ᑐᓴᕋᑦᓴᓂᐅᑎᑎᒍᑦ ᑐᓴᕐᑎᓯᒍᑕᐅᔪᑦ
ᒫᑦᔨ 19, 2019 – ᐊᐅᐸᓗᒃ, ᓄᓇᕕᒃ – ᒪᑭᕝᕕᐅᑉ ᐊᖓᔪᕐᖄᒪᕆᖓ ᓵᓕ ᒍᐊᑦ ᐅᖃᐅᓯᖃᕆᐊᖕᖓᖃᐅᕗᖅ ᑐᓴᕐᓱᓂ ᖃᓄᐃᓕᓂᕕᓂᕐᒥᓂᒃ ᐅᓪᓗᒥ ᑲᕙᒪᑐᖃᒃᑯᑦ ᑮᓇᐅᔭᑎᒍᑦ ᑐᕌᒐᑦᓴᒥᓂᒃ 2019-ᒨᓕᖓᔪᓂᒃ ᑐᓴᕐᑕᐅᑎᑦᓯᓂᖃᕐᑎᓗᒋᑦ.
“ᐱᑐᑦᓯᒪᓂᖃᕐᓱᑎᒃ ᐃᓕᖓᑎᓪᓗᒋᑦ ᒪᑭᕝᕕᐅᑉ ᑎᓕᔭᐅᒪᒍᑎᖏᓐᓄᑦ, ᐅᓪᓗᒥ ᑲᕙᒪᑐᖃᒃᑯᑦ ᑮᓇᐅᔭᑎᒍᑦ ᑐᕌᒐᑦᓴᓕᐊᒥᓂᒃ ᑐᓴᕐᑕᐅᑎᑦᓯᒍᑎᒋᕐᖃᐅᔭᖏᑦ ᐃᑲᔪᕐᓯᓂᖃᓚᖓᕗᑦ ᐱᔭᑦᓴᖁᑎᓂᒃ ᐃᓕᖓᑦᓱᑎᒃ ᐃᓄᑐᐃᓐᓇᓄᑦ ᐅᑭᐅᕐᑕᑐᒥ,” ᐅᖃᕐᐳᖅ ᓵᓕᒍᐊᑦ. “ᐃᓄᑐᐃᓐᓀᑦ ᐱᓯᒪᔪᑦ ᓄᓇᕕᐅᑉ ᓄᓇᓕᖁᑎᖏᓐᓂᑦ 15-ᓂᑦ ᑕᒃᑯᖓ ᑲᑎᒪᓂᕐᔪᐊᒧᑦ ᑲᑎᒪᔭᕐᑐᓯᒪᕗᑦ ᑕᒃᒐᓂ ᐱᓇᓱᐊᕈᓯᕐᒥ ᐊᐅᐸᓗᒻᒦᓱᑎᒃ. ᐊᒥᓱᑦ ᐱᔭᑦᓴᖁᑕᐅᔪᑦ ᐅᖃᖃᑎᒌᒍᑎᒋᓕᕇᕐᑕᕗᑦ ᐃᓚᐅᑎᑕᐅᕗᑦ ᐊᕕᑦᑐᓯᒪᓂᕐᒥ ᑌᔭᐅᑦᔪᑎᓕᒻᒥ ‘ᓴᐳᑦᔨᓯᒪᓂᖅ ᐃᓄᐃᑦ ᓯᕗᓪᓕᐅᑎᒐᑦᓴᖁᑎᖏᓐᓂᒃ.”
