1994-ᖑᑎᓪᓗᒍ, ᒪᑭᕝᕕᓗ ᑯᐯᒃ ᐃᑯᒪᓕᕆᔨᖏᓪᓗ ᐊᖏᖃᑎᒌᒍᑎᖃᓚᐅᕐᓯᒪᕘᒃ ᐃᑯᒪᓕᐅᕈᑎᓂᒃ ᐱᑕᖃᕐᑎᓯᒍᑎᓂᒃ ᐸᕐᓇᓯᒪᒍᑎᓄᑦ ᐊᖏᖃᑎᒌᒍᑎᒥ ᐃᑲᔪᕐᓯᒍᑎᒋᓂᐊᓕᕐᓱᒋᑦ ᐅᕐᖂᒍᑎᑦᓴᒥᒃ ᐅᕐᓱᐊᓗᑦᓯᒍᑎᓂᒃ ᐊᒻᒪᓗ ᐳᓪᓚᓕᓐᓂᒃ ᐅᕐᓱᐊᓗᓐᓂᒃ. ᑖᒃᑯᐊ ᐱᓇᓱᒍᑏᑦ ᐱᑕᖃᕐᑎᓯᒍᑎᐅᒻᒥᔪᑦ ᓯᖁᒥᓯᒪᔨᐊᖃᕐᑎᓯᑦᑌᓕᓂᕐᒥᓗ ᓯᖁᒥᓯᒪᔪᖃᕐᐸᓗ ᓴᓇᔭᖃᕐᓂᒥᒃ ᐅᕐᓱᐊᓗᑦᑐᑐᓂᒃ ᐅᕐᖂᓯᓴᐅᑎᓂᒃ ᐃᒪᕐᒥᓗ ᐆᓇᕐᑐᓕᐅᕈᑎᓂᒃ ᐊᑐᕐᐸᑕᖏᓐᓂᒃ ᓂᐅᕐᕈᓯᐊᒥᓗ, ᐱᓇᓱᒐᖁᑕᐅᔪᓪᓗ, ᐱᑦᔪᔨᕕᐅᔪᓪᓗ, ᐃᓕᒃᑰᓱᑎᒃᓗ ᓂᐅᕕᕐᐸᑐᑦ ᐃᓘᓐᓇᖏᓐᓂ ᐃᓄᑐᐃᓐᓀᑦ ᓄᓇᓕᖏᓐᓂ. ᑯᐯᒃᑯ-ᐃᑯᒪᓕᕆᔨᖏᑦ ᐊᒻᒪᓗ ᒪᑭᕝᕕᒃ ᐊᖏᖃᑎᒌᒍᑎᖃᕐᓯᒪᔫᒃ ᐊᐅᓚᑕᐅᒍᑎᖏᑦ ᐅᕐᓱᐊᓗᑦᓯᒍᑎᓂᒃ ᐃᑲᔪᕐᓯᒍᑎᐅᔪᑦ ᑲᒪᔨᖃᓚᖓᑎᓪᓗᒋᑦ ᒪᑭᕝᕕᒥᒃ.
ᑖᒃᑯᐊ ᐅᕐᓱᐊᓗᑦᓯᒍᑎᓂᒃ ᐃᑲᔪᕐᓯᒍᑏᑦ ᐊᖏᖃᑎᒌᒎᑎᑕᖏᑦ 2010-ᖑᑎᓪᓗᒍ ᓄᑕᐅᓯᓕᔭᐅᓚᐅᔪᑦ ᐋᕐᕿᒋᐊᕐᑕᐅᒍᑎᑖᕐᓱᑎᒃ. ᒪᑭᕝᕕᒃ ᑲᔪᓯᓗᓂ ᐊᐅᓚᑦᓯᔨᐅᓚᖓᔪᖅ ᐱᒐᓱᒍᑎᑦᓴᓂᒃ ᐊᓪᓚᓯᒪᔪᖕᖑᐃᒍᑎᑎᒍᑦ ᐊᖏᕐᑕᐅᒪᔪᓂᒃ ᐃᑲᔪᕐᓯᒍᑎᑖᕐᑕᑎᑦᓯᓗᑎᒃ ᐊᒻᒪᓗ ᓴᐳᑦᔨᓯᒪᓂᖃᑦᓯᐊᓗᑎᒃ ᐃᓘᓐᓇᖏᓐᓂᒃ ᐃᓚᐅᖃᑕᐅᒍᓐᓇᐅᑎᑖᕐᓯᒪᑦᓱᑎᒃ ᐅᕐᓱᐊᓗᑦᓯᕙᑦᑐᓂᒃ. ᐅᕐᓱᐊᓗᑦᓯᕕᐅᔪᑦ ᓂᐅᕕᐊᖑᔪᑦ ᐊᑭᖏᓐᓂᒃ ᐊᐅᓚᑦᓯᓂᓕᕆᓂᒃᑯᑦ ᐱᓇᓱᖃᑦᑕᑎᓪᓗᒍ ᐅᕐᓱᐊᓗᑦᓯᓕᕐᐸᑕ ᐃᓚᐅᔫᖃᑕᐅᔪᑦ. ᑕᒪᓐᓇ ᑐᑭᓕᒃ ᑖᒃᑯᐊ ᐃᓚᐅᖃᑕᐅᒍᓐᓇᐅᑎᑖᕐᑕᐅᒪᔪᑦ ᒪᑭᕝᕕᒧᑦ ᑐᓂᔨᖃᑦᑕᒋᐊᑐᓐᓂᐊᕈᓐᓀᑎᓪᓗᒋᑦ ᐅᕐᓱᐊᓗᓐᓂᒃ ᐊᑭᓕᕐᑐᐃᒍᑎᕕᓂᕐᒥᓂᒃ ᐅᑎᕐᑕᐅᒍᑎᑦᓴᔭᓂᒃ. ᐅᕐᖂᒍᑎᑦᓴᒥᒃ ᐅᕐᓱᐊᓗᑦᓯᒍᑎᓂᒃ ᐃᑲᔪᕐᓯᒍᑏᑦ ᑲᔪᓰᓐᓇᑕᕐᓗᑎᒃ ᑎᒍᔭᐅᖃᑦᑕᓚᖓᓕᕐᑐᑦ ᐅᕐᓱᐊᓗᑦᓯᕕᐅᔪᓄᑦ ᑌᒣᒻᒪᓗ ᐅᕐᓱᐊᓗᑦᓯᔪᕕᓂᖅ ᐃᑲᔪᕐᓯᔭᐅᒍᑎᒥ ᐅᖓᑖᓄᑦᑐᓂᒃ ᑭᓯᐊᓂ ᐊᑭᓖᖃᑦᑕᓂᐊᓕᕐᑎᓗᒍ.
ᐅᕐᓱᐊᓗᒻᒥᒃ ᓂᐅᕕᕐᓗᑎᒃ ᐃᑲᔪᕐᓯᔭᐅᒍᓐᓇᐅᑎᑖᕐᖃᒥᕐᑐᑦ ᐊᓪᓚᓯᒪᔪᖕᖑᐃᒍᑎᐅᖃᑦᑕᓚᖓᕗᑦ ᐊᑐᓯᖃᑦᑕᓂᐊᕐᑐᓂᒃ ᑌᑲᖕᖓᑦ ᐅᓪᓗᒥᑦ ᐊᓪᓚᓯᒪᔪᖕᖑᐃᒍᑎᓕᐅᕐᕕᒥᓂᑦ. ᐅᕐᓱᐊᓗᑦᓯᕙᑦᑐᑦ ᐊᓪᓚᑕᐅᒪᕐᖄᕆᐊᖃᕐᐳᑦ ᒪᑭᕝᕕᒥ ᐃᑲᔪᕐᓯᔭᐅᒍᑎᓄᑦ ᐊᑭᓕᕐᑕᐅᖃᑦᑕᓚᐅᕐᑎᓇᒋᑦ ᐅᕐᓱᐊᓗᑦᓯᒍᑎᕕᓂᖏᑦ.
ᐅᓇ ᓇᕐᓂᓗᒍ ᖃᕆᑕᐅᔭᕐᓅᔭᕐᓂᐊᓕᕋᕕᐅᒃ ᐃᓚᐅᔪᖕᖑᖃᑕᐅᒍᑎᑦᓴᔭ ᐊᓪᓚᓯᒪᔪᖕᖑᐃᕕᒃ ᐱᒐᓱᒍᑎᑦᓴᔭᐅᑦᓱᓂ PDF-ᒥ ᖃᕆᑕᐅᔭᒃᑯᑦ ᐊᓪᓚᑕᐅᒪᔪᖅ.
ᖃᐅᔨᒋᐊᕐᕕᖃᕆᐊᖃᕐᐳᑎᑦ ᒣᒃ ᐁᐆᕆᔫᒥᒃ ᒪᑭᕝᕕᒥ ᐅᖄᓚᕕᒋᓗᒍ ᐅᕙᓂ (514) 745-8880 ᖃᕆᑕᐅᔭᒃᑯᓗᓐᓃᑦ ᐊᓪᓚᕕᒋᓗᒍ ᐅᕙᓂ m_iorio@makivik.org ᑐᑭᓯᒋᐊᒃᑲᓂᕆᐊᖃᑐᐊᕈᕕᑦ.