ᒪᓐᑐᔨᐊᓪ, ᑏᓯᒻᐱᕆ 20,2023 – ᑯᐯᒃ ᐊᖓᔪᕐᖄᖓ ᕙᕌᓐᓱᐊ ᓗᑰ ᒪᑭᕝᕕᐅᓗ ᐊᖓᔪᕐᖄᖓ ᐱᑕ ᐋᑕᒥ ᐊᖏᕈᑎᓖᒃ ᐅᓪᓗᒥ ᓄᑖᒥᒃ ᐊᖏᖃᑎᒌᒐᓱᐊᕐᓂᒧᑦ ᓄᑭᒋᔭᐅᓂᐊᕐᑐᓂᒃ ᓄᓇᕕᐅᑉ ᑲᕙᒪᑦᓴᖓᑕ ᐃᓂᓪᓚᖓᐅᓯᑦᓴᖓᓂᑦ ᓄᑕᐅᓯᓕᕐᑎᕆᒍᑎᐅᓂᐊᕐᑐᓂᑦ. ᐊᑎᓕᐅᕈᑕᐅᓂᖓ ᓄᑭᑖᕐᑎᓯᒍᑎᒃ ᐊᖏᔪᒻᒪᕆᒻᒥᒃ ᐊᓪᓗᕆᐊᕐᓂᐅᔪᖅ ᐊᖏᖃᑎᒌᓐᓂᖏᓐᓄᑦ ᑯᐯᒃ ᑲᕙᒪᖓᑕ ᐃᓄᐃᓪᓗ ᓄᓇᕕᒻᒥᐅᑦ ᓄᐃᑦᓯᒍᑎᐅᓚᖓᑦᓱᓂᓗ ᑲᕙᒪᓐᓂᒥᒃ ᐃᓂᓪᓚᖓᐅᓯᐅᓂᐊᕐᑐᒥᒃ ᓄᓇᕕᐅᑉ ᐱᒍᒪᔭᖏᓐᓂᑦ ᑐᖕᖓᕕᖃᕐᓱᓂ. ᓄᑭᑖᕐᑎᓯᒍᑎᐅᑉ ᐊᑎᓕᐅᕐᑕᐅᓂᖓ ᓄᐃᑕᑎᑦᓯᒥᔪᖅ ᑯᐯᒃ ᑲᕙᒪᖓᑕ ᑐᓂᓯᒪᓂᖓᓂᑦ ᐱᓇᓱᐊᖃᑎᖃᕈᒪᓪᓚᕆᓐᓂᖓᓂᓪᓗ ᐃᓄᓐᓂᑦ ᓄᓇᕕᒻᒥᐅᓂᑦ.
ᐊᕐᕌᒍᐃᑦ ᐊᒥᓱᑦ ᐊᓂᒍᕐᑐᓂᑦ, ᐃᓄᐃᑦ ᓄᓇᕕᒻᒥᐅᑦ ᑯᐯᓪᓗ ᑲᕙᒪᖓ ᐅᖄᖃᑎᒌᖃᑦᑕᓯᒪᓕᕐᑐᑦ ᓄᐃᑦᓯᒍᒪᓂᕐᒥᒃ ᓄᑖᒥᒃ ᑲᕙᒪᓐᓂᒥᒃ ᐃᓂᓪᓚᖓᐅᓯᐅᓂᐊᕐᑐᒥᒃ ᓄᓇᕕᒻᒥ. ᐱᖓᓱᑦ ᐊᖏᖃᑎᒌᒍᑏᑦ ᐊᑎᓕᐅᕐᑕᐅᖃᑦᑕᓯᒪᔪᑦ ᐊᖏᖃᑎᒌᒐᓱᐊᕐᓃᑦ ᐊᑐᕐᓱᒋᑦ 2003-ᒥᑦ, 2007-ᒥᑦ 2011-ᒥᓪᓗ ᐃᓚᒋᔭᐅᑎᓪᓗᒍ ᓄᓇᕕᒻᒥ ᓄᓇᓕᓕᒫᑦ ᑲᕙᒪᖓ ᒪᓕᒐᖏᓪᓗ ᓄᐃᑦᓯᒍᑎᐅᒐᔭᕐᑐᑦ ᐊᐅᓚᑕᐅᒍᑎᒋᓂᐊᕐᑕᖏᓐᓂᑦ.
