ᑰᑦᔪᐊᒥ, ᓯᑉᑎᒻᐸ 25-ᒍᑎᓪᓗᒍ, 2025-ᒥ – ᓂᕿᑦᓯᑐᓂ, ᓯᑉᑎᒻᐸ 19-ᒥ, ᑰᑦᔪᐊᒥᐅᑦ ᒪᑭᕝᕕᑯᑦ ᐊᓪᓚᑎᒻᒪᕆᖓ ᐊᓕᓯᐊ ᐊᔭᒍᑕᖅ ᐊᒻᒪᓗ ᑮᓇᐅᔭᓕᕆᔨᒻᒪᕆ ᔮᔨ ᐴᑎ ᑲᑎᓯᓚᐅᔫᒃ ᐅᑭᐅᕐᑕᑐᒥ ᐅᒥᐊᕐᔪᐊᖅ ᐊᑖᓂᐊᓘᑉ ᑲᓇᑕᒥ ᐅᒥᐊᕐᔪᐊᖁᑎᖓ Frédérick Rolette ᐊᐅᓪᓚᖃᑦᑕᓚᖓᓕᕐᓂᖓ ᐱᑦᔪᑎᒋᑦᓱᒍ, ᐅᒥᐊᕐᔪᐊᒥ ᑕᒡᒐᓂ ᐅᒥᐊᕐᑐᑎᖏᑦ ᑎᑭᓯᒪᓚᐅᕐᑐᑦ Halifax Nova Scotia-ᒥᑦ ᐱᓯᒪᑦᓱᑎᒃ ᐱᓂᐊᕐᓂᖃᕈᑎᒧᑦ ᐁᓯᒪᓚᐅᕐᑐᑦ.
ᒪᑭᕝᕕᒧᑦ, ᑕᒪᓐᓇ ᐊᓪᓗᕆᐊᕐᓂᒥ ᐱᒻᒪᕆᒥᒃ ᓇᓗᓀᕐᓯᔪᖅ ᓄᓇᕕᒻᒥᐅᑦ ᐊᒻᒪᓗ ᐊᑕᓂᐊᓘᑉ ᑲᓇᑕᒥ ᐅᓇᑕᕐᑐᓴᖏᑦᑕ ᐅᒥᐊᕐᑐᑎᖏᑦ ᑐᑭᓯᒪᖃᑎᒌᒍᑎᐅᓂᐊᕐᑐᓄᑦ ᓲᓱᒋᐅᑎᑦᓯᐊᓂᕐᒧᓗ ᐱᓇᓱᐊᕐᐸᓕᐊᒍᑎᓂᒃ. ᐃᓚᒋᔭᐅᑎᓪᓗᒍ HMCS Frédérick Rolette, ᑕᓪᓕᒪᒋᐊᓪᓓᑦ ᐅᑭᐅᕐᑕᑐᕐᓯᐅᑏᑦ ᐃᒪᕐᐱᒦᒍᑎᔦᓪᓗ ᐅᒥᐊᑦ ᑕᕐᕋᒥ ᓄᓇᓕᓐᓂᒃ ᐱᓇᓱᐊᖃᑎᖃᓛᕐᒥᔪᑦ; ᓯᕗᒧᐊᑦᑎᓗᒋᑦ, ᐅᓇᑕᕐᑐᓭᑦ ᐅᒥᐊᕐᑐᑎᖏᑦ ᓄᓇᓕᓐᓂ ᐃᓄᖏᓐᓂᒃ , ᓄᓇᓕᒻᒥ ᓯᕗᓕᕐᑎᓂᖏᓐᓂᒃ, ᐊᒻᒪᓗ ᐃᓅᓱᑦᓂᒃ/ᐅᕕᒃᑲᓂᒃᐱᓇᓱᐊᖃᑎᖃᕈᒪᔪᖅ ᐱᓇᓱᐊᖃᑎᒌᓐᓃᑦ ᐱᕈᕐᑎᓗᒋᑦ ᓄᐃᑎᕆᓗᑎᓗ ᐃᓕᑦᓯᕕᐅᒍᓐᓇᑐᓂᒃ ᐅᖄᖃᑎᒌᕝᕕᐅᒍᓐᓇᑐᓂᓪᓗ. ᓂᕿᑦᓯᕕᐅᓚᐅᕐᑐᒥ ᑰᒃᔪᐊᒥ ᖁᕕᐊᓱᒍᑎᖃᕐᑎᓗᒋᑦ, ᖁᓪᓕᒥᒃ ᐃᑭᑦᓯᔪᖃᕐᓱᓂᓗ ᐃᓗᕐᕈᓯᒥᓂᓪᓗ ᑰᒃᔪᐊᒥᐅᓂᒃ ᑕᑯᑦᓴᐅᑎᑦᓯᔪᖃᕐᒥᓱᓂ, ᐁᑦᑑᑎᑦᓴᓂᒃ ᒪᑭᕝᕕᑯᓪᓗ ᐅᒥᐊᕐᔪᐊᒥᓪᓗ ᑕᒡᒐᓂ ᐊᖓᔪᕐᖄᖓ ᔫᓖᓐ ᓕᓯ ᐁᑦᑑᑎᓂᒃ ᑐᓂᔨᔨᒌᓚᐅᔪᕘᒃ ᑕᒪᑦᓱᒪ ᐱᓇᓱᐊᖃᑎᒌᓐᓂᐅᑉ ᐱᒻᒪᕆᐅᓂᖓ ᑕᑯᑦᓴᐅᑎᒋᐊᓪᓚᓱᒍ.
ᐃᓱᒪᒋᔭᒥᓂᒃ HMCS Frédérick Rolette-ᓗ ᓄᓇᕕᐅᓪᓗ ᓄᑖᒥᒃ ᐱᓇᓱᐊᖃᑎᒌᓐᓂᕆᓯᔭᖏᑦᑕ ᐱᒻᒪᕆᐅᓂᖓᓂᒃ ᐅᖃᕐᓱᓂ, ᒪᑭᕝᕕᑯᑦ ᐊᖓᔪᕐᖄᖓ ᐱᑕ ᐋᑕᒥ ᐅᖃᓚᐅᔪᖅ ᐃᒫᒃ “ᑕᒪᓐᓇ ᐱᓇᓱᐊᖃᑎᒌᓐᓂᖅ ᖃᓄᕐᑑᓂᕆᕙᑦᑕᕗᓐᓂᒃ ᑲᕙᒪᓂᒃ ᐊᑦᔨᒌᑦᑎᓯᓂᖃᑦᓯᐊᑐᓂᓪᓗ ᐱᓇᓱᐊᖃᑎᑦᓴᓂᒃ ᐱᓇᓱᐊᖃᑎᖃᕈᒪᑦᓱᑕ ᐋᕐᕿᓱᖃᑎᒌᑦᓯᒪᓂᖅ ᑎᑭᐅᑎᒐᓱᓪᓗᒍ ᓲᓱᒋᔭᐅᑦᓯᐊᓂᓪᓗ ᓯᕗᓕᕕᓂᑦᑎᒍᑦ ᓇᔪᕐᑕᑎᓐᓃᑎᓪᓗᑕ. ᐊᒥᓱᓂᒃ ᐅᖄᖃᑎᒌᒍᑎᑦᓴᖃᕐᑐᒍᑦ ᕿᓚᓈᕈᑎᖃᕐᓱᖓᓗ ᑖᓐᓇ ᐊᑕᓂᐊᓘᑉ ᑲᓇᑕᒥ ᐅᒥᐊᕐᑐᑎᖏᓐᓂᒃ ᐱᓇᓱᐊᖃᑎᖃᕐᓂᒥᒃ ᓯᕗᒧᑦ ᑲᔪᓯᑎᑦᓯᓂᕐᒥᒃ.” ᐊᓪᓚᑎᒻᒪᕆ ᐊᓖᓯᐊ ᐊᔭᒍᑕᒃ ᐅᖃᓚᐅᕐᒥᔪᖅ ᐊᑦᔨᒐᓚᖏᓐᓂᒃ ᐃᓱᒪᒋᔭᒥᓂᒃ, ᐅᖃᐅᓯᖃᕆᐊᓪᓚᓱᓂ ᑕᒪᑦᓱᒪ ᐱᓇᓱᐊᖃᑎᒌᓐᓂᐅᑉ ᓄᓇᕕᒻᒥᐅᓂᒃ ᐱᕙᓪᓖᓂᕆᓂᐊᕐᑕᖓᓂᒃ: “ᐱᕈᕐᑎᓯᓗᓂ ᐊᑕᓂᐊᓘᑉ ᑲᓇᑕᒥ ᐅᒥᐊᕐᑐᑎᖏᓐᓂᒃ ᐱᓇᓱᐊᖃᑎᒌᓐᓂᒥᒃ ᐱᐅᔪᒥᒃ ᐊᓪᓗᕆᐊᕐᓂᐅᕗᖅ ᓲᓱᒋᐅᑎᑦᓯᐊᓂᕐᒧᑦ, ᑐᑭᓯᒪᐅᑎᓂᕐᒧᑦ, ᐊᒻᒪᓗ ᐅᑉᐱᕈᓲᑎᑦᓯᐊᓂᕐᒧᑦ. ᒪᑭᕝᕕᑯᓐᓂ ᕿᓚᓈᕐᐳᒍᑦ ᑕᒪᑦᓱᒥᖓ ᐱᑐᑦᓯᒪᖃᑎᒌᒍᑎᒥᒃ ᐱᕈᕐᑎᓯᓚᖓᓂᕐᒥᑦ, ᑕᑯᓛᕐᓂᒥᓪᓗ ᐱᐅᔪᓂᒃ ᓄᓇᕕᒻᒥᐅᑉ ᐱᕙᓪᓗᓕᑕᐅᒍᑎᒋᓂᐊᕐᑕᖏᓐᓂᒃ.
ᑲᓇᑕᒥ ᓴᐱᒻᒥᔨᓂᑦᓴ ᐱᓯᒪᔪᑦ:
“ᑲᓇᑕᒥ ᐅᑭᐅᕐᑕᑐᒥ ᐃᒪᖏᑦ ᑲᓇᑕᓕᒫᒧᑦ ᐱᒻᒪᕆᐅᒍᑎᖃᕐᒪᑕ ᐊᒻᒪᓗ ᐃᓐᓄᐃᓯᒪᒍᑎᕗᓐᓄᑦ ᐱᒻᒪᕆᖕᖑᐸᓪᓕᐊᑐᐃᓂᓐᓇᓚᖓᑦᓱᑎᒃ. ᐅᐱᒍᓱᓪᓚᕆᑉᐳᒍᑦ ᐱᑐᖃᑎᖃᕆᐊᒥᒃ ᓄᑖᒥᒃ ᐅᑭᐅᕐᑕᑐᓯᐅᑎᒥᒃ ᐃᒪᕐᐱᒦᒍᑎᔭᒥᒃ ᐅᒥᐊᕐᒥᒃ ᑕᕐᕋᒥ ᐃᒪᖁᑎᑦᑎᓂ, ᐱᕈᕐᑎᓯᔪᓂᒃ ᑐᑭᖃᑦᓯᐊᑐᓂᒃ ᐱᓇᓱᐊᖃᑎᒌᒍᑎᓂᒃ ᓄᓇᓕᓐᓂ ᑭᓇᐅᓂᑦᑎᓂᒃ ᐃᓗᑦᓯᑖᕆᔪᓂᒃ, ᐊᑦᑕᓀᓕᑎᕆᔪᓂᓄᓪᓗ ᐅᑭᐅᕐᑕᑐᒥ ᐊᐅᓚᒍᓐᓇᓂᕐᒧᑦ ᐊᑐᐃᓐᓇᐅᓂᑦᑎᓂᒃ.”
- ᐅᐱᒋᔭᐅᒍᑎᓕᒃ David J. McGuinty, ᑐᕐᖃᑕᕐᕕᒃ ᑲᓇᑕᐅᑉ ᐅᓇᑕᕐᑐᓴᖏᑦ
“ᑲᓇᑕᐅᑉ ᑕᕐᕋᖓᓂ ᓄᓇᓕᖏᓐᓂᒃ ᐱᑐᖃᑎᖃᕆᐊᒥ ᐱᓪᓚᕆᒍᑎᑕᖃᕐᐳᖅ, ᑲᒪᒋᔭᕆᐊᓕᖓᓗ ᐱᒻᒪᕆᐊᓘᑎᑕᐅᑦᓱᓂ ᐊᑕᓂᐊᓘᑉ ᑲᓇᑕᒥ ᐅᒥᐊᕐᑐᑎᖁᑎᖏᓐᓄᑦ. ᑲᓇᑕᐅᑉ ᑕᕐᕋᖓ ᐃᓚᒋᔭᐅᓪᓚᕆᒻᒪᑦ ᑲᓇᑕᐅᑉ ᐊᑦᑕᓇᕐᑐᒦᑦᑌᓕᒍᑎᖏᓐᓄᑦ ᐊᒻᒪᓗ ᐃᓐᓄᑕᐅᓯᒪᒍᑎᖓᓄᑦ, ᐊᒻᒪᓗ ᐅᓪᓗᒥ ᖁᕕᐊᓱᒍᑕᐅᓂᖓ ᐱᓇᓱᐊᖃᑎᒌᓐᓂᒥᒃ, ᓲᓱᒋᐅᑎᓂᕐᒥ, ᐊᒻᒪᓗ ᑲᓇᑕᐅᑉ ᐅᑭᐅᕐᑕᑐᖓᓂᒃ ᑲᒪᔨᐅᖃᑎᒌᓐᓂᒥᒃ ᐊᖏᕐᓯᒪᓂᕗᓐᓂᒃ ᓴᕐᕿᔮᕐᑎᓯᒋᐊᓪᓚᓱᓂ.”
