ᑰᒃᔪᐊᖅ – ᒣ 2, 2016 – ᒪᑭᕝᕕᒃ ᖃᒻᒥᑯᑦ ᑐᓴᕐᑎᑕᐅᒍᑎᑖᓚᐅᕐᖁᖅ ᖃᓄᕐᓗᓃᑦ ᒪᓂᔨᒍᑎᐅᓯᒪᕋᑕᖕᖏᒋᐊᖏᑦ ᑐᓂᔭᐅᓇᔭᕐᑐᑦ ᑲᑎᖕᖓᔨᓄᑦ ᓯᓚᕐᔪᐊᓕᒫᒥ ᓂᐅᕐᕈᓯᐅᕈᑎᖃᕐᓂᒥᒃ ᓂᕐᔪᑎᓂᒃ ᓄᖑᑐᐃᓐᓇᕆᐊᖃᓕᕐᑐᓂᒃ ᑲᑎᖕᖓᔨᒃᑯᓄᑦ (ᖃᓪᓗᓈᕐᑎᑐᑦ ᑌᔭᐅᑦᔪᓯᓕᓐᓄᑦ CITIES-ᒥᒃ) ᓇᓄᔭᓂᓪᓗ ᓇᓄᕋᕕᓂᕐᓂᓗ ᖁᕝᕙᕆᐊᕐᓗᒋᑦ ᓂᐅᕐᕈᑎᑦᓴᐅᖏᓕᑎᑦᓯᓂᐅᒐᔭᕐᑐᒧᑦ ᐃᓚᒋᐊᕈᑎ II-ᒥᑦ ᐱᓗᒋᑦ ᐃᓚᒋᐊᕈᑎ I-ᒧᑦ ᐃᓕᔨᓂᐅᒐᔭᕐᑐᓄᑦ ᐅᖃᕐᑕᐅᒐᔭᕐᓗᑎᑦ ᑭᖑᓪᓕᒥ ᑲᑎᖕᖓᓂᕐᔪᐊᖃᓕᕐᒥᒍᑎᒃ ᑖᒃᑯᐊ ᑲᑎᖕᖓᔨᐅᖃᑎᒌᑦᑐᑦ ᑲᑎᖕᖓᓕᕐᒥᒍᑎᒃ ᕿᕐᓂᑌᑦ ᓄᓇᖓᓐᓂ ᔪᖄᓇᔅᐴᒃ ᐃᓪᓗᒐᓴᖏᓐᓂ ᐊᑑᑎᔭᐅᓂᖃᓛᕐᑐᒥ ᓯᑉᑎᒻᐱᕆ 24 – ᐅᒃᑐᐱᕆ 5, 2016 ᐅᓪᓗᖏᓐᓂ. ᑕᒪᓐᓇ ᑐᑭᖃᕐᑐᖅ ᑭᒡᒐᑐᕐᑕᐅᓂᖏᓐᓂᒃ ᐱᒻᒪᕆᐅᑦᓱᓂ ᐊᓂᒍᕋᓱᒋᐊᓕᒻᒥᒃ ᐊᓂᒍᐃᓂᒃᑯᑦ ᐃᓄᑐᐃᓐᓀᑦ ᐱᒐᓱᒍᑎᒋᔭᖏᑎᒍᑦ ᓯᓚᕐᔪᐊᒥᐅᓂᒃ ᓇᓗᓀᕆᖁᔨᑦᓱᑎᒃ ᐃᓄᑐᐃᓐᓀᑦ ᓂᐅᕐᕈᓯᐅᕐᓂᑯᑦ ᐊᖁᕕᕋᐅᑎᒍᑎᖃᓲᖑᓂᖏᓐᓂᒃ ᓇᓄᕋᕐᓂᓗ ᓇᓄᔭᓂᓪᓗ ᐊᕗᖓᐅᓕᒋᐊᓪᓚᑐᒥᓪᓗ ᑕᑯᑦᓴᐅᑎᑦᓯᒍᑎᐅᑦᓱᑎᒃ ᑲᓇᑕᒥᐅᑦ ᐃᓄᑐᐃᓐᓀᑦ ᓇᓄᕃᔭᕐᐸᓂᖏᑦ ᐱᐅᖕᖏᑐᖔᒧᓕᖓᓂᖃᖕᖏᒋᐊᖏᑦ ᓇᓄᕐᓂᒃ ᓄᖑᐃᓐᓇᑎᑦᓯᓚᕿᑦᑌᓕᓂᑎᒍᑦ.
