ᑰᒃᔪᐊᖅ, ᓇᑦᔪᐃᔭᕐᕕᒃ 19, 2026 – ᒪᑭᕝᕕᐅᑉ ᑎᒥᖓ (“ᒪᑭᕝᕕᒃ”), Newfound Resources Limited ᑎᒥᖓ (“NRL”), Fame Fisheries Limited ᑎᒥᖓ (“FFL”) ᓇᑯᕐᓴᐳᑦ ᐅᓐᓂᓯᐅᕈᑎᖃᕈᓐᓇᕋᒥᒃ ᓯᕗᓂᕐᑖᕈᑎᒥᒃ ᐊᓪᓚᒍᑏᑦ ᐊᑎᓕᐅᕐᕕᐅᓂᖏᓐᓂᒃ ᐱᑦᔪᑎᖃᕐᑎᓗᒋᑦ ᒪᑭᕝᕕᐅᑉ ᑫᒥᓯᒪᔭᖓᓂᒃ ᑐᖕᖓᕖᕐᓂᓴᒥᒃ ᐃᓚᐅᕐᑑᑎᒌᒧᑦ NRL-FFL-ᑯᑦ ᐃᖃᓗᓐᓂᐊᓂᕐᒧᑦ ᓂᕿᑦᓴᓯᐊᕐᓂᒧᓪᓗ ᑎᒥᖓᓄᑦ ᖃᓗᓯᑎᓪᓗᒍ NRL-ᑯᑦ ᐃᒪᕐᐱᒪᕆᒻᒥ ᑭᖑᕐᓚᓂᒃ ᐱᔪᓐᓇᐅᑎᖓᓂᒃ.
ᓂᐅᕐᕈᑕᐅᓂᖓᓄᑦ ᐃᓂᓪᓚᕈᑏᑦ ᐊᑖᒍᑦ, ᒪᑭᕝᕕᒃ ᐱᒐᔭᕐᑐᖅ ᐊᐅᓚᑦᓯᔪᓂᒃ ᑯᒻᒪᓲᑎᖃᕈᑎᓂᒃ NRL-ᒥ ᐃᓚᒌᖏᓐᓂᒃ ᐃᓚᖃᕐᑎᓗᒋᑦ ᐱᖃᕈᑎᓂᒃ ᑖᒃᑯᐊ ᐃᓚᒌᑦ ᐅᒥᐊᖏᓐᓂᒃ ᐃᖃᓗᓐᓂᐊᕈᑎᓂᒃ, ᑌᓗᒋᒃ Newfoundland Victor ᐊᒻᒪᓗ Newfound Pioneer.
ᓂᐅᕕᕈᒪᓂᕐᒥᒃ ᓄᐃᑦᓯᒍᑎ ᐱᕕᑖᕐᑎᓯᒐᔭᕐᑐᖅ ᒪᑭᕝᕕᐅᑉ ᓅᓐᓂᖓᓂᒃ ᐊᑯᓂᐊᓗᒃ ᐊᑑᑎᒋᓕᕐᑕᒥᓂᒃ ᐃᖃᓗᓐᓂᐊᓂᕐᒥᒃ ᐱᔪᓐᓇᐅᑎᒥᒃ ᐊᒻᒪᓗ ᑰᑕᓂᒃ ᓄᐃᑦᑕᓯᔨᑐᐃᓐᓇᐅᓱᓂ ᐱᖃᓪᓚᕆᓯᓗᓂ ᐃᓚᐅᕐᑑᑎᒌᒥᒃ ᑎᒥᒥᒃ ᑲᒪᔪᒥᒃ ᓂᕿᑦᓴᓂᐊᕐᓂᒥᒃ, ᐅᒥᐊᓂᒃ ᐃᖏᕐᕋᑎᑦᓯᓂᒥᒃ, ᑎᒥᒥᒃ ᑲᒪᔨᐅᓂᕐᒥᒃ ᐊᒻᒪᓗ ᓂᐅᕐᕈᑎᑦᓴᕈᐃᓂᕐᒥᒃ.
