ᐅᓪᓗᒥᐅᓕᕐᑐᖅ ᖃᖓᑦᑕᔫᓕᕆᓂᒥᒃ ᐃᕐᙯᑎᑦᓯᒍᑎᒃ – ᑲᓇᑕᒥᐅᑦ ᐃᓄᐃᑦ ᐊᖏᖃᑎᒌᑉᐳᑦ ᐱᖕᖑᑎᑦᓯᓱᑎᒃ ᖃᖓᑦᑕᔫᓕᕆᓂᒻᒪᕆᐅᓚᖓᔪᒥᒃ ᑲᓇᑕᐅᑉ ᐅᑭᐅᕐᑕᑐᖓᓂ

ᑐᓴᕋᑦᓴᖅ

ᓯᑉᑎᒻᐱᕆ 28, 2018 – ᒪᓐᑐᔨᐊ, ᑯᐯᒃ – ᐃᓄᐃᑦ ᓄᓇᕕᒻᒥᐅᑦ ᑯᐯᒻᒥ, ᐃᓚᖃᕐᓱᑎᒃ ᐃᓅᕕᐊᓗᓐᓂ ᑲᓇᓐᓇᒥᐅᓂᒃ ᐊᑎᓕᐅᖃᑎᒌᑉᐳᑦ ᒪᓐᑐᔨᐊᒥ ᐅᓪᓗᒥ ᐊᑕᐅᓯᖕᖑᑎᑦᓯᓱᑎᒃ ᒪᕐᕉᓂᒃ ᖃᖓᑦᑕᔫᓕᕆᓃᓐᓂ – ᕘᔅᑦ ᐃᐊ (First Air) ᐊᒻᒪᓗ ᑲᓀᑎᐊᓐ ᓄᐊᑦᔅ (Canadian North) – ᖃᖓᑦᑕᔫᓕᕆᓂᒻᒪᕆᖕᖑᑎᑦᓯᕗᑦ ᐅᑭᐅᕐᑕᑐᒥ.

ᐊᑎᓕᐅᖃᑎᒌᒌᕐᓱᑎᒃ, ᐃᓄᐃᑦ ᓯᕗᓕᕐᑎᒋᒃ ᓵᓕ ᒍᐊᑦ ᒪᑭᕝᕕᒃ ᑯᐊᐳᕇᓴᐅᑉ ᐊᖓᔪᕐᖄᖓ ᐊᒻᒪᓗ ᑐᒉᓐ ᔅᒥᑦᔅ (Duane Smith) ᐃᓅᕕᐊᓗᐃᑦ ᓄᓇᓕᓕᒫᑦ ᑯᐊᐳᕇᓴᖓᑕ ᐊᖓᔪᕐᖄᖓ ᐊᒻᒪᓗ ᑐᑭᒧᐊᑦᑎᓯᔨᒻᒪᕆᖓ ᓭᒨᖃᑎᒌᓚᐅᕐᑑᒃ ᓇᓗᓀᕐᓯᓱᑎᒃ ᖃᖓᑦᑕᔫᓕᕆᓂᒻᒪᕆᐅᓚᖓᓕᕐᑐᒥᒃ ᑲᓇᑕᐅᑉ ᐅᑭᐅᕐᑕᑐᖓᓂ.

ᕘᔅᑦ ᐃᐊ ᐃᓘᓐᓈᒍᑦ ᓇᒻᒥᓂᕆᔭᐅᕗᖅ ᒪᑭᕝᕕᒃ ᑯᐊᐳᕇᓴᒧᑦ, ᑲᓀᑎᐊᓐ ᓄᐊᑦᔅ ᓇᒻᒥᓂᕆᔭᐅᑎᓪᓗᒍ ᐃᓅᕕᐊᓗᓐᓄᑦ ᑲᓇᓐᓇᒥᐅᓄᑦ.

