ᑰᒃᔪᐊᒥ, ᑯᐯᒃ, ᓅᕕᒻᐱᕆ 8, 2017 – ᒪᑭᕝᕕᑯᑦ ᐊᓕᐊᑉᐳᑦ ᑐᓴᕐᑎᓯᒋᐊᒥᒃ ᐱᒻᒪᕆᒻᒥᒃ ᐊᓪᓗᕆᐊᕈᑎᐅᔪᖃᓚᐅᕐᓂᖓᓄᑦ ᐱᕙᓪᓕᐊᑎᑕᐅᔪᖃᕋᓱᐊᕐᑎᓗᒍ ᓄᑖᒥᒃ ᐊᑑᑎᒐᑦᓴᐅᓂᐊᕐᑐᓂᒃ ᑐᖕᖓᕕᐅᓂᐊᕐᑐᓂᓪᓗ ᐅᕕᒃᑲᓂᒃ ᖄᑭᕐᑎᑕᐅᓂᖏᓐᓄᑦ ᓄᓇᕕᒻᒥ. ᑖᒃᑯᐊ ᓄᑖᑦ ᐊᑑᑎᒐᑦᓴᓕᐊᖑᓯᒪᔪᑦ ᐱᕙᓪᓕᐊᑎᑕᐅᓚᐅᔪᑦᓱᑎᒃ ᓴᐳᒻᒥᔪᖃᕐᑎᓗᒍ ᐊᑦᔨᒋᔭᐅᖏᑐᓂᒃ ᑲᑎᒪᔨᐊᐱᓐᓂᒃ ᐅᓄᕐᓯᒋᐊᕐᑎᓯᒍᑎᐅᓂᐊᓕᕐᑐᑦ ᐃᓚᐅᖃᑕᐅᒍᓐᓇᓚᖓᔪᓂᒃ ᐅᕕᒃᑲᓂᒃ ᐱᖕᖑᐊᕈᓐᓇᑐᓂᒃ, ᓄᓇᓖᓪᓗ ᐃᓚᐅᖃᑕᐅᓂᕐᓴᐅᓂᐊᓕᕐᓱᑎᒃ, ᐊᒻᒪᓗ ᐃᓅᓯᕐᒥᒃ ᐱᕙᓪᓕᐊᑎᑦᓯᒐᓱᐊᕐᓂᒥᒃ ᐱᓕᐅᒥᑎᑦᓯᒐᓱᐊᕈᑕᐅᓗᑎᒃ.
“ᕕᕗᐊᕆᐅᑎᓪᓗᒍ ᑕᒡᒐᓂ ᐊᕐᕌᒍᕐᒥ ᑐᓴᕐᑎᓯᓚᐅᔪᒐᑦᑕ ᐊᕐᖁᑎᓕᐅᕐᓂᐊᓕᕆᒥᒃ ᓄᑖᒥᒃ ᑐᕌᕐᕕᓕᐅᕐᓗᑕ ᑕᒪᑦᓱᒧᖓ ᐅᕕᒃᑫᑦ ᖄᑭᕐᑎᑕᐅᓂᖏᓐᓄᑦ ᓄᓇᕕᒻᒥᓗ,” ᑌᒣᓕᓚᐅᕐᑐᖅ ᔫᐱ ᑕᕐᕿᐊᐱᒃ, ᒪᑭᕝᕕᑯᑦ ᐊᖓᔪᕐᖄᒪᕆᖓᑦ. “ᐱᔪᕆᐅᑎᖃᕐᐳᖓ ᑐᓴᕐᑎᓯᒋᐊᒥᒃ ᓄᑖᒥᒃ ᐊᐅᓚᑦᔦᒍᑎᖃᓚᖓᓕᕋᑦᑕ ᑕᒪᑦᓱᒧᖓ ᖄᑭᕐᓂᑯᑦ ᐃᑲᔪᕐᓯᒪᐅᑎᑦᑎᓂᒃ, ᐊᒥᓲᓂᕐᓴᓄᑦ ᐃᓄᓐᓄᑦ ᐱᖕᖑᐊᑎᑦᓯᒍᑕᐅᒍᓐᓇᓚᖓᓕᕐᑐᓂᒃ ᐊᑯᓂᕐᓂᓴᐅᓂᖃᕐᑐᒥᒃ.”