ᑐᓂᔨᒍᑎᐅᖃᑦᑕᓯᒪᔪᑦ ᖁᕝᕙᕆᐊᕆᖁᔨᔪᓄᑦ ᓇᓄᕋᔭᓂᒃ ᑖᒃᑯᐊ CITIES-ᑯᑦ ᐃᓚᒋᐊᕈᑎᖏᓐᓂᒃ II-ᒦᑦᑐᓂᒃ I-ᒨᕆᖁᔨᒍᑎᐅᑦᓱᑎᒃ ᑐᓂᔭᐅᖃᑦᑕᓚᐅᔪᕗᑦ ᑖᒃᑯᐊ CITIES-ᑯᑦ CoPs-ᖏᓐᓄᑦ ᐊᑑᑎᔭᐅᓚᐅᕐᓯᒪᔪᓄᑦ ᑑᖃ, ᖃᑖᕐᒥ 2010-ᖑᑎᓪᓗᒍ ᐊᒻᒪᓗ ᐹᖕᑲᒃ, ᑌᓚᓐᒥ 2013-ᖑᑎᓪᓗᒍ. ᑖᒃᑯᐊ ᒪᓂᔭᐅᖃᑦᑕᓯᒪᔪᑦ, ᑲᔪᓯᑎᑕᐅᓚᐅᕐᓂᕈᑎᒃ ᓄᕐᖃᑎᑦᓯᓚᕆᒐᔭᕐᓯᒪᔪᑦ ᓯᓚᕐᔪᐊᒥ ᓇᓄᕃᓪᓗ ᓇᓄᔭᕕᓃᓪᓗ ᓂᐅᕐᕈᑕᐅᕙᓐᓂᖏᓐᓂᒃ, ᓄᕐᖃᑎᑦᓯᒋᐊᕈᑎᐅᔪᑦ ᓵᓚᐅᓚᐅᕐᓯᒪᕗᑦ ᓇᑯᕐᒪᑕ ᐊᕐᓱᕈᕐᓱᑎᒃ ᑲᓇᑕᒥᐅᑦ ᐃᓄᑐᐃᓐᓇᖏᑕ ᐱᒐᓱᒻᒪᕆᒍᑎᖏᑦ ᐃᑲᔪᕐᑕᐅᓱᑎᒃ ᑲᓇᑕᐅᓪᓗ ᓄᓇᕗᓪᓗ ᓄᓇᑦᓯᐊᓗ ᑲᕙᒪᖏᓐᓄᑦ.
ᒫᓐᓇᓯᐅᑎᐅᓚᐅᔪᔪᑦ ᐊᑯᓐᓂᖏᓐᓂ ᑭᖑᓪᓕᐸᐅᓚᐅᔪᔪᓪᓗ CoP-ᑯᑦ 2013-ᒥ ᐊᒻᒪᓗ ᐁᕆᓕ 27, 2016 ᐅᓪᓗᖏᓐᓂ ᖄᖏᐅᑎᒋᐊᖃᖕᖏᓂᐅᓯᔪᑦ ᑐᓂᔨᔪᖃᕐᓂᐊᐸᑦ ᒪᓂᔨᒍᑎᓂᒃ ᑕᒃᒐᓂ ᐊᕐᕌᒍᒥ CoP-ᓂᐅᓛᕐᑐᓄᑦ, ᒪᑭᕝᕕᓗ ᐃᓄᑐᐃᓐᓀᓗ ᐃᓄᕕᐊᓗᐃᑦ ᓄᓇᑕᕐᓯᒪᓂᕐᒥᓄᑦ ᓄᓇᖁᑎᒥᓐᓂ, ᓄᓇᕗᒻᒥᐅᓗ ᐊᒻᒪᓗ ᓄᓇᑦᓯᐊᕗᑦ, ᐃᓚᐅᒻᒥᑎᓪᓗᒋᑦ ᑲᓇᑕᒥ ᐊᕙᑎᓕᕆᔨᒃᑯᓗ ᑲᓇᑕᐅᓪᓗ ᓯᓚᑖᓂ ᐊᐅᓚᑦᓯᔩᑦ ᑲᓇᑕᒨᓕᖓᒧᓂᒃ ᓄᓇᕗᓪᓗ ᑲᕙᒪᖓᑦ ᐱᓇᓱᐊᕈᑎᖃᖃᑦᑕᓕᓚᐅᔪᕗᑦ ᐊᒥᓱᐃᓂᒃ ᐱᕙᓪᓕᐊᑎᑦᓯᒍᑎᐅᒍᓐᓇᑐᓂᒃ ᐅᓚᐱᑦᓯᒋᐊᕈᑎᐅᒍᓐᓇᑐᓂᓪᓗ ᑲᓇᑕᐅᑉ ᓯᓚᑖᓂᒥᐅᓂᒃ ᑲᕙᒪᐅᒻᒥᔪᓂᒃ ᐊᒻᒪᓗ ᓂᕐᔪᑎᓂᒃ ᐱᔪᓐᓇᐅᑎᑕᕐᑎᓯᓂᕐᓄᑦ ᑲᕙᒪᒃᑯᑎᒎᕐᓇᑎᒃ ᐱᓇᓱᒐᖃᕐᕕᖁᑕᐅᔪᓂᒃ. ᑕᒪᒃᑯᐊ ᓯᕗᓂᖃᓚᐅᔪᕗᑦ ᐅᓚᐱᑦᓯᒋᐊᕐᓂᖃᓛᕐᓂᒥᒃ ᑕᑯᑦᓴᐅᑎᑦᓯᒍᑎᖃᑦᓯᐊᓂᒃᑯᑦ ᐃᓅᑦᔪᓯᓅᓕᖓᓂᖏᓐᓂᓗ, ᐃᓗᕐᖁᓯᕐᒨᓕᖓᓂᖏᓐᓂᓗ ᑮᓇᐅᔭᑎᒍᓪᓗ ᒪᑭᑕᒐᓱᒍᑎᑎᒎᕐᑐᓂᒃ ᐱᓪᓚᕆᐅᑦᓱᑎᒃ ᓇᓄᕐᓅᓕᖓᔪᑦ ᐃᓄᑐᐃᓐᓇᑎᒍᑦ ᑕᑯᑦᓴᐅᑎᓪᓗᒋᓪᓗ ᑭᐅᒍᓐᓇᐅᑎᐅᔪᓪᓗ, ᐊᑦᑕᓇᖕᖏᑐᓂᖏᓪᓗ ᐱᐅᓯᐅᓕᕐᑐᓄᓪᓗ ᑲᐅᑎᑐᐃᓐᓇᕈᓐᓇᓂᖏᑦ ᑲᓇᑕᐅᑉ ᓇᓄᖏᓐᓂᒃ ᑲᒪᒋᔭᖃᕐᓂᓄᑦ ᒪᓕᒐᓕᐊᖑᒪᔪᑦ. ᑕᒪᓐᓇ ᐅᓐᓂᓯᐅᕈᑎᑦᓴᐅᔪᖅ ᑲᔪᓯᑎᑦᓯᓂᐅᑎᓪᓗᒍ ᐃᓄᑐᐃᓐᓀᑦ ᑲᔪᓯᑦᓯᐊᕈᓐᓇᓂᖏᓐᓂᒃ ᑕᒪᒃᑯᓂᖓᓗ ᐱᒐᓱᒍᑎᖃᕐᓂᐅᔪᑦ ᐱᒃᑫᒍᑎᐅᓚᖓᕗᑦ ᐊᓯᑦᔨᓂᕐᑕᖃᕐᓂᐊᖏᑦᑐᓄᑦ ᓂᐅᕐᕈᓯᐅᕈᑎᖃᖃᑦᑕᓂᒃᑯᑦ ᐊᖁᕕᒐᐅᑎᒍᑎᒋᑦᓱᒋᑦ ᓇᓄᕃᓪᓗ ᐊᓯᖏᓪᓗ ᓇᓄᔦ ᐊᐅᓚᑕᐅᓂᖃᕐᓗᑎᒃ CITIES-ᑯᑎᒍᑦ ᐊᓯᑦᔨᑲᓪᓚᓚᖓᖕᖏᓂᖏᑦ ᑕᑯᑦᓴᐅᔪᑦ.
