ᒪᓐᑐᕆᐊᒥᑦ, ᑯᐯᒃᒥᑦ – ᐅᒃᑑᐱᕆ 6, 2016 – ᐃᓄᐃᑦ ᓯᕗᓕᕐᑏᑦ ᑭᒡᒐᑐᕐᑐᑦ ᒪᑭᕝᕕᒥᒃ ᐊᒻᒪᓗ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᓂᒃ ᐱᒻᒪᕆᐅᑎᑦᓯᕗᑦ ᒪᓂᔨᓯᒪᔭᒥᓂᒃ ᐱᖁᔮᐱᒻᒥᒃ 113-ᒥ ᑯᐯᒃᒥ ᐅᖃᕐᕕᒪᕆᒻᒥ. ᐱᖁᔮᐱᒃ, ᑌᔭᐅᓂᓕᒃ “ᐱᖁᔭᖅ ᐊᓯᑦᔨᑐᐃᒍᑎᑦᓴᖅ ᐱᖁᔭᕐᒥᒃ ᐊᓯᖏᓐᓂᓗ ᐱᖁᔭᓕᐊᒍᓯᒪᔪᓂᒃ ᐱᑦᔪᑎᓕᓐᓂᒃ ᑎᒍᐊᕈᓯᕐᒥᒃ ᐊᒻᒪᓗ ᑐᑭᓯᒪᐅᑎᑦᓭᑦ ᐅᖃᕐᑕᐅᒍᓐᓇᓂᖏᓐᓂᒃ” ᐅᖃᐅᓯᕐᑕᖃᕐᓱᓂᓗ ᐱᒻᒪᕆᓐᓂᒃ ᓄᑖᒍᑦᓱᑎᒃ ᐱᕕᑦᓴᖃᕐᑎᓯᒍᑎᑦᓴᓂᒃ ᐃᓄᐃᑦ ᑎᒍᐊᕈᓯᖓᓅᓕᖓᔪᓂᒃ.
ᐱᖁᔮᐱᑎᒍᑦ, ᐃᓄᐃᑦ ᑎᒍᐊᕈᓯᑐᖃᖏᑦ ᐃᓕᑕᕆᔭᐅᓂᕐᑖᕋᔭᕐᑐᑦ ᐱᖁᔭᖕᖑᓗᑎᒃ, ᑲᑐᑦᔮᕆᔭᐅᓯᒪᔪᒧᑦ ᒪᑭᕝᕕᒧᑦ, ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᓄᑦ ᐊᒻᒪᓗ ᐊᓯᖏᓐᓄᑦ ᓄᓇᓕᑐᙯᑦ ᑲᑎᑦᑕᑎᖏᓐᓄᑦ. ᐃᓄᐃᑦ ᑎᒍᐊᕈᓯᑐᖃᖓᑎᒍᑦ ᑎᒍᐊᕐᓂᕋᐅᑎᑎᒍᑦ ᓄᐃᑦᓯᓛᕐᑐᑦ ᐃᓅᓕᕐᓂᒧᑦ ᓇᓗᓀᕐᑕᐅᒍᑎᒥᒃ.