ᑕᒪᓐᓇ ᐱᕙᓪᓕᐊᒍᑎ ᓯᕗᓂᖃᕈᑕᐅᕗᖅ ᑐᑭᒧᐊᒍᑎᔪᓕᐅᕐᓂᒥᒃ ᒪᑭᕝᕕᐅᑉ ᐃᓱᐊᖁᑎᑎᒍᑦ ᐊᒻᒪᓗ ᑮᓇᐅᔭᑎᒍᑦ ᐱᕕᖃᕈᑎᖏᓐᓂᒃ NRL-ᑯᑦ FFL-ᑯᓪᓗ ᒪᑭᑎᓯᒪᔭᖏᓐᓄᑦ ᓂᐅᕐᕈᓯᕐᓂᒥᒃ ᐱᔪᓐᓇᕈᑎᓄᑦ, ᓲᖑᓯᑎᑦᓯᓗᓂ ᐃᓄᐃᑦ ᐱᖃᕐᓂᖓᓂᒃ ᐊᒻᒪᓗ ᐃᓚᐅᕕᖃᕐᓂᖓᓂᒃ ᑕᕆᐅᒥ ᐃᖃᓗᓐᓂᐊᓂᕐᒥᒃ ᐱᓇᓱᐊᕐᕕᓂ ᐊᒻᒪᓗ ᐊᕐᕌᒍᐃᑦ ᖁᓕᐅᓈᕐᑎᑐᑦ ᐊᒥᓱᑦ ᐱᓇᓱᖃᑎᒌᒍᑕᐅᔪᑦ ᐊᒻᒪᓗ ᐱᖃᑎᒌᒍᑕᐅᔪᑦ ᑎᒥᐅᔪᑎᒍᑦ ᖄᖓᓄᑦ ᓴᓇᒋᐊᓪᓚᓂᕐᒥᒃ:
“ᐃᖃᓗᓐᓂᐊᓂᖅ ᐊᑯᓂᐊᓗᒃ ᐱᒻᒪᕆᐅᑦᓱᓂ ᐃᓚᐅᕗᖅ ᓄᓇᕕᒻᒥ ᒪᑭᑕᐅᑎᓄᑦ, ᐊᒻᒪᓗ ᐊᑦᓱᕈᕐᓱᑕ ᐱᓇᓱᖃᑦᑕᓯᒪᕗᒍᑦ ᐊᕐᕌᒍᓂ ᐊᓂᒍᕐᓯᒪᔪᓂ ᓴᓇᑦᓱᑕ ᓂᑲᓇᖕᖏᑐᒥᒃ ᐃᓄᐃᑦ ᓂᑦᑕᖃᑕᐅᓂᖓᓂᒃ ᑕᕝᕙᓂ ᐱᓇᓱᒐᕐᒥ. ᑖᓐᓇ ᐱᔪᓐᓇᓯᒍᑎ ᓄᑖᖅ ᑕᒪᑐᒪ ᖃᐅᑦᔨᓴᐅᑎᒋᓯᒪᔭᑦᑕ ᐊᒻᒪᓗ ᐱᖃᑎᖃᕈᑎᑦᑕ ᖄᖓᓂ ᓴᓇᕗᖅ ᓱᕐᖁᐃᓯᒪᑎᓪᓗᒍ ᓂᑲᓇᖕᖏᓂᖓ ᐊᑯᓂᐅᔪᕐᑎᒍᑦ. ᑕᑯᓐᓇᐳᒍᑦ ᐃᓱᒣᓐᓇᖅ ᐱᒍᓐᓇᓂᑦᑎᓂᒃ ᐊᑕᐅᑦᓯᑯᑦ ᐱᕈᕐᓂᒥᒃ, ᐱᖕᖑᐃᓗᑕᓗ ᐊᑯᓂᕆᓛᕐᑐᓂᒃ ᐱᔪᓐᓇᓯᒍᑎᑦᓴᓂᒃ ᐃᓄᖁᑎᑦᑎᓄᒃ ᐊᒻᒪᓗ ᓂᑲᓀᓪᓕᑎᕆᐅᑎᑦᓴᒥᒃ ᒪᑭᑕᐅᑎᑎᒍᑦ ᓄᓇᕕᐅᑉ ᓯᕗᓂᑦᓴᖃᕐᓂᖓᓂᒃ.
ᑌᒣᑦᑐᓂᒃ ᑕᒐ ᑮᓇᐅᔦᕈᑎᒋᔪᒥᓇᕐᑐᓂᒃ ᑲᔪᓯᑎᑦᓯᖃᑦᑕᕈᒪᕗᒍᑦ ᑭᖑᕚᖑᓚᖓᔪᑦ ᐱᑦᔪᑎᒋᓗᒋᑦ”.
