ᑐᓴᕋᑦᓴᖅ
ᐆᒃᑑᐱᕆ 1, 2019 – ᑰᒃᔪᐊᖅ, ᑯᐯᒃ – ᒪᑭᕝᕕᑯᓐᓂ ᐊᖓᔪᕐᖄᖅ ᓵᓕ ᒍᐊᑦ ᐅᖃᐅᓯᓕᒃ ᕕᐁᓐ ᖃᐅᔨᓴᕐᑎᖏᑦᑕ ᑐᓴᕐᑎᓯᒍᑎᖓᓂᒃ ᑭᖑᓪᓕᐹᒥᒃ ᑕᑯᑦᓴᐅᑎᑦᓯᓂᕃᑦᓱᓂ ᔮᒃ ᕕᐁᓐ ᓈᓚᑦᑐᕕᓂᐅᒋᐊᖓ ᐃᓄᓐᓄᑦ ᐅᖃᐅᑎᔭᐅᒍᑎᕕᓂᕐᒥᓂᒃ ᖃᐅᔨᓴᕐᑐᐃᑦ ᑰᒃᔪᐊᒦᑦᑎᓗᒋᑦ, ᑰᒃᔪᐊᕌᐱᒻᒥᓗ ᐊᕐᕌᓂᒐᓚᐅᓕᕐᑐᖅ. ᑐᓴᕐᑐᕕᓂᐅᑦᓱᑎᓗ ᐃᓄᓐᓄᑦ ᐅᖃᐅᓯᕆᔭᐅᔪᕕᓂᕐᓂᒃ ᒪᓐᑐᕆᐊᓪᒥ ᓈᓚᓐᓂᖃᕐᑎᓗᒋᑦ. ᖃᐅᔨᒍᑎᐅᓗᐊᖕᖑᐊᑐᖅ ᖃᐅᔨᓴᕐᑎᓄᑦ ᐃᒣᓕᖓᒋᐊᖓ “ᐱᖕᖏᓂᕐᓴᐅᑎᑕᐅᓂᕐᒥᒃ ᐃᓘᓐᓇᖏᓐᓂᑦ ᐃᓘᓐᓈᒍᓗ ᓄᓇᖃᕐᖄᓯᒪᔪᐃᑦ ᐃᓄᑐᐃᓐᓀᓗ ᐱᓂᐊᕐᓂᖃᕐᕕᐅᓱᑎᒃ ᐊᑑᑎᒋᐊᖏᑦ ᖃᓄᐃᓘᖃᑎᒋᔭᒥᓂᒃ ᓇᐅᓕᒫᓅᓕᖓᔪᓂᒃ ᐱᒍᑦᔨᐅᑎᓂᑦ ᖃᐅᔨᓴᕐᑕᐅᔪᕕᓂᕐᓂᑦ.”
“ᐃᓄᑐᐃᓐᓀᑦ ᐅᖃᐅᓯᕆᒍᒪᔭᒥᓂᒃ ᐅᖃᐅᓯᓕᕕᓃᑦ ᖃᐅᔨᓴᕐᑎᓄᑦ ᐃᓘᓐᓇᖏᓐᓂᑦ ᐱᒍᑦᔨᐅᑎᐅᒋᐊᓕᓕᒫᓂᑦ ᐊᑦᑐᐃᓱᑎᒃ” ᐅᖃᓚᐅᕐᑐᖅ ᓵᓕ ᒍᐊᑦ. “ᐊᒥᓱᕕᑦᓱᑎᒃ, ᕿᐊᑦᓱᑎᒃ, ᐃᓄᑐᐃᓐᓇᐅᖃᑎᒃᑲ ᐅᖄᔪᕕᓂᐅᕗᑦ ᖃᐅᔨᓴᕐᑎᓄᑦ ᐊᑑᑎᓯᒪᔭᒥᓂᒃ ᐃᓗᓯᓕᕆᓄᕐᒧᑦ, ᐱᖁᔭᖃᕐᓂᓕᕆᓂᕐᒧᑦ, ᐃᓄᓕᕆᓂᕐᒧᑦ, ᐃᓅᓱᑦᑐᑦ ᓴᐳᒻᒥᔭᐅᓂᖏᓐᓄᓗ ᐱᒍᑦᔨᐅᑎᖏᑎᒍᑦ, ᑭᖑᓂᕐᒥ ᐱᑦᓯᐊᑕᐅᖕᖏᓚᕆᒍᑎᐅᓯᒪᔪᓂᒃ, ᐊᓯᖏᓐᓂᓗ ᖃᓄᐃᓘᖃᑎᖃᕐᓂᒥᓂᑦ ᑯᐯᒃ ᑲᕙᒪᖓᑕ ᐱᒍᑦᔨᐅᑎᖏᑎᒍᑦ. ᑕᑯᑦᓱᒍ ᓯᕗᓪᓕᐹᖓ ᖃᓄᐃᓕᒋᐊᕈᑎᐅᖁᔭᖓ – ᐃᒫᒃ ᑯᐯᒃ ᒪᒥᐊᕝᕕᖃᕐᓗᓂ ᐃᓄᑐᐃᓐᓇᓂᒃ ᓄᓇᖃᕐᖄᓯᒪᔪᓂᓪᓗ, ᐃᑉᐱᒍᓱᒃᑯᒍᑦ ᑐᓴᕐᑕᐅᔪᕕᓂᐅᒋᐊᑦᑕ.”