ᔫᐱ ᑕᕐᕿᐊᐱᒃ, ᐊᖓᔪᕐᖄᖓ ᒪᑭᕝᕕᐅᑉ, ᐅᖃᕐᑐᕕᓂᖅ: “ᑐᖕᖓᓱᑦᑎᓯᕗᒍᑦ ᑐᕐᖃᑕᕐᕕᐅᑉ ᐃᕐᖃᑐᐃᕕᓕᕆᓂᕐᒧᑦ ᐊᓯᑦᔩᒋᐊᓚᖓᑎᓪᓗᒍ ᑯᐯᒃᒥ ᐱᖁᔭᕐᒥᒃ ᐋᕐᕿᑕᐅᓯᒪᔪᑦᓴᑐᖃᐅᒐᓗᐊᕐᑎᓗᒍ ᐱᖁᔭᑎᒍᑦ ᐃᓕᑕᕆᔭᐅᓂᕆᒋᐊᓕᖓ ᓱᕐᕃᓯᒪᓂᖓᑕ ᐃᓄᐃᑦ ᑎᒍᐊᕈᓯᑐᖃᖓᑕ ᐃᓄᓐᓂᒃ ᑎᒍᐊᕐᑕᐅᓯᒪᔪᓂᒃ, ᐊᖓᔪᕐᖄᖏᓐᓂᒃ ᐴᑯᓗᒃᑯᖏᓐᓂᓗ, (ᐊᓈᓇᓪᓚᕆᐅᔪᑦ) ᑕᒪᓐᓇ ᐱᒻᒪᕆᐊᓗᒃ ᐱᓪᓗᒍ ᓄᓇᕕᒻᒥᐅᑦ ᐃᓄᐃᑦ ᑎᒍᐊᕈᓯᑐᖃᖓ”. ᓄᓇᕕᒻᒥ, ᑕᓪᓕᒪᐅᑉᐸᑕ ᐃᓅᓕᕐᖃᒦᑦ ᐊᑕᐅᓯᖅ ᑎᒍᐊᕐᑖᕆᔭᐅᓲᖅ ᐃᓄᐃᑦ ᑎᒍᐊᕈᓯᑐᖃᖓᒍᑦ. ᐃᓕᑕᕆᔭᐅᒍᑎᑦᓴᑖᕆᐊᖃᓕᕐᒪᑕ ᐃᓄᐃᑦ ᑎᒍᐊᕈᓯᑐᖃᖓᒍᑦ ᕿᑐᕐᖓᐅᔪᑦ ᐊᖓᔪᕐᖄᕆᔭᐅᔪᐃᓪᓗ, ᐱᒍᓐᓇᐅᑎᖃᕐᒪᑕ ᑲᓇᑕᒥ ᐱᖁᔭᑎᒍᑦ ᐊᒻᒪᓗ ᓄᓇᓕᑐᙯᑦ ᐱᒍᓐᓇᐅᑎᖃᕐᑎᑕᐅᓂᖓᒍᑦ.
ᓄᓇᕕᒻᒥ ᓄᓇᓕᓕᒫᓂ ᐱᓇᓱᕝᕖᑦ ᑲᕙᒪᒃᑯᓂᒃ ᓵᖓᓯᒋᐊᕐᑐᕈᑎᖃᖃᑦᑕᓯᒪᓕᕐᒪᑕ ᐃᓕᔭᐅᖁᔨᑦᓱᑎᒃ ᒪᓕᒐᕐᓄᑦ ᑎᒍᐊᕈᓯᕐᒥᒃ 1990-ᓃᑦᓱᑕᓂᑦ. ᐁᕆᓕ 2012-ᒥ ᑐᓴᕐᑎᓯᒍᑎᓕᐊᕕᓂᖏᓐᓂ ᐱᓇᓱᖃᑎᒌᑦᑐᑦ ᓄᓇᓕᑐᙯᑦ ᑎᒍᐊᕈᓯᖏᑦ ᐱᓪᓗᒋᑦ ᑯᐯᒃᒥ ᐊᓪᓚᑕᐅᓯᒪᓐᓂᒪᑕ. ᒪᕐᕉᒃ ᐱᖁᔮᐱᓕᐊᕕᓃᒃ ᐱᕕᑦᓴᖃᕐᑎᓯᒍᑎᑦᓴᑕᓖᒃ ᑲᒪᒋᔭᐅᑦᓵᓂᖕᖏᒪᑕ ᑎᓕᔨᒍᑎᓂ 2012-ᒥ 2013-ᒥᓪᓗ ᑯᐯᒃᑯᑦ ᓂᕈᐊᕐᓂᖃᓯᑐᐊᕐᒪᑕ. ᑕᒪᓐᓇᑕᒐ ᐱᒻᒪᕆᐅᓚᕿᕗᖅ ᑯᐯᒃᑯᑦ ᑐᕐᖃᑕᕐᕕᖓ ᐃᕐᖃᑐᐃᕕᓕᕆᓂᕐᒧᑦ ᓯᑎᐊᕙᓂ ᕚᓕᐅᑉ ᒪᓂᔨᓂᕕᓂᖓ ᓄᑖᒥᒃ ᐱᖁᔮᐱᒻᒥᒃ ᐅᒃᑑᐱᕆ 6, 2016-ᒥ.
ᐃᓕᓴᐱ ᐅᐃᑦᑕᖓᖅ, ᐊᖓᔪᕐᖄᖓᑦ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ, ᐅᖃᕐᑐᕕᓂᖅ, “ᐃᓕᑕᕆᔭᐅᓂᖃᕐᓂᐊᓕᕐᓂᖓ ᐃᓄᐃᑦ ᑎᒍᐊᕈᓯᑐᖃᖓᑕ ᑕᕝᕘᓇ ᐱᖁᔮᐱᑎᒍᑦ ᐊᓪᓗᕆᐊᕐᓂᓚᕆᐅᓚᖓᕗᖅ ᑐᖕᖓᕕᖃᕐᓱᓂ ᓄᓇᓕᒻᒥᐅᑦ ᐃᓚᐅᑎᑕᐅᓂᖏᓐᓂᒃ ᐊᒻᒪᓗ ᐃᓄᐃᑦ ᐱᕐᖁᓯᑐᖃᖓᑎᒍᑦ ᐃᓕᕐᖁᓯᑐᖃᖓᓂᒃ ᓄᓇᕕᒻᒥᐅᓄᑦ ᐃᒻᒥᓂᒃ ᐊᐅᓚᑦᓯᒍᓐᓇᓯᕙᓪᓕᐊᒍᑕᐅᓗᓂ.”
-2-
ᑕᒪᕐᒥᒃ ᐱᓇᓱᕝᕖᒃ ᐅᓪᓛᖅ ᐱᓇᓱᖃᑎᒌᒋᐊᓪᓚᕈᑎᖃᓚᐅᑯᑉᐴᒃ ᑯᐯᒃᑯᑦ ᑲᕙᒪᖓᓂᒃ ᕿᒥᕐᕈᖃᑎᒌᓐᓂᐊᓗᑎᒃ, ᐋᕐᕿᓱᐃᓂᐊᕐᓗᑎᓪᓗ ᑲᔪᓯᑎᑦᓯᓂᐊᕐᓗᑎᓪᓗ ᑕᒪᑐᒥᖓ ᐱᒋᐊᕐᑕᐅᖃᒻᒥᐅᔪᒥᒃ.
