ᑰᑦᔪᐊᒥᑦ – ᒫᑦᓯ 23, 2016 – ᒪᑭᕝᕕᒃ ᑮᓇᐅᔭᕐᑖᑎᑕᐅᓐᓂᖁᖅ ᐃᑉᐸᓴᖅ ᑲᕙᒪᑐᖃᒃᑯᓂᑦ $50-ᒥᓕᐊᓂᒃ ᐊᕐᕌᒍᓄᑦ ᒪᕐᕉᓅᓕᖓᓂᐊᕐᑐᓂᒃ ᓄᓇᕕᒻᒥᐅᓂᒃ ᑯᐯᒃᒥ ᐃᓪᓗᐃᓂᐊᕐᑐᓂᒃ ᐃᑲᔪᕐᓯᒍᑎᑦᓴᓂᒃ. ᓄᓇᕕᒻᒥᐅᑦ ᐊᕐᕌᒍᓂ ᐊᒥᓱᓂ ᓂᓐᓂᐅᕋᓚᐅᑎᔪᒥᐅᒍᓲᒍᓕᕐᒪᑕ. ᒪᑭᕝᕕᒃ ᓵᖓᓯᒋᐊᕐᑐᐸᒻᒪᑦ ᑲᕙᒪᑐᖃᒃᑯᓂᒃ ᑮᓇᐅᔭᖃᕐᑎᑕᐅᒋᐊᓪᓚᕈᒪᑦᓱᑎᒃ ᐃᓪᓗᐃᓂᐊᕐᑐᓂᒃ ᐃᑲᔪᕐᓯᒍᑎᑦᓴᓂᒃ ᐱᒍᓐᓇᓯᑎᑕᐅᓚᐅᕐᓯᒪᒐᑎᒃ ᐃᑉᐸᓴᖅ ᑭᓯᐊᓂ ᐱᒍᓐᓇᓯᓂᕃᓕᕐᓂᖁᑦ ᑲᕙᒪᑐᖃᒃᑯᑦ. ᐅᖃᕐᓯᒪᔭᖓᓗ ᑲᕙᒪᑐᖃᒃᑯᑦ ᐱᓇᓱᖃᑎᒌᑦᓯᐊᓂᐅᓚᖓᔪᒥᒃ ᐱᒋᐊᕐᑎᓯᓂᐅᑦᓱᓂ ᒪᑭᕝᕕᒃ ᑕᑯᑎᑦᓯᒍᓐᓇᓛᓕᕐᒪᑦ ᐃᓪᓗᔪᐊᓂᒃ ᓴᓇᒍᓯᕆᒍᒪᔭᒥᓂᒃ ᑲᕙᒪᑐᖃᒃᑯᓂᒃ ᓄᓇᓕᓐᓂᒃ ᐃᓪᓗᓕᐅᕈᑦᔨᓕᕈᑎᒃ, ᑲᕙᒪᑐᖃᒃᑯᓄᑦ ᓴᐳᑦᔭᐅᓗᑎᒃ.
“ᑖᓐᓇ ᐅᓪᓗᖅ ᓄᓇᕕᒻᒥᐅᓄᑦ ᐱᒻᒪᕆᐊᓘᕗᖅ. ᐃᓪᓗᐃᓂᐊᕐᓂᖅ ᐃᓅᓯᒃᑯᓗ ᐱᓐᓀᓗᑕᖃᕈᑕᐅᓂᖓ ᐊᕐᕌᒍᑕᒫᑦ ᓱᒐᓗᓕᕐᐸᓕᐊᑐᐃᓐᓇᒪᑦ, ᑭᓯᐊᓂ $50-ᒥᓕᐊᓐ ᓄᓇᕕᒻᒥ ᐃᓪᓗᓕᐅᕈᑎᑦᓭᑦ ᑐᑭᒧᐊᒋᐊᑦᓯᐊᕈᑎᑦᓴᐅᓚᖓᓕᕐᖁᑦ. ᑕᒪᓐᓇ ᐱᒋᐊᕐᕕᒋᓗᒍ ᑭᓯᐊᓂᐅᒻᒪᑦ,” ᐅᖃᕐᑐᕕᓂᖅ ᒪᑭᕝᕕᐅᑉ ᐊᖓᔪᕐᖄᖓ ᔫᐱ ᑕᕐᕿᐊᐱᒃ.
