐᒧᓗ, ᓗᒃ ᑉᓛᓐᓯᐊᒧᑦ ᐊᒻᒪᓗ ᔭᓐ ᐳᓰᐃᒧᑦ, ᑯᐯᒃᑯᑦ ᐅᖃᕐᕕᒪᕆᖓᓄᑦ ᐃᓚᐅᔪᒥᒃ ᐅᖓᕙᒧᑦ.
ᑖᓐᓇ ᓯᕗᓕᕐᑎᖓ ᑯᐃᔮᑦ ᑐᕐᖃᑕᕐᕕᖏᓪᓗ ᑲᑎᓯᓚᐅᔪᕗᑦ ᐸᕐᓇᓯᒪᐅᑎᓕᕆᔨᓂᒃ, ᑖᒃᑯᐊ ᐃᓄᓐᓄᑦ ᑲᑎᒪᕕᐅᒻᒪᕆᓲᖑᒻᒪᑦ ᓯᕗᓕᕐᓯᔭᐅᑦᓱᓂ ᒪᑭᕝᕕᑯᓄᑦ.
ᒪᑭᕝᕕᐅᑉ ᐊᖓᔪᕐᖄᒪᕆᖓᑦ ᔫᐱ ᑕᕐᕿᐊᐱᒃ ᐅᖃᓚᐅᔪᑦᕗᖅ ᐃᒫᒃ, “ᐊᔪᒉᑦᑑᔭᖏᑦᑑᒐᓗᐊᖅ ᐃᓄᐃᑦ ᓯᕗᓕᕐᓯᔨᖏᑦ ᑲᑎᒪᓯᓲᖑᓕᕆᐊᖏᑦ ᑯᐯᒃᑯᑦ ᓯᕗᓕᕐᑎᖓᓂᒃ ᐅᓪᓗᒥᐅᓕᕐᑎᓗᒍ, ᑭᓯᐊᓂ ᖃᓪᓗᓈᓂ ᑭᓯᐊᓂᕙᓪᓘᓲᖑᒻᒪᑕ ᑯᐯᒃ ᓯᑎᒥ. ᓯᕗᓕᕐᑎᒥᒃ ᐊᖏᕐᕋᖃᕐᕕᕗᓐᓅᔨᐊᖃᕐᓯᒪᒋᐊᒥᒃ, ᑲᑎᓯᒋᐊᕐᑐᓱᓂ ᓯᕗᓕᕐᓯᔨᑦᑎᓂᒃ ᐱᑐᐃᓐᓇᐅᑎᓂᐅᔭᖕᖏᑕᕗᑦ. ᓇᑯᕐᓴᐳᖓᓕ ᐊᐅᓚᒍᓐᓇᓯᓚᐅᕐᒪᑦ ᓄᓇᑦᑎᓄᑦ ᑐᓵᒋᐊᕐᑐᓱᓂ ᐃᓄᖁᑎᑦᑕ ᐱᑦᔪᑎᖏᓐᓂᒃ ᐱᒻᒪᕆᐅᓂᖃᕐᑐᓂᒃ.
ᐃᓅᓯᓕᕆᓂᕐᒨᓕᖓᔪᓂᒃ ᒪᑯᓂᖓ ᐃᓕᓐᓂᐊᓂᓕᕆᓂᕐᓂᒃ, ᐃᓗᕐᕈᓯᓕᕆᓂᕐᓂᒃ ᐅᖃᐅᓯᓕᕆᓂᕐᓂᓗ, ᐊᓐᓂᐊᓂᓕᕆᓂᕐᓂᓗ, ᐅᕕᒃᑲᓕᕆᓂᕐᓂᓗ, ᐃᓪᓗᓕᕆᓂᕐᓂᓗ ᐊᒻᒪᓗ ᐃᓅᒐᓱᐊᕈᑏᑦ ᐊᑭᑐᔫᓂᖏᓐᓄᑦ ᐱᒻᒪᕆᐅᓂᕐᐸᐅᑎᑕᐅᒻᒪᑕ ᓄᓇᕕᐅᑉ ᐃᓄᖁᑎᖏᓐᓄᑦ.