ᒪᑭᕝᕕᒃ ᖄᖏᕐᓂᑯᓕᐅᕐᑐᓴᔭᐅᒐᓂ ᐱᓇᓱᕝᕕᐅᕗᖅ ᑎᓕᔭᐅᒪᐅᑎᖃᕐᓱᓂ ᐊᐅᓚᑦᓯᓂᐊᕐᓂᒥᒃ ᐃᓄᓐᓅᓕᖓᔪᓂᒃ ᓄᓇᕕᒻᒥᐅᓄᑦ ᐱᕐᖁᓯᑐᖃᓕᕆᒍᑎᑦᓴᓂᒃ ᑮᓇᐅᔭᓂᒃ ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᑎᒍᑦ ᐊᓪᓚᑕᐅᓯᒪᔪᓂᒃ. ᒪᑭᕝᕕᒃ ᐊᐅᓚᑦᓯᒋᐊᖃᕐᓯᒪᔪᖅ ᑮᓇᐅᔭᓕᐅᕆᐊᓪᓚᕈᑎᑦᓴᖃᕐᓗᓂᓗ ᑖᒃᑯᓂᖓ ᑮᓇᐅᔭᕐᓂᒃ, ᐊᒻᒪᓗ ᒪᕿᑉᐸᓕᐊᒍᑎᑦᓴᐅᓚᖓᑎᓪᓗᒋᑦ ᐃᑲᔪᕐᓯᒍᑎᒋᓗᒋᑦ ᓄᐃᑕᐅᒐᓱᐊᕐᑐᓂᒃ ᐃᓄᓐᓄᑦ ᐊᐅᓚᑕᐅᑦᓱᑎᒃ ᓇᒻᒥᓂᖅ ᐱᓇᓱᕝᕕᖁᑎᒋᔭᐅᔪᓂᒃ ᓄᓇᕕᒻᒥ. ᒪᑭᕝᕕᒃ ᑫᓪᓚᑐᐃᔨᐅᒻᒪᑦ ᐃᓄᐃᑦ ᐃᓕᕐᖁᓯᖓᓂᒃ ᐱᐅᓕᐊᑦᓯᐊᓂᕐᒥᒃ ᐅᖃᐅᓯᕐᒥᓗ ᖃᓄᐃᖕᖏᓯᐊᕆᖃᕐᓂᒥᓪᓗ, ᒪᑭᑕᑦᓯᐊᕆᐊᖃᕐᓂᒥᓪᓗ, ᐊᔪᕐᑕᕈᓐᓀᒋᐊᖃᕐᓂᒥᓪᓗ ᐃᓕᓐᓂᐊᓯᒪᒋᐊᖃᕐᓂᖏᓐᓂᓗ ᐃᓄᐃᑦ ᓄᓇᕕᒻᒥ ᓄᓇᓕᓐᓂ.
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᓇᐅᓕᒫᓂᒃ ᐱᒍᑦᔨᔨᐅᕗᑦ ᓄᐃᑕᐅᓯᒪᑦᓱᑎᒃ 1978-ᒥ ᔦᒥᓯ ᐯᒥ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᒧᑦ. ᑲᒪᒋᔭᑦᓴᖃᕐᓱᑎᒃ ᑯᐯᒃ ᑕᕐᕋᖓᓂᒃ 55 ᐃᑳᖓᔫᑉ ᖁᓛᓃᑦᑐᓕᒫᒥᒃ ᐱᕕᑦᓴᖃᕐᑎᓯᒍᑎᖃᕐᓱᑎᒃ ᐃᓗᓯᓕᕆᓂᕐᒥᒃ ᐃᓄᓕᕆᓂᕐᒥᓗ ᐱᒍᑦᔨᐅᑎᓂᒃ ᓄᓇᓖᑦ ᖁᓕᓪᓗ ᓯᒪᓪᓗ ᐃᓄᖏᓐᓂᒃ.
ᖃᐅᔨᒋᐊᕐᑐᕕᓴᖅ:
ᒍᐃᓕᐊ ᑕᒍᓐᓈᖅ
ᑐᓴᕋᑦᓴᓕᕆᓂᕐᒥᒃ ᐊᑕᐅᑦᓯᑰᕐᑎᓯᔨ ᑐᓴᕋᑦᓴᓂᐊᕐᑎᐅᓱᓂᓗ
ᒪᑭᕝᕕᒃ
wtagoona@makivik.org
819-964-2925
ᖃᐅᔨᒋᐊᕐᑐᕕᓴᖅ:
ᐃᓖᓇ ᓚᑉᕌᓐᔅ
ᑐᑭᒧᐊᖅᑎᓯᔨ ᐃᓄᐃᑦ ᐱᒻᒪᕆᖁᑎᖏᓐᓂᒃ ᐱᓇᓱᐊᓲᖏᓐᓂᓗ ᐊᓪᓚᕕᒻᒥ
ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ
Elena_Labranche@ssss.gouv.qc.ca
819-964-2222