ᓄᐃᑕᐅᑦᓴᐅᑎᒋᒋᐊᓕᒃ
ᑰᑦᔪᐊᖅ, ᓄᓇᕕᒃ – ᕕᐳᐊᕆ 5, 2026 – ᒪᑭᕝᕕᒃ, ᑭᒡᒐᑐᕐᑐᖅ ᐃᓄᑐᐃᓐᓇᓂᒃ ᓄᓇᕕᒻᒥᐅᓂᒃ, ᓇᖏᖃᑎᖃᕐᖁᖅ ᐃᓄᑐᐃᓐᓇᓂᒃ ᑲᓛᓖᑦ ᓄᓈᓂ (ᑯᕇᓐᓛᓐᑦ) ᑭᐅᒍᑎᖃᕐᓱᓂ ᒫᓐᓇᐅᓚᐅᕐᑐᖅ ᐅᖃᐅᓯᐅᓚᐅᕐᑐᓂᒃ ᐊᒥᕆᑲᒥᐅᑦ ᐊᖓᔪᕐᖄᖑᓄᑦ ᑖᓄᓪᑦ ᑐᕋᒻᑉᒧᑦ ᓱᓕᔪᒥᒃ ᐅᖃᕐᓂᕋᕐᓱᓂ ᐊᒥᕆᖃᒥᐅᑦ “ᐱᔪᓐᓇᐅᑎᖃᕆᐊᖏᑦ, ᐱᖁᔭᑎᒍᑦ ᐱᖃᕐᓂᕋᕐᓱᓂ, ᐊᒻᒪᓗ ᓇᒻᒥᓂᖃᕐᓂᕋᕐᓱᓂ” ᑯᕇᓐᓛᓐᑦᒥᒃ, ᒪᑭᕝᕕᒃ ᐊᖏᖕᖏᓚᕆᒃᑯᖅ ᑖᑦᓱᒥᖓ ᐱᖃᕐᓂᕋᐅᑎᒥᒃ ᐱᖁᔭᑎᒍᑦ ᐃᓕᑕᕆᔭᐅᖕᖏᓂᕋᕐᓱᒍ ᐊᒻᒪᓗ ᓈᒻᒪᖏᓐᓂᕋᕐᓱᒍ. ᑐᓴᕐᑎᓯᒍᑎᒃ ᑐᓴᕐᑎᓯᒍᑎᐅᑎᓪᓗᒍ, ᐱᒍᑦᔨᔪᐃᑦ ᐃᓚᐅᑎᓪᓗᒍ ᐊᖓᔪᕐᖄᖅ ᐱᑕ ᐋᑕᒥ ᑲᖓᑕᓕᕐᖁᑦ ᓅᒃᒧᑦ ᐃᓄᐃᑦ ᖃᖓᑦᑕᔫᖏᑦᑕ ᖃᖓᑦᑕᔫᖓᑎᒍᑦ Boeing 737-800-ᑎᒍᑦ ᑕᑯᑦᓴᐅᑎᑦᓯᒋᐊᕐᑐᓱᑎᑦ ᐊᑕᐅᓯᐅᑦᔨᖃᑎᐅᓂᕐᒥᓂᒃ.
ᑯᕇᓐᓛᓐᑦ ᓂᐅᕕᕐᑕᐅᔪᑦᓴᔭᐅᖕᖏᑐᖅ, ᐋᕐᕿᓯᒪᐅᑎᑦᓴᐅᓗᓂ ᐱᖁᑎᐅᖕᖏᓚᖅ ᐱᑖᕆᔭᐅᔪᑦᓴᐅᓗᓂ, ᐅᕝᕙᓘᓐᓃᑦ ᓄᓇ ᓂᐅᕕᐊᑦᓴᐅᓱᓂ. ᐃᓄᑐᐃᓐᓇᐃᑦ ᓄᓇᒋᕙᐅᒃ. ᖃᓄᑐᐃᓐᓇᖅ ᐅᖃᐅᓯᖃᕋᓱᐊᕐᓂᖅ ᑲᓛᓖᑦ ᒥᑦᓵᓄᑦ ᐅᕝᕙᓘᓐᓃᑦ ᓯᕗᓂᑦᓴᖓᓂᒃ ᐱᐅᓯᖃᕐᕕᖃᕐᓗᓂ ᐱᑦᔪᑕᐅᑎᓪᓗᒍ ᐊᓯᐊᓄᑦ ᑲᕙᒪᒧᑦ ᑐᑭᑖᕐᑕᐅᓂᐊᕐᑎᓗᒍ ᓈᒻᒪᖏᓪᓚᖅ.