ᐱᓗᐊᕐᑐᒥᒃ, 2017-2018 ᖄᑭᕐᓇᐅᓕᕐᐸᑦ ᓄᓇᕕᒻᒥ, ᒪᑭᕝᕕᑯᑦ ᑐᓴᕐᑎᓯᒍᑎᖃᓚᐅᕐᑐᑦ ᒪᑯᓂᖓ:
- ᐱᓇᓱᑦᑎᑖᕆᔭᐅᔪᖃᕐᑎᓗᒍ ᓄᓇᓕᓕᒫᓂᒃ ᑐᑭᒧᐊᑦᑎᓯᔨᐅᓂᐊᕐᑐᒥᒃ ᖄᑭᕐᓂᒧᑦ
- ᑮᓇᐅᔭᖃᕐᑎᑕᐅᔪᖃᕐᓗᓂ ᓄᓇᓕᓐᓂᒃ ᓄᓇᓕᓐᓂ ᖄᑭᕐᓂᒥᒃ ᐱᒋᐅᕐᓴᑎᑦᓯᔨᐅᓂᐊᕐᑐᓄᑦ
- ᐊᕐᕿᓱᕐᑕᐅᔪᖃᕐᓗᓂ ᓄᓇᓕᓐᓂ ᖄᑭᕐᓂᒥᒃ ᐱᒋᐅᕐᓴᑎᑦᓯᔩᑦ ᑐᑭᒧᐊᑦᑎᓯᔨᐅᓂᕐᒥᒃ (coaches) ᑲᑎᒪᓂᐊᕈᓯᖃᕐᑎᓯᓂᕐᒧᑦ
- ᐊᕐᕿᓱᕐᑕᐅᔪᖃᕐᓗᓂ ᐅᕕᒃᑫᑦ ᖄᑭᕐᓂᒥᒃ ᐱᕙᓪᓕᐊᑎᑕᐅᒐᓱᐊᕐᓂᖏᓐᓂᒃ ᓄᓇᓕᓐᓂ
- ᐊᕐᕿᓱᕐᑕᐅᔪᖃᕐᓗᓂ ᐅᕕᒃᑫᑦ ᖄᑭᕐᓂᖃᕐᑎᓗᒋᑦ ᓄᓇᓕᓕᒫᑎᒍᑦ ᖄᑭᕐᓇᐅᑉ ᐅᓪᓗᖏᑦ ᐃᓱᓕᓕᕐᐸᑕ
ᑖᒃᑯᐊ ᑐᓴᕐᑎᓯᒍᑏᑦ ᑐᖕᖓᕕᖃᕐᑎᑕᐅᒻᒪᑕ ᐱᓇᓱᐊᕐᑕᐅᓚᐅᕐᑐᓄᑦ ᓄᓇᕕᒻᒥ ᐅᕕᒃᑫᑦ ᖄᑭᕐᓂᒥᒃ ᓱᖏᐅᓯᓴᕐᑕᐅᓂᖏᑦᑕ ᐃᑲᔪᕐᓯᒪᐅᑎᖏᓐᓄᑦ ᑲᑎᒪᔨᐊᐱᖏᓐᓄᑦ, ᑖᒃᑯᐊ ᓄᐃᑕᐅᓚᐅᔪᒻᒪᑕ ᐅᐱᕐᖓᓴᐅᑎᓪᓗᒍ 2017-ᒥ. ᑖᒃᑯᐊ ᑲᑎᒪᔨᐊᐲᑦ, ᐃᓄᑦᑕᖃᕐᓱᓂ ᑭᒡᒐᑐᕐᑎᒋᔭᐅᔪᓂᒃ ᒪᑭᕝᕕᑯᓄᑦ, ᑲᑎᕕᒃ ᓄᓇᓕᓕᒫᑦ ᑲᕙᒪᖓᓄᑦ, ᓄᓇᓖᑦ ᓯᕗᓕᕐᑎᖏᓐᓄᑦ, ᐅᕕᒃᑲᓄᑦ, ᐊᖓᔪᕐᖄᕆᔭᐅᔪᕐᓄᑦ, ᐊᒻᒪᓗ ᓄᓇᓕᓐᓂ ᖄᑭᕐᓂᓕᕆᓂᕐᒥᒃ ᑭᒡᒐᑐᕐᑎᖏᓐᓄᑦ, ᑎᓕᔭᐅᓚᐅᔪᒻᒪᑕ ᐱᕙᓪᓕᐊᑎᑦᓯᖁᔭᐅᑦᓱᑎᒃ ᑕᑯᓐᓈᑕᐅᓂᐊᕐᑐᒥᒃ ᑕᒪᑦᓱᒧᖓ ᐅᕕᒃᑫᑦ ᖄᑭᕐᓂᑯᑦ ᑐᖕᖓᕕᖃᕐᑎᓯᓂᕐᒧᑦ ᐱᕙᓪᓕᐊᑎᑦᓯᓂᕐᒧᓗ ᓄᓇᕕᒻᒥ.
