ᐱᕙᓪᓕᐊᔪᓕᕆᔩᑦ ᓄᐃᑕᖓ
ᐊᐅᐸᓗᒃ, ᓄᓇᕕᒃ – ᒫᑦᔨ 27, 2023 – ᓱᑲᓕᐅᑎᒌᕋᒥᒃ ᖃᓂᖕᖏᓂᓕᒻᒥᒃ 427 ᑭᓛᒥᑕᐃᑦ ᐅᖓᑖᓄᑦ, ᐱᖓᓲᔪᕐᑐᑦ ᐃᓕᒌᑦᑎᑐᑦ ᐱᔭᕇᑦᓯᐊᖁᑦ ᐃᕙᒃᑲᒃ 2023-ᒥᒃ, ᐊᕐᕌᒍᑕᒫᕐᓯᐅᑎᒥᒃ ᕿᒧᑦᓯᑯᑦ ᓱᑲᓕᐅᑎᓂᕐᒥᒃ ᒪᑭᕝᕕᒧᑦ ᐸᕐᓇᑕᕕᓂᕐᒥᒃ. ᓱᑲᓕᐅᑎᓂᖅ ᐱᒋᐊᕐᓂᖁᖅ ᑲᖏᕐᓱᔪᐊᒥ ᐊᒻᒪᓗ ᐱᔭᕇᕐᓱᓂ ᐊᐅᐸᓗᒻᒥ, ᐱᖓᓱᑦ ᓵᓚᓖᑦ ᐃᓂᖏᑦ ᐱᔭᐃᑦ ᐅᑯᓄᖓ ᐃᓕᒌᓄᑦ, ᐃᓕᒌᑦ ᑭᓯᑦᓯᒍᑎᖓ 6 ᒍᐃᓕ ᑫᓐ ᐊᒻᒪᓗ ᐃᑦᓴᔭ ᐊᕐᓇᑐᒃ, ᑲᐃᕙᓪᓚᒍᓯᖏᑦ ᑲᑎᑦᓱᑎᒃ ᐃᒪᐃᓪᓗᐊᑐᑦ 38:38:20, ᐃᓕᒌᑦ ᑭᓯᑦᓯᒍᑎᖓ 2 ᑳᓘᔅ ᓱᕈᓯᓛᖅ ᐊᒻᒪᓗ ᐸᐅᓗᓯ ᐊᒪᕈᐊᓕᒃ, ᑲᐃᕙᓪᓚᒍᓯᖏᑦ ᑲᑎᑦᓱᑎᒃ ᐃᒪᐃᓪᓗᐊᑐᑦ 39:00:20 ᐊᒻᒪᓗ ᐃᓕᒌᑦ ᑭᓯᑦᓯᒍᑎᖓ 5 ᐊᓗᐸ ᖃᐅᑭ ᐊᒻᒪᓗ ᓯᐊᓪᑕᓐ ᕈᐊᐃᑦᓕ, ᑲᐃᕙᓪᓚᒍᓯᖏᑦ ᑲᑎᑦᓱᑎᒃ ᐃᒪᐃᓪᓗᐊᑐᑦ 44:18:19.
ᐊᔪᐃᓐᓇᓂᖏᑦ ᐊᒻᒪᓗ ᑐᓂᒪᓂᖏᑦ ᕿᒧᑦᓯᑏᑦ ᐃᓕᖏᓪᓗ ᑕᑯᑦᓴᐅᓚᕆᓚᐅᕐᖁᑦ ᕿᒧᑦᓯᓂᕐᒥᓂ, ᓄᐃᑕᑎᑦᓯᓱᑎᒃ ᐱᒻᒪᕆᐅᓂᖓᓂᒃ ᐃᓄᐃᑦ ᐱᐅᓯᑐᖃᖓᓂᒃ ᐊᓯᐅᔨᑦᑕᐃᓕᓂᕐᒥᒃ. ᐊᑦᓱᕈᕐᓱᓂ ᐱᓇᓱᓐᓂᖅ ᐊᒻᒪᓗ ᑐᓂᒪᓂᖅ ᐊᑐᕆᐊᓕᒃ ᐃᓄᐃᑦ ᕿᒻᒥᖏᓐᓂᒃ ᐱᕈᕐᓴᐃᓂᕐᒧᑦ ᕿᒧᑦᓯᕈᑎᓂᒃ ᓇᓗᓇᐃᕐᓯᒍᑎᐅᕗᖅ ᐊᑦᑕᓇᐃᓕᓯᒪᑦᓯᐊᓂᖓᓂᒃ ᐃᓕᕐᕈᓯᖏᑦᑕ ᑐᑭᖓᓂᒃ ᓱᑲᓕᐅᑎᓂᐅᑉ.
