ᑐᓴᕋᑦᓴᖅ
ᑰᑦᔪᐊᖅ, ᓯᑦᑎᒻᐱᕆ 8, 2025 – ᓄᓇᕕᒃ ᐊᑐᐃᓐᓇᐅᓕᕐᖁᖅ ᐃᓕᑕᕆᔭᐅᒍᓐᓇᓂᐊᕐᓂᒥᓂᒃ ᓄᓇᖓ ᓯᓚᕐᔪᐊᒥ ᐅᓕᓐᓂᖓ ᐳᕐᑐᓂᕐᐸᐅᓂᖓᓂᒃ. ᑕᓯᐅᔭᖅ ᓯᕗᓪᓕᐹᒥ ᐃᓕᑕᕆᔭᐅᓚᐅᕐᓯᒪᑎᓪᓗᒍ Guinness World Records-ᑯᓄᑦ 1953ᒥ, ᐊᒥᓱᐃᑦ ᐃᓱᒪᖏᓐᓇᖁᑦ Bay of Fundy ᑕᓯᐅᔭᖓ ᐊᑯᓐᓂᒋᓐᓂ New Brunswick ᐊᒻᒪᓗ Nova Scotia ᐳᕐᑐᓂᕐᐸᐅᓂᕋᕐᑕᐅᓱᓂ. ᓄᑖᑦ ᓇᐅᑦᓯᑐᕐᓃᑦ ᑕᓯᐅᔭᕐᒥ ᓄᓇᓕᖓᑕ ᑕᓯᐅᔭᐅᑉ ᓴᓂᐊᓂ ᓄᑖᓂᒃ ᓄᐃᑦᓯᕗᑦ ᓄᓇᕕᒻᒥ ᐅᓕᓐᓂᖏᑦ ᐳᕐᑐᓂᕐᐸᐅᓂᖏᓐᓂᒃ ᓯᓚᕐᔪᐊᒥ. 2024-2025ᒥ ᓄᐊᑕᕕᓃᑦ ᐊᐅᓪᓚᑎᑕᐅᒪᓕᕐᖁᑦ Canadian Hydrographic Service-ᑯᓄᑦ ᐃᖃᓪᓕᐊᓂᓕᕆᓂᕐᒥᒃ ᐃᒪᕐᐱᓕᕆᓂᕐᒥ ᐱᒍᑦᔨᕕᖓᓄᑦ ᕿᒥᕐᕈᔭᐅᔪᑦᓴᐅᓱᑎᒃ.
ᖃᐅᔨᓴᕐᓂᐅᓯᒪᔪᖅ ᐊᐅᓚᑕᐅᑦᓱᓂ ᓄᓇᕕᒻᒥ ᐳᓚᕋᕐᑐᓕᕆᓂᕐᒥ ᑲᑐᑦᔨᖃᑎᒌᓐᓂᖓᓄᑦ 2003ᒥ ᑲᔪᓯᒍᓐᓇᓂᖕᖏᓚᖅ ᐃᓚᖓᑦ ᒪᕐᕉᓂᒃ ᑲᒪᒍᑎᓐᓂᒃ ᐅᓕᓐᓂᓂᒃ ᐊᑐᕐᖃᔦᕐᑐᕕᓂᐅᑎᓪᓗᒍ, ᖃᐅᔨᓴᕈᑎᒃ ᐃᓚᖓ ᓱᓕᑦᓯᐊᖏᑦᑐᓂᒃ ᖃᐅᔨᒍᑎᓂᒃ ᓄᐃᑦᓯᔪᕕᓂᐅᑦᓱᓂᓗ. ᓄᐊᑕᕕᓃᑦ ᓄᐃᑦᓯᔪᕕᓂᐅᒐᓗᐊᕐᓱᑎᒃ ᐅᓕᓐᓂᓂᒃ ᐳᕐᑐᔪᒻᒪᕆᓂᒃ, ᖃᐅᔨᒍᑎᕕᓃᑦ ᑲᒪᒋᔭᐅᓐᓂᖏᓪᓚᑦ. ᑖᓐᓇ ᒪᑭᕝᕕᑯᓄᑦ ᑐᓂᒪᒋᐊᓪᓚᕈᑎᐅᓯᓐᓂᖁᖅ ᓄᐊᑦᓯᓂᐊᕐᓗᑎᒃ ᓱᓕᑦᓯᐊᑐᓂᒃ ᑭᓯᑕᐅᒪᒍᑎᓂᒃ ᐃᑲᔪᕐᓯᒍᑎᐅᓗᓂ ᑌᔭᐅᒍᓯᖓᓂᒃ.