-ᐱᑕ ᐋᑕᒥ, ᐊᖓᔪᕐᖄᖅ, ᒪᑭᕝᕕᒃ
“ᐊᕐᕌᒍᐃᑦ 20 ᐊᓂᒍᕐᑐᑦ ᑕᑯᒍᑕᐅᓯᒪᕗᑦ ᐃᑲᔪᕐᑎᒌᓪᓚᕆᓐᓂᒥᒃ ᓴᓇᔭᐅᔪᒥᒃ ᓂᑲᓇᖕᖏᑐᒧᑦ ᐊᒻᒪᓗ ᓱᕐᕋᑲᑦᑕᖏᑦᑐᒧᑦ ᒪᑭᕝᕕᐅᑉ ᐊᒻᒪᓗ Newfound Resources Limited ᑎᒥᖏᑦᑕ ᐱᖃᑎᒌᓐᓂᖓᓄᑦ. ᑖᓐᓇ ᐅᓪᓗᒥ ᐱᔪᓐᓇᓯᒍᑎ ᓴᓇᕗᖅ ᐅᓪᓗᒥ ᐊᔪᐃᓐᓇᕈᑕᐅᔪᑦ ᖄᖓᓂ ᐊᖏᓪᓕᑎᕆᑦᓱᓂ NRL-ᑯᑦ ᐱᓇᓱᑦᑕᖏᑕ ᑎᑭᐅᑎᔮᖓᓂᒃ ᐊᒻᒪᓗ ᐱᕈᕐᐸᓕᐊᑎᑦᓯᓱᓂ ᑖᑦᓱᒪ ᑎᒥᖓᓂᒃ ᑭᖑᕚᓄᑦ ᙯᔪᓄᑦ ᑐᕌᕐᓂᑎᓐᓂ. ᑕᑯᑦᓱᓂ NRL/FFL-ᑯᑦ ᓂᑲᓇᖕᖏᑐᓂᒃ ᐊᒻᒪᓗ ᐊᓯᑦᔨᑕᖕᖏᑐᓂᒃ ᐊᐅᓚᑦᓯᔨᖃᕐᓂᖓᓂᒃ, 30-ᓂ ᐊᕐᕌᒍᓂ ᑐᖓᓕᕇᓂ ᖄᖏᕐᓂᑯᓕᐅᕐᑎᓯᓯᒪᔪᓂᒃ, ᑖᓐᓇ ᐱᖃᑎᒌᒍᑎ ᑲᔪᓯᓚᖓᔪᖅ ᐃᑲᔪᕐᓂᒥᓂᒃ ᐃᓚᒌᓂᒃ ᓄᓇᕕᓕᒫᒥ, ᐃᓄᐃᑦ ᓄᓇᖓᓐᓂ ᐊᒻᒪᓗ ᓂᐅᕙᓐᓛᓐᑦᒥ ᓛᐸᑐᐊᒥᓗ.”
-ᐋᓐᑎ ᒧᐊᖃᐅᔅ, ᐊᖓᔪᕐᖄᒧᑦ ᑐᖓᓕᖅ ᒪᑭᑕᐅᑎᓂᒃ ᐱᕙᓪᓕᐊᓂᕐᒧᑦ, ᒪᑭᕝᕕᒃ
“ᑖᓐᓇ ᐋᕐᕿᓱᕐᑕᐅᔪᖅ, ᐃᓚᖃᓕᕐᓗᓂ ᖃᒻᒥᖅ ᐱᑖᖑᓚᐅᔪᔪᒥᒃ ᐅᒥᐊᒥᒃ ᑭᖑᕐᓚᓂᐊᕈᑎᒥᒃ ᐊᒻᒪᓗ ᐊᖏᓕᐅᒥᓯᒪᓪᓚᕆᑦᑐᓂᒃ ᒪᑭᕝᕕᑯᑦ ᑰᑕᖏᓐᓂᒃ ᓄᓇᑖᕐᕕᒋᓯᒪᔭᒥᓂ, ᒪᑭᕝᕕᒃ/NRL-ᒥᒃ ᐊᖏᓂᕐᐹᕈᕐᑎᓯᓚᖓᔪᖅ ᑭᖑᕐᓚᓂᒃ ᐱᕕᓕᒫᓄᑦ ᑳᓇᑕᒥ. ᓱᓕᒋᐊᓪᓚᒃ, ᑕᕐᓯᕈᑕᐅᒻᒥᔪᖅ ᖃᒻᒥᖅ ᓱᖑᒋᐊᕐᓂᒪᕆᐅᓯᒪᔫᑦ ᑲᔪᓯᓂᖓᓄᑦ ᑐᕌᓯᑎᓪᓗᒋᑦ