ᐱᑕ ᐋᑕᒥ, ᒪᑭᕝᕕᐅᑉ ᐊᖓᔪᕐᖄᖓ, ᐅᐱᒍᓱᓚᐅᕐᖁᖅ ᐱᒐᓱᐊᕐᓂᖏᓐᓂᒃ ᕿᒧᑦᓯᑏᑦ ᐊᒻᒪᓗ ᐃᓕᖏᓐᓂᒃ, ᐅᖃᕐᓱᓂ, “ᐃᕙᒃᑲᓂᐅᑉ ᓄᐃᑕᐅᓂᕕᖓ 20 ᐅᑭᐅᑦ ᐅᖓᑖᓄᑦ ᓈᓕᕐᑐᑦ, ᐊᒻᒪᓗ ᓱᑲᓕᐅᑎᓂᖅ ᓯᕗᓪᓕᐹᖅ ᐊᑑᑎᔪᕕᓂᐅᑦᓱᓂ 2001-ᒥ, ᓇᓗᓇᐃᕐᓯᓱᓂ ᒪᑭᕝᕕᐅᑉ ᐃᓄᐃᑦ ᕿᒻᒥᖏᓐᓂᒃ ᕿᒧᑦᓯᕈᑎᓂᒃ ᐆᒻᒪᑎᑦᓯᒋᐊᓪᓛᓂᖓᓂᒃ. ᐅᐱᒍᓱᒃᑯᒍᑦ ᐱᓇᓱᓐᓂᕕᓂᕐᒥᒃ ᐃᓄᐃᑦ ᕿᒻᒥᖏᓐᓂᒃ ᕿᒧᑦᓯᕈᑎᓂᒃ ᓄᓇᕕᒻᒧᑦ ᐅᑎᕐᑎᓯᒍᑎᐅᓯᒪᔪᓂᒃ, ᑮᒻᒦᑦ ᑐᖁᕋᕐᑕᐅᓯᒪᒐᓗᐊᕐᑎᓗᒋᑦ ᑲᕙᒪᐅᓯᒪᔪᓄᑦ ᑕᐃᑦᓱᒪᓂ 1950 ᐅᑭᐅᑦ ᕿᑎᖓᓂᑦ ᐱᒋᐊᕐᓱᓂ 1960 ᐅᑭᐅᑦ ᓈᓂᖓᓄᑦ ᑎᑭᑦᓱᒍ”.
ᒪᑭᕝᕕᒃ ᓇᑯᕐᒦᕈᒪᕗᖅ ᒪᑭᑉᐸᓕᐊᓂᕐᒥᒃ ᐱᕈᕐᐸᓕᐊᑎᑦᓯᓂᕐᒧᑦ ᐱᓇᓱᕝᕕᖓᑕ ᐱᓇᓱᑦᑎᖏᓐᓂᒃ ᐊᑦᓱᕈᕐᓱᑎᒃ ᐱᓇᓱᓐᓂᕆᖃᑦᑕᑕᖓᓄᑦ ᐸᕐᓇᓱᑎᒃ ᓱᑲᓕᐅᑎᓂᕐᒥᒃ ᐊᒻᒪᓗ ᑮᓇᐅᔭᖃᕐᑎᓯᓂᒃᑯᑦ ᐃᑲᔪᑦᓯᐊᓚᐅᕐᑐᓂᒃ ᑕᒃᑲᓂ ᐊᕐᕌᒍᒥ ᓄᐃᑕᒧᑦ.
ᕿᒧᑦᓯᑏᑦ ᒫᓐᓇ ᐃᓚᐅᔪᑦ ᐃᕙᒃᑲᑐᓄᑦ ᒪᓕᒃᑯᑦ ᐱᐅᓯᕕᓂᖏᓐᓂᒃ ᓱᑲᓕᐅᑎᔪᕕᓃᑦ 20 ᐅᑭᐅᓂᒃ ᓈᔪᓂ ᐱᔪᕕᓂᕐᓂᒃ, ᐊᒻᒪᓗ ᐱᒻᒪᕆᐅᓂᕐᓴᐅᒥᑎᓪᓗᒍ, ᒪᓕᒃᑯᑦ ᐊᕐᕕᑕᕐᓱᑎᓪᓗ ᓯᕗᓪᓕᕕᓂᕐᒥᑕ ᐊᕐᖁᑎᒋᖃᑦᑕᑕᕕᓂᖓᓂᒃ, ᐊᑐᕐᓱᑎᒃ ᐃᖏᕐᕋᐅᑎᒋᖃᑦᑕᕈᓇᕕᓂᖏᑦᑕ ᐊᑦᔨᖏᓐᓂᒃ.
2023-ᒥ ᐃᕙᒃᑲᒃ ᓱᑲᓕᐅᑎᓂᖅ ᐆᑦᑐᕋᐅᑎᑐᐃᓐᓇᐅᓚᐅᖕᖏᓪᓚᖅ ᕿᒧᑦᓯᑏᑦ ᑎᒥᖏᑦᑕ ᐊᒻᒪᓗ ᐃᓱᒪᖏᑦᑕ ᐊᑦᓱᕈᕐᓇᑐᒃᑰᕈᓐᓇᓂᖏᓐᓂᒃ. ᓇᓗᓇᐃᕐᓯᓚᐅᕆᕗᖅ ᓱᓕᓂᖓᓂᒃ ᐱᒻᒪᕆᐅᓂᖓᑕ ᐃᓄᐃᑦ ᐱᐅᓯᑐᖃᖓᒍᑦ ᐱᓇᓱᒍᓯᕐᓂᒃ ᐊᓯᐅᔨᑎᑦᓯᑕᐃᓕᓂᕐᒥᒃ, ᐃᓚᐅᑎᓪᓗᒍ ᕿᒻᒥᓂᒃ ᕿᒧᑦᓯᕈᑎᑦᓴᓂᒃ ᐱᕈᕐᑎᓯᓂᕐᒥᒃ ᑲᒪᑦᓯᐊᓂᕐᒥᓗ.
ᒪᑭᕝᕕᒃ ᐅᐱᒍᓱᒃᑯᒃ ᐃᓘᓐᓇᖏᓐᓂᒃ ᐱᖓᓲᔪᕐᑐᓂᒃ ᐃᓕᒌᑦᑎᑐᓂᒃ ᐊᒻᒪᓗ ᓱᑲᓕᐅᑎᔪᑦ ᐱᓇᓱᑦᑎᖏᓐᓂᒃ ᐱᔭᕇᕐᑐᓂᒃ ᑕᒃᑲᓂ ᐅᑭᐅᒥ ᓱᑲᓕᐅᑎᓂᕐᒥᒃ. ᑐᓂᒪᓂᓯ ᑖᑦᓱᒧᖓ ᐱᐅᓯᑐᖃᕐᒧᑦ ᐱᓂᐊᕐᓂᒧᑦ ᑲᔪᖏᕐᓴᐃᓂᐅᕗᖅ ᐃᓘᓐᓇᑎᓐᓂᒃ. ᑭᖑᓪᓕᐹᒥ ᖃᓄᐃᓕᖓᓂᖏᑦ ᐊᒻᒪᓗ ᓵᓚᖃᐅᑎᖏᑦ ᑕᑯᔭᐅᒍᓐᓇᖁᑦ ᐃᕙᒃᑲᐅᑉ ᖃᕆᑕᐅᔭᒃᑯᑦ ᐱᑐᑦᓯᒪᐅᑎᖓᑕ ᐃᓂᖓᓂ ᒫᓂ www.Ivakkak.com