ᑖᒃᑯᐊ ᑐᕌᒐᖏᑦᑕ ᐅᖃᐅᓯᕐᑕᖏᑦ ᐱᕙᓪᓕᐊᑎᑕᐅᓯᒪᔪᑦ ᑲᑎᒪᔨᐊᐱᓐᓄᑦ ᓄᓇᕕᒻᒥ ᖄᑭᕐᓂᓕᕆᓂᕐᒧᑦ ᐃᒣᓕᖓᔪᑦ “ᐃᒻᒥᒎᑦᓯᐊᕈᓐᓇᑐᒥᒃ, ᓄᓇᓕᓐᓄᑦ ᐊᐅᓚᑦᔭᑕᐅᒪᔪᒥᒃ, ᐃᓗᕐᕈᓯᕐᑎᒍᑦ ᓲᓱᒋᔭᖃᕐᑐᒥᒃ ᖄᑭᕐᓂᒧᑦ ᐃᑲᔪᕐᓯᒪᐅᑎᖃᕐᓂᐊᑎᓪᓗᒍ ᐃᑲᔪᕐᓯᓯᒪᓂᐊᕐᑐᒥᒃ ᓄᓇᕕᐅᑉ ᐅᕕᒃᑲᖏᑦᑕ ᐃᓅᓯᖏᓐᓂᒃ ᐱᓕᐅᒥᑎᑦᓯᒍᑎᐅᓂᐊᕐᑐᒥᒃ.”
ᑖᒃᑯᐊ ᑲᑎᒪᔨᐊᐲᑦ ᙯᖁᔨᖃᑦᑕᓯᒪᓕᕐᑐᑦ ᖄᑭᕐᓂᒥᒃ ᖃᐅᔨᒪᔪᒻᒪᕆᐅᑎᖃᕐᑐᓂᒃ ᑕᒪᒃᑯᓇᖕᖓᑦ ᑎᒥᐅᔪᕐᓂᑦ, ᐊᒻᒪᓗ ᐃᓄᑑᓈᕐᑎᑐᓂᒃ ᑕᒪᒃᑯᓄᖓ ᐊᒥᓱᒐᓛᓄᑦ ᑲᑎᒪᓂᐅᖃᑦᑕᓚᐅᕐᑐᓄᑦ. ᑕᒪᒃᑯᐊ ᙯᖃᑦᑕᓚᐅᕐᑐᑦ ᐃᓚᖃᕐᓱᑎᒃ ᐅᑯᓂᖓ: ᖄᑭᕐᓂᖅ ᑯᐯᒃᒥ, ᖄᑭᕐᓂᖅ ᑲᓇᑕᒥ, ᖄᑭᕐᓂᖅ ᓄᓇᕘᕐᒥ, New Zealand Maori Cultural Integration, Tara Leisha (ᐱᐅᔪᕐᒥᒃ ᐅᕕᒃᑲᓂᒃ ᐱᕙᓪᓕᐊᑎᑦᓯᒐᓱᐊᕐᓂᒥᒃ ᖃᐅᔨᒪᔪᒻᒪᕆᐅᔪᖅ) ᐊᒻᒪᓗ ᐊᒥᓱᒻᒪᕆᓐᓂᒃ ᖄᑭᕐᑎᐅᓯᒪᔪᓂᒃ ᐅᑯᓂᖓ Maxime Lalande ᐊᒻᒪᓗ John Chabot.
