ᐋᑐᒑ, ᕕᕈᐊᕆ 26, 2019 – ᓇᒻᒥᓂᖃᕐᑐᑦ ᕘᔅ ᐃᐊᒥᓪᓗ ᐊᒻᒪᓗ ᑲᓀᑎᐋᓐ ᓄᐋᔅᒥᒃ ᐅᓪᓗᒥ ᓄᐃᑦᓯᒍᑎᖃᕐᖃᐅᕗᑦ ᑲᒃᑯᓂᖓ ᐊᓪᓚᓯᒪᔪᓂᒃ ᑭᐅᒍᑎᒋᑦᓱᓂᖏᑦ ᐱᓕᐅᑎᖃᑎᒌᓐᓂᓕᕆᓂᕐᒥᒃ ᐊᓪᓚᕕᐅᑉ ᑐᓴᕐᑕᐅᑎᑦᓯᒍᑎᖏᓐᓂᒃ ᐃᓕᖓᑦᓱᑎᒃ ᐊᑕᐅᓯᖕᖑᑎᑦᓯᓂᕐᒧᑦ ᖃᖓᑦᑕᔫᓕᕆᕖᓐᓂᒃ:
“ᑌᒪᓕ ᓇᓗᓀᕆᒐᓗᐊᕐᓱᑕ ᐱᓕᐅᑎᖃᑎᒌᓐᓂᓕᕆᓂᕐᒥᒃ ᐊᓪᓚᕕᐅᑉ ᑎᓕᔭᐅᒪᒍᑎᖏᓐᓂᒃ ᐱᑕᕐᑎᓯᒋᐊᖃᕐᓱᑎᒃ ᑭᒡᒐᑐᕐᓗᑎᒃ ᐊᐅᓚᒍᑎᓕᕆᓂᕐᓄᑦ ᑐᕐᖃᑕᕐᕕᒥᒃ ᐃᓄᓕᒫᓄᓕᖓᔪᓂᒃ ᐅᓇᒻᒥᓱᒍᑎᖏᓐᓅᓕᖓᔪᑎᒍᑦ ᕿᒥᕐᕈᒐᔭᕐᓂᒥᒃ ᐊᑕᐅᓯᖕᖑᕋᓱᐊᕐᓂᖏᓐᓂᒃ ᕘᔅ ᐃᐊᓗ ᑲᓀᑎᐋᓐ ᓄᐋᔅᓗ, ᓇᓂᓯᒍᑎᖃᕐᓂᕋᕈᑎᖏᑦ ᐱᔪᓐᓇᑎᑦᓯᖏᑦᑑᒍᑎᑦᓴᓂᒃ ᑕᒪᑐᒧᖕᖓᓕᖓᔪᓂᒃ ᑌᒃᑯᐊ ᓇᓂᓂᕋᕐᑕᖏᑦ ᐱᓪᓚᕆᐊᓘᓂᖃᓪᓗᐊᖏᓪᓚᑦ, ᐅᖃᕈᒪᕗᒍᓪᓗ ᑐᑭᓯᒪᔭᖃᑦᓯᐊᖏᒋᐊᖏᑦ ᐃᓄᐃᑦ ᐱᓇᓱᒐᖃᕐᕕᖁᑎᖏᑕ ᒪᓂᔭᖏᓐᓂᒃ ᐋᕐᕿᒍᑎᑦᓴᐅᒐᔭᕐᑎᓗᒋᑦ ᑲᔪᓯᓂᖃᑦᓯᐊᕈᓐᓇᑐᓄᑦ ᑕᕐᕋᒥ ᐊᐅᓚᒍᑎᖃᕐᑎᓯᓂᑎᒎᕐᓱᑎᒃ.