ᑲᓛᓖᑦ ᓯᕗᓕᕐᑎᖏᑦ ᐊᒻᒪᓗ ᐃᓄᖏᑦ ᑐᑭᓯᓇᑦᓯᐊᖃᑦᑕᖁᑦ ᖁᓚᕐᓇᓂᖃᕋᑎᒃ. ᑯᕇᓐᓛᓐᑦ ᓂᐅᕕᐊᑦᓴᐅᖏᓪᓚᖅ, ᓯᕗᓂᑦᓴᖓᓗ ᑐᑭᑖᕐᑕᐅᓛᕐᖁᖅ ᑲᓛᓖᑦ ᓄᓈᓂ, ᐃᓄᒻᒥᓄᑦ. ᐃᓄᑐᐃᓐᓇᐃᑦ ᓄᓇᕕᒻᒥ ᓈᓚᑦᓯᐊᖁᑦ ᑕᒪᓐᓇ ᐅᖃᐅᓯᐅᖃᑦᑕᑐᖅ ᓄᑖᖑᖕᖏᒪᑦ. ᑖᓐᓇ ᐊᑦᔨᒋᕙᐅᒃ ᓄᓇᐅᑉ ᐊᓯᐊᓂᑦ ᓄᓇᒥᒃ ᐱᓕᑦᑎᑐᑦ ᐊᐅᓚᑦᓯᓂᕐᒥᒃ ᐃᓱᒻᒪᓯᕐᖃᕐᓂᑎᑐᑦ ᓲᖑᔪᒻᒪᕆᓐᓄᑦ ᑲᕙᒪᓄᑦ ᐊᑐᖃᑦᑕᓯᒪᔭᖓᑎᑐᑦ ᐊᑯᓂᐊᓗᒃ ᓱᓪᓕᑎᒋᑦᓱᒍ ᐃᓄᑐᐃᓐᓇᐃᑦ ᓄᓇᖏᓐᓂᒃ ᑎᒍᓯᒍᑎᒋᑦᓱᒍ, ᓱᓇᐅᑎᑦᓯᒐᑎᒃ ᐃᓄᑐᐃᓐᓇᐃᑦ ᓄᑭᖓᓂᒃ, ᐊᒻᒪᓗ ᒪᓕᑦᑕᐅᑎᑦᓯᓱᑎᒃ ᑐᑭᑖᓂᒃ ᐊᖏᕐᑕᐅᒪᒐᑎᒃ. ᑖᓐᓇ ᓄᓇᐅᑉ ᐊᓯᐊᓂᑦ ᓄᓇᒥᒃ ᐊᐅᓚᑦᓯᓂᕐᒥᒃ ᐃᓱᒻᒪᓯᖅ ᐊᑐᕈᓐᓇᐃᖁᖅ. 2026-ᒥ, ᐃᓄᑐᐃᓐᓇᐃᑦ ᓇᒻᒥᓂᖅ-ᑐᑭᑖᕈᓐᓇᓂᖓ ᐱᒍᒪᓂᖃᑦᓯᐊᖏᓐᓂᐅᖏᓪᓚᖅ ᐅᕝᕙᓘᓐᓃᑦ ᐊᖏᖃᑎᒌᒐᓱᐊᕈᑎᑦᓴᐅᖏᓪᓚᖅ: ᐱᖁᔭᑎᒎᕐᓱᓂ, ᑲᕙᒪᑎᒎᕐᓱᓂ, ᐊᒻᒪᓗ ᐱᑦᓯᐊᓱᓂ ᓱᓕᔫᕗᖅ. ᖃᓄᑐᐃᓐᓇᖅ ᐋᕐᕿᓱᐃᒐᓱᐊᕐᓂᖅ ᐃᓄᑐᐃᓐᓇᐃᑦ ᓄᓇᖏᓐᓂᒃ ᐱᖁᑎᑎᑐᑦ ᓂᐅᕕᕐᑕᐅᓛᕐᑎᓗᒋᑦ ᓄᓇᒋᔭᐅᖕᖏᖔᕐᓗᑎᑦ ᐊᐅᓚᑕᐅᓗᑎᒃ ᐃᓄᒻᒥᓄᑦ ᑲᒪᖕᖏᓚᖅ ᑕᒪᖏᓐᓂᒃ ᐱᐅᓯᐅᓯᒪᔪᒥᒃ ᐊᑑᑎᓯᒪᔪᒥᒃ ᐊᒻᒪᓗ ᐅᓪᓗᒥ ᐃᓄᑐᐃᓐᓇᐃᑦ ᐱᔪᓐᓇᓂᖓᓂᒃ.
“ᑕᒫᓂ ᐊᑦᑕᓇᕐᑐᒦᓐᓂᓴᖃᕐᖁᖅ ᓄᓇᕐᔪᐊᒥ ᑲᕙᒪᓕᕆᓂᕐᒥᑦ ᐊᑦᑕᓇᕐᓂᓴᒥᒃ”, ᐅᖃᕐᑐᖅ ᐱᑕ ᐋᑕᒥ, ᒪᑭᕝᕕᐅᑉ ᐊᖓᔪᕐᖄᖓ. “ᐃᓄᑐᐃᓐᓇᐃᑦ ᓄᓇᖓ ᐅᖄᒍᑕᐅᓕᕐᒪᑦ ‘ᐱᔭᐅᔪᑦᓴᐅᓂᐊᕐᓂᕋᕐᑕᐅᓗᓂ’, ᐊᕐᓵᓂᒐᓱᐊᕐᓂᐅᕗᖅ ᐃᓄᑐᐃᓐᓇᐃ ᐱᔪᓐᓇᓂᖓᓂᒃ ᐊᒻᒪᓗ ᓄᓇᑦᑎᓂᒃ ᐱᑖᕆᔭᐅᑎᑦᓯᓗᓂ ᑕᒫᓂᒥᐅᖑᖕᖏᑐᓄᑦ. ᑕᒪᓐᓇ ᑕᑯᑦᓴᐅᑎᑦᓯᕗᖅ ᑲᒪᖕᖏᓚᕆᓐᓂᒥᒃ ᐃᓄᑐᐃᓐᓇᐃᑦ ᐃᓅᒋᐊᖏᑦ ᐊᒻᒪᓗ ᓄᓇᐃᑦ ᐃᓂᒋᓯᒪᔭᕗᑦ, ᐊᐅᓚᓯᒪᔭᕗᑦ, ᐊᒻᒪᓗ ᑲᒪᒋᓯᒪᔭᕗᑦ ᑕᐃᒪᖕᖓᓂᑦ ᑕᐃᑦᓱᒪᓂᕐᔪᐊᓂᑦ. ᐃᓄᑐᐃᓐᓇᐃᑦ ᐊᑕᐅᓯᐅᖃᑎᒌᒃᑯᑦ ᐅᑭᐅᕐᑕᑐᓕᒫᒥ, ᐊᒻᒪᓗ ᑲᓛᓖᑦ ᐃᓚᒋᕙᕗᑦ, ᐊᑕᐅᓯᐅᑦᓱᑕ ᐃᓚᒌᖑᕗᒍᑦ. ᓯᕗᓂᑦᓴᖓ ᑕᐃᒃᑯᓄᖓ ᑐᑭᑖᕐᑕᐅᓛᕐᑐᖅ, ᐱᔪᓐᓇᐅᑎᓕᕐᔪᐊᓄᑦ ᓯᓚᑖᓃᑦᑐᓅᖕᖏᑐᖅ. ᐃᓄᑐᐃᓐᓇᐃᑦ ᐃᓚᐅᒐᑎᒃ ᑕᑯᓐᓇᑎᑐᐃᓐᓇᐅᖏᒻᒪᑕ ᐅᑭᐅᕐᑕᑐᒥ. ᐱᒍᓐᓇᐅᑎᓂᒃ-ᑎᒍᒥᐊᕐᓱᑕ ᓄᓇᕐᔪᐊᒥᐅᖑᒐᑦᑕ ᐱᔪᓐᓇᓂᖃᕐᓱᑕ ᓄᓇᑦᑎᓂ ᐊᒻᒪᓗ ᓯᕗᓂᑦᓴᑎᓐᓂᒃ”.