ᐋᑕᒥ ᐊᓚᑯ-ᑎᓖᓪ, ᐳᕐᑐᓂᕐᓴᐅᓱᓂ ᐊᖓᔪᕐᖄᑉ ᑐᖓᓕᖓ ᒪᑭᕝᕕᐅᑉ ᐱᑦᓴᖑᕆᐊᓪᓚᒍᓐᓇᑐᓂᒃ ᐱᕙᓪᓕᐊᑎᑦᓯᒍᑎᖃᕐᓂᓄᑦ ᐱᑦᔪᔨᕕᐊᓐᓂ ᓯᕗᓕᕐᑎᐅᓱᓂᓗ ᑖᒃᑯᐊ ᐊᓪᓚᖁᑎᖏᓐᓄᑦ ᓄᓇᕕᒻᒥ, ᑕᒐᑕᒐ ᐱᕕᑦᓴᖃᕐᓂᒥᓂ ᐅᖃᕈᒪᕗᖅ ᐅᐱᒍᓱᑦᔨᒋᐊᒥᓂᒃ ᐃᓘᓐᓇᖏᓐᓂᒃ ᑲᓇᑕᐅᑉ ᐃᓄᑐᐃᓐᓇᓕᒫᖏᓐᓂᒃ ᐃᓗᖏᕐᑐᓱᑎᒃ ᑕᒪᑐᒥᖓ ᐱᒐᓱᒍᑎᖃᕐᐸᓂᖏᓐᓄᑦ. ᐃᕐᙯᑎᑦᓯᒋᐊᕈᒪᕗᕐᓗ ᐃᓄᑐᐃᓐᓇᓂᒃ ᑕᒪᓐᓇ ᑕᑯᑦᓴᐅᒍᑕᐅᓕᕋᓗᐊᕐᑎᓗᒍ ᐱᒻᒪᕆᒻᒥᒃ ᓵᓚᖃᕈᑎᖃᕐᓂᒥᒃ, ᐃᓄᑐᐃᓐᓀᑦ ᑲᔪᓯᓗᑎᒃ ᑕᑯᑦᓴᐅᑎᑦᓯᒋᐊᖃᕆᐊᖏᑦ ᖃᓄᑎᒋᒃ ᓇᓄᐃᑦ ᐃᓗᕐᖁᓯᖓᓐᓄᓗ ᑮᓇᐅᔭᑎᒍᓪᓗ ᒪᑭᑕᒐᓱᒍᑎᒋᒋᐊᓕᖏᓐᓄᑦ ᐱᓪᓚᕆᐅᓂᖃᕐᒪᖔᑕ, ᑲᔪᓯᔪᒥᓪᓗ ᐃᓗᖏᕐᑐᕈᑎᒋᓗᒋᑦ ᑲᒪᑦᓯᐊᖏᓐᓇᕆᐊᖃᕐᓂᖏᓐᓄᑦ ᓄᖑᐃᓐᓇᑎᑦᓯᑌᓕᓂᒃᑯᑦ ᓇᓄᕐᓂᒃ ᐊᑐᓂᑦ ᑲᓇᑕᐅᑉ ᐃᓄᑐᐃᓐᓇᖏᑕ ᓄᓇᖁᑎᖃᕐᕕᖏᓐᓂ ᑲᔪᓯᔪᒥᒃ ᓯᕗᓂᑦᓴᑎᓐᓂ ᑭᖑᕚᑦᑎᓄᑦ ᑎᑭᐅᑎᓂᖃᑦᓯᐊᕈᓐᓇᓛᖁᓪᓗᒋᑦ.
ᑐᑭᓯᒋᐊᒃᑲᓂᕈᒪᔪᑦ ᖃᐅᔨᒋᐊᕐᕕᖃᕈᓐᓇᐳᑦ:
ᒍᐃᓕᐋᒻ ᑕᒍᕐᓈᖅ
ᑐᓴᖃᑦᑕᐅᑎᒍᑎᓕᕆᓂᕐᓄᑦ ᐊᑕᐅᑦᓯᑯᕐᑎᓯᔨ ᑐᓴᕋᑦᓴᓂᐊᕐᑎᓄᓪᓗ ᑐᓴᕆᐊᕐᕕᐅᓱᓂ
819-964-2925
ᒪᑭᕝᕕᒃ ᐱᕙᓪᓕᐊᑎᑦᓯᓂᕐᒥᒃ ᐱᓇᓱᒐᖃᕐᕕᐅᕗᖅ ᑎᓕᔭᐅᓯᒪᒍᑎᖃᕐᓱᓂ ᑲᒪᔨᐅᓂᐊᕐᑎᓗᒍ ᑮᓇᐅᔭᑎᒍᑦ ᕿᒻᒪᖁᓯᐊᕆᓯᒪᔭᖏᓐᓂᒃ ᓄᓇᕕᒻᒥᐅᑦ ᐃᓄᑐᐃᓐᓇᖏᑦᑐ ᐱᑕᖃᕐᑎᑕᐅᒍᑎᓕᓐᓂᒃ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖏᓐᓂᑦ. ᒪᑭᕝᕕᐅᑉ ᐱᔭᑦᓴᖁᑎᖏᑦ ᐃᓚᖃᕐᑐᑦ ᐊᐅᓚᑦᓯᔨᐅᓂᐊᕐᓂᒥ ᑖᒃᑯᓂᖓᓗ ᑮᓇᐅᔭᕐᑖᖑᓯᒪᔪᓂᒃ ᑮᓇᐅᔭᓕᐅᕈᑎᖃᕐᓂᐊᓂᕐᒥᒃ ᖁᕝᕙᑎᕆᒍᑎᖃᕐᓗᓂᓗ ᒪᑭᑕᒐᓱᒍᑎᑎᒍᑦ ᐱᕈᕐᐸᓕᐊᑎᒋᐊᓕᓐᓂᒃ.