ᑐᓴᕋᑦᓴᓂᐊᕐᑎᓄᑦ ᐊᓂᔪᖅ
ᓅᕕᒻᐱᕆ 03, 2022 – ᑰᔾᔪᐊᖅ, ᓄᓇᕕᒃ – ᐅᓪᓗᒥ, ᒪᑭᕝᕕᒃ ᐊᑐᓯᔪᖅ ᐃᓄᒃᑎᑑᑐᐃᓐᓇᑐᒥᒃ ᑕᕐᓴᒥᓂᒃ. ᑕᕐᓴᖓ ᐃᓄᒃᑎᑑᕐᓱᓂ ᓄᐃᑕᓲᑐᖃᐅᒐᓗᐊᖅ ᐊᕐᕌᒍᓂ ᐊᒥᓱᓂ, ᑭᓯᐊᓂ ᓄᐃᑕᑦᓯᓚᖓᓕᕐᒥᔪᖅ ᑕᒪᑐᒥᖓ ᐊᓪᓚᓯᒪᑦᓯᐊᕈᑎᒥᒃ ᖃᓪᓗᓈᑎᑐᑦ ᐊᓪᓚᓯᒪᓂᖓᓂ ᐃᓄᒃᑎᑐᑦ ᐊᓪᓚᖏᑦᑕ ᐊᑖᓂ. ᑖᓐᓇ ᐋᕐᕿᒋᐊᕈᑎ ᓄᐃᑦᓯᑐᐃᓐᓇᑐᖅ ᒪᑭᕝᕕᐅᑉ ᐊᔪᐃᓐᓇᓂᖓᓂᒃ ᐋᕐᕿᓱᐃᓂᕐᒥᒃ ᐊᓪᓚᓯᒪᔪᓂᒃ ᑕᒻᒪᐅᒪᔪᓂᒃ ᐱᐅᓕᓐᓂᐊᒐᖁᑎᑦᑎᓂ.
ᑖᒃᑯᐊ ᐋᕐᕿᒋᐊᕈᑏᑦ ᑎᓕᔨᒍᑕᐅᓯᒪᔪᑦ ᑭᖑᓪᓕᐹᒥᒃ ᒪᑭᕝᕕᒃ ᐊᕐᕌᒍᑕᒫᑦ ᑲᑎᒪᓂᒻᒪᕆᖃᕐᑎᓗᒍ ᐁᕆᓕ 2022-ᒥ ᑲᖏᕐᓱᒥ, ᐊᒻᒪᓗ ᐋᕐᕿᒋᐊᕐᓯᒪᓕᕐᑐᖅ ᑕᕐᓴᖅ ᐊᖏᕐᑕᐅᓚᐅᔪᑦᓱᓂ ᒪᑭᕝᕕᐅᑉ ᑲᑎᒪᔨᖏᑦ ᑲᑎᒪᑎᓪᓗᒋᑦ ᑕᕐᕿᒥ ᑕᒡᒐᓂ.
ᐊᓪᓚᖏᓐᓄᑦ ᐊᓯᑦᔨᕈᑎᐅᑉ ᐊᓯᐊᒍᑦ, ᒥᑭᔪᐊᐱᓐᓂᒃ ᐊᑦᔨᖑᐊᖓᑕ ᐊᓯᑦᔨᕈᑎᓂᒃ ᐋᕐᕿᑐᖃᕐᓯᒪᒻᒥᔪᖅ ᑕᕐᓴᖓᓂ. ᐃᓄᖕᖑᐊᖅ ᑕᕐᓴᐅᑉ ᐃᓗᐊᓂ ᐊᒥᓕᒋᐊᕐᓯᒪᔪᖅ ᓅᒋᐊᕐᓱᒍᓗ ᑮᑖᐱᒃ ᑕᓕᕐᐱᒧᑦ ᓄᐃᑎᑦᓯᐊᓱᒋᑦ ᓄᓇᕕᐅᑉ ᓄᓇᓕᓕᒫᖏᑦ ᓄᓇᖕᖑᐊᑉ ᐃᓗᐊᓂ.
ᕿᑎᕐᖃᓵᕐᓯᐅᑎᕗᑦ ᐊᑐᐊᒐᖁᑎᕗᑦ, ᑕᕐᕋᓕᒃ, ᓄᑖᒥᒃ ᐊᓪᓚᓯᒪᓂᖃᕐᓂᐊᓕᕐᒥᔪᖅ, ᐋᕐᕿᕈᑕᐅᒻᒥᑎᓪᓗᒍ ᐊᓯᐊᓄᑦ ᐊᓪᓚᓯᒪᓂᒃᑯᑦ ᑕᒻᒪᐅᒪᔪᒧᑦ. ᐱᒋᐊᕐᓗᓂ ᓄᐃᒋᐊᕕᑦᑐᓂ ᐊᑐᐊᒐᖓᓂ 130-ᒥ, ᖃᓪᓗᓈᑎᑐᑦ ᐊᓪᓚᓯᒪᓂᖓ ᓴᖑᓂᐊᓕᕐᑐᖅ Taqralik-ᒥᒃ Tarralik-ᒧᑦ.