- ᐊᖓᔪᕐᖄᑉ-ᑐᖓᓕᖓ ᐋᓐᑲᔅ ᑖᑉᓰ, ᐊᖓᔪᕐᖄᐅᕕᓕᒃ ᐊᑕᓂᐊᓘᑉ ᑲᓇᑕᒥ ᐅᒥᐊᕐᑐᑎᖏᑦ
“ᐱᓪᓚᕆᒍᑎᖃᕐᐳᒍᑦ ᐱᕕᑦᓴᖃᕆᐊᒥᒃ ᓄᓇᕕᒻᒥᒃ ᐱᑐᖃᑎᖃᕐᓂᒥᒃ, ᐊᒻᒪᓗ ᐱᓇᓱᐊᖃᑎᒌᓐᓂᐊᓚᖓᔪᓂᒃ ᓯᕗᓂᕐᒥ ᐊᑯᓃᕐᓂᐊᑐᓂᒃ ᐋᕐᕿᓱᐃᖃᑎᒌᒋᐊᒥ. ᑕᒡᒎᓇ ᐱᓇᓱᐊᖃᑎᒌᓐᓂᑯᑦ, ᐅᑭᐅᕐᑕᑐᒥᒃ ᑐᑭᓯᒪᓂᕐᑖᕆᐊᓪᓚᐳᒍᑦ, ᐊᐅᓚᒍᑎᓄᑦ ᐊᑐᐃᓐᓇᐅᒍᓐᓇᓂᕗᓐᓂᒃ ᐊᑦᑕᓀᓕᑎᑦᓯᓱᑕ, ᐅᐱᓐᓇᑐᒃᑯᓗ ᓱᓪᓕᑕᐅᑎᑦᓯᓱᑕ ᐊᑕᓂᐊᓘᑉ ᑲᓇᑕᒥ ᐅᒥᐊᕐᑐᑎᖏᓪᓗ ᐱᑐᖃᑎᒌᑦᓯᒪᓂᕐᒥᒃ.”
- ᐊᖓᔪᕐᖄᖅ ᔫᓖᓐ ᓕᓯ, ᐊᖓᔪᕐᖄᖑᕕᓕᒃ ᑲᒪᔨ, HMCS Frédérick Rolette
–30 –
ᐅᖄᕕᐅᒍᓐᓇᑐᖅ:
Katharine Morrill
ᑐᓴᐅᒪᖃᑎᒌᑦᑎᓯᓂᕐᓂᒃ ᑐᑭᒧᐊᑦᑎᓯᔨ, ᒪᑭᕝᕕᑯᓐᓂ
ᖃᕆᑕᐅᔭᑎᒍᑦ ᑐᕌᒍᑎᖓ ᐊᓪᓚᕕᐅᒍᒪᑐᐊᕈᓂ: kmorrill@makivvik.ca
ᖃᕆᑕᐅᔭᑎᒍᑦ ᑕᑯᒐᓱᐊᕐᑕᐅᒍᓐᓇᒥᔪᑦ ᐅᕘᓇ: www.makivvik.ca
20250925 – IN – NAVY AFFILIATION
ᒪᑭᕝᕕᒃ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕐᓯᒪᓂᖓᓄᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᐅᑎᖃᕐᓱᓂ ᑮᓇᐅᔭᕐᑖᕆᔭᐅᓯᒪᔪᓂᒃ ᑲᒪᔨᐅᑦᓱᓂ ᐃᓄᐃᑦ ᓄᓇᕕᒻᒥᐅᑦ ᑮᓇᐅᔭᕐᑖᕕᓂᖏᓐᓂᒃ ᐊᖏᖃᑎᒌᓐᓂᐅᓯᒪᔪᖅ ᔦᒥᔅ ᐯᒥ ᑯᐯᒃᓗ ᑕᕐᕋᐊᓂ ᑮᓇᐅᔭᕐᑖᕈᑕᐅᓚᐅᕐᓯᒪᒻᒪᑦ. ᒪᑭᕝᕕᒃᑯᑦ ᑮᓇᐅᔦᑦ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕋᓱᐊᕈᑎᓂᓪᓗ ᑲᒪᒋᔭᖃᓲᑦ ᐊᒻᒪᓗ ᐱᕈᕐᓭᒐᓱᐊᕐᓱᑎᒃ ᐃᓄᓐᓄᑦ ᐊᐅᓚᑕᐅᓗᑎᒃ ᑮᓇᐅᔭᓕᐅᕋᓱᐊᕈᑎᖏᓐᓂᒃ, ᐊᔪᕐᓴᑐᓂᓪᓗ ᐃᑲᔪᕐᓯᒪᐅᑎᖃᕋᓱᐊᓱᒍᑦᓱᑎᒃ , ᐊᒻᒪᓗ ᐃᓕᓐᓂᐊᑎᑦᓯᒐᓱᐊᕐᐸᓱᑎᒃ ᐃᓄᓐᓂᒃ ᓄᓇᓕᓐᓂ.