ᓅᕕᒻᐱᕆ 2018-ᖑᑎᓪᓗᒍ, ᓵᓕ ᒍᐊᑦ ᐅᖃᕆᐊᕐᑐᓚᐅᔪᔪᖅ ᖃᐅᔨᓴᕐᑎᓄᑦ ᒪᕐᕉᓂ ᐅᓪᓗᑐᕐᑎᓗᒋᑦ ᑰᒃᔪᐊᒥ. ᑌᑲᓂ ᒍᐊᑦ ᖃᐅᔨᒪᔭᐅᒋᐊᖃᕐᓂᕃᓚᐅᔪᔪᖅ ᖃᐅᔨᓴᕐᑏᑦ ᑎᓕᔭᐅᓯᒪᒍᑎᖓᑕ ᐱᒻᒪᕆᐅᓂᖓᓂᒃ, ᐊᑦᑐᐃᓂᖓᓂᒃ ᐱᒻᒪᕆᓂᒃ ᐃᓄᑐᐃᓐᓀᑦ ᐃᓅᓯᕐᒥᓂ ᐊᑑᑎᔭᖏᓐᓂᑦ ᓄᓇᕕᒻᒥ, ᐱᓗᐊᕐᑐᖅ: ᐱᖁᔭᖃᕐᓂᖅ, ᓯᓚᑦᑐᓭᒍᑏᑦ, ᐳᓖᓰᑦ, ᐃᓗᓯᓕᕆᓂᕐᒥ ᐃᓄᓕᕆᓂᕐᒥᓗ ᐱᒍᑦᔨᐅᑏᑦ, ᐃᓅᓱᑦᑐᐃᑦ ᓴᐳᒻᒥᔭᐅᓂᖏᓪᓗ. ᒍᐊᑦ ᐅᖃᐅᓯᑦᓴᖃᕐᕕᖃᓚᐅᔪᔪᖅ ᐃᓘᓐᓇᖏᓐᓂᒃ ᑖᒃᑯᓂᖓ ᐊᒻᒪᓗ ᐅᖃᓚᐅᔪᑦᓱᓂ, “ᐱᓀᓗᑕᕗᑦ ᐋᕐᕿᑕᐅᓂᐊᖕᖏᑐᑦ ᖃᓪᓗᓈᑦ ᓄᓇᖓᓃᑦᑐᓄᑦ. ᐋᕐᕿᓱᕈᑎᑦᓭᑦ ᐃᓄᑐᐃᓐᓇᓄᑦ ᓇᕝᕚᑕᐅᓂᐊᕐᖁᑦ.”
ᐅᖃᐅᓯᕐᒥᓄᑦ ᐃᓚᒋᔭᐅᑎᑦᓱᒍ, ᒍᐊᑦ ᐃᑉᐱᒋᔭᐅᒋᐊᖃᕐᓂᕃᓚᐅᔪᒻᒥᔪᖅ ᐃᒫᒃ ᓄᓇᕕᒃ ᐱᓇᓱᐊᕐᒪᑦ ᓇᖕᒥᓂᖅ-ᑐᑭᑖᕈᓐᓇᓂᕐᒧᑦ ᐱᓇᓱᑦᑕᐅᒐᔭᕐᑐᓂᒃ, ᐊᒻᒪᓗ ᑌᒫᒃ, ᐱᓇᓱᑦᓱᑎᒃ ᐱᓇᓱᐊᕆᐊᓕᓕᒫᕗᓐᓂᒃ ᓇᖕᒥᓂᖅ ᐊᐅᓚᑦᓯᒍᓐᓇᓯᓂᕐᒥᒃ ᐃᓘᓐᓇᖏᓐᓂᑦ ᐊᐅᓚᑦᓯᔨᐅᕕᖃᕐᓱᑎᒃ ᐱᓇᓱᐊᕐᕕᐅᔪᓕᒫᓂᑦ.