ᐃᓄᑐᐃᓐᓀᑦ ᓄᓇᓕᖏᑦ ᐊᔪᒉᓪᓕᐅᑐᑦ ᐊᖏᔪᒥᓪᓗ ᖁᓅᒻᒥᓱᑎᒃ ᑐᓴᕐᑎᓯᒍᑎᓕᐊᓄᑦ ᐱᔭᐅᔪᓂᒃ ᐃᓗᖏᕐᑐᓱᑕᓗ ᓂᕆᐅᓐᓂᖃᕐᐳᒍᑦ ᑐᕐᖃᑕᕐᕕᒃ ᑲᔪᓯᑎᑦᓯᒍᑎᖃᓛᕐᑎᓗᒍ ᑎᓕᔭᐅᓯᒪᒍᑎᒥᓂᒃ ᓭᒻᒪᖃᑎᒌᓐᓂᓴᓅᓕᖓᔪᓂᒃ ᐊᒻᒪᓗ ᓇᓗᓀᕆᓗᓂ ᑖᒃᑯᐊ ᐱᓇᓱᒐᖃᕐᕕᖁᑕᐅᔪᑦ ᒪᓂᔨᓯᒪᑦᓱᑎᒃ ᐊᑕᐅᓯᖕᖑᖃᑎᒌᒍᒪᒍᑎᒥᓐᓂᒃ ᐱᖁᔭᕐᔪᐊᑎᒍᑦ ᑎᓕᔭᐅᒪᒍᑎᖃᕐᒪᓃᒃ ᑭᒡᒐᑐᕐᓂᐊᓗᑎᒃ ᐱᔪᓐᓇᐅᑎᖃᕈᑎᖏᑎᒍᓪᓗ ᐅᓇᒻᒥᓱᒍᑎᒋᕙᓐᓂᐊᑕᖏᑎᒍᓪᓗ ᓄᓇᕕᒻᒥᐅᓗ ᐃᓄᕕᐊᓗᐃᓪᓗ ᓄᓇᖁᑎᖓᓂ ᓄᓇᓯᒪᕕᖃᕐᑐᑦ ᐱᒐᓱᒍᑎᒋᒍᒪᓕᕐᑕᖏᓐᓂᒃ.
“ᐊᓪᓚᕕᖁᑕᐅᔪᖅ ᐃᐱᕃᓐᓀᓯᒪᒻᒪᑦ ᐱᐅᓯᕆᓲᒥᓂᒃ ᐃᓱᒪᑦᓴᓯᐅᕈᑎᖃᕐᓂᑯᑦ ᑌᒫᒃ ᐊᑕᐅᓯᖕᖑᑎᑦᓯᓂᐅᑉ ᐊᑐᕐᓂᖃᑦᓯᐊᕋᔭᕐᓂᖓᓂᒃ. ᐃᓱᒪᑦᓴᓯᐅᕈᑎᖃᕋᑎᒃ ᖃᓄᑎᒋᐊᓗᒃ ᑮᓇᐅᔭᑎᒍᑦ ᑮᓇᐅᔭᑐᐃᓐᓇᐅᖏᑦᑐᑯᓗ ᐱᕙᓪᓕᖁᑕᐅᓂᐊᕐᒪᖔᑦ ᑕᕐᕋᒥᐅᓄᑦ, ᐊᓪᓚᕕᖁᑕᐅᔫᑉ ᑐᑭᓯᓂᐊᕐᓂᕕᓂᖓ ᐃᓕᑕᕐᓯᖏᓗᐊᕐᑐᖅ ᐊᑕᐅᓯᖕᖑᓂᖅ ᐊᑑᑎᒋᐊᖃᓕᕐᑎᓗᒍ ᑲᔪᓯᑦᓯᐊᖁᓗᒍ ᖃᖓᑦᑕᔫᒃᑯᑦ ᐊᐅᓚᓂᐅᕙᑦᑐᖅ ᑕᕐᕋᒧᑦ ᐊᒻᒪᓗ ᐃᑯᓪᓚᐅᒥᑎᑦᓯᒐᔭᕐᓱᓂ ᑮᓇᐅᔭᑎᒍᑦ ᐅᖁᒣᓪᓕᐅᕈᑎᖏᓐᓂ ᐃᓄᑐᐃᓐᓀᑦ ᓄᓇᓂᒃ ᐃᓐᓄᐃᓇᓱᓐᓂᒧᑦ ᐱᓇᓱᕝᕕᖓᓂ (LCO) ᓇᒻᒥᓂᖃᕐᑑᔪᑦ. ᑕᒪᓐᓇ ᐱᓇᓱᐊᕐᓂᖅ ᑕᑯᑦᓴᐅᑎᑦᓯᕗᖅ ᖃᓪᓗᓈᑦ ᓄᓇᖓᓐᓂ ᐱᓇᓱᒐᖃᕐᕖᑦ ᑲᔪᓯᔪᒥᒃ ᖄᖏᓐᓈᑕᖃᕆᐊᖏᑦ ᑕᕐᕋᒥᐅᑦ ᐱᓇᓱᒐᖁᑎᖏᓐᓂᒃ ᑕᒪᑐᒨᓇᓗ ᐊᖏᖃᑎᖃᖕᖏᓚᒍᑦ ᐊᓪᓚᕕᖁᑕᐅᔫᑉ ᑐᑭᑖᕈᑎᒋᓯᒪᔭᖓᓐᓂᒃ ᖄᖏᓐᓈᑕᖃᓚᖓᑦᓱᑎᒃ ᑕᐸᓇᖕᖏᑐᒥᒃ ᐊᒻᒪᓗ ᐊᖏᔪᒻᒪᕆᐊᓗᒻᒥᒃ ᐱᐅᓂᕐᓴᒧᑦ ᓱᕐᕃᓂᖃᕐᓂᕆᒐᔭᓚᐅᕐᑕᖓᓂᒃ ᑕᒪᑐᒥᖓ ᑮᓇᐅᔭᑎᒍᑦ ᐊᐅᓚᑕᖃᕐᓂᐅᑉ ᑕᕐᕋᒥᐅᓂᒃ.
“ᐊᓪᓚᕕᖁᑕᐅᔫᑉ ᓲᕐᓗ ᖂᑭᑦᑐᐊᐱᒻᒥᒃ ᑕᐅᑐᑦᑕᖃᕐᓂᖓ ᑲᖐᒋᔭᖃᖕᖏᓗᐊᕆᕗᖅ ᑮᓇᐅᔭᑎᒍᑦ ᒪᑭᑕᒐᓱᐊᕐᓂᑯᑦ ᖃᓄᐃᓕᖓᓂᐅᔪᓂᒃ (ᐆᑦᑑᑎᒋᓗᒍ, ᐃᑉᐱᓇᓪᓚᕆᑦᑐᒥᒃ ᐱᔭᖃᖕᖏᓗᐊᓕᕐᑐᑦ ᐱᑦᔪᑎᖃᕐᓱᑎᒃ ᖃᓕᕇᑦᑐᓂᒃ ᐊᕐᖁᑎᖃᕐᓂᒥᓄᑦ, ᐊᐅᓚᒍᒪᔪᓪᓗ ᐱᑕᖃᖕᖏᓗᐊᕐᓂᖏᑦ ᐊᒻᒪᓗ ᐊᑑᑎᖃᑦᓯᐊᕈᓐᓀᑐᓂᒃ ᖃᖓᑕᓐᓇᕕᑦᓴᓕᐅᕐᓯᒪᓃᑦ ᐱᑦᔪᔭᖃᕐᓱᑎᒃ ᒥᑭᔪᖑᐊᕌᐱᓐᓂᒃ ᐅᖓᓯᑦᑕᕇᒻᒪᕆᐅᑦᓱᑎᒃᓗ ᓄᓇᓕᓐᓂᒃ ᐊᖏᔪᕐᔪᐊᒥ ᓄᓇᒥ) ᑖᒃᑯᐊ ᐊᑕᐅᓯᖕᖑᕈᒪᓂᕐᒥᒃ ᐃᓱᒪᑖᕐᓯᒪᒍᑎᐅᔪᑦ — ᑌᒣᓕᓗᑎᒃ ᐱᓂᐊᕐᓂᖃᖕᖏᑐᐊᕈᑎᒃ ᖃᖓᑦᑕᔫᓕᕆᔨᐅᓂᕐᒥᒃ ᐱᓇᓱᑦᑕᒥᓂᒃ ᐊᓯᐅᔨᑐᐃᓐᓇᕆᐊᖃᓕᕐᒪᑕ — ᑕᒪᑐᒥᖓ ᐱᔭᖃᕋᓱᓪᓗᑎᒃ. “ᐊᑕᐅᓯᖕᖑᓂᖅ ᐱᔪᓐᓇᕈᑎᒋᓛᕐᐸᕗᑦ ᐊᐅᓚᑕᖃᕆᐊᕐᓂᒥᒃ ᐃᖏᕐᕋᑎᑕᐅᔪᑎᒍᑦ ᓈᒻᒪᖏᑦᑑᒍᑎᐅᓲᓂᒃ ᑭᖕᖒᒪᓇᕐᓱᑎᒃ ᑲᓱᕐᑎᓯᒍᑎᐅᒐᔭᕐᓂᖏᑦ ᐱᑦᔪᔨᒍᑎᑦᑎᒍᑦ ᐱᑕᖃᖕᖏᓗᐊᕐᑐᓂᒃ ᐊᒻᒪᓗ ᑲᔪᓯᔪᒥᒃ ᑮᓇᐅᔭᕐᑐᓂᑎᒍᑦ ᐊᑑᑎᔭᐅᖃᑦᑕᕋᔭᕐᑐᓂᒃ. ᐊᓪᓚᕕᖁᑕᐅᔫᑉ ᐊᓪᓚᓯᒪᔭᖏᓐᓂᒃ ᑭᐳᓪᓗᐊᓱᑎᒃ, ᖃᖓᑦᑕᔫᖁᑎᕗᑦ ᓵᖕᖓᓯᒋᐊᖃᓲᑐᖃᐅᕗᑦ ᐱᔪᓐᓇᓂᕐᓴᐅᓇᓱᒋᔪᓂᒃ ᓵᖕᖓᓯᖏᓐᓇᕆᐊᖃᓲᖑᑦᓱᑎᓗ ᖃᐅᑕᒫᑦ ᓄᑖᓄᑦ ᓴᕐᕿᕕᐅᑐᐃᓐᓇᕆᐊᖃᕐᓂᓂᒃ. ᓱᖁᓯᔪᐃᑦᑑᓱᑕ ᓯᕗᓂᖃᕐᐳᒍᑦ ᐱᑕᖃᕐᑎᓯᕕᖃᖃᑦᑕᓂᑦᓴᑎᓐᓂᒃ ᖃᖓᑦᑕᔫᑦᑎᒍᑦ ᐊᐅᓚᕙᑦᑐᓄᑦ ᐱᑦᔪᔨᕕᒋᓗᒋᑦ ᐱᐅᓂᕐᐹᓂᒃ, ᑲᔪᓯᓂᖃᑦᓯᐊᒐᐅᒐᕈᓐᓇᑐᓂᓪᓗ ᖃᖓᑦᑕᔫᑎᒍᑦ ᐱᑦᔪᔨᔨᒍᑎᓂᒃ ᐱᓕᐅᑎᖃᑕᐅᓗᑕ ᐊᑭᓕᐊᕆᕙᑦᑕᑎᒍᑦ ᐊᑦᑕᓇᖕᖏᑑᓗᓂ ᖃᖓᑦᑕᔫᓕᕆᔨᐅᓗᓂ ᑖᓐᓇᑐᐊᖑᓗᓂ, ᐊᓯᓄᑦ ᐅᓚᐱᑕᐅᒍᓐᓀᓗᓂ.
“ᒪᑭᕝᕕᓗ ᐃᓄᕕᐊᓗᐃᓪᓗ ᐱᕙᓪᓕᐊᓂᕐᒧᑦ ᑲᑐᑦᔨᖃᑎᒌᓐᓂᖓ ᐱᔭᑦᓴᑖᕐᑎᑕᐅᒪᕘᒃ ᐃᓄᑐᐃᓐᓇᓄᑦ ᐃᓚᐅᔪᖁᑎᒥᓐᓄᑦ, ᐊᑐᕐᐸᑐᓄᓪᓗ ᐊᒻᒪᓗ ᐃᓄᑐᐃᓐᓇᓕᒫᓄᑦ ᑲᓱᕐᑎᓯᖁᔭᐅᑦᓱᑎᒃ ᐊᕕᓯᒪᒍᑎᖏᓐᓂᒃ ᑕᕐᕋᒥᓗ ᓯᕿᓂᕐᒥᓗ ᐃᓅᒐᓱᓐᓂᑯᑦ ᖃᓄᐃᓕᖓᓂᐅᔪᑦ. ᑕᒐᑕᒐᐅᔪᖅ, ᐃᓅᓇᓱᐊᕐᓂᐅᑉ ᐊᑭᑐᔪᒻᒪᕆᐊᓘᓂᖓ – ᐃᓚᖓᑎᒍᑦ ᐱᑦᔪᑎᖃᕐᓱᓂ ᐊᒃᓱᕈᕐᓇᓂᖓᓄᑦ ᐊᑭᑐᔪᐊᓘᓂᖓᓄᓪᓗ ᐃᖏᕐᕋᑎᑦᓯᓂᐅᑉ ᐱᓇᓱᒐᕐᓂᒃ ᑕᕐᕋᒥ – ᑌᒣᒃᑫᓱᖑᒻᒪᑕ ᐊᔪᕐᓴᓂᕐᒥᒃ ᐃᓅᓯᖃᕐᓂᒥᒃ ᐃᓄᖁᑎᑦᑎᓄᑦ. ᐃᓄᑐᐃᓐᓀᑦ ᑐᑭᖃᑦᓯᐊᓂᕋᕐᑕᐅᔪᓂᒃ ᐃᓚᐅᖃᑕᐅᒍᓐᓇᓂᐊᑐᐊᕈᑎᒃ ᑲᓇᑕᓕᒫᒥ ᒪᑭᑕᒐᓱᒍᑎᑦᓴᓕᕆᒍᑎᑎᒍᑦ, ᐃᓚᐅᕐᖄᕆᐊᖃᕐᐳᑦ ᑐᑭᖃᑦᓯᐊᑐᒥᒃ ᐃᓚᐅᓂᖃᕐᓗᑎᒃ ᑕᕐᕋᒥ ᒪᑭᑕᒐᓱᒍᑎᓕᕆᓂᕐᓄᑦ: ᐱᐊᓚᓂᖃᑦᓯᐊᑐᖅ ᐅᑭᐅᕐᑕᑐᓕᒫᒥ ᖃᖓᑦᑕᔫᓕᕆᓂᖅ ᐊᕐᖁᑎᑦᓴᑐᐊᖑᒻᒪᑦ ᐊᕗᖔᓗ ᓯᕗᓂᑦᓴᑎᓐᓂ, ᑲᔪᓯᐅᒐᕈᓐᓇᓗᓂ ᑭᐅᑦᔪᑎᐅᓗᓂ ᐱᑕᖃᕐᑎᓯᓂᐊᕐᓗᓂ ᑕᕝᕓᓇᖅ ᐱᕙᓪᓕᖁᑎᐅᕙᓐᓂᐊᑐᓂᒃ.
“ᐃᓄᑐᐃᓐᓇᓄᑦ ᓯᕗᓕᕐᑕᐅᓱᓂ ᐋᕐᕿᒍᑎᑦᓴᖅ ᓴᕐᕿᓚᐅᔪᕗᖅ ᑫᕙᓪᓚᒍᓯᓂ ᐊᒥᓱᐊᓗᓐᓂ ᐅᖃᖃᑎᒌᓐᓂᓂᒃ ᐱᓂᐊᕐᓂᖃᖃᑦᑕᓚᐅᕐᑎᓗᒋᑦ ᐃᓄᑐᐃᓐᓀᑦ ᐊᒻᒪᓗ ᑕᕐᕋᒥ ᓂᕈᐊᕐᑕᐅᒪᑦᓱᑎᒃ ᓯᕗᓕᕐᑎᐅᔪᑦ. ᐱᔭᕇᕐᓯᒪᑦᓯᐊᖏᑦᑐᓂᒃ ᑐᑭᓯᓂᐊᕐᓂᕕᓂᖅ ᐱᓕᐅᑎᖃᑎᒌᓐᓂᓕᕆᓂᕐᒥᒃ ᐊᓪᓚᕕᐅᑉ ᑐᓴᑎᓯᒍᑎᖓᓂ ᑕᑯᑦᓴᐅᑎᑦᓯᕗᖅ ᑐᑭᓯᒪᑦᓯᐊᖏᓐᓂᒥᒃ ᑕᕐᕋᒥ ᖃᓄᐃᓕᖓᓂᐅᔪᒥᒃ ᑕᒪᓐᓇᓗ ᓈᒻᒪᓈᕐᓯᒪᖕᖏᑐᓂᒃ ᓈᒻᒪᖏᑦᑐᓂᓪᓗ ᓱᕐᕃᓂᖃᕐᓱᓂ ᐃᓄᑐᓐᐃᓇᓂᒃ. ᑖᒃᑯᓄᖓ ᐃᕐᖃᐅᒪᑎᑕᐅᓕᕐᐳᒍᑦ ᑲᕙᒪᑐᖃᒃᑯᑦ ᐃᑲᔪᕐᓯᖃᑦᑕᓯᒪᒋᐊᖏᑦ ᓯᕿᓂᕐᒥᐅᔭᐅᓂᕐᓴᓂ ᐅᓯᒍᑦᔨᔨᓂ, ᑕᕐᕋᒨᓕᖓᔪᑦ ᖃᖓᑦᑕᔫᓕᕆᕖᑦ ᓴᐅᔭᐅᕙᓪᓕᐊᑐᐃᓐᓇᑎᓪᓗᒋᑦ ᐅᓄᕐᓯᒋᐊᕐᑕᐅᑲᑦᑕᑐᓄᑦ ᒪᓕᒐᕐᓄᑦ ᐊᒻᒪᓗ ᐊᑭᓕᕆᐊᓕᓐᓄᑦ. ᑲᓇᑕᐅᑉ ᑲᕙᒪᖓ ᖃᐅᔨᒪᖕᖏᓯᕐᑐᕆᐊᖃᖕᖏᓚᖅ ᐃᓄᑐᐃᓐᓀᑦ ᐃᒻᒥᓂᕿᒍᓐᓇᓂᖓᓐᓂᒃ, ᓂᕈᐊᕐᑕᐅᓯᒪᔪᓂᓪᓗ ᐃᓄᑐᐃᓐᓇᓂᒃ ᓯᕗᓕᕐᑎᓂᒃ ᐊᒻᒪ LCO-ᓂᒃ; ᑌᒣᓕᙰᓐᓇᓂᖅ ᐅᖁᒣᓪᓕᐅᕈᑎᑐᐃᓐᓇᐅᒪᑦ ᖃᒻᒥᑯᓪᓗ ᓯᕗᓂᑦᓴᒥᓗ ᐃᓅᑦᔪᓯᑎᒍᓪᓗ-ᑮᓇᐅᔭᑎᒍᓪᓗ ᒪᑭᑕᒐᓱᓐᓂᑯᑦ ᖃᓄᐃᓕᖓᓂᖏᓐᓄᑦ ᑕᕐᕋᒥᐅᓕᒫᑦ.
“ᑕᒪᕐᒥᒃ ᐱᓇᓱᒐᕐᕕᖁᑕᐅᔫᒃ ᕿᓄᕕᖃᕐᐴᒃ ᐊᐅᓚᒍᑎᓕᕆᓂᕐᓄᑦ ᑐᕐᖃᑕᕐᕕᒃ ᐊᖓᔪᕐᖃᐅᓂᕐᒥᓂᒃ ᐊᑐᕐᑐᓴᐅᒋᐊᖓ ᑐᖕᖓᕕᖃᕐᓗᓂ ᑲᓇᑕᒥ ᐊᐅᓚᒍᑎᓕᕆᓃᑦ ᐱᖁᔭᖓᓐᓂᒃ, ᑖᒃᑯᓂᖓ ᐊᕐᖁᑎᖃᕐᓗᓂ ᓇᐅᑦᓯᑐᖁᑦᓱᒍ ᐊᑕᖏᑦᓯᐊᓗᒍ ᐊᑕᐅᓯᖕᖑᖃᑎᒌᒐᓱᓐᓂᐅᔪᖅ, ᑐᑭᓯᒪᔭᖃᑦᓯᐊᓗᓂᓗ ᐊᑯᓂᕆᔪᒥᒃ ᑭᖕᖒᒪᒋᔭᐅᓂᖃᕆᐊᖓ ᑕᕐᕋᒥᐅᓄᑦ ᐊᒻᒪᓗ ᐃᓱᒪᑦᓴᓯᐅᕈᑎᖃᑦᓯᐊᓗᓂ ᐊᒥᓱᐊᓗᓐᓂᒃ ᐱᐅᓂᕐᓴᒧᑦ ᓱᕐᕋᕈᑎᐅᖃᑦᑕᓛᕐᑐᓂᒃ ᓱᕐᖁᐃᓯᓂᕐᒥᓗ ᓴᖑᒋᐊᕈᓐᓇᓂᖃᕐᓗᓂᓘᕐᑐᒥ ᐱᑦᔪᔨᒍᑎᓂᒃ, ᐱᑐᑦᓯᒪᐅᑎᓂᕐᓂᒃ, ᐊᑦᑕᓇᖕᖏᑐᓂᒃ, ᐊᕙᑎᒥᒃ ᐊᒻᒪᓗ ᐃᓄᑐᐃᓐᓇᑎᒍᑦ ᐃᒻᒥᓂᕿᒍᓐᓇᓯᒍᒪᓂᖏᓐᓂᒃ ᐃᓄᖁᑎᑦᑕ. ᑐᕐᖃᑕᕐᕕᒃ ᐊᑕᓐᓂᐅᕕᒋᒻᒥᔭᕗᑦ ᐃᓱᒪᖃᓯᐅᑦᔨᖁᑦᓱᒍ ᓄᑖᖅ ᖃᖓᑦᑕᔫᓕᕆᔨ ᐱᔭᑦᓴᖁᑎᖃᓛᕐᒥᒋᐊᖓ ᐃᖏᕐᕋᑎᑦᓯᔨᐅᓂᒃᑯᑦ ᑮᓇᐅᔭᓕᐅᕋᓱᒍᑎᓂᒃ ᐅᑭᐅᕐᑕᑑᑉ ᓄᓇᖁᑎᓕᒫᖏᓐᓂ ᓲᕐᓗ ᒪᑭᑕᓕᕈᓂ ᑕᕐᕋᒥ ᐊᖏᓂᕐᐸᖑᓗᓂ ᑲᕙᒪᓄᑦ-ᓇᒻᒥᓂᕆᔭᐅᓂᖃᕋᓂ ᐱᓇᓱᒐᖃᕐᑎᓯᔨᐅᓗᓂ. ᑐᑭᖃᑦᓯᐊᓗᑎᒃ ᑐᑭᓯᓂᐊᕐᓂᒥᒃ ᑕᒪᑐᒥᖓ ᐊᑕᐅᓯᕈᕋᓱᓐᓂᒥᒃ ᑐᑭᓯᓴᕐᑐᑦ ᐃᓱᒪᖃᖃᓯᐅᑎᑦᔨᒋᐊᖃᕐᐳᑦ ᐊᖏᔪᑲᓪᓚᓂᒃ ᐱᕙᓪᓕᖁᑎᑕᖃᕐᓂᖓᓂᒃ.
“ᑲᔪᓯᓚᖓᕗᒍᑦ ᐱᓇᓱᖃᑎᖃᕐᓂᒥᒃ ᑲᓇᑕᐅᑉ ᐊᐅᓚᒍᑎᓕᕆᔨᖏᓐᓂᒃ ᐱᔭᕇᕈᑎᖃᓕᕐᐸᑕ ᐊᑕᖏᕐᑐᒥᒃ ᕿᒥᕐᕈᔭᖃᕐᓂᒥᒃ ᑐᑭᓯᓂᐊᕐᓂᒥᓪᓗ ᐃᓄᓕᒫᑦ ᐅᓇᒻᒥᓱᒍᑎᖏᓐᓂᒃ ᖁᕝᕙᑎᕆᓗᑎᒃ ᑖᑦᓱᒥᖓ ᐊᑕᐅᓯᖕᖑᓂᕐᒥᒃ ᐊᒻᒪᓗ ᐃᓱᒪᑦᓴᓯᐅᕈᑎᖃᑦᓯᐊᓗᑕ ᐱᓪᓚᕆᐅᑦᓱᑎᒃ ᑮᓇᐅᔭᑎᒍᑦ ᒪᑭᑕᒐᓱᒍᑎᑎᒍᓪᓗ, ᐃᓅᑦᔪᓯᑎᒍᓪᓗ ᖃᓄᐃᓕᖕᙰᒍᓐᓇᓂᖏᓐᓂᒃ ᐱᓕᐅᑎᖃᑎᒌᓐᓂᓕᕆᓂᕐᒥᒃ ᐊᓪᓚᕕᐅᑉ ᐃᓱᒪᒋᓚᐅᔪᖕᖏᑕᖏᓐᓂᒃ. ᐳᕿᐊᓱᖕᖏᓚᒍᑦ ᐊᑕᐅᓯᖕᖑᓂᖓ ᕘᔅ ᐃᐊᒃᑯᓗ ᑲᓀᑎᐋᓐ ᓄᐋᔅᑯᓪᓗ ᓴᕐᕿᓂᖃᓚᖓᒋᐊᖏᒃ ᑭᖕᖒᒪᓇᓪᓚᕆᓪᓗᑎᒃ ᐃᓄᓕᒫᑦ ᐊᑯᕐᖓᓂ ᐅᓇᒻᒥᓱᒍᑎᐅᔪᓂᓗ.
