ᑐᓴᕋᑦᓴᓂᐅᑎᑎᒍᑦ ᑐᓴᕐᑕᐅᑎᑦᓯᒍᑏᑦ
ᐆᒃᑐᐱᕆ 22, 2019 – ᑰᒃᔪᐊᖅ, ᓄᓇᕕᒃ – ᒪᑭᕝᕕᒃ ᐱᓇᓱᒐᖃᕐᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ ᖃᓄᐃᓕᒋᐊᕈᑎᖃᕐᓂᖓᑦ ᑲᕙᒪᑐᖃᒃᑯᑦ ᓂᕈᐊᕐᑎᓯᒍᑎᖏᓐᓂᒃ ᑎᒍᓯᓂᕆᓚᐅᔪᕙᖓ ᑐᖕᖓᓱᑦᑎᓯᑦᓯᐊᓂᖃᕐᓱᓂ, ᑕᒪᖏᓐᓄᑦ ᓄᓇᖁᑎᒥᓂᓗ ᓄᓇᕕᒻᒥ ᐊᒻᒪᓗ ᑲᓇᑕᒧᑦ ᐃᓘᓐᓈᓄᑦ. ᐅᐱᒍᓲᑦᔨᓂᖃᓚᐅᔪᕗᕐᓗ ᓂᕈᐊᕐᑕᐅᕋᑖᒥᒃ ᐃᓚᐅᔫᖃᑕᐅᓚᖓᓕᕐᑐᒥᒃ ᐱᖁᔭᓕᐅᕐᕕᒧᑦ ᑭᒡᒐᑐᕐᓗᓂ ᓂᕈᐊᕐᑕᐅᒪᕕᐅᓲᒥᒃ ᐊᐱᑦᓯᐱ-ᔦᒥᓯ ᐯ-ᓄᓇᕕᒃ-ᐃᔫᒥ ᓯᓪᕕ ᐱᕈᐲᒥᒃ ᑭᒡᒐᑐᕐᑎᑕᖑᔪᒥᒃ ᑲᕙᒪᑦᑎᓄᑦ Bloc Quebecois/ᐸᓛᒃ ᑯᐯᒃᑯᐊᑯᓐᓄᑦ, ᓵᓕ ᑖᑦᓱᒥᖓ ᑐᖕᖓᓱᑦᑎᓯᓚᐅᔪᖅ ᐳᓛᕆᐊᕈᒪᑉᐸᑦ ᖃᒻᒥᐅᒍᓐᓇᕕᓕᒫᒃᑯᓗ ᐱᕕᑦᓴᑖᑦᓴᑐᐊᕈᓂ ᑎᑭᒍᓐᓇᓂᕋᕐᓱᒍ.
ᓵᓕ ᒍᐊᑦ ᐅᖃᓚᐅᔪᖅ ᐃᒫᒃ “ᕿᓚᓈᕐᐳᖓ ᑲᑎᖕᖓᖃᑎᒋᓛᕆᐊᖓ, ᓴᐳᑦᔨᓯᒪᓂᕆᓛᕐᑕᖓᓂᓪᓗ ᐱᓇᓱᑦᑕᑎᓐᓂᒃ ᓇᒻᒥᓂᖅ-ᑐᑭᑖᕐᑐᐃᒍᓐᓇᐅᑎᑖᕋᓱᒍᑎᑦᑎᓂᒃ, ᐊᓯᖏᓐᓂᓗ ᐱᔭᑦᓴᖁᑎᑦᑎᓂᒃ ᓲᕐᓗ ᐆᑦᑑᑎᒋᓗᒋᑦ ᑲᔪᓯᑎᑕᐅᓂᕆᒋᐊᓕᖏᑦ ᓯᓚᐅᕐᔪᐊᒥᐅᑦ ᑲᑎᖕᖓᕕᕐᔪᐊᖓᑕ ᐅᖃᒻᒪᕆᒍᑎᒋᓯᒪᔭᖏᑦ ᐱᑦᔪᑎᖃᕐᓱᑎᒃ ᐱᔪᓐᓇᐅᑎᖃᕐᑎᑕᐅᒍᑎᖏᓐᓂᒃ ᓄᓇᖃᕐᖃᓯᒪᔫᖃᑎᒌᑦᑐᑦ,”