“ᓇᑯᕐᓴᒪᕆᑉᐳᖓ ᑕᑯᒋᐊᒥᒃ ᑖᑦᓱᒥᖓ ᐅᓪᓗᒥ.  ᐊᕙᑎ ᒪᕐᕈ ᐊᕐᕌᒍᐃᑦ ᖄᖏᕐᓯᒪᓕᕐᑐᑦ ᓄᓇᕕᒻᒥᐅᑦ ᑮᓇᐅᔭᓂᒃ ᑐᕐᖁᐃᓚᐅᕐᓯᒪᑎᓪᓗᒋᑦ ᖃᖓᑦᑕᔫᓕᕆᓂᕐᒧᑦ ᓯᕗᓂᖃᕐᓱᑎᒃ ᐱᓇᓱᐊᖃᑎᖃᓛᕐᓂᒥᓂᒃ ᐃᓅᖃᑎᒥᓂᒃ ᐊᓯᖏᓐᓂ ᓄᓇᖃᕐᕕᓕᓐᓂ.  ᑖᓐᓇ ᐅᓪᓗᖅ ᑕᒡᒐᐅᓕᕐᖁᖅ.  ᑲᓇᑕᐅᑉ ᐅᑭᐅᕐᑕᑐᖓᑕ ᖃᖓᑕᕕᐅᒍᓐᓇᕕᖓᓂᒃ ᓇᒻᒥᓂᖃᕈᒪᓯᒪᒐᑦᑕ ᓇᒻᒥᓂᖃᓕᕐᖁᒍᑦ,” ᐅᖃᕐᐳᖅ ᒪᑭᕝᕕᐅᑉ ᐊᖓᔪᕐᖄᖓ ᓵᓕ ᒍᐊᑦ.

“ᑕᒪᓐᓇ ᐊᖏᔪᒻᒪᕆᐊᓗᒃ ᐊᓪᓗᕆᐊᕐᓂᖅ ᐱᕙᓪᓕᐊᑎᑦᓯᓂᕐᒧᑦ ᒪᑭᑕᒐᓱᐊᕐᓂᑯᑦ ᐱᔪᓐᓇᓂᖏᓐᓂ ᐃᓄᐃᑦ ᐃᓅᕕᐊᓗᐃᓪᓗ.  ᐅᐱᒍᓱᑉᐳᒍᑦ ᐱᔭᕆᓯᒪᔭᖏᓐᓂ ᐃᓅᕕᐊᓗᐃᑦ ᑎᒥᖁᑎᖓᑕ ᐊᒻᒪᓗ ᓂᕆᐅᓐᓂᖃᕈᑎᒋᑦᓯᐊᓱᒍ ᑕᒪᑦᓱᒪ ᐱᕙᓪᓕᑎᑦᓯᓂᕆᓚᖓᔭᖓ ᐃᓅᕕᐊᓗᓐᓂ.”  ᐅᖃᕐᐳᖅ ᑐᒉᓐ ᔅᒥᑦᔅ ᐃᓅᕕᐊᓗᐃᑦ ᓄᓇᓕᓕᒫᑦ ᑯᐊᐳᕇᓴᖓᑕ ᐊᖓᔪᕐᖄᖓ ᐊᒻᒪᓗ ᑐᑭᒧᐊᑦᑎᓯᔨᒻᒪᕆᖓ

ᑖᓐᓇ ᐅᑭᐅᕐᑕᑐᓕᒫᒧᑦ ᖄᖓᑦᑕᔫᖃᕐᑎᓯᓂᖅ ᑌᔭᐅᒍᓯᖃᓚᖓᔪᖅ “ᑲᓀᑎᐊᓐ ᓄᐊᑦᔅ (Canadian North)”, ᐊᒻᒪᓗ ᖃᖓᑦᑕᔫᖏᑦ ᕘᔅᑦ ᐃᐊᑯᑦ ᑕᕐᓴᑖᕐᖃᒥᖓᓂᒃ ᓇᓗᓀᒃᑯᑕᖃᓚᖓᑦᓱᑎᒃ, ᐃᓚᒋᔭᐅᑎᓪᓗᒍ ᐃᓄᑦᓱᖑᐊᖅ.  ᑖᒃᑯᐊ ᑐᑭᑖᖃᑎᒌᑦᑐᐃᑦ ᑕᒪᑦᓱᒥᖓ ᐱᓇᓱᐊᕐᑕᒥᓂᒃ ᐱᔭᕇᓛᕈᓇᐅᔪᑦ 2018 ᐃᓱᐊᓂ.

-30-

ᑐᓴᕋᑦᓴᓕᕆᓂᕐᒧᑦ ᖃᐅᔨᒋᐊᕐᕕᐅᒍᓐᓇᑑᒃ:

PDF Version