ᐱᒋᐊᕐᖃᒥᐅᑎᓪᓗᒍ 2024, ᒪᑭᕝᕕᑯᑦ ᐊᕐᕌᒍᓕᒫᒥ ᖃᐅᔨᓴᕐᓂᖃᓯᓚᐅᔪᑦ ᓱᓕᑦᓯᐊᑐᓂᒃ ᐅᓕᓐᓂᓂᒃ ᖃᐅᔨᓴᕐᓱᑎᒃ ᑕᓯᐅᔭᐅᑉ ᐹᖓᓂ ᑕᓯᐅᔭᐅᑉ ᓄᓇᓕᖓᑕ ᓴᓂᐊᓂ. ᒪᕐᕉᒃ ᖃᐅᔨᓴᕈᑏᒃ ᐃᓕᔭᐅᔪᕕᓃᒃ ᐅᐱᕐᖓᖑᑎᓪᓗᒍ ᖃᐅᔨᒪᔨᖃᕐᓱᑎᒃ ᓄᓇᓕᒻᒥᐅᓂᒃ ᐃᓄᓐᓂᒃ, ᖃᐅᔨᒪᒍᓯᖏᑦ ᓯᑯᐃᑦ ᓅᑦᑕᓂᖏᓐᓂᒃ ᐅᓕᓐᓂᐅᓗ ᖃᓄᐃᓗᕐᓂᖏᓐᓂᒃ ᐊᑐᕐᓂᖃᓪᓚᕆᔭᐅᔪᕗᖅ ᐊᑦᑕᓀᑦᑐᒥᒃ ᓱᓕᑦᓯᐊᑐᓂᓗ ᖃᐅᔨᓴᕐᓂᐅᓂᐊᕐᑐᒥᒃ ᓄᓇᓂ. ᐅᓕᓐᓃᑦ ᐳᕐᑐᓂᖏᑦᑕ ᐊᖏᓕᕆᓐᓂᑯᖏᓐᓄᑦ ᓯᑯᐃᓗ ᓅᑦᑕᓂᖏᓐᓄᑦ ᓇᓃᖁᔨᓂᖏᑦ ᐊᑑᑎᓪᓚᕆᒋᐊᖃᓚᐅᔪᕗᖅ ᑲᔪᓯᑦᓯᐊᕈᓐᓇᓂᐊᕐᒪᑦ ᖃᐅᔨᓴᕐᓂᖅ. ᒪᑭᕝᕕᑯᑦ ᓂᐅᕕᕐᓂᒥᔪᑦ ᐱᖁᑎᓂᒃ ᐃᓕᓐᓂᐊᑎᑦᓯᓱᑎᓗ ᐃᓄᓐᓂᒃ ᑕᓯᐅᔭᒥᐅᓂᒃ ᐱᒍᑦᔨᒍᓐᓇᓂᐊᕐᒪᑕ ᓱᒃᑯᑐᖃᕐᐸᑦ ᑲᒪᒋᓐᓇᓗᑎᓗ ᖃᐅᔨᓴᕈᑎᓂᒃ. ᐊᕐᖃᐅᒪᔫᕐᑏᑦ ᐃᓄᐃᑦ ᐃᓕᑕᕆᔭᐅᒍᑎᑖᕐᓂᖁᑦ ᐃᒪᕐᒥᒃ ᓂᓪᓕᓇᕐᑐᒥᒃ ᐊᕐᖃᐅᒪᓂᕐᒥ ᐱᓇᓱᒍᓐᓇᓂᐊᕐᓗᑎᒃ, ᑐᓂᒪᑦᓯᐊᓂᖏᓗ ᑲᔪᓯᑦᓯᐊᕈᑎᐅᓚᐅᕐᖁᑦ ᐱᓇᓱᑦᑕᐅᔪᒥᒃ.