ᐱᕙᓪᓕᐊᑎᑕᐅᒐᐅᒐᓚᐅᕐᓂᖓᓄᑦ
“ᑕᒪᓐᓇ ᓄᑕᖅ ᐊᑑᑎᔭᐅᓂᐊᓕᕐᑐᖅ ᐱᕙᓪᓕᐊᑎᑕᐅᒐᐅᒐᓚᐅᕐᒪᑦ ᑕᒪᑦᓱᒧᖓ ᖄᑭᕐᓂᒥᒃ ᐃᑲᔪᕐᓯᒪᐅᑎᑦᑎᓄᑦ,” ᑌᒣᓕᓚᐅᕐᑐᖅ ᔫᐱ ᑕᕐᕿᐊᐱᒃ. “ᑖᒃᑯᐊ ᓇᒻᒪᓈᕐᓂᖃᕐᓱᑎᓪᓗ ᖃᐅᔨᔭᐅᓯᒪᔪᓄᑦ ᓇᓗᓀᔭᕐᑕᐅᔪᖃᓚᐅᕐᓯᒪᑎᓪᓗᒍ ᑖᒃᑯᓄᖓ ᓄᓇᕕᒻᒥ ᐅᕕᒃᑲᓂᒃ ᖄᑭᕐᓂᒥᒃ ᐱᕙᓪᓕᐊᑎᑦᓯᒐᓱᐊᕈᑎᓄᑦ ᐃᑲᔪᕐᓯᒪᐅᑎᓄᑦ, ᒪᑭᕝᕕᑯᓄᑦ ᒫᓐᓇᑯᑦ ᑲᒪᒋᔭᐅᓂᖃᕐᑐᒧᑦ. ᑖᒃᑯᑎᒎᓇ, ᑖᓐᓇ ᑎᒥᖁᑎᕗᑦ ᓇᑯᕐᒦᕈᒪᔪᖅ ᔪᐃ ᔪᓅᒥᒃ ᐱᓇᓱᐊᕐᓯᒪᓕᕐᓂᖓᓄᑦ ᐱᕈᕐᓴᑕᐅᔪᖃᕐᑎᓗᒍ ᐊᑦᑕᓇᖕᖏᑐᒥᒃ ᖄᑭᕐᓂᒧᑦ ᑐᖕᖓᕕᐅᓂᐊᓕᕐᑐᒥᒃ ᓄᓇᕕᒻᒥ ᑖᒃᑯᓇᓂ ᖁᓕᓂ ᐊᕐᕌᒍᓚᐅᕐᑐᓂ. ᑖᓐᓇ ᔪᐃ ᐊᒥᓱᒐᓚᓐᓂᒃ ᐃᓄᐃᑦ ᐅᕕᒃᑲᖏᓐᓂᒃ ᐊᑑᑎᑎᑦᓯᓯᒪᓕᕐᑐᖅ ᐱᒍᓐᓇᓯᒍᑎᐅᓚᐅᕐᑐᓂᒃ ᑕᒪᒃᑯᓇᓂ ᐊᕐᕌᒍᕐᓂ ᖄᖏᖃᑦᑕᓚᐅᕐᑐᓂ. ᑕᒪᑦᓱᒧᖓᓕ ᐅᑎᕈᑎᖃᕋᓱᐊᕈᓐᓀᑐᒍᑦ, ᑭᓯᐊᓂᓕ ᓯᕗᒧᐊᕆᐊᑐᐃᓐᓇᓕᕋᑦᑕ ᓄᑖᒧᑦ ᖄᑭᕐᓂᓕᕆᓂᐅᓚᖓᓕᕐᑐᒧᑦ ᓄᓇᕝᒻᒥ, ᐃᒣᓕᔭᐅᒍᓐᓇᓕᕋᔭᕐᑎᓗᒍ “ᐱᒋᐊᕐᑎᑕᐅᒪᔪᖅ ᓄᓇᕕᒻᒥ ᐃᓄᓐᓄᑦ ᐃᓄᓐᓄᐊᖓᑎᓪᓗᒍ”.