“ᕿᒥᕐᕈᒌᑦᓯᐊᓯᒪᓕᑐᐊᕐᐸᑕ ᑲᓇᑕᐅᑉ ᐊᐅᓚᒍᑎᓕᕆᔨᖏᑦ ᐱᑎᑕᐅᑦᔪᑎᖃᕐᓯᒪᓕᕈᑦᑕᓗ ᐃᓘᓐᓇᖏᓐᓂᒃ ᒪᓕᒐᖃᕐᑎᓯᒍᑎᑎᒍᑦ ᐊᖏᕐᑕᐅᒪᒍᑎᐅᒋᐊᓕᓐᓂᒃ, ᓯᕗᓂᖃᕐᐳᒍᑦ ᐊᑕᐅᓯᖕᖑᖃᑎᒌᓐᓂᓴᒥᒃ ᑲᔪᓯᑎᑦᓯᓂᖃᓛᕐᓗᑕ. ᑌᒪᓕ ᑌᓐᓇ ᐅᓪᓗᖅ ᓇᓪᓕᐅᑎᖕᖏᓂᖓᓂ, ᑲᔪᓯᓗᑕ ᑕᕐᕋᒥᐅᓂᒃ ᓄᓇᓕᓐᓂᒃ ᐱᑕᖃᕐᑎᓯᕕᖃᓚᖓᕗᒍᑦ ᐱᔪᓐᓇᕕᖃᕐᑎᓗᒋᑦ ᓇᖏᐊᕐᓇᖏᑦᑐᓂᒃ ᓱᖏᕐᑐᑎᑦᓯᐊᓂᓪᓗ ᖃᖓᑦᑕᔫᒃᑯᑦ ᐊᐅᓚᓂᕐᒥᒃ ᐱᑦᔪᔨᒍᑎᖃᕐᓗᑕ ᑮᓇᐅᔭᕐᑐᕈᑎᖏᓐᓂᒃ ᐃᓄᐃᑦ ᐃᓚᐅᔪᖁᑎᑦᑕ.
-30-
ᑐᓴᕋᑦᓴᓂᐊᕐᑎᓄᑦ ᖃᐅᔨᒋᐊᕐᕕᐅᔪᓐᓇᑐᖅ: ᒍᐃᓕᐋᒻ ᑕᒍᕐᓈᖅ, ᑐᓴᖃᑦᑕᐅᑎᓕᕆᐅᑎᓄᑦ ᑐᑭᒧᐊᑦᑎᓯᔨ, ᒪᑭᕝᕕᒥ, ᐅᖄᓚᕕᐅᒍᓐᓇᑐᖅ ᐅᕙᓂ (819) 964-2925. ᖃᕆᑕᐅᔭᑎᒍᓪᓗ ᐊᓪᓚᖃᑦᑕᐅᑎᒍᑎᑎᒍᑦ ᐊᓪᓚᕕᒋᓗᒍᓘᓐᓃᑦ wtagoona@makivik.org; ᐅᓇᓗ ᖃᐅᔨᒋᐊᕐᕕᐅᔪᓐᓇᒥᔪᖅ; ᒫᒃ ᕝᓕᐊᒥᖕ, ᑮᓇᐅᔭᓕᕆᔩᑦ ᐳᕐᑐᓂᕐᐹᖓ. ᐃᓄᕕᐊᓗᐃᑦ ᐱᓇᓱᒐᖃᕐᕕᖁᑎᖓᓐᓂ. ᐅᖄᓚᐅᑎᖓ (867) 678-5429, ᖃᕆᑕᐅᔭᑎᒍᑦ ᑐᕌᕈᑎᖓ ᐅᓇ: MFleming@inuvialuit.com