ᐊᕐᕌᒍᓕᒫᒥ ᐃᑉᐱᒋᔭᖃᓚᐅᕐᑎᓗᒋᑦ, ᖃᐅᔨᒍᑎᕕᓃᑦ ᐊᑦᔨᒋᖕᖏᓂᖏᑦ ᕿᒥᕐᕈᔭᐅᓐᓂᖁᑦ ᓇᐅᑦᓯᑐᕐᑕᐅᓱᑎᒃ ᓄᓇᓕᖓᓂ Burncoat Head Bay of Fundy-ᓄᓇᖓᓂ. ᖃᐅᔨᒍᑎᕕᓃᑦ ᓄᐃᑦᓯᓂᕐᖁᑦ ᓄᓇᕕᐅᑉ ᐅᓕᓐᓂᖏᑦ ᖄᖏᓂᖏᓐᓂᒃ Bay of Fundy-ᒥᒃ, ᓱᕐᖁᐃᓯᒋᐊᓪᓚᒍᑎᐅᑦᓱᓂ ᑕᓯᐅᔭᖅ ᐅᓕᓪᓗᐊᑕᕐᓂᐸᐅᓂᖓᓂᒃ ᓯᓚᕐᔪᐊᓕᒫᒥ.
ᐊᖓᔪᕐᖄᖅ ᐱᑕ ᐋᑕᒥ:
“ᒪᑭᕝᕕᑯᑦ ᐅᐱᒍᓱᒃᑯᑦ ᓯᕗᓕᕆᐊᒥᒃ ᑖᑦᓱᒥᖓ ᐱᒻᒪᕆᒻᒥ ᐱᓇᓱᑦᑕᐅᔪᒥᒃ, ᐊᑯᓂᐅᓗᐊᕐᑐᖅ ᕿᑲᐅᑦᔭᐅᓚᐅᕐᑐᖅ, ᓯᕗᒧᐊᑦᑎᓯᓗᒍ. ᑕᓯᐅᔭᒥ ᐅᓕᓐᓂᒥᒃ ᖃᐅᔨᓴᕐᓂᖅ ᓱᕐᖁᐃᓯᒍᑎᐅᕗᖅ ᐃᓄᑐᖃᖁᑎᑦᑕ ᖃᐅᔨᒪᔭᑐᖃᖏᓐᓂᒃ: ᓄᓇᕕᒻᒥ ᐅᓕᓪᓗᐊᑕᕐᑐᓄᑦ ᓄᓇᒋᔭᐅᒋᐊᖓᓂᒃ. ᑖᓐᓇ ᖃᐅᔨᒪᒍᓯᖅ ᓲᖑᓯᐅᒥᑎᑦᓯᕗᖅ ᑕᑯᓐᓇᐅᔮᕐᑕᕗᓐᓂᒃ ᓯᕗᓂᕐᒥ: ᓴᐳᒻᒥᓗᑕ ᐊᕙᑎᑦᑎᓂᒃ ᐃᓅᒍᓯᑦᑎᓂᓗ, ᐱᕕᑦᓴᓯᐊᒥᒃ ᐊᑑᑎᒋᐊᕐᓗᑕ ᑖᒃᑯᐊ ᐃᓂᖁᓇᕐᑐᐃᑦ ᓄᓀᑦ ᐳᓚᕋᕐᕕᓕᐊᖑᑎᓗᒋᑦ, ᓄᐃᑕᑎᓗᒍ ᐊᑦᔨᐅᖏᑦᑐᖅ ᐃᓗᕐᕈᓯᕗᑦ, ᓄᐃᑦᓯᓗᑕ ᑖᕗᖓᐅᓕᒍᓐᓇᑐᓂᒃ ᒪᑭᑕᒐᓱᐊᕈᑎᓂᒃ ᑮᓇᐅᔭᑎᒍᑦ ᓄᓇᓕᑦᑎᓂ ᓄᓇᕕᓕᒫᒥ .”