“ᐅᖃᖃᑎᒌᒍᑎᖃᕐᑲᐅᔪᒍᑦ ᐊᑯᓂᑲᓪᓚᒃ ᐃᓕᖓᔪᓂᒃ ᐃᓕᓐᓂᐊᓂᕐᒧᑦ ᑕᑯᓕᕐᐳᒍᓪᓗ ᑮᓇᐅᔭᕐᑐᕈᑎᑦᓴᑖᕐᑕᐅᒍᑎᖏᓐᓂᒃ ᐃᓄᑐᐃᓐᓇᓄᑦ ᓯᕗᓕᕐᑕᐅᓗᑎᒃ ᐳᕐᑐᓂᕐᓴᒋᐊᓪᓚᒥᒃ ᐃᓕᓐᓂᐊᓂᖃᕐᓂᒥᒃ ᐱᓇᓱᒍᑎᐅᓛᓕᕐᑐᓂᒃ ($125.5-ᒥᓕᐊᓂᒃ ᐊᕐᕌᒍᐃᑦ 10 ᐊᓂᒍᕐᓗᒋᑦ). ᑌᒣᑦᓴᒪᑕ ᑕᒐ, ᐊᒥᓱᑦ ᑲᑎᒪᒋᐊᕐᓯᒪᔪᑦ ᐅᖃᐅᓯᑦᓴᖃᕐᕕᖃᕐᖃᐅᒋᕗᑦ ᐃᓕᖓᔪᓂᒃ ᐃᓄᐃᑦ ᐃᒻᒥᓂᐊᑲᑕᓐᓂᖏᓐᓄᑦ ᐅᐱᒍᓱᑉᐳᒍᓗ ᑮᓇᐅᔭᒋᐊᓪᓚᓂᒃ ᐊᑐᕐᑕᐅᓛᕐᑐᓂᒃ ᑲᓇᑕᒥᐅᑦ ᐃᓄᑐᐃᓐᓀᑦ ᐃᒻᒥᓂᐊᕐᓂᒥᒃ ᐊᑑᑎᑎᑕᐅᑦᑌᓕᒍᑎᑦᓴᖏᓐᓂᒃ ᐱᓇᓱᒍᑎᖃᕈᑎᐅᓛᕐᑐᓂᒃ ($50-ᒥᓕᐊᓂᒃ ᐊᕐᕌᒍᐃᑦ 10 ᐊᓂᒍᕐᓗᒋᑦ).”
“ᐊᒻᒪᓗᑦᑕᐅᖅ, ᐊᒥᓱᑦ ᓂᓪᓕᕈᑎᖃᖃᑦᑕᖃᐅᔪᑦ ᐱᐊᕃᑦ ᐅᕕᒃᑫᓗ ᓴᐳᑦᔭᐅᓯᒪᒋᐊᖃᕐᓂᖏᓐᓂ, ᑕᑯᓕᕆᕗᒍᓪᓗ ᑮᓇᐅᔭᖃᕐᑎᑕᐅᒍᑎᑦᓴᓂᒃ ᑐᕌᕐᑐᓂᒃ ᐃᓗᓯᖃᑦᓯᐊᑐᑦᓴᐅᓂᕐᒧᓗ ᐃᓄᓕᕆᔭᐅᓂᒃᑯᓗ ᐱᑦᔪᔭᐅᒍᑎᑦᓴᖏᑦ ᐃᓄᑐᐃᓐᓀᑦ ᕿᑐᕐᖓᖏᑕ ($220-ᒥᓕᐊᓂᒃ ᐊᕐᕌᒍᐃᑦ ᑕᓪᓕᒪᑦ ᐊᓂᒍᕐᓗᒋᑦ). ᐊᖏᔪᒥᒃ ᐃᑉᐱᓂᐊᕐᓂᒥᒃ ᐃᑉᐱᒍᓱᒍᑎᑕᓕᓐᓂ ᑲᒪᒋᔭᖃᕆᐊᕐᓂᒥᒃ ᐱᓇᓱᐊᖃᑎᒌᒍᑎᖃᕐᖃᐅᒋᕗᒍᑦ ᐃᓕᖓᔪᓂᒃ ᐅᖃᐅᓯᑦᑎᓄᓪᓗ ᐃᓗᕐᖁᓯᑦᑎᓄᓪᓗ, ᑕᒪᓐᓇ ᐱᓪᓗᒍ ᐊᓕᐊᓇᕐᑐᒪᕆᐅᕗᖅ ᑕᑯᒋᐊᒥᒃ ᑮᓇᐅᔭᖃᕐᑎᑕᐅᒍᑎᑖᕐᑕᐅᒍᑎᑦᑎᓂᒃ ᐃᓕᖓᓚᖓᔪᓂᒃ ᐊᓯᐅᑎᑦᓯᑌᓕᓂᕐᒧᓗ, ᖁᕝᕙᑎᕆᒍᑎᖃᕐᓂᒧᓪᓗ ᐊᒻᒪᓗ ᐊᑐᕐᑕᐅᑎᑦᓯᓂᖃᕆᐊᒃᑲᓂᕐᓂᓄᑦ ᓄᓇᓕᑐᖃᕐᑎᒍᑦ ᐅᖃᐅᓯᓪᓚᕆᑦᑎᓂᒃ ᐃᓚᐅᑎᓪᓗᒋᑦ ᐃᓄᒃᑎᑑᕐᓗ ᐃᓄᕕᐊᓗᒃᑐᓐᓗ ($333.7-ᒥᓕᐊᓂᒃ ᐊᕐᕌᒍᐃᑦ ᑕᓪᓕᒪᑦ ᐊᓂᒍᕐᓗᒋᑦ).”
“ᑲᕙᒪᑐᖃᒃᑯᑦ ᑮᓇᐅᔭᑎᒍᑦ ᑐᕌᒐᓕᐊᒥᓐᓂᒃ ᑐᓴᕐᑕᐅᑎᑦᓯᓂᖃᓚᐅᔪᕗᑦ ᑲᕙᒪᑐᖃᒃᑯᑦ ᐱᖁᔭᓕᐅᕐᕕᖓᓂ ᐊᑕᐅᑦᓯᑯᓪᓗ ᑮᓇᐅᔭᓕᕆᔨᒻᒪᕆᕗᑦ ᑐᓴᕐᑕᐅᑎᑦᓯᓂᖃᓪᓗᐊᓚᐅᔪᒋᕗᖅ ᐅᖃᐅᑦᔨᓱᓂ 64-ᖑᑦᓱᑎᒃ ᑲᑎᒪᔭᕐᑐᓯᒪᔪᓂᒃ ᒪᑭᕝᕕᐅᑉ ᐊᕐᕌᒍᑕᒫᕐᓯᐅᑎᒥᓂ ᑲᑎᒪᑎᑦᓯᓂᖓᓄᑦ. ᑖᓐᓇᓗ ᐅᐱᒍᓱᑉᐳᖅ ᑮᓇᐅᔭᖃᕐᑎᑕᐅᒍᑎᑖᕐᑕᐅᒋᐊᒥᒃ ᐃᓱᒪᒋᔪᓐᓀᓂᒍᑎᑦᓴᓂᒃ ᐊᒻᒪᓗ ᐅᑎᕐᑎᓯᕕᖃᕈᑎᑦᓴᓂᒃ ᐊᑕᖏᕐᓱᒋᑦ ᓄᓇᓂᒃ ᐃᓐᓄᐃᓯᒪᓇᓱᓐᓂᓄᑦ ᑮᓇᐅᔭᓂᒃ ᐊᑦᑕᑐᐊᖑᓯᒪᔪᓂᒃ. ᓄᓇᕕᒻᒥ ᐊᖏᖃᑎᒌᒍᑎᖃᕐᓯᒪᒐᑦᑕ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᒃ ᐊᑎᓕᐅᖃᑎᒌᒍᑕᐅᒪᔪᓂᒃ 1975-ᒥ, ᖃᒻᒥᐅᓂᕐᓴᑯᓪᓗ ᓄᓇᕕᒻᒥᐅᑦ ᐃᓄᑐᐃᓐᓀᑦ ᓄᓇᓂᒃ ᐃᓐᓄᐃᓯᒪᓇᓱᓐᓂᒥᓄᑦ ᐊᖏᖃᑎᒌᒍᑎᖏᓐᓂᒃ (ᕿᑭᕐᑕᓕᕆᓂᕐᓄᑦ).”