ᒪᑭᕝᕕᑯᑦ ᓴᐳᒻᒥᒍᒪᓂᖃᕐᐳᑦ ᐱᕙᓪᓕᐊᑎᑦᓯᒐᓱᐊᕐᓂᒥᒃ ᐊᒻᒪᓗ ᑕᑯᓐᓈᓂᖃᕐᓗᑎᒃ ᐱᐅᓂᕐᐹᓂᒃ ᐊᑑᑎᒐᑦᓴᐅᓂᐊᕐᑐᓂᒃ ᐊᕐᕿᓱᕐᑕᐅᔪᖃᕐᑎᓗᒍ ᐅᕕᒃᑫᑦ ᖄᑭᕐᓂᖏᓐᓂᒃ ᓄᓇᕕᒻᒥ, ᑕᒪᑦᓱᒧᖓ ᑭᖕᖒᒪᓇᕐᑐᓄᓪᓗ ᐊᒻᒪᓗ ᐃᓅᓯᕐᑎᒍᑦ ᓯᕗᓂᑦᓴᖃᕐᓂᑯᑦ. ᑕᒪᓐᓇ ᓄᑖᖅ ᑕᑯᓐᓈᓂᒍᓯᐅᓂᐊᓕᕐᑐᖅ ᐱᕙᓪᓕᐊᑎᑕᐅᓯᒪᓕᕐᒪᑦ ᐃᓄᓐᓄᑦ ᐃᓄᓐᓅᓕᖓᓂᐊᕐᑎᓗᒍ. ᒪᑭᕝᕕᑯᓐᓄᓕ, ᖄᑭᕐᓂᒥᒃ ᐱᕙᓪᓕᐊᑎᑦᓯᒐᓱᐊᕐᓂᐅᔪᖅ ᐱᕕᑦᓴᓯᐊᖑᖏᓐᓇᓚᖓᒻᒪᑦ ᐅᕕᒃᑲᓄᑦ ᓱᖃᑦᓯᑎᑦᓯᒍᑕᐅᓗᓂ ᐱᐅᓯᓕᐅᒥᑎᑦᓯᒍᑕᐅᓗᓂᓗ ᐱᔪᓐᓇᓂᖏᓐᓂᓗ ᐱᔪᕆᐅᑎᖃᓲᖑᓂᖏᓐᓂᓗ. ᑕᒪᓐᓇ ᐃᑲᔪᕐᓯᒪᐅᑎᐅᔪᖅ ᐊᒻᒪᓗ ᑮᓇᐅᔭᖃᕐᑎᑕᐅᓚᖓᓂᖓ ᐱᕕᐅᓂᕐᐸᐅᑎᒐᓱᐊᕐᓗᒋᑦ, ᑕᒪᓐᓇ ᖄᑭᕐᓂᓚᕆᐅᓂᐊᕐᑐᖅ ᑕᒪᑦᓱᒧᖓ ᐃᑲᔪᕐᓯᒪᐅᑎᒧᑦ ᑕᑯᓐᓈᓂᖃᕐᑎᑕᐅᓂᐊᕐᒪᑦ ᑲᔪᖏᕐᓭᒍᑎᐅᓗᓂ ᐊᒥᓱᒋᐊᓪᓚᐅᓂᕐᓴᓂᒃ ᐱᐊᕋᕐᓂᒃ ᐅᕕᒃᑲᓂᓪᓗ ᐃᓚᐅᖃᑕᐅᒍᓐᓇᓂᕐᒧᑦ ᐊᑯᓂᕐᓂᖃᕐᓂᓴᒃᑯᑦ.