ᒫᓐᓇᐅᔪᖅ ᓯᓚᐅᑉ ᐊᓯᑦᔨᐸᓪᓕᐊᓂᖓ ᐊᒻᒪᓗ ᐱᒍᒪᔭᐅᓕᕐᐸᓕᐊᔪᑦ ᐅᑭᐅᕐᑕᑐᒥ ᐱᑖᕐᕕᓴᐃᑦ ᓄᓇᒥᒃ ᑕᑯᓐᓇᑕᐅᒻᒪᕆᓐᓂᒻᒨᕐᑎᓯᕙᓪᓕᐊᕗᑦ, ᐃᓄᑐᐃᓐᓇᐃᑦ ᓄᓇᒧᑦ ᐊᑦᑐᐊᓂᖏᑦ ᐊᒻᒪᓗ ᐃᓄᑐᐃᓐᓇᐃᑦ ᖃᐅᔨᒪᓂᖓ ᑲᒪᒋᔭᐅᒋᐊᖃᕐᖁᖅ ᑐᖕᖓᕕᑦᑎᑐᑦ ᓲᕐᓗ. ᐃᓄᑐᐃᓐᓇᐃᑦ ᓯᕗᓕᕐᑎᐅᓂᖏᑦ, ᐃᓄᑐᐃᓐᓇᐃᑦ ᐊᖏᕐᓂᖏᑦ, ᐊᒻᒪᓗ ᑐᑭᑖᕐᓃᑦ ᐋᕐᕿᓱᕐᑕᐅᒪᔪᑦ ᐃᓄᓐᓄᑦ ᓄᓇᖃᕐᓯᒪᔪᓄᑦ, ᑐᑭᓯᓯᒪᔪᓄᑦ, ᐊᒻᒪᓗ ᑲᔪᓯᑎᑦᓯᓯᒪᔪᓄᑦ ᑖᒃᑯᓂᖓ ᓄᓇᓂᒃ, ᓄᓇᓕᓐᓂᒃ ᓴᐳᑦᔨᓯᒪᔪᓄᑦ, ᐊᒻᒪᓗ ᐃᑉᐱᒍᓱᑦᓯᒪᔪᓄᑦ ᐱᑦᓯᐊᑐᓂᒃ ᑲᔪᓯᒍᓐᓇᓯᐊᕐᑐᓂᓪᓗ ᓂᕈᐊᕐᓂᓂᒃ ᐅᑭᐅᕐᑕᑐᒥ. ᖃᓄᑐᐃᓐᓇᖅ ᐱᓇᓱᐊᕐᓂᖅ ᓴᓂᕐᕙᐃᔪᖅ ᐃᓄᑐᐃᓐᓇᐃᑦ ᐱᔪᓐᓇᓂᖏᓐᓂᒃ ᐊᒻᒪᓗ ᑲᒪᖕᖏᑐᖅ ᐃᓄᑐᐃᓐᓇᐃᑦ ᐃᓅᓯᖏᓐᓂᒃ ᐃᓱᐃᓪᓕᐅᕕᖃᕐᓂᕐᒥᒃ ᐊᖏᓕᑎᑦᓯᒋᐊᓛᕐᖁᖅ ᐊᒻᒪᓗ ᐊᑦᑕᓇᕇᕐᑐᒥᒃ ᖃᓄᐃᓕᖓᓂᕐᒥᒃ ᐱᐅᖕᖏᓕᒥᑎᑦᓯᒋᐊᕐᓱᓂ.
ᒪᑭᕝᕕᒃ ᐊᐱᕆᕗᖅ ᐅᑯᓂᖓ:
- ᑲᕙᒪᓂᒃ ᐊᒻᒪᓗ ᑎᒥᐅᔪᓂᒃ ᐅᖃᖁᔨᑦᓱᓂ ᑐᑭᓯᓇᑦᓯᐊᑐᒥᒃ ᐊᒻᒪᓗ ᐃᓄᓕᒫᓄᑦ ᑐᓴᕐᑕᐅᓗᓂ ᑲᓛᓖᑦ ᓄᓈᑦ ᓯᕗᓂᑦᓴᖓ ᐃᓄᒻᒥᓄᑦ ᐱᒋᔭᐅᒋᐊᖓ ᐊᒻᒪᓗ ᐃᓄᑐᐃᓐᓇᐃᑦ ᓄᓇᖓ ᓇᓪᓕᐊᓘᓐᓃᑦ ᐱᑖᕆᔭᐅᒐᓱᐊᕈᓐᓇᖏᒋᐊᖓ, ᐊᖏᖃᑎᒌᒐᓱᐊᕈᑕᐅᒍᓐᓇᖏᒋᐊᖓ, ᐅᕝᕙᓘᓐᓃᑦ ᓂᐅᕕᕐᑕᐅᒍᓐᓇᖏᒋᐊᖓ.