“ᑖᓐᓇ ᑐᓴᕐᑎᓯᒍᑎ ᑕᑭᔪᖅ, 500-ᓃᑲᓴᑦᑐᑦ ᒪᑉᐱᒉᑦ, ᐱᑕᖃᕐᓱᑎᒃ 142-ᓂᒃ ᖃᓄᐃᓕᒋᐊᖁᔨᒍᑎᓂᒃ,” ᐅᖃᓚᐅᕐᑐᖅ ᐊᖓᔪᕐᖄᖅ ᒍᐊᑦ. “ᑭᖑᓂᐊᒍᑦ ᐱᓇᓱᐊᓛᕐᓂᒥᒃ ᑯᐯᒃ ᑲᕙᒪᖓᓂᒃ ᖃᓄᐃᓘᕐᕕᖃᕈᑎᒋᓛᕐᓱᒋᑦ ᐸᕐᓇᓯᒪᕗᒍᑦ ᐊᒡᓚᕕᒋᓛᕐᓱᒋᑦ, ᐊᑕᖏᕐᓯᔪᒥᒃ ᑭᐅᒍᑎᖃᕐᓗᑕ ᖃᐅᔨᓴᕐᑏᑦ ᑭᖑᓪᓕᐹᒥᒃ ᑐᓴᕐᑎᓯᒍᑎᖓᓂᒃ.”
ᑭᖑᓪᓕᐹᖅ ᑐᓴᕐᑎᓯᒍᑎ ᑌᒐᕐᑕᐅᓱᓂ, ᓇᐅᓕᒫᓅᓕᖓᔪᓂᒃ ᖃᐅᔨᓴᕐᓂᖅ ᐃᓘᓐᓇᖏᓐᓂᑦ ᖃᓄᐃᓘᖃᑎᐅᓂᖏᓐᓂᑦ ᓄᓇᖃᕐᖄᓯᒪᔪᓄᑦ ᐊᒻᒪᓗ ᓇᐅᓕᒫᓅᓕᖓᔪᑦ ᐱᒍᑦᔨᐅᑏᑦ ᐃᓚᖏᑦ ᑯᐯᒻᒥ: ᓈᓚᓐᓂᖅ, ᒪᒥᐊᖃᑎᒌᓐᓂᖅ ᐊᒻᒪᓗ ᐱᓇᓱᑦᑕᐅᓂᖓ, ᐊᑐᐃᓐᓇᐅᕗᖅ ᖃᕆᑕᐅᔦᑦ ᐱᑐᖃᑎᒌᕝᕕᖓᓂ, ᓀᓪᓕᑎᕐᓯᒪᑦᓱᓂ ᑐᓴᕐᑎᓯᒍᑎᐅᑦᓱᓂ, ᐅᖃᐅᓯᐅᓯᒪᔪᑦ ᐊᒡᓚᑕᐅᓂᖏᑦ, ᐅᐃᒍᖏᓪᓗ. ᖃᐅᔨᓴᕐᑏᑦ ᖃᕆᑕᐅᔦᑦ ᐱᑐᖃᑎᒌᕝᕕᖓᓂ ᑕᑯᑦᓴᐅᑎᑦᓯᕕᖓ ᐅᓇ cerp.gouv.qc.ca
ᑖᒃᑯᐊ “ᕕᐁᓐ ᖃᐅᔨᓴᕐᑏᑦ” ᐊᑦᓯᔭᐅᓚᐅᔪᔪᑦ ᑖᑦᓱᒧᖓ ᐃᕐᖃᑐᐃᔨ ᔮᒃ ᕕᐁᓐᒧᑦ, ᑲᒪᒋᔭᖃᕐᓯᒪᔪᒧᑦ ᐃᕐᖃᑐᐃᔨᓄᑦ ᐊᐅᓚᑦᓯᔨᐅᕕᖓᓂ Abitibi-ᒥ, ᐃᓚᒋᔭᐅᒻᒪᑦ ᑕᕝᕙᓂ ᓄᓇᕕᒃ, ᐊᕐᕌᒍᐃᑦ 30 ᐅᖓᑖᓄᑦ ᑯᐯᒃ ᐃᕐᖃᑐᐃᕕᕐᔪᐊᖓᓂ. ᕕᐁᓐ ᖃᐅᔨᓴᕐᑎᖏᑦ ᓄᐃᑕᐅᓯᒪᔪᑦ ᑯᐯᒃ ᑲᕙᒪᖓᓄᑦ ᑏᓯᒻᐱᕆ 21, 2016. ᑌᒐᕐᑕᐅᓚᕆᒍᓯᖓ ᐃᒣᓕᖓᔪᖅ ᓇᐅᓕᒫᓅᓕᖓᔪᓂᒃ ᖃᐅᔨᓴᕐᓂᖅ ᐃᓘᓐᓇᖏᓐᓂᑦ ᖃᓄᐃᓘᖃᑎᐅᓂᖏᓐᓂᑦ ᓄᓇᖃᕐᖄᓯᒪᔪᓄᑦ ᐊᒻᒪᓗ ᓇᐅᓕᒫᓅᓕᖓᔪᑦ ᐱᒍᑦᔨᐅᑏᑦ ᐃᓚᖏᑦ ᑯᐯᒻᒥ: ᓈᓚᓐᓂᖅ, ᒪᒥᐊᖃᑎᒌᓐᓂᖅ ᐊᒻᒪᓗ ᐱᓇᓱᑦᑕᐅᓂᖓ.
