ᑰᒃᔪᐊᖅ, ᒪᓐᓂᓕᐅᑦ 30, 2026 – ᒪᑭᕝᕕᒃᑯᑦ ᑐᖕᖓᓱᑦᑎᓯᕐᖃᐅᔪᑦ ᑲᓇᑕᐅᑉ ᐊᖓᔪᕐᖄᖓᓂᒃ ᒪᐋᒃ ᑳᕐᓂᒥᒃ ᑰᒃᔪᐊᒧᑦ ᐃᓄᐃᑦ ᑲᓇᑕᐅᓪᓗ ᐱᓇᓱᐊᖃᑎᒌᓐᓂᒧᑦ ᑲᑎᖕᖓᔨᖏᑦ (ICPC) ᐅᓪᓗᒥ ᑲᑎᒪᑎᓪᓗᒋᑦ. ᑲᓇᑕᐅᑉ ᐊᖓᔪᕐᖃᖓ ᒪᓕᑦᑕᐅᓯᒪᕐᖃᐅᔪᖅ ᑲᓇᑕᐅᑉ ᑐᕐᖃᑕᕐᕕᖏᓐᓄᑦ ᑭᐊᔨ ᐊᓇᓐᑕᓴᓐᑲᔩᒧᑦ, ᑌᕕ ᒥᑭᓐᑎᒧᑦ, ᕇᐱᑲ ᐋᓪᑎᒧᑦ, ᒫᓐᑎ ᑳᓪ-ᒫᔅᑎᒧᑦ, ᕇᐱᑲ ᓵᑦᕌᓐᒧᑦ, ᑎᒻ ᖄᔾᓴᓐᒧ,ᑦ, ᐊᒻᒪᓗ ᓯᕗᓕᕐᑎᓄᑦ ᑲᓇᑕᒥ ᐃᓄᐃᑦ ᓄᓇᖏᓐᓂᑦ ᐱᓯᒪᔪᓄᑦ.
ᑐᖕᖓᓱᑦᑎᑕᐅᑦᓱᑎᒃ ᑲᑎᑦᑕᕕᒻᒥ, ᑲᑎᒪᓂᖓᑦ ᐃᓄᓐᓂᒃ ᑲᓇᑕᐅᑉ ᑲᕙᒪᖓᓂᓪᓗ ᐊᑕᐅᓯᕐᒦᖃᑎᒌᑦᑎᓯᕐᖃᐅᔪᖅ ᐃᓄᐃᑦ ᓄᓇᖓᑕ ᑲᓇᑕᐅᓪᓗ ᐅᑭᐅᕐᑕᑐᖓᑕ ᓯᕗᓂᑦᓴᖓᓅᓕᖓᓪᓚᕆᑦᑐᓂᒃ ᐱᑦᔪᑎᓂᒃ ᐅᖄᖃᑎᒌᓐᓂᒧᑦ. ᐅᖄᖃᑎᒌᒍᑎᖃᓗᐊᖕᖑᕈᑎᖏᑦ ᐱᑦᔪᑎᖃᕐᓱᑎᒃ ᐅᑭᐅᕐᑕᑐᒥ ᓇᖕᒥᓂᖃᕈᑎᓂᒃ ᓴᐳᑦᔭᐅᒍᑎᖏᓐᓂᓗ, ᐅᑭᐅᕐᑕᑐᒥ ᓯᓚᑖᓃᑦᑐᓄᐊᖓᔪᓄᑦ ᒪᓕᒐᖓᓂᒃ, ᐊᑭᑐᔫᓪᓗᐊᖏᑦᑐᓂᒃ ᐃᓪᓗᖃᕐᑎᓯᓂᕐᒥᒃ, ᐅᑭᐅᕐᑕᑐᒥ ᓂᕿᑦᓯᐊᖃᕈᑎᓂᒃ ᐱᓇᓱᐊᕈᑎᓂᒃ, ᐃᓄᐃᑦ ᓄᓇᖓᓂ ᓯᓚᑦᑐᓴᕐᕕᒪᕆᑦᓴᒥᒃ ᒪᓂᔭᐅᓯᒪᔪᒥᒃ, ᐊᒻᒪᓗ ᐃᓗᓯᓕᕆᓂᕐᒥᒃ ᖃᓄᐃᖕᖏᓯᐊᕐᓂᒥᓪᓗ.