ᑖᒃᑯᐊ ᑲᑎᒪᔨᐊᐲᑦ ᐱᕙᓪᓕᐊᑎᑦᓯᒐᓱᐊᓕᕐᒪᑕ ᐃᒣᓕᒋᐊᖁᔨᒍᑎᑦᓴᓂᒃ ᑕᒪᑦᓱᒧᖓ ᑭᖑᓪᓕᐹᒥ ᑐᓴᕐᑎᓯᒍᑎᑦᓴᓕᐊᕆᓂᐊᕐᑕᒥᓄᑦ. ᑲᑎᒪᓂᖃᕆᐊᓪᓚᖑᓱᑦᑐᑦ ᓅᕕᒻᐱᕆᐅᑉ ᑕᕐᕿᖓ ᐃᓱᓕᓕᕐᐸᑦ. ᒪᑯᓂᖓ ᐃᓱᒪᒋᔭᐅᒋᐊᖃᕐᓂᐊᑐᓂᒃ ᐃᓗᓕᖃᕐᑎᑕᐅᓂᐊᕐᑐᒥᒃ:
- ᓴᐳᒻᒥᔭᐅᓂᕐᓴᐅᑎᓗᒋᑦ ᓄᓇᓕᑦᑎᒍᑦ, ᐊᒻᒪᓗ ᐃᓚᐅᕕᐅᓂᕐᓴᐅᓂᐊᕐᑎᓗᒍ
- ᐊᒥᓱᓄᑦ ᐅᕕᒃᑲᓄᑦ ᐃᓚᐅᕕᐅᓗᓂ ᓄᓇᓕᑦᑎᒍᑦ ᐊᑯᓂᐅᓂᕐᓴᑎᒍᑦ
- ᐊᑐᕐᑎᑕᐅᔪᖃᕐᓗᓂ ᐱᐅᔪᕐᒥ ᐅᕕᒃᑲᓂᒃ ᐱᕙᓪᓕᐊᑎᑦᓯᒐᓱᐊᕈᓯᕐᓂᒃ
- ᐱᕙᓪᓕᐊᑎᑕᐅᔪᖃᕐᑎᓗᒍ ᓄᓇᓕᓕᒫᑦ ᑐᖕᖓᕕᑦᓴᖏᓐᓂᒃ ᓴᐳᒻᒥᒍᑎᐅᓂᐊᕐᑐᒥᒃ ᓄᓇᓕᑦᑎᒍᕐᑐᓂᒃ ᒪᓕᑦᑕᐅᑎᓪᓗᒋᑦ ᖄᑭᕐᓂᓕᕆᔩᑦ ᑲᓇᑕᒥ ᒪᓕᒐᖏᑦ ᐊᒻᒪᓗ ᐊᓐᓂᑌᓕᒪᓂᖃᕐᑐᒥᒃ ᐊᕙᑎᖃᕐᑎᓯᓂᕐᒥᒃ
- ᐱᑐᕝᕕᓴᓕᐅᕐᓗᓂ ᐃᓕᓐᓂᐊᓂᓕᕆᓂᕐᒥᒃ ᐊᒻᒪᓗ ᐃᓕᓐᓂᐊᕕᒻᒥ ᓄᐃᖏᑑᑎᑦᓯᑌᓕᖕᖏᓂᕐᓴᐅᑎᑦᓯᓂᕐᒥᒃ
- ᐊᑐᕐᑎᑕᐅᔪᖃᕐᑎᓗᒍ ᐃᓄᐃᑦ ᐃᓗᕐᕈᓯᖓᓂᓪᓗ ᐅᖃᐅᓯᖓᓂᓪᓗ
- ᐃᓚᐅᕕᐅᓂᐊᕐᑎᓗᒍ ᐊᖓᔪᕐᖄᕆᔭᐅᔪᓄᑦ
- ᐊᑕᐅᓯᐅᓕᖓᑎᑕᐅᒍᓐᓇᓯᑎᑕᐅᓗᑎᒃ ᓄᓇᕕᒻᒥᐅᑦ ᐊᑯᓐᓂᖏᑎᒍᑦ ᑕᒪᑦᓱᒧᖓ ᓄᑖᒧᑦ ᑐᖕᖓᕕᒻᒧᑦ
“ᒪᑭᕝᕕᑯᑦ ᑕᒫᓂᒻᒪᑕ ᓴᐳᒻᒥᒍᒪᑦᓱᑎᒃ ᐱᕙᓪᓕᐊᑎᑕᐅᔪᖃᕐᑎᓗᒍ ᑐᖕᖓᕕᑦᓯᐊᖑᓂᐊᕐᑐᒥᒃ ᐅᕕᒃᑲᓂᒃ ᖄᑭᕐᑎᓯᓂᕐᒧᑦ ᓄᓇᕕᒻᒥ, ᐱᕙᓪᓕᐊᑎᑕᐅᓯᒪᔪᒥᒃ ᐃᓄᓐᓄᑦ ᐃᓄᓐᓄᐊᖓᔪᒥᒃ, ᐊᒻᒪᓗ ᐱᖕᖑᐊᑎᑦᓯᓂᕐᓴᐅᓂᐊᕐᑐᒥᒃ ᐊᒥᓲᓂᕐᓴᓂᒃ ᐱᐊᕋᕐᓂᒃ ᐅᕕᒃᑲᓂᓪᓗ,” ᑌᒣᓕᓚᐅᕐᑐᖅ ᔫᐱ ᑕᕐᕿᐊᐱᒃ.