ᑕᐅᑐᖕᖏᒑᕐᓱᒋᑦ ᓂᕈᐊᕐᓂᑎᒍᑦ ᖃᓄᐃᓕᖕᖓᓂᐅᔪᑦ ᐊᕕᑎᑦᓯᓂᖃᕋᔭᕐᑎᓗᒋᑦ ᑲᓇᑕᐅᑉ ᓄᓇᓕᕐᔪᐊᖓᓂ, ᓵᓕ ᒍᐊᑦ ᑕᐅᑐᑦᑕᖃᖔᕐᐳᖅ ᐱᒐᓱᕝᕕᓴᑦᓯᐊᖑᓂᖓᓂ ᑲᓇᑕᐅᑉ ᑲᕙᒪᖓᑕ ᐊᖓᔪᕐᖄᖓᓄᑦ ᐱᕙᓪᓕᐊᑎᑦᓯᒍᑎᖃᕐᕕᓴᑦᓯᐊᖁᑎᖃᕐᓱᓂ ᑲᓇᑕᐅᑉ ᓄᓇᓕᕐᔪᐊᖓᓂᒃ ᑲᑎᐅᒥᓂᕐᓴᐅᒐᔭᕐᑎᓗᒋᑦ. “ᔭᔅᑕᓪ ᑐᕈᑑ ᐱᔪᓐᓇᓂᖃᑦᓯᐊᓚᖓᔪᓂᒃ ᑲᕙᒪᑖᓚᐅᕐᒪᑦ, ᐱᓇᓱᖃᑎᖃᕈᓐᓇᓯᐊᕐᓱᓂᓗ ᐊᓯᒥᓂᒃ ᑲᕙᒪᑦᑎᐅᒥᔪᓂᒃ – ᐅᑯᓂᖓ NDP, the Bloc Quebecois, Greens, the Conservatives, and the Independent candidate – ᐱᖁᔭᓕᐊᕆᒍᒪᔭᒥᓂᒃ ᑐᓂᔨᖃᑎᒋᖃᑦᑕᓗᒋᑦ ᐱᖁᔭᓕᐅᕐᕕᒧᑦ ᑕᒪᑐᒥᖓᓗ ᐱᓇᓱᓪᓗᑎᒃ ᐱᕙᓪᓕᐊᑎᑦᓯᒍᑎᖃᕐᓗᑎᒃ ᑲᓇᑕᓕᒪᒦ ᐊᑕᐅᓯᐅᖃᑎᒌᑦᓯᐊᓂᑦᓴᒥᒃ.”
ᐃᓕᖓᑎᓪᓗᒋᓪᓕ ᐊᖏᔪᒻᒪᕆᐊᓘᑦᓱᓂ ᓂᕈᐊᕐᑕᐅᒪᕕᐅᓲᒧᑦ ᐊᐱᑦᓯᐱ-ᔦᒥᓯ ᐯ-ᓄᓇᕕᒃ-ᐃᔫ ᓄᓇᖁᑎᖏᓐᓂ, ᓵᓕ ᒍᐊᑦ ᐱᔪᕆᒪᒍᑎᖃᓚᐅᔪᕗᖅ ᐃᓄᑐᐃᓐᓇᐅᓱᓂ ᓂᕈᐊᕐᑕᐅᑎᒐᓱᓚᐅᔪᒥᒃ ᑭᐋᕋ ᑲᐹᓇ-ᒍᐁᑦᓕᒥᒃ ᑰᒃᔪᐊᒥᐅᒥᒃ, ᑖᓐᓇ ᑭᐋᕋ ᓂᕈᐊᕐᑕᐅᑎᒐᓱᓚᐅᔪᒻᒪᑦ ᑭᒡᒐᑐᕐᓱᓂ Green Party-ᑯᓂᒃ ᑕᓪᓕᒪᒋᔭᐅᓚᐅᔪᕗᕐᓗ ᓂᕈᐊᕐᑕᐅᓂᖃᕐᓱᓂ 1,006-ᓄᑦ (178-ᖑᓚᐅᔪᒻᒪᑕ 197-ᓂᑦ ᓂᕈᐊᕐᕕᓂᑦ ᑐᓴᕐᓴᕉᑎᔪᑦ). ᐅᖃᓚᐅᔪᕗᕐᓗ ᐃᒫᒃ “ᐱᔪᕆᒪᒍᑎᒋᒻᒪᕆᑉᐸᑎᒋᑦ ᑭᐊᕌ. ᑕᑯᑦᓴᐅᕗᕐᓗ ᓂᕈᐊᕐᑕᐅᑎᒐᓱᕝᕕᒃ ᐊᖏᓗᐊᕆᐊᖓ. ᐊᐅᓚᑦᓯᒋᐊᕐᓂᓴᕐᓂᑎᓐᓂᓗ ᓯᕗᓂᖃᕐᐳᒍᑦ ᓂᕈᐊᕐᑕᐅᑎᒐᓱᕝᕕᐅᕙᑦᑐᑦ ᑎᑎᕐᑐᑕᐅᒪᓂᖏᓐᓄᑦ ᑲᑎᖕᖓᔨᐅᕕᓖᑦ ᑕᒪᑐᒥᖓ ᑐᓴᕐᑎᓛᓕᕐᒥᒐᑦᑎᒋᑦ, ᓄᓇᕕᒻᒥ ᐃᓕᒃᑯᑐᒥᒃ ᓂᕈᐊᕐᑕᐅᑎᒐᓱᕝᕕᑖᕆᐊᖃᕆᐊᑦᑕ ᐃᓄᑐᐃᓐᓇᑎᒍᑦ ᓄᓇᖁᑎᑦᑎᓅᓕᖓᓂᕐᓴᐅᓛᕐᑐᒥᒃ, ᑕᒪᓐᓇᓗ ᐱᒍᒥᓇᕆᐊᓪᓚᐳᖅ ᐃᓱᒪᒋᑦᓱᒋᑦ ᓇᒻᒥᓂᖅ-ᑐᑭᑖᕐᑐᐃᒍᓐᓇᓯᒐᓱᒍᑎᓂᒃ ᐱᓇᓱᒍᑎᖃᕐᓂᕆᓕᕐᑕᕗᑦ. ᑕᒪᓐᓇ ᑭᖕᖒᒪᒋᒻᒥᔭᕗᑦ ᑯᐯᒃᒥ ᓄᓇᓕᕐᓚᑎᒎᕋᔭᕐᑎᓗᒍ.”
ᓵᓕ ᒍᐊᑦ ᐅᖃᐅᓯᑦᓴᖃᕐᕕᖃᓚᐅᔪᒻᒥᔪᖅ ᐸᓛ ᑯᐯᒃᑯᐊᑯᑦ/ Bloc Quebecois-ᑯᑦ ᓯᕗᓕᕐᑎᖓᓂᒃ Yves-François Blanchet/ᐄᕝ-ᕙᕋᓐᓱᐊ ᐸᓛᓐᓯᐊᑦᒥᒃ/Yves-François Blanchet-ᒥᒃ. ᐃᒫᒃ ᐅᖃᐅᑎᑦᓱᒍ “ᓂᕆᐅᕝᕕᒋᕙᑦᑎᒋᑦ ᓴᐳᒻᒥᓛᕐᑎᓗᑎᑦ ᐱᕙᓪᓕᐊᑎᑦᓯᓂᕐᒥᒃ ᐱᓇᓱᒍᑎᑦᑎᓂᒃ ᓄᓇᕕᒻᒥ – ᑕᒪᖏᑎᒍᑦ ᐱᓂᐊᕐᓂᓕᕆᓂᑎᒍᓪᓗ ᒪᑭᑕᒐᓱᒍᑎᓕᕆᓂᑎᒍᓪᓗ – ᐱᓂᐊᕐᓂᓕᕆᓂᑎᒍᓪᓗ ᐱᕙᓪᓕᐊᑎᑦᓯᒍᑎᖃᕈᓐᓇᕋᑦᑕ ᐃᓱᐊᕐᑐᒥᒃ ᐃᓅᖃᑎᒌᒍᓐᓇᓂᕐᒥᒃ. ᑭᓯᐊᓂ ᑕᒪᓐᓇᐅᒐᓗᐊᕐᑎᓗᒍ, ᐱᑦᔪᑎᒋᑦᓱᒋᑦ ᑯᐯᒃ ᐊᕕᒍᒪᓂᖏᑦ ᑲᓇᑕᒥ, ᖃᐅᔨᒪᒋᑦ ᐃᓄᑐᐃᓐᓀᑦ ᐱᕙᓪᓕᐊᓯᒪᓂᕐᒥᒍᑦ ᐊᕕᑦᓯᒐᔭᕐᓂᒥᒃ ᑲᓇᑕᒥᒃ ᐱᐅᓯᖃᕐᓂᐅᔭᖃᑦᑕᓯᒪᖕᖏᒋᐊᖏᑦ ᑌᒣᓐᓂᐅᔭᕋᑎᓪᓗ.”