ᑯᐯᒃ ᑲᕙᒪᖓᑕ ᓄᓇᕕᐅᓪᓗ ᑎᒥᐅᔪᖏᑦ ᓱᕐᕋᑕᐅᓂᖃᕐᓂᐊᑐᑦ ᓯᕗᓂᕐᒥ ᐊᖏᖃᑎᒌᒐᓱᐊᕐᓂᐅᔪᓄᑦ ᑲᔪᖏᕐᓴᑕᐅᕗᑦ ᐃᓚᐅᕕᖃᖁᔭᐅᑦᓱᑎᒃ ᐊᑐᓂᑦ ᑎᓕᔭᐅᒪᐅᑎᒥᑕ ᑐᖕᖓᕕᖏᓐᓂᑦ ᐊᐅᓚᑦᓯᒍᓯᒥᓂᓪᓗ ᐊᑐᕐᓗᑎᒃ ᐃᑲᔪᕐᓯᓯᒪᖁᔭᐅᓂᐊᕐᑐᑦ ᐊᖏᖃᑎᒌᒐᓱᐊᕐᓂᖅ ᐊᑑᑎᑎᓪᓗᒍ.
ᐅᖃᐅᓯᖏᑦ:
“ᓭᒻᒪᖃᑎᖃᕐᓂᖅ ᓄᓇᖃᕐᖄᓯᒪᔪᓂᑦ ᑯᐯᒃ ᑲᕙᒪᖓᑕ ᐊᖏᔪᒥᒃ ᐱᔭᑦᓴᕆᕙᐅᒃ. ᐅᐱᒍᓱᑉᐳᖓ ᐱᕙᓪᓕᐊᓂᖃᕐᓯᒪᓕᕋᑦᑕ ᐊᕐᕌᒍᓂᑦ ᐊᓂᒍᕐᑐᓂᑦ ᑐᖕᖓᕕᒋᑦᓱᒍ ᓲᓱᒋᐅᑎᓂᖅ, ᑯᐯᒃ ᑲᕙᒪᖓᓂᑦ ᑭᒡᒐᑐᕐᑕᖏᓐᓂᑦ-ᒪᑭᕝᕕᒥᑦ ᓄᓇᕕᒻᒥᐅᓂᑦ ᑭᒡᒐᑐᕐᑕᖏᓐᓂᑦ ᑐᖕᖓᕕᓕᒻᒥᒃ. ᐅᓪᓗᒥ ᒪᑭᕝᕕᓗ ᐊᑎᓕᐅᕐᑐᒍᒃ ᓄᓇᕕᐅᑉ ᓇᒻᒥᓂᖅ-ᑲᕙᒪᑦᓴᖓᓄᑦ ᐊᖏᖃᑎᒌᒐᓱᐊᕐᓂᒥᒃ ᓂᑭᑖᕐᑎᓯᓂᕐᒥᒃ, ᐱᒋᐊᕐᑎᓯᒍᑎᐅᓚᖓᓕᕐᑐᖅ ᑯᐯᒃ ᑲᕙᒪᖓᓂᑦ ᐃᓄᓐᓂᓗ ᓄᓇᕕᒻᒥᐅᓂᒃ ᐊᖏᖃᑎᒌᒐᓱᐊᕐᓂᒥᒃ ᑲᔪᓯᑎᑦᓯᓂᕐᒥᒃ 2024-ᖑᓕᕐᐸᑦ ᓄᓇᕕᐅᑉ ᑲᕙᒪᑦᓴᖓᓄᑦ ᐊᖏᖃᑎᒌᓐᓂᒥᒃ. ᓇᓗᕐᖁᑎᖕᖏᓚᖓ ᓂᕆᐅᓐᓂᖃᑦᓯᐊᓚᖓᓂᕐᒥᒃ ᓯᕗᓂᕐᒥᒃ ᐱᓇᓱᐊᖃᑎᒌᑦᓯᐊᓂᐊᕐᓂᑎᓐᓂᑦ.”