-30-
ᖃᐅᔨᒋᐊᕐᕕᐅᒍᓐᓇᑐᖅ:
ᒍᐃᓕᐋᒻ ᑕᒍᕐᓈᖅ
ᐱᓂᐊᕐᓂᓕᕆᓂᕐᒧᑦ ᐊᔪᖀᒋᐊᕐᑎᒋᔭᐅᔪᖅ ᐊᖓᔪᕐᖄᒧᑦ ᐊᒻᒪᓗ
ᑐᓴᐅᒪᖃᑦᑕᐅᑎᓕᕆᕕᒻᒥ ᑐᑭᒧᐊᕐᑎᓯᔨᐅᑦᓱᓂ
ᐅᖄᓚᐅᑎᖓ: 819-964-2925
wtagoona@makivik.org
ᒪᑭᕝᕕᒃ ᐱᕙᓪᓕᐊᑎᑦᓯᓂᕐᒧᑦ ᐱᓇᓱᒐᖃᕐᕕᐅᕗᖅ ᑎᓕᔭᐅᓯᒪᒍᑎᖃᕐᓱᓂ ᑲᒪᔨᐅᓂᐊᕐᑎᓗᒍ ᑮᓇᐅᔭᒻᒪᕆᓐᓂᒃ ᕿᒻᒪᖁᑕᐅᒪᔪᓂᒃ ᑮᓇᐅᔭᕐᑕᖑᓯᒪᑦᓱᑎᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑕᐅᒍᑎᕕᓂᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᐳᑦ ᐊᐅᓇᑦᓯᓂᕐᒥᓗ ᑮᓇᐅᔭᓕᐅᕈᑎᖃᕐᓂᒥᓪᓗ ᑖᒃᑯᓂᖓ ᑮᓇᐅᔭᒻᒪᕆᓐᓂᒃ ᖁᕝᕙᑎᕆᒍᑎᑦᓴᕆᑦᓱᒋᓪᓗ ᒪᑭᑕᒐᓱᒍᑎᑎᒍᑦ ᐱᕈᕐᐸᓕᐊᑎᒋᐊᓕᓐᓂᒃ ᐱᑕᖃᕐᑎᓯᒍᑎᐅᓗᑎᒃ ᐃᑲᔪᕐᓯᒪᓂᕐᒥᒃ ᓴᕐᕿᑎᑕᐅᒋᐊᖃᓕᕐᐸᑕ ᐃᓄᐃᑦ-ᐃᖏᕐᕋᑎᓐᓂᐊᑕᖏᑦ ᐱᓇᓱᒉᑦ ᓄᓇᕕᒻᒦᑐᑦ, ᒪᑭᕝᕕᒃ ᖁᕝᕙᑎᕆᔨᐅᕗᖅ ᐃᓄᐃᑦ ᐃᓗᕐᖁᓯᖏᓐᓂᓗ ᐅᖃᐅᓯᖓᓐᓂᓗ ᐊᓯᐅᑎᑦᓯᑌᓕᓂᕐᓂᒃ ᐃᓚᖃᕐᒥᑎᓪᓗᒋᑦ ᐃᓗᓯᓕᕆᓃᑦ, ᖃᓄᐃᖕᖏᓯᐊᕐᓃᑦ, ᐊᔪᕐᓴᓂᕐᒥᓗ ᐱᑕᖃᓗᐊᕐᑎᓯᑦᑌᓕᓃᑦ, ᐃᓕᓐᓂᐊᕕᖃᕐᑎᓯᓃᓪᓗ ᐃᓄᑐᐃᓐᓇᓂᒃ ᓄᓇᓕᓐᓂ.