ᓅᕕᒻᐱᕆ 9, 2018, ᑰᑦᔪᐊᖅ, ᓄᓇᕕᒃ – ᒪᑭᕝᕕᒃ ᑯᐊᐳᕇᓴ ᐃᓱᒫᓗᑉᐳᖅ ᐃᖃᓗᒻᒥᐅᓂᒃ ᑐᓴᓚᐅᕐᓱᑎᒃ ᓂᐅᕕᕐᕕᖓ Northmart ᐃᑯᐊᓪᓚᓚᐅᕐᑎᓗᒍ ᐃᓪᓗᔪᐊᖓᑕ ᐃᓚᖓ ᐃᓗᓕᖏᓪᓗ ᓱᒃᑯᓱᑎᒃ. ᒪᑭᕝᕕᒃ ᑕᒪᑦᓱᒨᓇ ᐃᑲᔪᕈᒪᔪᖅ.
“ᐅᑉᐱᓇᖕᖏᑐᕋᑕᖅ ᑕᒪᓐᓇ ᓄᓇᕗᒻᒥᐅᑦ ᑐᑦᑕᕕᓪᓚᕆᖓᓂᒃ ᐃᓄᒋᐊᑦᑐᓂᕐᐹᒥᒃ ᑌᒣᓕᔪᖅ ᐱᒍᑦᔨᕕᓪᓚᕆᐅᑦᓱᓂᓗ ᑲᓇᓐᓇᒥᐅᓂᒃ,” ᐅᖃᓚᐅᕐᑐᖅ ᐊᖓᔪᕐᖄᖅ ᓵᓕ ᒍᐊᑦ.
ᐅᒥᐊᕐᔪᐊᑰᕐᑎᓯᓂᖅ ᐅᒃᑯᐊᖃᒻᒥᐅᔪᖅ ᐅᑭᐅᕐᒪᑦ. ᐅᓯᒍᑎᑦᓭᕈᕐᓂᖅ ᐱᑕᖃᕆᐊᖃᓚᖓᔪᓂ ᑕᒡᒐᓂ ᐅᑭᐅᒥ ᐃᓱᒫᓗᓐᓇᑐᓪᓚᕆᐅᔪᖅ ᐊᑭᑐᔪᐊᓘᒻᒪᑦ ᖃᖓᑦᑕᔫᒃᑯᑦ ᑎᑭᓭᑲᑦᑕᓂᖅ ᐅᑭᐅᕐᑕᑐᒧᑦ.
“ᖃᐅᔨᒪᖁᔨᕗᒍᑦ ᓄᓇᕗᒻᒥᐅᑦ ᓯᕗᓕᕐᑎᖏᓐᓂ ᐃᑲᔪᕈᓐᓇᕈᑦᑕ ᐃᑲᔪᕈᒪᒐᑦᑕ. ᖃᐅᔨᒋᐊᕐᕕᖃᑐᐃᓐᓇᕆᐊᖃᕐᑐᓯ ᐅᕙᑦᑎᓂᒃ ᒪᑭᕝᕕᑯᓐᓂ, ᐊᑐᐃᓐᓇᐅᕗᒍᑦ ᓴᐳᑦᔨᓯᒪᒍᓐᓇᕋᑦᑕ ᐃᖃᓗᒻᒥᐅᑦ ᓂᐅᕕᕐᕕᑖᖕᖏᓂᖏᓐᓂ,” ᐅᖃᓚᐅᕐᑐᖅ ᓵᓕ ᒍᐊᑦ.
ᒪᑭᕝᕕᒃ ᑯᐊᐳᕇᓴ ᓇᒻᒥᓂᖁᑎᓕᒃ ᒪᕐᕉᓂᒃ ᐱᒻᒪᕇᓐᓂ ᖃᖓᑦᑕᔫᓂ ᑲᓇᑕᐅᑉ ᐅᑭᐅᕐᑕᑐᖓᓂ, ᕘᔅᑦ ᐃᐊ ᐊᒻᒪᓗ ᐃᓄᐃᑦ ᐱᒍᑦᔨᐸᑦᑑᓂᒃ ᐅᓯᒍᑦᔨᓂᕐᒥᒃ ᓄᓇᓕᓐᓄᑦ.
-30-
ᖃᐅᔨᒋᐊᕐᕕᐅᒍᓐᓇᑐᖅ:
ᒍᐃᓕᐊᒻ ᑕᒍᕐᓈᖅ
ᑐᑭᒧᐊᑦᑎᓯᔨ ᑐᓴᐅᒪᖃᑎᒌᓐᓂᓕᕆᕕᒻᒥ
ᒪᑭᕝᕕᒃ ᑯᐊᐳᕇᓴ
ᐅᖄᓚᐅᑎᖓ: 819-964-2925
wtagoona@makivik.org
ᒪᑭᕝᕕᒃ ᓄᓇᑖᕋᓱᐊᕐᓂᒧᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᓂᖃᕐᓱᓂ ᑲᒪᒋᔭᖃᕆᐊᖃᕐᓂᒥᒃ ᐊᑭᓕᕐᑕᐅᒍᑎᐅᓯᒪᔪᓂᒃ ᓄᓇᕕᐅᑉ ᐃᓄᖏᓐᓄᑦ ᓄᐃᑕᐅᒪᔪᓂᒃ ᔦᒥᔅ ᐯᓗ ᑯᐯᒃ ᑕᕐᕋᖓᑕᓗ ᐊᖏᖃᑎᒌᓐᓂᖓᑕ ᐊᑖᒍᑦ. ᒪᑭᕝᕕᐅᑉ ᖃᓄᐃᓘᕐᑎᐅᓂᖓ ᐃᓚᖓᕐᐳᖅ ᐊᐅᓚᑦᓯᓂᕐᒥᒃ ᑮᓇᐅᔭᓕᐅᕈᑎᖃᕋᓱᐊᕐᓂᒥᓪᓗ ᑕᒃᑯᓂᖓ ᐊᑭᓕᕐᑕᐅᒍᑎᐅᓯᒪᔪᓂᒃ ᐊᒻᒪᓗ ᑫᓪᓗᑐᐃᔨᐅᑦᓱᓂ ᒪᑭᑕᒐᓱᐊᕐᓂᑯᑦ ᐱᕈᕐᐸᓕᐊᑎᑦᓯᓂᕐᒥᒃ ᐃᑲᔪᕐᓯᓂᕐᒥᒍᑦ ᓄᐃᑕᐅᔪᖃᓕᑐᐊᕐᒪᑦ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᒃ ᑫᓪᓗᑐᐃᓲᖑᕗᖅ ᐊᓯᐅᑎᑦᓯᑌᓕᒪᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᒪᑯᓂᖓᓗ ᖃᓄᐃᖕᖏᓯᐊᕐᓂᖏᓐᓂ, ᐃᓗᓯᕐᓱᓯᐊᕐᓂᖏᓐᓂ, ᐊᑦᓱᔫᓂᕐᒥ ᐃᑯᓪᓚᐅᒥᑎᑦᓯᓂᕐᒥᒃ ᐊᒻᒪᓗ ᐃᓕᓐᓂᐊᓂᖏᓐᓂ ᐃᓄᐃᑦ ᓄᓇᓕᓐᓃᑐᐃᑦ.