ᒪᑭᕝᕕᒃᑯᑦ ᐃᑉᐱᒋᔭᖃᖏᓐᓇᓂᐊᕐᖁᖅ ᐅᓕᓐᓃᑦ ᐳᕐᑐᓂᖏᓐᓂᒃ, ᐅᓕᓐᓃᑦ ᐳᕐᑐᓂᖏᑦ 19ᓂᒃ ᐊᕐᕌᒍᕐᓂᒃ ᐅᑎᕐᑕᓲᖑᒻᒪᑕ. ᐱᒋᐊᕐᓂᖓᓂ ᐃᓕᑕᕐᓇᐅᑏᑦ ᐃᓱᒪᒋᔭᐅᕗᖅ ᑭᓯᑦᓯᓂᐅᖃᑦᑕᑐᐃᑦ ᐳᒃᑭᓂᕐᐹᖓᓃᓐᓂᖏᓐᓂᒃ ᐅᑎᕐᑕᑐᓂ ᐳᕐᑐᓕᕆᕐᑐᓂᒃ, ᐃᒫᒃ ᑐᑭᓕᒃ ᐅᓕᓐᓃᑦ ᐳᕐᑐᓂᕐᓴᐅᒋᐊᓪᓚᓂᐊᕐᑎᓗᒋᑦ ᓂᕆᐅᓐᓇᖁᑦ ᐊᕐᕌᒍᕐᓂᒃ ᓯᕗᓂᑦᑎᓂ. 1953ᒥ 2003ᒥᓗ ᓇᐅᑦᓯᑐᕐᓃᑦ ᐳᕐᑐᓂᕐᓴᐅᓂᕐᖁᑦ ᐅᓪᓗᒥᓂᑕᕐᓂᒃ, ᖃᐅᔨᓴᕐᑏᓗ ᐅᑉᐱᕆᔭᖃᕐᓱᑎᒃ ᐊᑦᔨᐸᓱᖓᓂᒃ ᐳᕐᑐᓂᕐᓴᓂᓗᓐᓃᑦ ᓇᐅᑦᓯᑐᕐᓂᐊᓂᖏᓐᓂᒃ ᓯᕗᓂᕐᒥ.
–30 –
ᖃᐅᔨᒋᐊᕐᕕᐅᒍᓐᓇᑐᖅ:
ᒥᕆᐊᒻ ᑎᒐᕐ
ᑯᐊᐳᕆᓴᓐᒥ ᐊᑐᐊᕋᑦᓴᓕᕆᔨᒃ
ᒪᑭᕝᕕᒃ
www.makivvik.ca
ᒪᑭᕝᕕᒃ ᓄᓇᑖᕐᓂᒧᑦ ᑎᒥᖕᖑᑐᕕᓂᖅ ᑎᓕᔭᐅᒪᑦᓱᓂ ᐊᐅᓚᑦᓯᓂᐊᕐᓱᓂ ᑮᓇᐅᔭᕐᑖᕕᓂᖏᓐᓂᒃ ᐃᓄᐃᑦ ᓄᓇᕕᒻᒥᐅᑦ ᔦᒻᔅ ᐯ ᑯᐯᒃᓗ ᑕᕐᕋᖓᓂ ᐊᖏᖃᑎᒌᒍᑎᖓᑎᒍᑦ. ᒪᑭᕝᕕᑯᑦ ᐱᓇᓱᒐᑦᓴᖏᓐᓂᒃ ᐃᓚᐅᔪᑦ ᐊᐅᓚᑦᓯᓗᑎᒃ ᑮᓇᐅᔭᓕᐅᕆᐊᓪᓚᒐᓱᒍᑎᒋᓗᒋᑦ ᑖᒃᑯᐊ ᑮᓇᐅᔦᑦ ᓄᐃᑦᓯᓗᑎᓗ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᒍᑎᐅᒍᓐᓇᑐᓂᒃ ᐃᑲᔪᕐᓯᓂᒃᑯᑦ ᓄᐃᑦᓯᓗᑎᒃ ᐃᓄᓐᓄᑦ ᐃᓂᕐᕋᑎᑕᐅᔪᓂᒃ ᑮᓇᐅᔭᑎᒍᑦ ᒪᑭᑉᐸᓕᐊᒐᓱᒍᑎᓂᒃ ᓄᓇᕕᒻᒥ. ᒪᑭᕝᕕᒃ ᐱᓇᓱᐊᕐᑐᖅ ᐱᐅᓕᐊᑦᓯᐊᓂᕐᒥᒃ ᐃᓄᐃᑦ ᐃᓗᕐᕈᓯᖓᓂᒃ ᐅᖃᐅᓯᖓᓂᓗ ᐃᓗᓯᕐᓱᓯᐊᕆᐊᖃᕐᓂᖏᓐᓂᓗ, ᖃᓄᐃᖕᖏᓯᐊᕆᐊᖃᕐᓂᖏᓐᓂᒃ, ᐊᔪᕐᓴᓂᒦᒍᓐᓀᑎᑦᓯᓂᕐᒥᒃ, ᐃᓕᓐᓂᐊᓂᖏᓐᓂᓗ ᐃᓄᐃᑦ ᓄᓇᓕᖏᓐᓂ
LEAF_BAY_TIDE_RESEARCH_PROJECT_PROVES ONCE AGAIN WORLDS_HIGHEST_TIDE_INUKTITUT.pdf