-30-
ᖃᐅᔨᒋᐊᕐᕕᓴᖅ:
ᒍᐃᓕᐊᒻ ᑕᒍᕐᓈᖅ
ᐱᓂᐊᕐᓂᓕᕆᓂᕐᒥ ᐊᔪᖀᒋᐊᕐᑎ
ᑐᓴᐅᒪᖃᑎᒌᒍᑎᓂᒃ ᑐᑭᒧᐊᑦᑎᓯᔨ
ᒪᑭᕝᕕᒃ
ᐅᖄᓚᐅᑎᖓ 819-964-2925
wtagoona@makivik.org
www.makivik.org
ᒪᑭᕝᕕᒃ ᓄᓇᑖᕐᓂᒧᑦ ᑎᒥᐅᔪᖁᑎᒋᔭᐅᕗᖅ ᑎᓕᔭᐅᒪᒍᑎᖃᕐᓱᓂ ᑲᒪᒋᔭᖃᕐᓂᐊᑎᓪᓗᒍ ᑭᖑᕝᕕᑕᐅᒍᑎᓄᑦ ᓄᓇᕕᒻᒥ ᐃᓄᑐᐃᓐᓀᑦ ᑮᓇᐅᔭᖁᑎᖏᓐᓂᒃ ᐱᑕᖃᕐᑎᑕᐅᔪᓂᒃ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᑎᒍᑦ. ᒪᑭᕝᕕᐅᑉ ᖃᓄᐃᓘᕐᑎᐅᒋᐊᖃᕐᓂᖓᑕ ᐃᓚᖓ ᐱᕈᕐᑎᓯᓂᖅ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᑮᓇᐅᔭᑎᒍᑦ ᒪᑭᑕᒍᑎᑦᓴᓕᐅᕐᓂᒥᒃ ᐱᑕᖃᕐᑎᓯᓂᕐᒥᒍ ᐃᑲᔪᕐᓯᒍᑎᓂᒃ ᐃᓄᑐᐃᓐᓇᓄᑦ-ᐊᐅᓚᑕᐅᓂᐊᕐᓗᑎᒃ ᖄᖏᕐᓂᑯᓕᐅᕐᕖᑦ ᓄᐃᑎᕐᑕᐅᓂᖏᓐᓄᑦ ᓄᓇᕕᒻᒥ. ᒪᑭᕝᕕᒃ ᐃᑲᔪᕐᓯᒪᔪᖅ ᐃᓄᒃᑎᑐᑦ ᐃᓗᕐᕈᓯᐅᑉ ᐅᖃᐅᓯᐅᓪᓗ ᐱᐅᓕᐊᕐᑕᐅᓂᒋᓐᓂᒃ, ᐃᓚᒋᔭᐅᒻᒥᑎᓪᓗᒋᑦ ᐃᓗᓯᓕᕆᓂᖅ, ᐃᑲᔪᕐᓯᐅᑎᓕᕆᓂᖅ, ᐊᔪᕐᓴᓗᐊᕐᓂᒥᒃ ᐃᑯᓪᓚᑎᑦᓯᓂᕐᒥᒃ, ᐊᒻᒪᓗ ᐃᓄᑐᐃᓐᓀᑦ ᓄᓇᓕᓐᓂᑦ ᐃᓕᓐᓂᐊᓂᖏᓐᓂᒃ.