ᐊᓪᓕᕇᕐᑐᑦ ᑏᓯᒻᐱᕆ 19, 2016 – ᑰᒃᔪᐊᖅ, ᑯᐯᒃ – ᓄᓇᕕᒻᒥᐅᓂᒃ ᐃᓄᓐᓂᒃ ᑭᒡᒐᑐᕐᓱᓂ ᒪᑭᕝᕕᒃ ᐃᓱᒫᓗᒍᑎᖃᓪᓚᕆᓐᓂᕋᕐᓱᓂ ᐅᖃᕐᓯᒪᔪᖅ ᑐᒃᑐᐃᑦ ᓄᖑᑉᐸᓕᐊᓂᖏᓐᓂᒃ ᑕᓯᐅᔭᑉ ᑐᒃᑐᖏᑦ ᑯᐯᑉ ᑕᕐᕋᖓᓃᑦᑐᑦ (ᓄᓇᕕᒻᒥ) ᑯᐯᓪᓗ ᑲᕙᒪᖓᓄᑦ ᕿᓄᒍᑎᖃᕐᓯᒪᑦᓱᓂ ᓂᕿᑦᓴᓯᐅᕋᑎᒃ ᑐᒃᑐᓂᐊᕐᐸᑐᑦ ᓄᕐᖃᑎᑕᐅᖁᑦᓱᒋᑦ.
2011-ᖑᑎᓪᓗᒍ ᑐᒃᑐᐃᑦ 430,000-ᖑᓂᕋᕐᑕᐅᓚᐅᕐᓯᒪᔪᑦ, 2016-ᒥ ᖃᐅᔨᓴᕈᑎᕕᓃᑦ ᑕᑯᑦᓱᒋᑦ 199,000-ᑐᐃᓐᓇᐅᓕᕐᑐᑦ 50%-ᒧᑦ ᐃᑭᓪᓕᒋᐊᕐᓱᑎᒃ ᐊᕐᕌᒍᓂ ᑕᓪᓕᒪᓂ. ᑲᖏᕐᓱᐊᓗᒃᔪᐊᑉ ᑐᒃᑐᖏᑦ 760,000-ᖑᓚᐅᔪᑦ, ᒥᑦᓴᐅᓴᕐᑕᐅᓯᒪᓕᕐᒥᔪᑦ 8,900-ᖑᓂᕋᕐᑕᐅᓱᑎᒃ 2015-ᒥ ᖃᖓᑦᑕᔫᑎᒍᑦ ᖃᐅᔨᓴᕐᑕᐅᓱᑎᒃ.
ᒪᑭᕝᕕᐅᑉ ᐊᖓᔪᕐᖄᖓᑕ ᑐᖓᓕᖓ ᐋᑕᒥ ᑕᓖᓪ ᐊᓚᑯ ᑲᑎᖕᖓᔩᓪᓗ ᐊᖑᓇᓱᐊᕐᓂᒥᒃ ᒥᑭᒋᐊᕐᓂᐊᓂᕐᒥᒃ ᐃᖃᓗᓐᓂᐊᓂᕐᒥᓗ ᐅᖃᓚᐅᕐᑐᑦ, “ᑐᒃᑐᐃᑦ ᐃᓄᑐᐃᓐᓇᓄᑦ ᓂᕿᒋᔭᐅᓪᓚᕆᑦᑐᑦ. ᑐᒃᑐᐃᑦ ᑕᐅᕐᓯᑕᐅᒍᓐᓇᖏᑦᑐᑦ ᓂᕿᓄᑦ ᓂᕿᐅᑦᓯᐊᖏᓐᓂᓴᓄᑦ ᖃᓪᓗᓈᓂᑦ ᐱᔪᓄᑦ ᐊᑭᑐᔫᑦᓱᑎᒃ ᓂᐅᕕᐊᑦᓴᕆᔭᐅᓲᓄᑦ ᓄᓇᕕᒻᒥ. ᑕᒪᓐᓇ ᐱᖕᖑᐊᓂᑐᐃᓐᓇᐅᖏᑦᑐᖅ, ᐃᓄᖁᑎᑦᑕ ᓂᕿᖃᕆᐊᖃᕐᓂᓚᕆᖓ, ᐱᒍᓐᓇᐅᑎᑦᑎᒍᑦ ᓴᑐᕐᑕᐅᓯᒪᑎᓪᓗᒍ ᐱᔭᕆᓯᒪᔭᕗᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᓐᓂᖓᒍ.”
1,200,00-ᖑᓚᐅᔪᑦ ᑲᑎᑦᓱᒋᑦ ᑲᖏᕐᓱᐊᓗᒃᔪᐊᑉ ᑕᓯᐅᔭᐅᓪᓗ ᑐᒃᑐᖏᑦ, ᓄᖑᒌᔭᕐᓯᒪᓪᓚᕆᓕᕐᑐᑦ ᓄᖑᑉᐸᓕᐊᖏᓐᓇᓱᑎᓪᓗ ᐃᓄᐃᑦ ᐊᖑᓇᓱᐊᕐᑏᑦ ᑕᑯᖃᑦᑕᑕᖏᑎᒍᑦ ᓄᓇᒥ ᖃᐅᔨᓴᕐᑏᓗ ᖃᐅᔨᓴᕐᓂᕆᖃᑦᑕᑕᖏᑎᒍᑦ. ᓂᕆᐅᓇᓚᐅᔪᒐᓗᐊᕐᑎᓗᒍ ᑌᒣᓕᒐᔭᕆᐊᖓᓂᒃ ᑯᐯᑉᒻᒥ ᖃᐅᔨᓴᕐᑎᐅᑉ ᑐᓴᕐᑎᓯᒍᑎᒋᓚᐅᔭᖏᑦ ᐊᖑᓇᓱᐊᕐᓂᒥᒃ ᒥᑭᒋᐊᕐᓂᐊᓂᕐᒥᒃ ᐃᖃᓗᓐᓂᐊᓂᕐᒥᓗ ᑲᑎᖕᖓᔩᑦ ᖁᐊᕐᓵᕈᑎᖃᕐᓯᒪᔪᑦ ᑐᓴᕐᑎᑕᐅᒍᑎᒥᓂᒃ.
“ᑕᒪᓐᓇ ᐃᓄᓐᓄ ᓂᖕᖓᓇᕐᑐᖅ ᖃᐅᔨᒪᔭᐅᓪᓗᐊᖏᑦᑐᖅ ᐊᒥᓲᓂᕐᓴᓄᑦ ᑲᓇᑕᒥᐅᓄᑦ. ᐱᐅᓯᑦᓯᐊᖑᖕᖏᓚᕆᑦᑐᖅ ᑲᕙᒪᑐᖃᒃᑯᑦ ᖃᐅᔨᒪᖕᖏᓯᕐᑐᑐᐃᓐᓇᑕᖓ, ᐊᖏᖃᑎᒌᓐᓂᑎᒍᑦ ᑲᒪᒋᔭᑦᓴᖃᕋᓗᐊᕐᒥᓱᑎᒃ ᐃᓄᓐᓄᑦ ᓄᓇᕕᒻᒥᐅᓄᑦ ᐱᓗᐊᕐᑐᒥᒃ ᑐᑭᑕᕈᑎᐅᓂᖏᓐᓂᑦ ᑲᖏᕐᓱᐊᓗᒃᔪᐊᑉ ᑐᒃᑐᖏᑦᑕ, ᑖᒃᑯᐊ ᐱᓇᓱᐊᕐᑕᐅᓲᖑᒻᒥᒪᑕ ᓂᐅᕙᓐᓛᓐᒥᐅᓄᑦ ᓛᐸᑐᐊᒥᐅᓄᓪᓗ, ᖃᓕᐊᕇᑦᑎᓗᒋᑦ ᓄᓀᑦ ᐊᖏᖃᑎᒌᒍᑎᑎᒍᑦ ᑲᕙᒪᑐᖃᒃᑯᑦ ᑲᒪᒋᔭᑦᓴᖃᖃᑎᐅᒻᒥᓱᑎᒃ. ᐊᑑᑎᓯᒪᔪᓂᒃ ᐊᑑᑎᒋᐊᓪᓚᖁᔨᖕᖏᓚᒍᑦ ᑲᕙᒪᒃᑯᑦ ᑐᑭᑖᕐᑌᓕᑎᓪᓗᒋᑦ ᑕᓯᐅᔭᑉ ᑐᒃᑐᖏᑦ ᑲᖏᕐᓱᐊᓗᒃᔪᐊᓗ ᑐᒃᑐᖏᑦ ᓄᖑᑐᐃᓐᓇᓚᕿᑎᓪᓗᒋᑦ,” ᐅᖃᕆᐊᓪᓚᓚᐅᕐᑐᖅ ᑕᓖᓪ ᐊᓚᑯ.
ᒪᑭᕝᕕᒃ ᑭᒡᒐᑐᕐᑎᖏᓪᓗ ᐊᖑᓇᓱᐊᕐᓂᒥᒃ ᒥᑭᒋᐊᕐᓂᐊᓂᕐᒥᒃ ᐃᖃᓗᓐᓂᐊᓂᕐᒥᓗ ᑲᑎᖕᖓᔩᑦ ᓄᕐᖃᖁᔨᓯᒪᔪᑦ ᓂᐃᑦᓴᓯᐅᕋᑎᒃ ᑐᒃᑐᓂᐊᖃᑦᑕᑐᓂᒃ ᐊᕐᕌᒍᓂ ᐱᖓᓲᔪᕐᑐᓂ ᖃᐅᔨᔭᐅᓯᒪᑦᓯᐊᒪᑕ ᐃᑭᓪᓕᒋᐊᖏᓐᓂᒃ, ᖃᐅᔨᔭᐅᓯᒪᑦᓱᑎᓪᓗ ᐱᐅᓯᕐᓱᖏᒋᐊᖏᓐᓂᒃ ᐸᓐᓃᓗ ᐃᑭᓪᓕᐅᒥᓯᒪᑦᓱᑎᒃ ᐊᒥᓱᖕᖑᐸᓪᓕᐊᒍᑎᑦᓴᑐᐊᑦ ᑭᓯᐊᓂ ᓂᕿᑦᓴᓯᐅᕋᑎᒃ ᑐᒃᑐᓯᐅᕐᑐᓄᑦ ᐱᔭᐅᒐᓱᐊᓗᐊᖕᖑᐊᖃᑦᑕᑐᑦ. ᐊᒥᓱᕕᑦᓱᑎᒃ ᓄᕐᖃᑎᑦᓯᖁᔭᐅᓯᒪᓕᕐᓱᑎᒃ ᑲᖏᕐᓱᐊᓗᒃᔪᐊᑉ ᑐᒃᑐᖏᓐᓂᒃ ᐱᓐᓂᐊᖃᑦᑕᖁᔭᐅᒍᓐᓀᓱᑎᒃ ᓄᕐᖃᑎᑦᓯᓴᕋᑖᓗᓚᐅᔪᑦ ᑯᐯᑉ ᑲᕙᒪᒃᑯᖏᑦ.
