ᕕᕗᐊᕆ 19, 2019-ᒥ – ᐳᕕᕐᓂᑐᖅ, ᓄᓇᕕᒻᒥ – ᑕᕐᕿᐅᓚᐅᕐᑐᒥ ᒪᑭᕝᕕᒃ ᑯᐊᐳᕇᓴᐅᑉ ᐊᖓᔪᕐᖄᖓ ᓵᓕ ᒍᐊᑦ ᐊᓪᓚᕕᖃᓚᐅᕐᑐᖅ ᑯᐯᒃᒥ ᑲᕙᒪᐅᑉ ᐊᖓᔪᕐᖄᒪᕆᖓᓄᑦ ᕗᕌᔅᓱᐊ ᓚᑰᒧᑦ ᐱᖁᔭᖅ 64 ᐱᑦᔪᑎᒋᑦᓱᒍ, ᑯᐯᒃᒥ ᖁᑭᐅᑏᑦ ᓇᓗᓀᕐᑕᐅᒪᓗᑎᒃ ᐊᓪᓚᑕᐅᓯᒪᖃᑦᑕᕆᐊᖃᕐᓂᖏᓐᓄᑦ ᐱᖁᔭᖅ ᐱᑦᔪᑎᒋᑦᓱᒍ.
ᑐᓴᕐᑕᐅᖁᔭᐅᔪᓂᒃ ᑯᐯᒃᑯᑦ ᐊᖓᔪᕐᖄᒪᕆᖓ ᓚᑰ ᐊᓪᓚᕕᐅᓚᐅᕐᑐᖅ ᐃᓱᐃᓪᓕᕈᑕᐅᑐᐃᓐᓇᕆᐊᓖᑦ ᐱᑦᔪᑎᒋᑦᓱᒋᑦ ᓄᓇᕕᒻᒥᐅᓄᑦ ᐃᓄᓐᓄᑦ ᐱᖁᔭᖕᖑᑕᐅᑉᐸᑦ ᖁᑭᐅᑏᑦ ᓇᓗᓀᕐᑕᐅᒪᓗᑎᒃ ᐊᓪᓚᑕᐅᓯᒪᒋᐊᖃᓚᖓᓕᕐᓂᖏᓐᓄᑦ, ᖃᐅᔨᑎᑦᓯᖃᑦᑕᐅᑎᒍᑎᓪᓗ ᐊᓪᓚᓯᒪᔪᐃᑦ ᐊᒻᒪᓗ ᑕᒪᑐᒥᖓ ᐱᖁᔭᒥᒃ ᒪᓕᖕᖏᑐᐃᑦ ᖃᓄᐃᓕᔭᐅᒋᐊᖃᓚᕿᖃᑦᑕᓚᖓᓂᖏᑦ ᐱᑦᔪᑎᐅᒻᒥᑎᓪᓗᒋᑦ ᑯᐯᒃᑯᑦ ᐊᖓᔪᕐᖄᒪᕆᖓ ᐊᓪᓚᕕᐅᓚᕿᓚᐅᑐᖅ. ᑕᒪᑦᓱᒪᐅᓪᓗ ᐋᕐᕿᓱᕐᓯᒪᐅᑎᑦᓴᖓ ᐊᑐᐃᓐᓇᕈᕐᑕᐅᕙᓪᓕᐊᓱᓂ, ᑯᐯᒃᒥ ᖁᑭᐅᑏᑦ ᓇᓗᓀᕐᑕᐅᒪᓗᑎᒃ ᐊᓪᓚᑕᐅᓯᒪᖃᑦᑕᕆᐊᖃᕐᓂᖏᓐᓄᑦ ᐱᖁᔭᖅ ᐊᑐᕈᓐᓇᓛᖕᖏᒪᑦ ᓄᓇᕕᒻᒥ ᐊᒻᒪᓗ ᐃᓄᐃᑦ ᐊᖑᓇᓱᑦᑏᑦ ᐱᐅᓯᑐᖃᕐᒥᒍᑦ ᐃᓅᒐᓱᐊᕈᓯᖏᓐᓄᑦ ᐃᓕᖓᖕᖏᓚᕆᓚᖓᒻᒪᑦ, ᑌᒣᑦᑐᓭᓐᓇᐅᖏᓐᓇᓱᓂᓗ ᐅᓪᓗᒥᒧᑦ.
ᒪᑭᕝᕕᐅᑉ ᐊᖓᔪᕐᖄᖓ ᓵᓕ ᒍᐊᑦ ᐅᖃᓚᐅᕐᑐᖅ ᐃᒫᒃ: “ᑕᒪᑦᓱᒪᐅᑉ ᐱᖁᔭᐅᑉ ᐊᑖᒍᕐᓗᑎᒃ ᐃᓄᓐᓅᓕᖓᓗᑎᒃ ᐃᓂᓪᓚᑕᐅᒪᐅᑎᑦᓴᖏᓐᓂᒃ ᕿᓂᕐᐳᒍᑦ, ᐃᓄᐃᑦ ᖁᑭᐅᑎᒥᓂᒃ ᐊᓪᓚᑕᐅᑎᑦᓯᒪᖃᑕᐅᒍᓐᓇᖁᑦᓱᒋᑦ ᐊᐳᕐᓯᒪᐅᑎᑭᑦᑑᒍᓐᓇᕕᓕᒫᑎᒍᑦ. ᐃᓅᓯᕐᑎᓅᓕᖓᖁᔭᕗᑦ, ᐃᓅᒐᓱᐊᕈᑎᑦᓴᑎᓐᓂᒃ ᐊᖑᓇᓱᓲᖑᒐᑦᑕ, ᐱᐅᓯᑐᖃᕐᑎᒍᓪᓗ ᐊᒻᒪᓗ ᐃᓅᑦᓱᑕ ᐱᒍᓐᓇᐅᑎᖃᕋᑦᑕ ᐃᓚᐅᔫᔪᒍᑦ ᔦᒥᔅ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᐅᓯᒪᔫᖅ ᐊᑖᒍᑦ ᐊᒻᒪᓗ ᓄᓇᕕᒻᒥ ᓄᓇᒋᔭᑦᑎᓂ ᑕᕆᐅᕐᒥᐅᑕᓂᓗ ᐆᒪᔪᓕᕆᓂᕐᒧᑦ ᐊᖏᖃᑎᒌᒍᑎᐅᓯᒪᔪᒧᑦ ᐱᒍᓐᓇᐅᑎᖃᕐᑎᑕᐅᒻᒥᒐᑦᑕ.” ᓵᓕ ᑌᒣᓕᔪᓂᒃ ᐊᓪᓚᕕᖃᓚᐅᕐᑐᖅ.
ᒪᑭᕝᕕᑯᑦ ᑯᐯᒃᑯᑦ ᑲᕙᒪᖓᓂᒃ ᒪᓂᔨᕕᖃᓚᐅᕐᑐᑦ ᑕᒪᑐᒥᖓ ᐃᑲᔪᕐᑎᒌᒍᑎᖃᕐᓗᑎᒃ ᐱᓇᓱᐊᖃᑎᖃᕈᒪᓂᕐᒥᓂᒃ ᐃᓄᐃᑦ ᐃᑲᔪᕐᑎᒌᓚᖓᔪᑦ ᓄᐃᑕᐅᖁᑦᓱᒋᑦ ᐃᓂᓪᓚᑎᕆᔨᐅᓚᖓᔪᐃᑦ ᐱᖁᔭᐅᑉ ᐋᕐᕿᓯᒪᓂᑦᓴᖓᓂᒃ ᐃᓄᓐᓅᓕᖓᔪᓂᒃ ᐋᕐᕿᓱᐃᓚᖓᔪᓂᒃ ᐱᖁᔭᖕᖑᑕᐅᒍᒪᔪᖅ ᐱᑦᔪᑎᒋᓗᒍ. ᑌᒣᓕᖓᓗᑕ ᐱᓇᓱᐊᖃᑎᒌᒍᑎᒍᓐᓇᑕᕗᑦ ᓄᓇᕕᒻᒥ ᑌᒣᓗᕐᓱᑕ ᐱᓇᓱᐊᖃᑦᑕᓯᒪᒻᒥᒐᑦᑕ ᐃᑲᔪᕐᑎᒋᓐᓂᑯᑦ ᓄᐃᑦᓯᒐᓱᐊᕐᓱᑕ. ᒪᑭᕝᕕᑯᑦ ᑐᑦᓯᕋᓚᐅᕐᒥᔪᑦ ᐊᓪᓚᑕᒥᒍᑦ ᑕᒪᓐᓇ ᐱᖁᔭᖕᖑᑕᐅᒍᒪᔪᖅ ᓄᑖᖅ ᓄᕐᖃᖓᑎᑕᐅᑫᓐᓇᖁᑦᓱᒍ ᓄᓇᕕᒻᒥ, ᓄᓇᕕᒻᒨᓕᖓᓂᕐᓴᓂᒃ ᐃᑲᔪᕐᑎᒌᒍᑎᐅᕐᖄᖁᑦᓱᒍ ᐱᓇᓱᐊᖃᑎᒋᓗᒋᑦ ᑯᐯᒃᒥ ᑲᕙᒪᒃᑯᑦ.