ᑕᒪᓐᓇ ᐱᓇᓱᑦᑕᐅᔪᖅ ᑲᔪᓯᖏᓐᓇᕋᓗᐊᕐᑎᓗᒍ, ᒪᑭᕝᕕᒃ ᐱᔪᕆᐅᑎᖃᑦᓯᐊᑐᖅ ᓯᕗᒧᐊᕈᑎᖃᕆᐊᒥᒃ ᐃᒻᒥᓂᒃ ᓄᐃᑕᑎᓐᓂᒥᓂᒃ ᐊᑐᕐᓱᓂ ᐃᓄᒃᑎᑐᑦ ᐊᑎᕐᒥᓂᒃ. ᐱᓇᓱᑦᑕᐅᖏᓐᓇᓚᖓᔪᖅ ᐱᑦᔪᑎᖃᕐᓗᓂ ᐋᕐᕿᒋᐊᕐᑎᓯᓂᕐᒥᒃ ᒪᑭᕝᕕᐅᑉ ᑎᒥᖕᖑᓯᒪᐅᑎᖓᓂᒃ ᐃᓕᑕᕆᔭᐅᑎᓪᓗᒍ ᐊᑎᓛᕋᒥ ᐋᕐᕿᓯᒪᑦᓯᐊᑐᒥᒃ ᒪᑭᕝᕕᐅᑉ ᐊᓪᓚᓯᒪᓂᖓᓂᒃ ᑕᒪᖏᓐᓂ ᖃᓪᓗᓈᑎᑐᑦ ᐅᐃᒍᑎᑐᓪᓗ ᐅᖃᐅᓯᕐᓂ.
-30-
ᐅᖃᕐᕕᓴᖅ:
ᑲᐅᓴᓐ ᑕᑯᓐᓈᖅ
ᑐᓴᕈᑎᓕᕆᓂᕐᒥᒃ ᑐᑭᒧᐊᑦᑎᓯᔨ
ᒪᑭᕝᕕᒃ
ctagoona@makivik.org
ᒪᑭᕝᕕᒃ ᓄᓇᑖᕐᓂᑯᑦ ᑎᒥᐅᖕᖑᓯᒪᕗᖅ ᑎᓕᔭᐅᒪᒍᑎᖃᕐᓱᓂ ᐊᐅᓚᑦᓯᔨᐅᓂᕐᒥᒃ ᕿᒻᒪᖁᑎᓂᒃ ᑮᓇᐅᔭᓂᒃ ᑭᒡᒐᑐᕐᓗᓂ ᐃᓄᓐᓂᒃ ᓄᓇᕕᒻᒥ ᐊᑐᕐᓗᓂ ᐱᕕᓕᐅᕐᑕᐅᓯᒪᔪᓂᒃ ᔦᒻᔅ ᐯᒥ ᐊᒻᒪᓗ ᑯᐯᒃ ᑕᕐᕋᖓᓂ ᐊᖏᖃᑎᒌᓂᐅᑉ ᐊᑖᒍᑦ. ᒪᑭᕝᕕᐅᑉ ᐊᑑᑎᖓ ᖃᓗᓯᔪᖅ ᐊᐅᓚᑦᓯᓂᕐᒥᒃ ᐊᒻᒪᓗ ᑐᖕᖓᕖᕈᑎᖃᕐᓂᒥᒃ ᑕᒪᒃᑯᓂᖓ ᑮᓇᐅᔭᓂᒃ ᐊᒪᓗ ᑫᓪᓗᐊᓂᕐᒥᒃ ᒪᑭᑕᐅᑎᑎᒍᑦ ᐱᕈᕐᐸᓕᐊᓂᕐᒥᒃ ᓄᐃᑕᑦᓯᒍᑎᒋᓗᒍ ᐃᑲᔪᕐᑐᓂᕐᒥᒃ ᐱᖕᖑᐃᒍᑎᓂᒃ ᐃᓄᐃᑦ-ᐱᖏᓐᓂᒃ ᖃᑭᓴᐅᑎᓂᒃ ᓄᓇᕕᒻᒥ. ᒪᑭᕝᕕᒃ ᑫᓪᓗᐊᐳᖅ ᐱᐅᓕᒪᑦᓯᓂᕐᒥᒃ ᐃᓄᐃᑦ ᐃᓗᕐᖁᓯᖓᓐᓂᒃ ᐅᖃᐅᓯᖓᓐᓂᓗ ᐊᒻᒪᓗ ᓱᓕ ᐃᓗᓯᕐᓱᓂᖓᓐᓂᒃ, ᖃᓄᐃᖕᖏᓂᖓᓐᓂᒃ, ᐊᔪᕐᓴᓂᐅᑉ ᐃᑯᓚᑎᑕᐅᓂᖓᓂᒃ, ᐊᒻᒪᓗ ᐃᓕᓐᓂᐊᓂᕐᒥᒃ ᐃᓄᑦᑎᒍᑦ ᓄᓇᓕᓐᓂ.