- ᓄᓇᕐᔪᐊᒥ ᐱᖁᔭᖅ ᐊᒻᒪᓗ ᑭᓇᒃᑯᑐᐃᓐᓇᐃᑦ ᐱᒍᓐᓇᐅᑎᖏᓐᓄᑦ ᑎᒥᐅᔪᑦ ᓴᐳᒻᒥᖁᑦᓱᒋᑦ ᐃᓄᑐᐃᓐᓇᐃᑦ ᓇᒻᒥᓂᖅ-ᑐᑭᑖᕈᓐᓇᓂᖓᓂᒃ ᐊᒻᒪᓗ ᐊᖏᖁᓇᒋᑦ ᓇᓪᓕᑐᐃᓐᓇᖏᓐᓂᒃ ᐅᖃᐅᓯᕐᓂᒃ ᐅᕝᕙᓘᓐᓃᑦ ᐱᓂᐊᕐᓂᓂᒃ ᓴᖑᑎᑦᓯᔪᓂᒃ ᐃᓄᑐᐃᓐᓇᐃᑦ ᐱᔪᓐᓇᐅᑎᖓᓂᒃ ᐅᕝᕙᓘᓐᓃᑦ ᐃᓄᑐᐃᓐᓇᐃᑦ ᓄᓇᖏᓐᓂᒃ ᖃᓄᐃᓘᕈᑎᑦᓴᐅᓗᑎᒃ ᐱᖁᑎᐅᑎᑦᓯᔪᓂᒃ.
- ᐃᓄᐃᑦ ᑲᑐᑦᔨᖃᑎᒌᑦ ᐊᒻᒪᓗ ᓄᓇᖃᕐᖄᓯᒪᔪᑦ ᑎᒥᐅᔪᐃᑦ ᓄᓇᕐᔪᐊᓕᒫᒥ ᓇᖏᖃᑎᖃᖁᑦᓱᒋᑦ ᐃᓄᑐᐃᓐᓇᓂᒃ ᐊᒻᒪᓗ ᓇᓗᓇᐃᕐᓯᖁᑦᓱᒋᑦ ᐅᑭᐅᕐᑕᑑᑉ ᓯᕗᓂᑦᓴᖓ ᐋᕐᕿᓱᕐᑕᐅᒪᒋᐊᖃᕆᐊᖓ ᐃᓄᑐᐃᓐᓇᐃᑦ ᕿᑎᖓᓃᑦᑎᓗᒋᑦ, ᐃᓄᐃᑦ ᐱᒍᓇᐅᑎᖏᓐᓂᒃ ᐃᓚᖃᕐᓗᑎᒃ ᐊᒻᒪᓗ ᐊᖏᕐᓂᖅ ᐱᒋᐊᕐᓂᐅᑎᓗᒍ.
ᑖᓐᓇ ᐱᓂᐊᕐᓂᖅ ᓲᖑᓯᑎᑦᓯᒋᐊᕐᓯᒪᕗᖅ ᐃᓄᑐᐃᓐᓇᐃᑦ ᐋᕐᖀᒍᑎᑦᓴᖏᓐᓂᒃ ᑲᓛᓖᑦ ᓄᓈᓐᓂᓕᒫᖅ, ᓄᓇᕕᓕᒫᒥ, ᐊᒻᒪᓗ ᐅᖓᑖᓄᑦ. ᒪᑭᕝᕕᒃ ᐊᖏᖕᖏᓚᖅ ᐊᔪᐃᓐᓇᓂᕐᒥᒃ ᓇᓪᓕᐊᓂᑐᐃᓐᓇᖅ ᓇᓪᓕᑐᐃᓪᓇᖓᓄᑦ ᑲᕙᒪᒧᑦ ᐋᕐᕿᓱᐃᓂᕐᒥᒃ ᐃᓄᑐᐃᓐᓇᐃᑦ ᓄᓇᖏᓐᓂᒃ ᓵᓚᖃᐅᑎᑎᑐᑦ ᓄᓇᕐᔪᐊᒥ ᓲᖑᓂᕐᒧᑦ ᐊᑦᓱᕉᑎᓄᑦ. ᐊᑕᐅᓯᑐᐊᖑᑦᓱᑎᒃ ᐅᑭᐅᕐᑕᑐᒥ ᓄᓇᑖᕐᓃᑦ ᓈᒻᒪᖏᓪᓚᑦ ᐊᒻᒪᓗ ᑲᒪᒋᔭᐅᓛᕐᖁᑦ ᐊᑭᕋᕐᑐᑐᓄᑦ.