“ᓄᑕᐅᓯᓕᕐᓯᒪᔪᓂᒃ ᐅᑭᐅᕐᑕᑐᒥᒃ ᑕᑯᓐᓇᕆᐊᑦᓯᓯᐊᓯᒪᓂᖅ ᓄᐃᑦᓯᒪᑦ ᐱᒻᒪᕆᐅᑦᓱᓂ ᐱᕕᑦᓴᒥᒃ,” ᐅᖃᕐᖃᐅᔪᖅ ᒪᑭᕝᕕᒥ ᐊᖓᔪᕐᖄᖅ ᐱᑕ ᐋᑕᒥ. “ᓄᓇᕕᒃ ᑌᒪᖕᖓᓂᑦ ᐃᓚᒋᔭᐅᓪᓚᕆᖏᓐᓇᓯᒪᒻᒪ ᐅᑭᐅᕐᑕᑐᒧᑦ. ᓄᓇᓕᕗᑦ ᓄᓇᒥᓪᓗ ᖃᐅᔨᒪᐅᓯᕗᑦ ᐃᑲᔪᕐᓯᓯᒪᒻᒪᑕ ᐅᓪᓗᒥᐅᑎᓪᓗᒍ ᐅᑭᐅᕐᑕᑐᒥᒃ ᑐᑭᓯᓇᕐᑎᓯᒍᑎᓂᒃ. ᑲᕙᒣᑦ ᐊᑦᑕᓀᓕᑎᑦᓯᒍᒪᓕᕐᑎᓗᒋᑦ ᓇᖕᒥᓂᖃᕐᓂᕋᕈᑎᓂᒃ, ᐊᑦᑕᓇᕐᑐᒦᒌᒃᑯᑎᖏᓐᓂ, ᐊᒻᒪᓗ ᐅᑭᐅᕐᑕᑐᒥ ᐱᐅᒃᑯᑎᒻᒪᕆᓂᒃ, ᑐᑭᑖᕐᑕᐅᖃᑦᑕᓚᖓᔪᓂᑦ ᐊᓂᕐᕋᕗᓐᓂᒃ ᓄᓇᕗᓐᓂᒃ ᓯᕗᓂᑦᓴᕗᓐᓂᓗ ᓱᕐᕃᓂᖃᓚᖓᔪᓂᒃ ᐃᓄᐃᑦ ᐃᓚᒋᔭᐅᓪᓚᕆᒋᐊᖃᕐᒪᑕ ᐱᓇᓱᐊᖃᑎᒋᔭᐅᓪᓚᕆᓪᓗᑎᒃ.
ᐅᓪᓗᒥ ᑲᑎᒪᓂᐅᕐᖃᐅᔪᖅ ᐱᕕᑦᓴᑖᕐᕕᒋᕐᖃᐅᔭᕗᑦ ᑐᕃᓐᓇᕕᒋᑦᓱᒋᑦ ᐅᖃᓕᒪᕕᖃᕈᓐᓇᓯᑦᓱᑕ ᑲᓇᑕᐅᑉ ᐊᖓᔪᕐᖄᖓᓂᒃ ᑐᕐᖃᑕᕐᕕᖏᓐᓂᓗ ᓄᓇᕕᒻᒥ ᓯᕗᓪᓕᐅᔭᐅᒋᐊᓖᑦ ᐱᑦᔪᑎᒋᑦᓱᒋᑦ, ᐃᓚᒋᔭᐅᑎᓪᓗᒋᑦ ᐃᓪᓗᓕᕆᓂᖅ, ᓂᕿᑦᓴᖃᕆᐅᖃᕐᓂᖅ ᐊᑭᑐᔫᓗᐊᖕᖏᑐᓂᒃ, ᐃᓗᓯᓕᕆᓂᖅ ᐊᒻᒪᓗ ᖃᓄᐃᖕᖏᓯᐊᕐᓂᖅ, ᐃᓕᓴᕐᓂᓕᕆᓂᖅ, ᐊᒻᒪᓗ ᐅᑭᐅᕐᑕᑐᒥᒃ ᓇᖕᒥᓂᖃᕐᓂᕋᕐᓂᖅ. ᑲᓇᑕᐅᑉ ᑲᕙᒪᖓᓂᒃ ᓯᕗᓂᕐᒥ ᐱᓇᓱᐊᖃᑎᖃᖏᓐᓇᓂᕆᓚᖓᔭᕗᑦ ᐊᑯᓂᐅᒋᕙᕗᑦ ᐃᓄᐃᑦ ᓯᕗᓪᓕᐅᔭᐅᖁᔭᖏᓐᓂᒃ ᐱᓇᓱᐊᕐᑕᐅᖏᓐᓇᓯᐊᖁᔨᒧᑦ ᑐᑭᑖᕐᑕᐅᓂᐊᕐᑐᓂᑦ ᐅᑭᐅᕐᑕᑐᒥ ᓯᕗᓂᑦᓴᐅᓚᖓᔪᒥᒃ ᐋᕐᕿᓱᐃᒍᑎᐅᓗᑎᒃ.”
ᑰᒃᔪᐊᒦᓐᓂᖓ ᑲᑎᒪᓂᐅᑉ ᑲᓇᑕᐅᑉ ᑭᒡᒐᑐᕐᑎᖏᓐᓄᑦ ᐃᓄᐃᓪᓗ ᓯᕗᓕᕐᑎᖏᓐᓄᑦ ᐱᕕᑦᓴᖃᕐᕕᐅᒋᐊᓪᓚᖃᐅᔪᖅ ᐳᓛᕆᐊᕈᓐᓇᓯᑎᑦᓱᒋᑦ ᐊᑐᕐᑕᐅᓗᐊᕐᓂᖏᑦᑕ ᓄᓇᓕᓕᒫᓄᐊᖓᔪᓂᒃ ᐱᓇᓱᐊᕐᑌᑦ ᐃᓚᖏᓐᓄᑦ ᐅᖄᖃᑎᒌᒋᐊᓪᓚᕕᑦᓴᑖᕐᕕᐅᓱᑎᓗ ᐃᓪᓗᓕᕆᓂᕐᒥᒃ, ᖃᓄᐃᖕᖏᓯᐊᕐᓂᒥ, ᐊᒻᒪᓗ ᓄᓇᓕᒻᒥ ᐱᐅᒃᑯᑎᒻᒪᕆᓂᒃ.
ᑲᑎᒪᒌᑐᐊᕐᒪᑕ, ᐃᓘᓐᓇᑎᒃ ᐃᓱᐊᕐᓯᕕᒻᒧᑦ ᒪᒥᓴᕐᕕᒧᑦ ᐁᑎᑕᐅᕐᖃᐅᔪᑦ ᑰᒻᒧᑦ ᓵᖕᖓᓗᐊᑦᓯᐊᑐᒧᑦ, ᑌᑲᓂᓗ ᑲᑎᒪᒋᐊᕐᓯᒪᔪᑦ ᑲᑎᒍᑎᖃᕐᖃᐅᓱᑎᒃ ᓂᕿᑐᐃᓐᓇᑐᖃᑎᒌᑦᓱᑎᒃ ᑏᑐᖃᑎᖃᒌᑦᓱᑎᓗ ᑲᓇᑕᐅᑉ ᐊᖓᔪᕐᖄᖓ ᐊᐅᓪᓚᕆᐊᕐᑐᒋᐊᖃᖕᖏᓂᖓᓂ. ᐅᓪᓗᒥ ᑲᑎᒪᓂᐅᕐᖃᐅᔪᖅ ᓇᓗᓀᕐᓯᖃᐅᔪᖅ ᓯᕗᓪᓕᐹᒥ ᑲᓇᑕᐅᑉ ᐊᖓᔪᕐᖄᖓᑕ ᑰᒃᔪᐊᓕᐊᕐᓂᖓᓂᒃ ᑌᒪᖕᖓᓂᑦ ᐊᕗᓐᓂᑎ 2008ᖑᓕᕐᓂᒪᓂᑦ, ᑌᑦᓱᒪᓂ ᑲᓇᑕᐅᑉ ᐊᖓᔪᕐᖄᕆᓯᒪᔭᖓ ᓯᑏᕙᓐ ᖄᕐᐳ ᓄᓇᕕᓕᐊᓚᐅᕐᓯᒪᒻᒪᑦ ᓄᓇᕕᒃ ᐃᓄᐃᑦ ᓄᓇᑖᕐᓂᒧᑦ ᐊᖏᖃᑎᒌᓐᓂᖓᑕ ᐊᑐᓕᕐᑎᑕᐅᓂᖓ ᖁᕕᐊᓱᒍᑎᐅᑎᓪᓗᒍ. ᒪᑭᕝᕕᒃ ᓇᑯᕐᒦᑐᖅ ᐃᓱᐊᕐᓯᕕᒻᒥᒃ ᐃᓂᒥᓂᒃ ᐊᑐᕐᑕᐅᑎᑦᓯᒍᓐᓇᖃᐅᒻᒪᑕ ᑲᑎᒪᒋᐊᕐᓯᒪᔪᓄᑦ ᐱᓇᓱᐊᖃᑎᕗᓐᓂᓗ ᐃᓄᐃᑦ ᑕᐱᕇᑦ ᑲᓇᑕᒥᒃᑯᓂᒃ ᐱᓇᓱᐊᕐᓯᒪᓂᖏᓐᓄᑦ ᑖᑦᓱᒪ ᑲᑎᒪᓂᐅᑉ ᑲᔪᓯᑎᑕᐅᒍᑎᖏᓐᓂᒃ ᐊᒻᒪᓗ ᒪᑭᕝᕕᑯᓐᓂᒃ ᓄᓇᓕᖓᓂᓪᓗ ᑰᒃᔪᐊᒥᒃ ᐱᕕᖃᕐᑎᑕᐅᓂᕐᒥᓄᑦ ᑲᑎᖕᖓᒋᐊᕐᕕᐅᒍᓐᓇᑎᑦᓱᒋᑦ ᐊᒻᒪᓗ ᑲᓇᑕᐅᑉ ᐊᖓᔪᕐᖄᖓᓂᒃ ᓄᓇᕕᒻᒧᑦ ᑐᖕᖓᓱᑦᑎᓯᒍᓐᓇᓂᕐᒥᒃ ᐱᕕᖃᕐᓂᒧᑦ.