ᓵᓕ ᒍᐊᑦ ᐅᖃᓚᐅᕐᒥᔪᖅ ᐃᒫᒃ: “ᖁᑭᐅᑎᒃ ᑌᒫᓪᓗᐊᓭᓐᓇ ᓴᓇᕐᕈᑎᐅᕗᖅ ᐊᒻᒪᓗ ᑮᓇᐅᔭᐅᑦᓱᓂ ᐅᕙᑦᑎᓄᑦ. ᓂᕿᑦᓴᑖᓚᕿᐅᑎᐅᓲᒍᒻᒪᑦ ᐱᒻᒪᕆᐅᑦᓱᓂᓗ ᓂᕆᑎᑦᓯᓚᕿᐅᑎᐅᓲᒍᒻᒪᑦ ᐃᓚᑦᑎᓂᒃ ᐊᒻᒪᓗ ᐊᓐᓇᐅᒪᐅᑎᒋᒍᓐᓇᓱᒍ ᓄᓇᒦᓕᕋᑦᑕ,”…
ᒪᑭᕝᕕᑯᑦ ᐊᓪᓚᑕᕕᓂᖓ ᑐᑭᓯᔭᐅᑦᓯᐊᑕᕕᓂᐅᒋᐊᖓ ᑐᓴᕐᓇᓚᐅᕐᑐᖅ ᐅᖃᐅᓯᑐᐃᓐᓇᑰᒐᓗᐊᖅ ᐅᖃᖃᑦᑕᓚᐅᕐᒪᑕ ᑯᐯᒃᒥ ᑲᕙᒪᒃᑯᑦ.
ᑯᐯᒃᒥ ᖁᑭᐅᑏᑦ ᓇᓗᓀᕐᑕᐅᒪᓗᑎᒃ ᐊᓪᓚᑕᐅᓯᒪᒋᐊᖃᕐᓂᖏᓐᓄᑦ ᐱᖁᔭᖅ ᐊᑐᕐᓂᖃᓯᒪᐅᔪᖅ ᔭᓄᐊᕆ 29, 2018-ᒥ. ᐱᖁᔭᐅᑉ ᐊᑖᒍᑦ, ᖁᑭᐅᑏᑦ ᓇᓗᓀᕐᑕᐅᒪᖕᖏᑐᐃᑦ ᑯᐯᒃᒥ ᐊᓪᓚᑕᐅᓯᒪᒍᑎᓄᑦ ᐊᓪᓚᑕᐅᖃᑦᑕᕆᐊᖃᓕᕐᑐᑦ.