-30-
ᖃᐅᔨᒋᐊᕐᕕᐅᒍᓐᓇᑐᖅ:
ᑲᐅᓴᓐ ᑕᒍᕐᓈ
ᑐᑭᒧᐊᑦᑎᓯᔨ ᑐᓴᕈᑎᓕᕆᓂᐅᑉ ᐱᓇᓱᕝᕕᖓᓂ
ᒪᑭᕝᕕᒃ
ctagoona@makivvik.ca
ᒪᑭᕝᕕᒃ ᓄᓇᑖᕐᓂᓕᕆᔨᐅᑦᓱᓂ ᑎᒥᐅᔫᕗᖅ ᑎᓕᔭᐅᒪᑦᓱᓂ ᐊᐅᓚᑦᓯᓛᕐᑎᓗᒍ ᐃᓄᐃᑦ ᓄᓇᕕᒻᒥᐅᑦ ᑭᖑᕚᑦᓴᓄᐊᖓᔪᑦ ᑮᓇᐅᔭᖏᓐᓂᒃ ᔭᐃᒥᔅ ᐯ ᐊᒻᒪᓗ ᑯᐸᐃᒃ ᑕᕐᕋᖓᑕ ᐊᖏᖃᑎᒌᒍᑎᖓᓄᑦ ᐊᑐᐃᓐᓇᐅᑎᑕᖏᓐᓂᒃ. ᒪᑭᕝᕕᐅᑉ ᖃᓄᐃᓘᕐᑎᐅᓂᖓ ᐃᓚᖃᕐᖁᖅ ᐊᐅᓚᑦᓯᓂᕐᒥᒃ ᐊᒻᒪᓗ ᑖᒃᑯᓂᖓ ᑮᓇᐅᔭᓂᒃ ᐊᑐᕐᑐᓴᓕᐅᕐᓂᒥᒃ, ᖃᐅᔨᔭᐅᑎᑦᓯᒋᐊᓪᓛᔨᐅᑦᓱᓂᓗ ᒪᑭᑕᒐᓱᐊᕐᓂᐅᑉ ᐱᕈᕐᐸᓕᐊᓂᖓᓂᒃ ᐊᑐᐃᓐᓇᐅᑎᑦᓯᓱᓂ ᐃᑲᔪᕐᓂᒥᒃ ᓄᐃᑦᓯᓂᕐᒧᑦ ᐃᓄᓐᓄᑦ-ᐊᐅᓚᑕᓂᒃ ᓇᒻᒥᓂᖅ ᑮᓇᐅᔭᓕᐅᕋᓱᐊᕐᕕᓂᒃ ᓄᓇᕕᒻᒥ. ᒪᑭᕝᕕᒃ ᓄᐃᑕᑎᑦᓯᕗᖅ ᐊᓯᐅᔨᑦᑕᐃᓕᓂᕐᒥᒃ ᐃᓄᐃᑦ ᐃᓕᕐᕈᓯᖓᓂᒃ ᐅᖃᐅᓯᖓᓂᓪᓗ ᐊᒻᒪᓗ ᐃᓗᓯᕐᓱᓯᐊᓂᖏᓐᓂᒃ, ᖃᓄᐃᖕᖏᓯᐊᕐᓂᖏᓐᓂᒃ, ᐊᑦᓱᔫᓂᕐᒥᓗ ᐃᑯᓪᓚᑎᑦᓯᓯᒪᓂᕐᒥᒃ, ᐊᒻᒪᓗ ᐃᓕᓐᓂᐊᓂᖏᓐᓂᒃ ᐃᓄᐃᑦ ᓄᓇᓕᓐᓂ.