ᕙᕌᓐᓱᐊ ᓗᑰ, ᑯᐯᒃ ᐊᖓᔪᕐᖄᖓ
“ᐊᑎᓕᐅᕈᑎᐅᓂᖓ ᓄᑭᑖᕐᑎᓯᒍᑎᒃ ᐊᒻᒪᓗ ᑐᑭᓯᒪᖃᑎᒌᓐᓂᒧᑦ ᐊᖏᖃᑎᒌᒍᑎᒃ ᓄᓇᕕᐅᑉ ᓇᒻᒥᓂᖅ ᑲᕙᒪᒍᑎᑦᓴᖓᓂᑦ ᑐᑭᓕᒃ ᐱᒋᐊᕐᑎᓯᓂᕐᒥᒃ ᐊᖏᖃᑎᒌᒐᓱᐊᕐᓂᐅᓚᖓᔪᓂᑦ, ᐊᖏᔪᒥᒃ ᐱᒻᒪᕆᐊᓘᒻᒪᑦ ᖁᕕᐊᓱᒍᑎᑦᓴᓯᐊᖑᕗᖅ. ᕿᓚᓈᓪᓚᕆᑉᐳᖓ ᐊᖏᖃᑎᒌᒐᓱᐊᕐᓂᐅᓚᖓᔪᑦ ᓯᕗᒧᐊᕐᐸᓕᐊᕈᑎᐅᓚᖓᓕᕐᓂᖏᓐᓂᑦ ᐱᐅᔪᓂᓪᓗ ᓱᕐᕃᓂᖃᕐᓂᐊᓂᖏᓐᓂᑦ ᓂᕆᐅᓐᓂᖃᑦᓯᐊᓱᖓ. ᑖᓐᓇ ᓯᕗᓪᓕᐸᐅᓚᖓᔪᖅ ᐊᖏᖃᑎᒌᓐᓂᐅᔪᓂᑦ ᐊᓯᖏᑦ ᐊᖏᖃᑎᒌᒍᑏᑦ ᓄᐃᑕᐅᓛᕐᒥᑎᓪᓗᒋᑦ ᖃᒻᒥᑯᑦ”
ᐄᐊᓐ ᓚᕝᕆᓂᐊ, ᑐᕐᖃᑌᔨ ᑲᒪᒋᔭᖃᕐᓱᓂ ᐱᓇᓱᐊᖃᑎᖃᕐᓂᒥᒃ ᓄᓇᖃᕐᖄᓯᒪᓯᒪᔪᓂᑦ ᐃᓄᑐᐃᓐᓇᓂᓪᓗ
“ᐊᖏᖃᑎᒌᒍᑎᒃ ᐅᓪᓗᒥ ᐊᑎᓕᐅᕐᑕᐅᔪᖅ ᑯᐯᒃ ᑲᕙᒪᖓᓄᑦ ᒪᑭᕝᕕᒧᓪᓗ ᐊᓪᓗᕆᐊᕐᓂᒪᕆᐅᔪᖅ ᓯᕗᓂᕐᒧᑦ ᑯᐯᒃ ᑕᕐᕋᖓᓂᒥᐅᓄᑦ. ᑯᐯᒃ ᑲᕙᒪᖓᑕ ᓄᓇᕕᒻᒥᐅᓗ ᐃᓄᖏᑦᑕ ᐱᓇᓱᐊᖃᑎᒌᓐᓂᕆᕙᑦᑕᖓ ᑐᖕᖓᕕᖃᓪᓚᕆᑦᑐᖅ ᓲᓱᒋᐅᑎᓂᕐᒥᒃ. ᑌᒣᒻᒪᑦ ᓇᑯᕐᓴᓚᕆᑦᑐᖓ ᑐᖕᖓᕕᓕᕐᑐᑕᐅᓯᒻᒪᑕ ᐊᖏᖃᑎᒌᒐᓱᐊᕐᓂᐅᓂᐊᕐᑐᑦ ᓯᕗᓂᕐᒥ.”
ᔮᓐ ᐳᓖ, ᑐᕐᖃᑌᔨ ᐱᓇᓱᑦᑐᓕᕆᓂᕐᒥᒃ
ᑐᕐᖃᑌᔨ ᑲᒪᒋᔭᖃᕐᓱᓂ ᓄᓇᖃᕐᕕᐅᔪᓂᑦ ᒧᕆᓰ, ᐊᐱᑎᐱ-ᑎᒥᔅᑲᒥᖕ ᐊᒻᒪᓗ ᑯᐯᒃ ᑕᕋᖓᓂᑦ
“ᓄᑭᑖᕐᑎᓯᓂᕐᒧᑦ ᐊᖏᖃᑎᒌᒍᑎᒃ ᐊᑎᓕᐅᕐᑕᐅᔪᖅ ᑯᐯᒃ ᑲᕙᒪᖓᓄᑦ ᒪᑭᕝᕕᒧᓪᓗ ᐱᒻᒪᕆᐅᕗᖅ ᓄᑕᐅᓯᓕᕐᑎᕆᒍᑎᐅᓂᐊᕐᒪᑕᑦ ᓄᓇᕕᐅᑉ ᐊᐅᓚᑕᐅᒍᓯᖓᓂᑦ ᓴᕐᕿᔮᕐᑎᓯᒍᑎᐅᑦᓱᓂᓗ ᑯᐯᒃ ᑲᕙᒪᖓᑕ ᑐᓂᓯᒪᓂᖓᓂᑦ ᐊᖏᖃᑎᒌᒐᓱᐊᖃᑎᖃᕐᓂᒧᑦ ᓄᓇᕕᒻᒥᐅᑦ ᐃᓄᖏᓐᓂᑦ.”