ᓂᕈᐊᕐᑕᐅᓂᕆᓚᐅᔪᔭᖓ ᐅᕕᒐᕐᑐᓂᕐᐹᖑᑦᓱᓂ ᐱᖁᔭᓕᐅᕐᑎᖑᓚᐅᔪᔫᑉ ᑲᓇᑕᒥ, 25-ᓂᒃ ᐅᑭᐅᓕᐅᑉ ᒪᒥᓛᖅ ᖃᕐᖃᐅᑉ ᖃᒪᓂᕐᔪᐊᒥᐅᑉ ᑭᒡᒐᑐᕐᓱᓂ NDP-ᑯᓂᒃ ᓄᓇᕗᒻᒥ ᐃᕐᙯᒋᐊᓪᓚᒍᑎᒋᓚᐅᔪᕙᖓ ᓵᓕ ᒍᐊᑦ. ᐃᒫᒃ ᐅᖃᕐᓱᓂ “ᐊᐅᓚᔨᑦᓯᐊᐳᖓ ᐃᓄᐃᑦ ᑕᐱᕇᑦ ᑲᓇᑕᒥ ᑲᑎᖕᖓᓂᕆᓚᐅᕐᓯᒪᔭᖓᓂᒃ ᖃᒪᓂᕐᔪᐊᒥ 1971-ᖑᑎᓪᓗᒍ ᑲᑎᖕᖓᖃᑕᐅᕕᒋᓚᐅᕐᓯᒪᔭᖓᓂᒃ ᑕᒑᖅ ᑰᓕᐅᑉ. ᑌᑦᓱᒪᓂ ᐃᓘᓐᓇᑕ ᓱᓕ ᐅᕕᒐᑐᒪᕆᐅᓯᒪᒐᑦᑕ. ᐱᔪᓐᓇᓂᖃᑦᓯᐊᓚᖓᕗᑎᑦ ᒪᒥᓛᖅ ᓯᕗᓂᑦᑎᓂᓗ ᑲᑎᖕᖓᓯᓛᐊᒥᒃ ᐃᓕᓐᓂᒃ ᓯᕗᓂᖃᕐᐳᖓ ᐱᓇᓱᖃᑎᒋᓛᕈᒪᓪᓗᑎᓪᓗ ᐱᑦᔪᑎᖃᕐᓗᑕ ᐃᓄᑐᐃᓐᓀᑦ ᓇᒻᒥᓂᖅ ᑐᑭᑖᕐᑐᐃᒍᓐᓇᓂᑦᓴᖓᓐᓂᒃ ᑲᑐᑦᔮᖃᖃᑎᒌᒍᑎᖃᕐᓗᑕ, ᑭᖑᕚᕆᓛᕐᑕᑎᓐᓅᓕᖓᑎᓪᓗᒋᑦ.”
-30-
ᖃᐅᔨᒋᐊᕐᕕᓴᖅ:
ᑳᓴᓐ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᓂᕐᓄᑦ ᑐᑭᒧᐊᑦᑎᓯᔨ
ᒪᑭᕝᕕᒃ ᐱᓇᓱᒐᖃᕐᕕᒥ
ᐅᖄᓚᐅᑎᖓ. (514) 745-8880
ctagoona@makivik.org
www.makivik.org
Makivvik is the land claims organization mandated to manage the heritage funds of the Inuit of Nunavik provided for under the James Bay and Northern Québec Agreement. Makivvik’s role includes the administration and investment of these funds and the promotion of economic growth by providing assistance for the creation of Inuit-operated businesses in Nunavik. Makivvik promotes the preservation of Inuit culture and language as well as the health, welfare, relief of poverty, and education of Inuit in the communities.