-30-
ᑐᑭᓯᒋᐊᕐᕕᐅᒍᓐᓇᑐᖅ
ᒍᐃᓕᐊᒻ ᑕᒍᓐᓈᖅ
ᐱᓂᐊᕐᓂᓕᕆᓂᕐᒧᑦ ᐊᔪᖀᒋᐊᕐᑎᒋᔭᐅᔪᖅ ᐊᖓᔪᕐᖄᒧᑦ ᐊᒻᒪᓗ
ᑐᓴᐅᒪᖃᑦᑕᐅᑎᓕᕆᕕᒻᒥ ᑐᑭᒧᐊᕐᑎᓯᔨᐅᑦᓱᓂ
ᐅᖄᓚᐅᑎᖓ: 819-964-2925
ᖃᕆᑕᐅᔭᑎᒍ5 ᑐᕌᒍᑎᖓ: wtagoona@makivik.org
ᒪᑭᕝᕕᐅᑉ ᖃᕆᑕᐅᔭᒥᑦᑎᐊᖏᓐᓂᒃ ᑕᑯᒐᓱᐊᕐᕕᐅᒍᓐᓇᑐᖅ ᐅᓇ: www.makivik.org
ᒪᑭᕝᕕᒃᑯᑦ ᓄᓇᓄᑦ ᐊᖏᖃᑎᒌᒍᑎᐅᓯᒪᔪᓂᒃ ᑎᒥᐅᔫᑦᓱᓂ ᑎᓕᔭᐅᒪᐅᑎᖃᕐᑐᖅ ᑲᒪᔨᐅᓚᖓᑦᓱᑎᒃ ᑮᓇᐅᔭᑎᒍᑦ ᕿᒻᒪᖂᑎᑦᓴᓕᐊᕕᓂᕐᓂᒃ ᐃᓄᓐᓄᑦ ᓄᓇᕕᒻᒥᐅᓄᑦ ᐱᔭᕕᓂᖏᓐᓂᒃ ᔦᒥᔅ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᒃ ᓄᐃᑕᐅᒻᒪᑦ. ᒪᑭᕝᕕᑯᑦ ᑲᒪᒋᔭᖃᕈᒫᕐᓂᐊᓯᒪᔪᑦ ᐊᐅᓚᑦᓯᓂᓕᕆᓂᕐᓂᒃ ᐊᒻᒪᓗ ᑮᓇᐅᔭᓕᐅᕈᑎᖃᕋᓱᐊᖃᑦᑕᓚᖓᓗᓂ ᑖᒃᑯᓂᖓ ᑮᓇᐅᔭᕐᑖᒍᓯᒪᔪᓂᒃ ᐊᒻᒪᓗ ᑮᓇᐅᔭᑎᒍᑦ ᐱᕙᓪᓕᐊᑎᑦᓯᒐᓱᐊᕐᑎᐅᓚᖓᓗᓂ ᐃᓄᐃᑦ ᓇᒻᒥᓂᖅ ᐊᐅᓚᑦᓱᒋᑦ ᑮᓇᐅᔭᓕᐅᕋᓱᐊᕈᑎᒋᓚᖓᔭᒥᓂᒃ ᓄᐃᑦᓯᒐᓱᐊᕐᑎᓗᒋᑦ ᐃᑲᔪᕐᑎᐅᖃᑦᑕᕈᒫᕐᓂᐊᓯᒪᒻᒥᔪᑦ ᓄᓇᕕᒻᒥ. ᒪᑭᕝᕕᒃ ᐃᓄᐃᑦ ᐃᓗᕐᕈᓯᖏᓐᓂᒃ ᐅᖃᐅᓯᖏᓐᓂᓗ ᐊᓯᐅᔨᑦᑌᓕᓂᒃᑯᑦ ᖁᕝᕙᑎᑦᓯᒐᓱᐊᕐᑎᐅᒍᒫᕐᓂᐊᓯᒪᒻᒥᔪᑦ ᐊᒻᒪᓗ ᐃᓄᐃᑦ ᐃᓗᓯᓕᕆᔭᐅᒍᓯᖏᓐᓂᒃ, ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ, ᐊᔪᕐᓴᑐᓂᓪᓗ ᐃᑲᔪᕐᓯᒪᔨᐅᒋᐊᖃᕐᓱᑎᒃ ᐊᒻᒪᓗ ᐃᓄᐃᑦ ᐃᓕᓴᕐᓂᓕᕆᔭᐅᓂᖏᓐᓂᒃ ᓄᓇᓕᓐᓂ ᑲᒪᒋᔭᖃᖃᑦᑕᓚᖓᒍᒫᕐᓂᐊᓯᒪᒻᒥᔪᑦ.