-30-
ᐅᖄᖃᑎᒋᔭᐅᒍᓐᓇᑐᖅ:
ᒍᐃᓕᐊᒻ ᑕᒍᕐᓈᖅ
ᑐᓴᐅᒪᒍᑎᓕᕆᓂᕐᒥᒃ ᑐᑭᒧᐊᑦᑎᓯᔨᖓᑦ ᐊᒻᒪᓗ ᑐᓴᕋᑦᓴᓕᕆᔨᖓᑦ
ᒪᑭᕝᕕᒃ ᑯᐊᐳᕇᓴᓐ
ᐅᖄᓚᐅᑎᖓ: 819-964-2925
ᖃᕆᑕᐅᔭᒃᑯᑦ: wtagoona@makivik.org
www.makivik.org
ᒪᑭᕝᕕᑯᑦ ᓄᓇᑖᕋᓱᐊᕐᑎᐅᓂᕐᒥᒃ ᑎᒥᐅᔫᒍᑎᖃᕐᐳᖅ ᑎᓕᔭᐅᒪᑦᓱᓂ ᑲᒪᒋᐊᖃᕐᓂᒥᒃ ᓄᓇᕕᐅᑉ ᐃᓄᖏᑦᑕ ᑮᓇᐅᔭᖁᑎᖏᓐᓂᒃ ᐱᕕᖃᕐᑎᑕᐅᓯᒪᔪᓄᑦ ᐊᑖᒍᑦ ᔦᒥᔅᐯᒥᓗ ᑯᐯᒃ ᑕᕐᕋᖓᓂᓗ ᐊᖏᖃᑎᒌᓐᓂᖓᑦ. ᒪᑭᕝᕕᑯᑦ ᐊᑐᕐᑕᐅᒍᓯᖃᕐᒪᑕ ᐃᓚᖃᕐᑐᓂᒃ ᐊᐅᓚᑦᓯᒋᐊᖃᕐᓂᒥᒃ ᑮᓇᐅᔦᕈᑎᐅᒋᐊᓕᓐᓂᓗ ᑕᒪᒃᑯᓂᖓ ᐊᑭᓕᕐᑕᐅᒍᑎᐅᓯᒪᔪᓂᒃ ᐊᒻᒪᓗ ᑫᓪᓗᑐᐃᓗᑎᒃ ᒪᑭᑕᒐᓱᐊᕐᓂᒥᒃ ᐱᕈᕐᓭᓂᕐᒥᒃ ᐃᑲᔪᕐᓯᓂᒃᑯᑦ ᓄᐃᑕᐅᔪᖃᕐᑎᓗᒍ ᐃᓄᓐᓄᑦ ᐊᐅᓚᑕᐅᔪᓂᒃ ᐱᔅᓇᓯᓂᒃ ᓄᓇᕕᒻᒥ. ᒪᑭᕝᕕᑯᑦ ᑫᓪᓗᑐᐃᓂᖃᓲᖑᕗᑦ ᐊᓯᐅᑎᑦᓯᑌᓕᒪᓂᕐᒧᑦ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗ ᖃᓄᐃᖏᓯᐊᕐᓂᓕᕆᓂᒃᑯᑦ, ᑐᖕᖓᕕᖃᑦᓯᐊᓂᒃᑯᓗ, ᐊᑦᓱᔫᑎᑦᓯᑌᓕᒪᓂᕐᒥᓗ, ᐊᒻᒪᓗ ᐃᓄᐃᑦ ᐃᓕᓐᓂᐊᓂᖏᓐᓂᒃ ᓄᓇᓕᓐᓃᑎᓪᓗᒋᑦ.