ᓯᕗᓕᕐᑎᖓᑦ ᑯᐃᔮᑦ ᑐᕐᖃᑕᕐᕕᖏᓪᓗ ᑖᒃᑯᑐᐊᖑᑦᓱᑎᒃ ᑲᑎᒪᑦᓯᒍᓐᓇᓯᓚᐅᕐᒥᔪᑦ ᒪᑭᕝᕕᒥᐅᓂᒃ.
ᓄᓇᕕᓕᐊᖑᓯᒪᓂᕐᒥᓂ ᑖᓐᓇ ᑯᐯᒃᑯᑦ ᓯᕗᓕᕐᑎᖓᑦ ᐅᒃᑯᐃᓯᒋᐊᕐᑐᓚᖓᒻᒥᔪᖅ ᐊᖏᓂᕐᐹᒥᒃ ᒥᕐᖑᐃᓯᕐᕕᐅᓚᖓᓕᕐᑐᒥᒃ ᓄᓇᕕᒻᒥ – ᑐᕐᓱᔫᒥᒃ – ᐅᒥᐅᔭᐅᑉ ᓄᓇᓕᖓᑕ ᓴᓂᐊᓃᑦᑐᒥᒃ ᑖᕙᓃᓕᕈᓂ ᑏᑐᕐᑎᑕᐅᓂᐊᕐᓱᓂᓗ ᐸᓂᕐᑎᑕᕐᑐᑎᑕᐅᓂᐊᕐᓱᓂᓗ.
-30-
ᐅᖄᖃᑎᒋᔭᐅᒍᓐᓇᑐᖅ:
ᒍᐃᓕᐊᒻ ᑕᒍᕐᓈᖅ
ᑐᓴᐅᒪᒍᑎᓕᕆᓂᕐᒥᒃ ᑐᑭᒧᐊᑦᑎᓯᔨᖓᑦ ᐊᒻᒪᓗ ᑐᓴᕋᑦᓴᓕᕆᔨᖓᑦ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ: 819-964-2925
ᖃᕆᑕᐅᔭᒃᑯᑦ: wtagoona@makivik.org
www.makivik.org
ᒪᑭᕝᕕᑯᑦ ᓄᓇᑖᕋᓱᐊᕐᑎᐅᓂᕐᒥᒃ ᑎᒥᐅᔫᒍᑎᖃᕐᐳᖅ ᑎᓕᔭᐅᒪᑦᓱᓂ ᑲᒪᒋᐊᖃᕐᓂᒥᒃ ᓄᓇᕕᐅᑉ ᐃᓄᖏᑦᑕ ᑮᓇᐅᔭᖁᑎᖏᓐᓂᒃ ᐱᕕᖃᕐᑎᑕᐅᓯᒪᔪᓄᑦ ᐊᑖᒍᑦ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ. ᒪᑭᕝᕕᑯᑦ ᐊᑐᕐᑕᐅᒍᓯᖃᕐᒪᑕ ᐃᓚᖃᕐᑐᓂᒃ ᐊᐅᓚᑦᓯᒋᐊᖃᕐᓂᒥᒃ ᑮᓇᐅᔦᕈᑎᐅᒋᐊᓕᓐᓂᓗ ᑕᒪᒃᑯᓂᖓ ᐊᑭᓕᕐᑕᐅᒍᑎᐅᓯᒪᔪᓂᒃ ᐊᒻᒪᓗ ᑫᓪᓗᑐᐃᓗᑎᒃ ᒪᑭᑕᒐᓱᐊᕐᓂᒥᒃ ᐱᕈᕐᓭᓂᕐᒥᒃ ᐃᑲᔪᕐᓯᓂᒃᑯᑦ ᓄᐃᑕᐅᔪᖃᕐᑎᓗᒍ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᐃᓂᖃᓲᖑᕗᑦ ᐊᓯᐅᑎᑦᓯᑌᓕᒪᓂᕐᒧᑦ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗ ᖃᓄᐃᖏᓯᐊᕐᓂᓕᕆᓂᒃᑯᑦ, ᑐᖕᖓᕕᖃᑦᓯᐊᓂᒃᑯᓗ, ᐊᑦᓱᔫᑎᑦᓯᑌᓕᒪᓂᕐᒥᓗ, ᐊᒻᒪᓗ ᐃᓄᐃᑦ ᐃᓕᓐᓂᐊᓂᖏᓐᓂᒃ ᓄᓇᓕᓐᓃᑎᓪᓗᒋᑦ.