–30–
ᖃᐅᔨᒋᐊᕐᕕᓴᖅ:
ᑳᑐᕆᓐ ᒧᐊᕆᓪ
ᑐᑭᒧᐊᑦᑎᓯᔨ ᑐᓴᐅᒪᖃᑎᒌᓐᓂᓕᕆᓂᕐᒥ, ᒪᑭᕝᕕᒃ
kmorrill@makivvik.ca
www.makivvik.ca
ᒪᑭᕝᕕᒃ ᓄᓇᑖᕐᓂᒧᑦ ᑎᒥᐅᔪᖁᑎᒋᔭᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᒋᔭᖃᕐᓂᐊᑎᓪᓗᒍ ᑭᖑᕝᕕᑕᐅᒍᑎᓄᑦ ᓄᓇᕕᒻᒥ ᐃᓄᑐᐃᓐᓀᑦ ᑮᓇᐅᔭᖁᑎᖏᓐᓂᒃ ᐱᑕᖃᕐᑎᑕᐅᔪᓂᒃ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᑎᒍᑦ. ᒪᑭᕝᕕᐅᑉ ᖃᓄᐃᓘᕐᑎᐅᒋᐊᖃᕐᓂᖓᑕ ᐃᓚᖓ ᐱᕈᕐᑎᓯᓂᖅ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒍᑎᑦᓴᓕᐅᕐᓂᒥᒃ ᐱᑕᖃᕐᑎᓯᓂᕐᒥᒍ ᐃᑲᔪᕐᓯᒍᑎᓂᒃ ᐃᓄᑐᐃᓐᓇᓄᑦ-ᐊᐅᓚᑕᐅᓂᐊᕐᓗᑎᒃ ᖄᖏᕐᓂᑯᓕᐅᕐᕖᑦ ᓄᐃᑎᕐᑕᐅᓂᖏᓐᓄᑦ ᓄᓇᕕᒻᒥ. ᒪᑭᕝᕕᒃ ᐃᑲᔪᕐᓯᒪᔪᖅ ᐃᓄᒃᑎᑐᑦ ᐃᓗᕐᕈᓯᐅᑉ ᐅᖃᐅᓯᐅᓪᓗ ᐱᐅᓕᐊᕐᑕᐅᓂᒋᓐᓂᒃ, ᐃᓚᒋᔭᐅᒻᒥᑎᓪᓗᒋᑦ ᐃᓗᓯᓕᕆᓂᖅ, ᐃᑲᔪᕐᓯᐅᑎᓕᕆᓂᖅ, ᐊᔪᕐᓴᓗᐊᕐᓂᒥᒃ ᐃᑯᓪᓚᑎᑦᓯᓂᕐᒥᒃ, ᐊᒻᒪᓗ ᐃᓄᑐᐃᓐᓀᑦ ᓄᓇᓕᓐᓂᑦ ᐃᓕᓐᓂᐊᓂᖏᓐᓂᒃ.