ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᒫᑦᔨ 19, 2020 – ᑰᒃᔪᐊᖅ ᓄᓇᕕᒃ – ᒪᑭᕝᕕᒃ ᑐᑭᑖᕈᑎᖃᕐᓯᒪᓕᕆᕗᖅ ᓄᕐᖃᖓᑎᑦᓯᑫᓐᓇᓂᖃᕐᓂᐊᓱᓂ ᓄᓇᕕᒻᒥᐅᓂᒃ ᐊᑭᓕᕐᑐᐃᑎᓐᓇᒋᑦ ᑮᓇᐅᑦᔭᓵᖏᓐᓄ ᑖᒃᓯᓕᕆᔭᐅᒍᑎᓲᖏᓐᓂᒃ ᑕᒪᑐᒥᖓᓗ ᑐᑭᑖᕈᑎᖃᕐᓯᒪᕗᑦ ᑲᒪᒍᑎᒋᑦᓱᒍ ᓄᕙᓐᓇᕐᔪᐊᒥ 19-ᒥᒃ ᐱᔪᖃᓕᕐᑐᒥᒃ, ᑕᒪᓐᓇ ᖃᓂᒻᒪᓯᖅ ᓯᓚᕐᔪᐊᒧᑦ ᐃᕐᐸᓯᒪᒻᒪᑦ. ᓄᕐᖃᖓᑫᓐᓇᑎᑦᓯᓂᐅᑉ ᐅᓪᓗᖏᑦ ᐃᓱᓕᓂᖃᓛᕐᐳᑦ ᒫᑦᔨ 30-ᒥᒃ.
ᑖᒃᑯᐊ ᑖᒃᓯᓕᕆᔭᐅᒍᑏᑦ ᐊᑭᓕᕐᑐᑕᐅᓇᑎᒃ ᑲᒪᑎᑦᓯᔪᓄᑦ ᐃᑲᔪᕐᓯᒪᒍᑎᐅᓲᖑᕗᑦ ᓄᓇᕕᒻᒥᐅᓂᒃ ᐱᕙᓪᓕᖁᑎᑖᕐᑕᑐᓂᒃ ᐱᑕᖃᕐᑎᓯᕕᖃᕈᑎᐅᑦᓱᑎᒃ ᑖᒃᓯᓂᒃ ᐊᓪᓚᓯᒪᔪᖕᖑᐃᒍᑎᖃᕐᓂᓴᐅᔪᑎᒍᑦ ᐱᑦᔪᔭᐅᒍᑎᐅᕙᑦᑐᓂᒃ ᐊᕐᕌᒍᑕᒫᑦ ᐱᑦᔪᔭᐅᔪᑦ ᐊᓪᓚᖁᑎᖏᑦ ᐅᓄᕐᓂᖃᓲᖑᔪᑦ 6,000 ᐅᖓᑖᓂ.
ᑕᒪᓐᓇ ᐱᓂᐊᕐᓂᐅᔪᖅ ᐊᑑᑎᑎᑕᐅᕗᖅ ᐱᑦᔪᑎᖃᕐᓱᓂ ᓴᐳᑦᔨᓯᒪᒋᐊᖃᕐᓂᓂᒃ ᐃᓗᓯᒃᑯᓗ ᖃᓄᐃᖕᖏᓯᐊᕐᑐᒥᒋᐊᖃᕐᓂᖏᓐᓂᒃ ᑕᒪᕐᒥᒃ ᐱᓇᓱᒍᑦᔨᔨᕗᓪᓗ ᐊᒻᒪᓗ ᐱᑦᔪᔭᐅᖃᑎᒌᑦᑐᑦ.
ᑰᐯᒃ ᑲᕙᒪᒃᑯᑦ ᑮᓇᐅᔭᕐᑐᕈᑎᓕᕆᔨᖏᓪᓗ ᐊᒻᒪᓗ ᑲᕙᒪᑐᖃᒃᑯᑦ ᑮᓇᐅᕐᑐᕈᑎᓕᕆᔨᖏᑦ, ᐊᕗᖓᐅᓕᒋᐊᕆᓯᒪᕘᒃ ᑖᒃᓯᓕᕆᐅᑏᑦ ᑲᒪᒋᔭᐅᒋᐊᖃᕐᓂᖓᑕ ᑭᖑᓪᓕᐹᖁᑎᒋᓲᖓᓐᓂᒃ ᐅᓪᓗᒥᒃ ᐃᓱᓕᕕᑦᓴᑖᖓᕐᓱᒋᒃ ᔫᓂ 1, 2020-ᒥᒃ
ᑲᒪᓇᓱᑦᑕᖃᖏᓐᓇᓯᐊᖃᑦᑕᓚᖓᔪᒍᑦ ᖃᓄᐃᓕᕙᓪᓕᐊᓂᐅᓕᕐᑐᓂᒃ, ᐊᒻᒪᓗ ᐱᓇᓱᒍᑦᔨᒍᑎᐅᓲᑦ ᓱᓕ ᐊᕗᖓᖓᐅᓕᒋᐊᕆᐊᖃᕐᐸᑕ, ᑐᓴᕋᑦᓴᑖᕐᖃᒥᖕᖑᑐᓕᒫᑦ ᑕᒪᕐᒥᒃ ᓄᐃᑎᖃᑦᑕᓚᖓᕙᕗᑦ ᖃᕆᑕᐅᔭᑎᒍᑦ ᑕᑯᓇᓱᒃᑕᐅᕕᑦᑎᒍᓪᓗ ᐊᒻᒪᓗ ᕖᓯᐳᒃᑯᑦ.
-30-
ᑐᑭᓯᒋᐊᒃᑲᓂᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᕕᒻᒥ ᑐᑭᒧᐊᑦᑎᓯᔨ
ᒪᑭᕝᕕᒥ
ctagoona@makivik.org
www.makivik.org
ᒪᑭᕝᕕᒃ ᓄᓇᓂᒃ ᐃᓐᓄᐃᓯᒪᓇᓱᒍᑎᓄᑦ ᐱᓇᓱᕝᕕᖁᑎᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᔨᐅᓂᐊᕐᓂᒥᓂᒃ ᕿᒻᒪᖁᓯᐅᑎᐅᑦᓱᑎᒃ ᑮᓇᐅᔭᖁᑎᑖᕆᓯᒪᔭᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ ᐱᑕᖃᕐᑎᑕᐅᒍᑎᖃᕐᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓚᑦᓯᔨᐅᓂᕐᒥᒃ ᑮᓇᐅᔭᓕᐅᕋᓱᒍᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᓂᒃ ᖁᕝᕙᑎᕆᔨᐅᑦᓱᓂᓗ ᑮᓇᐅᔭᑎᒍᑦ ᒪᑭᑕᒐᓱᒍᑎᓂᒃ ᐱᑕᖃᕐᑎᓯᔨᒋᔭᐅᑦᓱᓂ ᐃᑲᔪᕐᓯᒪᔨᐅᓂᕐᒥᒍᑦ ᓴᕐᕿᑎᑕᐅᓇᓱᓕᕐᒪᑕ ᐃᓄᑐᐃᓐᓇᓄᑦ ᐃᖏᕐᕋᑎᑕᐅᓚᖓᑦᓱᑎᒃ ᐱᓇᓱᒐᖁᑕᐅᔪᓂᒃ ᓄᓇᕕᖕᒥ. ᒪᑭᕝᕕᒃ ᖁᕝᕙᑎᕆᔨᐅᕗᖅ ᐊᓯᐅᑎᑦᓯᑌᓕᓂᕐᓄᑦ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐃᓚᐅᒻᒥᑎᓪᓗᒋᑦ ᐃᓗᓯᓕᕆᔭᐅᓂᑦᓴᖏᓪᓗ, ᐊᑦᓱᐃᓂᑦᓴᖏᓪᓗ, ᐊᔪᕐᓴᕈᓐᓀᓂᑦᓴᖏᓪᓗ, ᐊᒻᒪᓗ ᐃᓕᓐᓂᐊᑎᑕᐅᒋᐊᖃᕐᓂᖏᓐᓂᒃ ᐃᓄᑐᐃᓐᓀᑦ ᓄᓇᓕᒻᒥᓂ.