ᐃᑉᐸᓴᖅ ᐅᖃᕐᑕᐅᓚᐅᕐᑐᑦ ᐱᖓᓱᐃᒍᓗᑕᓗ ᐱᓇᓱᖃᑎᒌᓐᓂᕆᓂᐊᕐᑕᕗᑦ , ᐱᓂᐊᕐᓂᓕᕆᓂᑎᒍᑦ ᑕᑯᓐᓇᑕᐅᓕᕐᑎᓗᒍ ᑲᕙᒪᑐᖃᒃᑯᓄᑦ ᑯᐯᒃᑯᓗ ᑲᕙᒪᖓᓄᑦ, ᓂᐸᖃᕈᑎᑦᓴᑖᕆᓚᖓᓕᕐᖃᕗᑦ ᓄᓇᕕᒻᒥ ᐃᓪᓗᐃᓂᐊᕐᓂᒨᓕᖓᔪᓂᒃ ᑭᖕᖒᒪᒋᔭᐅᑦᓴᐅᑎᒋᔪᓂᒃ ᐊᕐᕌᒎᓛᕐᑐᓂᓪᓗ ᑭᖕᖒᒪᒋᔭᐅᕙᓐᓂᐊᑐᓂᒃ.
“ᑖᒃᑯᐊ ᑮᓇᐅᔭᖃᕐᑎᑕᐅᒋᐊᓪᓚᕈᑎᑦᓴᕗᑦ ᑲᕙᒪᑐᖃᒃᑯᓂᑦ ᓄᓇᕕᒻᒥ ᐃᓪᓗᓕᐅᕈᑎᑦᓴᓂᒃ ᐱᕕᑦᓴᑖᕆᔭᐅᓚᖓᕗᑦ ᐅᕕᒐᕐᑐᖁᑎᑦᑎᓄᑦ ᐱᓇᓱᓪᓗᑎᓪᓗ-ᐱᒋᐅᕐᓴᓗᑎᓪᓘᕈᓐᓇᓂᕐᒥᒃ ᐊᒻᒪᓗ ᐱᓇᓱᒐᕐᑖᕈᓐᓇᓂᕐᒥᒃ.” ᐅᖃᕐᑐᕕᓂᖅ ᑕᕐᕿᐊᐱᒃ.
ᖃᐅᔨᒋᐊᑦᓯᐊᕕᑦᓴᖅ:
ᒍᐃᓕᐊ ᑕᒍᓐᓈᖅ
ᑐᓴᐅᒪᖃᑎᒌᒍᑎᓂᒃ ᐊᑕᐅᑦᓯᑰᕐᑎᓯᔨ ᑐᓴᕋᑦᓴᓕᕆᔨᐅᑦᓱᓂᓗ
wtagoona@makivik.org
819-964-2925
ᒪᑭᕝᕕᒃ ᐱᓇᓱᕝᕕᐅᓱᓂ ᑎᓕᔭᐅᒪᐅᑎᖃᕐᐳᖅ ᐊᐅᓚᑦᓯᓂᐊᕐᓗᓂ ᐱᐅᓯᑐᖃᓕᕆᒍᑎᑦᓴᓂᒃ ᓄᓇᕕᒻᒥᐅᑦ ᐃᓄᐃᑦ ᑮᓇᐅᔭᖃᕐᑎᑕᐅᒍᑎᖏᓐᓂᒃ ᐱᒍᓐᓇᓯᓯᒪᑦᓱᒋᑦ ᔦᒥᓯ ᐯᒥ ᑯᐯᓪᓗ ᑕᕐᕋᖓᓂ ᐊᖏᖃᑎᒌᒍᑎᑎᒍᑦ. ᒪᑭᕝᕕᒃ ᑲᒪᒋᔭᑦᓴᖃᕐᒥᔪᖅ ᐊᐅᓚᑦᓯᓂᐊᕐᓗᓂ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᑮᓇᐅᔭᓕᐅᕈᑎᑦᓴᕆᒋᐊᓪᓚᓂᐊᕐᓗᒋᑦ ᐊᒻᒪᓗ ᒪᑭᑉᐸᓕᐊᒍᑎᑦᓴᕆᓂᐊᕐᓗᒋᑦ.