ᑕᕐᕋᒥᐅᑦ/ᓄᓇᖃᕐᖄᓯᒪᔪᑦ ᐊᐅᓚᑦᓯᔨᐅᓂᖓᓄᑦ ᑳᓇᑕᐅᑉ ᑕᕆᐅᖓᓂ ᑕᕐᕋᒥᐅᔭᓂᒃ ᑭᖑᕐᓚᓂᐊᕐᓂᐅᑉ ᐱᓇᓱᐊᒐᖓᓂᒃ, ᐃᓘᓐᓇᓂ ᐱᔭᐅᑎᓪᓗᒍ ᓂᐅᕐᕈᓯᕈᑎᓂᒃ ᐋᕐᕿᓱᐃᓂᑐᐃᓐᓇᑯᑦ. ᐊᓕᐊᓱᒃᑯᒍᑦ ᐃᓚᐅᒐᑦᑕ ᑕᒪᑐᒧᖓ ᐊᓯᑦᔨᕈᑎᒻᒪᕆᒻᒧᑦ ᐊᒻᒪᓗ ᓂᕆᐅᑦᓯᐊᐳᒍᑦ ᓱᓕᒋᐊᓪᓚᒃ ᐱᒍᑎᑦᓴᓂᒃ ᐱᓇᓱᐊᓚᖓᓂᑦᑎᓂᒃ ᐊᑯᐊᓂᓗᒃ ᐱᖃᑎᒋᓕᕐᑕᕗᑦ ᐃᓚᓐᓈᕆᑦᓱᒋᓪᓗ ᒪᑭᕝᕕᑯᑦ ᐃᓚᒋᓗᒋᑦ.”
-ᐳᕃᐊᓐ ᒫᒃᓇᒫᕋ, ᑲᑎᒪᔩᑦ ᐊᖓᔪᕐᖄᖓᑦ, NRL ᐊᒻᒪᓗ FFL
ᐱᐅᑦᓴᑐᒻᒪᕆᐅᕗᒍᑦ ᐃᓚᒌᓐᓂᑎᓐᓂᒃ ᐊᒻᒪᓗ ᐃᑲᔪᕐᑎᒌᑦᓯᐊᑐᒻᒪᕆᐅᓂᕐᒥᒃ ᒪᑭᕝᕕᑯᓪᓗ ᐱᕙᓪᓕᐊᓯᒪᔭᑦᑎᓂᒃ 2004-ᒥᓂᒃ. ᑖᓐᓇ ᑮᓇᐅᔦᕈᑎ ᐊᑐᕐᑐᓴᕈᕐᐳᖅ ᐊᒻᒪᓗ ᐱᔪᓐᓇᓯᑎᑦᓯᕗᖅ ᒪᑭᕝᕕᐅᑉ ᖃᓂᓗᐊᖕᖑᐊᑐᒥᒃ ᐱᓇᓱᖃᑕᐅᓂᖓᓂᒃ ᐱᓇᓱᓐᓂᑎᓐᓄᑦ ᐃᖃᓗᓐᓂᐊᓂᕐᒥᒃ ᐊᒻᒪᓗ ᑎᒥᑦᑕ ᐃᓗᐊᒍᑦ ᓄᓇᕐᔪᐊᓕᒫᓄᑦ ᓂᐅᕐᕈᓯᕈᑎᓂᒃ ᐊᒻᒪᓗ ᓂᐅᕐᕈᓯᕋᓱᐊᕈᑎᓂᒃ, ᑐᖕᖓᕕᖃᕐᑎᓗᒍ ᓂᐅᕙᓐᑦᓛᓐᑦᒥ ᐊᒻᒪᓗ ᓈᐸᑐᐊᒥ. ᐃᓚᒌᓕᐅᕐᓂᖅ ᑯᒻᒪᓲᑎᑦᑎᓂᒃ ᐅᕙᑦᑎᓂᒃ ᐱᕕᑖᕐᑎᓯᓚᖓᔪᖅ ᐊᖏᓕᒋᐊᓪᓚᓂᕐᒥᒃ ᐊᒻᒪᓗ ᐱᐅᓯᒋᐊᕆᓂᕐᒥᒃ ᐱᕙᓪᓕᖁᑎᓂᒃ ᓄᓇᕕᒻᒧᑦ, ᐱᕕᓕᐅᕐᓗᓂᓗ ᐊᑯᓂᐅᔪᑎᒍᑦ ᐅᒥᐊᕐᑐᑏᑦ ᓴᑑᒪᓂᖓᓂᒃ ᐊᒻᒪᓗ ᐱᕕᓕᐅᕐᒥᓗᓂ ᓱᓕᒋᐊᓪᓚᒃ ᖃᑭᓴᐅᑎᒥᒃ ᐱᕈᕐᓴᑎᑦᓯᓂᑦᑎᓂᒃ ᑲᑐᑦᔨᓗᑕ.