-30-
ᖃᐅᔨᒋᐊᕐᕕᓴᖅ:
ᑲᑕᕆᓐ ᒧᕆᓪ
ᑐᑭᒧᐊᑦᑎᓯᔨ ᑐᓴᐅᒪᖃᑦᑕᐅᑎᓕᕆᓂᕐᒧᑦ, ᒪᑭᕝᕕᒃ
ᒪᑭᕝᕕᒃ ᓄᓇᑖᕐᓂᒧᑦ ᑎᒥᐅᔫᕗᖅ ᑎᓕᔭᐅᒪᒍᑎᖃᕐᓱᓂ ᐊᐅᓚᑦᓯᓂᕐᒥᒃ ᑭᖑᕚᑦᓴᓄᑦ ᕿᒻᒪᖁᑎᑦᓴᓂᒃ ᑮᓇᐅᔭᓂᒃ ᓄᓇᕕᒻᒥᐅᑦ ᐃᓄᖏᓐᓄᑦ ᐊᑐᐃᓐᓇᐅᑎᑕᕐᓂᒃ ᔭᐃᒥᔅ ᐸᐃ ᐊᒻᒪᓗ ᑯᐸᐃᒃ ᑕᕐᕋᖓᑕ ᐊᖏᖃᑎᒌᒍᑎᖓᑕ ᐊᑖᒍᑦ. ᒪᑭᕝᕕᐅᑉ ᐱᔭᑦᓴᖏᑦ ᐃᓚᖃᕐᖁᑦ ᐊᐅᓚᑦᓯᓂᕐᒥᒃ ᐊᒻᒪᓗ ᑮᓇᐅᔭᓕᐅᕋᓱᐊᕈᑎᖃᕐᓂᒥᒃ ᑖᒃᑯᓂᖓ ᑮᓇᐅᔭᓂᒃ ᐊᒻᒪᓗ ᖃᐅᔨᔭᐅᑎᑦᓯᒐᓱᐊᕐᓂᒥᒃ ᒪᑭᑕᒐᓱᐊᕐᓂᑯᑦ ᐱᕈᕐᐸᓕᐊᓂᕐᒥᒃ ᐊᑐᐃᓐᓇᖃᕐᑎᓯᓗᑎᒃ ᐃᑲᔪᕐᓂᒥᒃ ᓄᐃᑦᓯᓂᕐᒧᑦ ᐃᓄᑐᐃᓐᓇᓄᑦ-ᐊᐅᓚᑕᕐᓂᒃ ᓇᒻᒥᓂᖅ ᑮᓇᐅᔭᓕᐅᕋᓱᐊᕐᕕᓂᒃ ᓄᓇᕕᒻᒥ. ᒪᑭᕝᕕᒃ ᓄᐃᑕᑎᑦᓯᕗᖅ ᐃᓄᐃᑦ ᐃᓕᕐᖁᓯᖓᓂᒃ ᐅᖃᐅᓯᖓᓂᓪᓗ ᐊᓯᐅᔨᑎᑦᓯᑕᐃᓕᓂᕐᒥᒃ ᐃᓗᓯᕐᓱᓯᐊᕐᓂᖏᓐᓂᓗ, ᖃᓄᐃᖕᖏᓯᐊᕐᓂᖏᓐᓂᓗ, ᐊᔪᕐᓴᖏᓐᓂᖏᓐᓂᓗ, ᐊᒻᒪᓗ ᐃᓕᓐᓂᐊᓂᖏᓐᓂᒃ ᐃᓄᑐᐃᓐᓇᐃᑦ ᓄᓇᓕᓐᓂ.