ᑎᓂ ᓚᒫᑦ, ᑯᐯᒃ ᑲᕙᒪᖓᑕ ᒪᓕᒐᓕᐅᕐᕕᐅᑉ ᑭᒡᒐᑐᕐᑎᖓ ᐅᖓᕙᒧᑦ
“ᐊᖓᔪᕐᖄᕆᔭᐅᑦᓱᖓ ᒪᑭᕝᕕᒧᑦ, ᐃᑎᔪᓪᓚᕆᒻᒥᒃ ᐅᐱᒍᓱᒻᒪᕆᑦᑐᖓ ᐱᒻᒪᕆᓪᓚᕆᐊᓗᒻᒥᒃ ᐊᑑᑎᒐᑦᑕ ᐊᑎᓕᐅᕐᓂᑯᑦ ᓇᒻᒥᓂᖅ ᑲᕙᒪᓐᓂᒥᒃ ᐊᖏᖃᑎᒌᒐᓱᐊᕐᓂᒧᑦ ᓄᑭᑖᕐᑎᑕᐅᒍᑎᒥᒃ. ᑖᓐᓇ ᓄᑭᑖᕐᑎᑕᐅᓂᖅ ᓴᕐᕿᔮᕐᑎᓯᓚᖓᔪᖅ ᐊᓪᓗᕆᐊᕐᓂᐅᓱᓕᓗ ᐊᑑᑎᒍᒪᓯᒪᔭᑐᖃᕗᓐᓂᒃ ᓇᒻᒥᓂᖅ ᐊᐅᓚᑦᓯᓂᕐᒥᒃ. ᐱᓇᓱᐊᖃᑎᖃᕐᓂᕗᑦ ᑯᐯᒃ ᑲᕙᒪᖓᓂᑦ, ᑌᒫᓪᓗᑐᖅ ᓲᓱᒋᐅᑎᓂᖃᖃᑎᒌᓐᓂᑎᓐᓂᑦ ᑕᑯᒍᑎᒋᔭᕋ ᐊᑐᓂᑦ ᐊᑦᔨᒌᖕᖏᑐᓂᑦ ᐃᓗᕐᖁᓯᖃᕋᓗᐊᕋᑦᑕ ᐊᒻᒪᓗ ᑐᓂᓯᒪᒍᑎᒋᓚᖓᑦᓱᒍ ᓯᕗᓂᕐᒥᒃ ᓲᓱᒋᔭᐅᓪᓚᕆᓐᓂᐊᓕᕐᑎᓗᒍ ᓄᓇᕕᒻᒥᐅᑦ ᐃᓄᐃᑦ ᐱᔪᓐᓇᐅᑎᖏᑦ.”
ᐱᑕ ᐋᑕᒥ, ᒪᑭᕝᕕᐅᑉ ᐊᖓᔪᕐᖄᖓ
– 30 –
ᓴᕐᕿᑎᑦᓯᔪᖅ: Ewan Sauves ᐃᒍᐊᓐ ᓵᐅᕝ ᑐᓴᕋᑦᓴᓕᕆᔨ ᑯᐯᒃ ᑲᕙᒪᖓᑕ ᐊᖓᔪᕐᖄᑉ ᐊᓪᓚᕕᖓ ᐅᖄᓚᐅᑎᖓ: 514-585-4451 ewan.sauves@mce.gouv.qc.ca
ᖃᐅᔨᒋᐊᕐᕕᐅᒍᓐᓇᑐᑦ: ᑐᓴᕋᑦᓴᓕᕆᕕᒃ ᑐᓴᕈᑎᓕᕆᓂᕐᒥᒃ ᐱᒍᑦᔨᕕᒃ ᐳᕐᑐᓂᕐᓭᑦ ᑲᑎᒪᔨᖏᑦᑕ ᑐᕐᖃᑕᕐᕕᖓ ᐅᖄᓚᐅᑎᖓ: 418-781-9520 medias@mce-sct.gouv.qc.ca