ᐃᓄᑐᐃᓐᓀᑦ ᑭᒡᒐᑐᕐᑎᖏᑦ ᓄᓇᓕᑐᙯᓪᓗ (ᐃᓚᐅᑎᓪᓗᒋᑦ ᐊᓪᓖᑦ ᑯᔩᒃᑯᑦ ᓇᔅᑳᐱᒃᑯᓗ) ᑕᓯᐅᔭᐅᑉ ᑐᒃᑐᖏᓐᓂᒃ ᐱᓇᓱᐊᕐᑕᐅᖃᑦᑕᖁᔨᒍᓐᓀᓱᑎᒃ ᐅᖃᓚᐅᕐᑐᑦ ᐱᓇᓱᐊᕈᓯᐅᒪᐅᕐᑐᒥ ᑲᑎᒪᓂᖃᕐᑎᓗᒋᑦ ᐊᖑᓇᓱᐊᕐᓂᒥᒃ ᒥᑭᒋᐊᕐᓂᐊᓂᕐᒥᒃ ᐃᖃᓗᓐᓂᐊᓂᕐᒥᓗ ᑲᑎᖕᖓᔩᑦ. ᒥᓂᔅᑕ ᑯᐯᒻᒥ ᓗᒃ ᐸᓛᓐᓯᐊᑦ ᑐᑭᑖᑦᓯᐊᕆᐊᖃᓕᕐᑐᖅ – ᑐᕐᖃᑕᕐᕕᐅᔪᖅ ᓇᐹᕐᑐᓕᕆᓂᕐᒧᑦ, ᒥᕐᖑᐃᓯᕐᕕᓕᕆᓂᕐᒧᑦ. ᓄᕐᖃᑎᓚᐅᕈᒃ ᓂᕿᑦᓴᓯᐅᕋᑎᒃ ᑐᒃᑐᓂᐊᖃᑦᑕᓂᖅ!
-30-
ᖃᐅᔨᒋᐊᕐᕕᐅᒍᓐᓇᑐᖅ
ᒍᐃᓕᐊᒻ ᑕᒍᓐᓈᖅ
ᑐᓴᐅᒪᖃᑦᑕᐅᑎᓂᕐᒥᒃ ᐊᑕᐅᑦᓯᑰᕐᑎᓯᔨ
ᒪᑭᕝᕕᒃ
ᐅᖄᓚᐅᑎᖓ 819-964-2925
ᖃᕆᑕᐅᔭᒃᑯᑦ ᑐᕌᕈᑎᖓ wtagoona@makivik.org
www.makivik.org
ᒪᑭᕝᕕᒃ ᑎᓕᔭᐅᓯᒪᒍᑎᖃᕐᐳᖅ ᐊᐅᓚᑦᓯᔨᐅᓂᐊᕐᑎᓗᒍ ᑮᓇᐅᔭᕐᑖᖑᓯᒪᔪᓂᒃ ᐃᓄᑐᐃᓐᓇᓄᑦ ᓄᓇᕕᒻᒥᐅᓄᑦ ᔦᒥᓯ ᐯᑉ ᑯᐯᓪᓗ ᑕᕐᕋᖓᑕ ᐊᖏᖃᑎᒌᒍᑎᖓᒍᑦ. ᒪᑭᕝᕕᐅᑉ ᐱᓇᓱᐊᕐᑕᖏᓐᓄᑦ ᒪᑯᐊ ᐃᓚᒋᔭᐅᔪᑦ ᐊᐅᓚᑦᓯᓂᖅ ᑮᓇᐅᔭᓕᐅᕋᓱᐊᕐᓂᓗ ᐊᑐᕐᓗᓂ ᑮᓇᐅᔭᕐᑖᖑᓯᒪᔪᓂᒃ ᑫᓪᓚᑐᐃᒍᑎᖃᕐᓂᓗ ᒪᑭᑕᒐᓱᐊᕐᓂᑎᒍᑦ ᐱᕈᕐᐸᓕᐊᑎᑦᓯᒐᓱᐊᕐᓂᒥᒃ.