-ᒫᒃ ᑯᐃᓐᓚᓐ, ᐊᖓᔪᕐᖄᖅ ᐊᐅᓚᑦᓯᔨᒻᒪᕆᒃ, NRL ᐊᒻᒪᓗ FFL
ᓂᐊᕕᕐᓂᐅᑉ ᐱᔭᕇᕐᑕᐅᓂᖓ ᓱᓕ ᐅᑕᕐᕿᒋᐊᖃᖏᓐᓇᑐᖅ ᐃᑉᐱᒍᓱᑦᓯᐊᓗᓂ ᕿᒥᕐᕈᔭᐅᓂᕐᒥᒃ ᐊᒻᒪᓗ ᐊᑦᑐᐊᔪᔨᖏᓐᓂᒃ ᐊᓪᓚᖁᑎᓂᒃ. ᓂᕆᐅᓐᓇᑐᖅ ᑖᓐᓇ ᓂᐅᕕ
–30 –
ᐅᖃᕐᕕᓴᖅ:
ᑳᑕᕆᓐ ᒧᐊᕆᓪ
ᑐᓴᕈᑎᓕᕆᓂᕐᒥᒃ ᑐᑭᒧᐊᑦᑎᓯᔨ, ᒪᑭᕝᕕᒃ
kmorrill@makivvik.ca
www.makivvik.ca
ᒪᑭᕝᕕᒃ ᓄᓇᑖᕈᑎᒥᒃ ᑲᒪᓂᕐᒧᑦ ᑎᒥᐅᕗᖅ ᑎᓕᔭᐅᒍᑎᖃᕐᓯᒪᑦᓱᓂ ᐊᐅᓚᑦᓯᔨᐅᓂᕐᒥᒃ ᕿᒻᒪᖁᓯᐊᓂᒃ ᐃᓄᐃᑦ ᓄᓇᕕᒻᒥ ᑮᓇᐅᔭᖏᓐᓂᒃ
ᓄᐃᑕᐅᓯᒪᔪᓂᒃ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓐᓂᐅᑉ ᐊᑖᒍᑦ. ᒪᑭᕝᕕᐅᑉ ᐊᑑᑎᖓ ᐃᓚᖃᕐᖁᖅ ᐊᐅᓚᑦᓯᓂᕐᒥᒃ ᐊᒻᒪᓗ
ᑐᖕᖓᕖᕈᑎᓕᐅᕐᓂᒥᒃ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᑫᓪᓗᐊᓂᕐᒥᒃ ᒪᑭᑕᐅᑎᑎᒍᑦ ᐱᕙᓪᓕᐊᒍᑎᓂᒃ ᓄᐃᑕᑦᓯᓗᓂ ᐃᑲᔪᕐᓯᒪᓂᕐᒥᒃ
ᐱᖕᖑᐃᒍᑎᓄᑦ ᐃᓄᐃᑦ-ᐱᖏᓐᓂᒃ ᖃᑭᓴᐅᑎᓂᒃ ᓄᓇᕕᐅᑉ ᐃᓗᐊᓂ. ᒪᑭᕝᕕᒃ ᑫᓪᓗᐊᐳᖅ ᐱᐅᓕᒪᑦᓯᓂᕐᒥᒃ ᐃᓄᐃᑦ ᐃᓗᕐᖁᓯᖓᓂᒃ ᐊᒻᒪᓗ
ᐅᖃᐅᓯᖓᓂᒃ ᐊᒻᒪᓗ ᐃᓗᓯᕐᓱᓂᖓᓂᒃ, ᖃᓄᐃᖕᖏᓂᖓᓂᒃ, ᐊᔪᕐᓴᓂᕐᒥᒃ ᓴᑐᕈᑎᖏᓐᓂᒃ, ᐊᒻᒪᓗ ᐃᓄᐃᑦ ᓄᓇᓕᓐᓂ
ᐃᓕᓐᓂᐊᑎᑕᐅᓂᖓᓂᒃ
