ᑰᑦᔪᐊᖅ, ᑎᓯᒻᐱᕆ 5, 2025 – ᐱᓇᓱᐊᕈᓯᐅᓚᐅᕐᑐᒥ ᑲᓇᑕᒥ ᓂᕈᐊᕐᑐᓕᕆᔨᒃᑯᓄᑦ ᐊᑑᑎᔪᕕᓂᕐᓂᒃ-ᖃᐅᔨᒐᓱᐊᕈᑎᓄᑦ ᑐᓴᕐᑎᓯᒍᑎᖏᑦ ᓄᐃᑕᕕᓂᐅᑎᓪᓗᒋᑦ ᐱᑦᔪᑎᓕᕕᓂᐅᓚᐅᔪᓂᕐᒥᓄᑦ ᐱᓀᓗᑕᖃᕐᓱᑎᒃ ᓄᓇᕕᒻᒥ ᓄᓇᓕᖏᑦᑕ ᐊᑑᑎᔭᕕᓂᖏᓐᓂᒃ ᑭᖑᓪᓕᐹᒥ ᑲᓇᑕᓕᒫᒥ ᓂᕈᐊᕐᑎᓯᑎᓪᓗᒋᑦ, ᒪᑭᕝᕕᒃ ᑐᓴᕐᑎᓯᒍᑎᖓᑕ ᐅᖃᐅᓯᖏᓐᓂᒃ ᐅᖃᕐᕕᖃᕈᒪᔪᖅ.
ᑲᓇᑕᒥ ᓂᕈᐊᕐᑐᓕᕆᔨᒃᑯᑦ ᓄᓇᓕᑦᑎᓂᑦ ᐃᓄᖁᑎᕗᑦ ᓂᕈᐊᕐᓂᒧᐊᖓᔪᓂᒃ ᐱᒍᑦᔭᐅᖏᓚᕿᒍᑎᕕᓂᖏᓐᓂᒃ ᑕᒻᒪᕈᑎᕕᓂᕐᒥᓂᒃ ᓱᓕᓂᕃᒍᑎᖏᑦ ᑐᓴᑦᓯᐊᑕᕗᑦ. ᐱᓗᐊᕐᑐᖅ, ᓇᑯᕆᓚᐅᕐᑕᕗᑦ ᑲᓇᑕᒥ ᓂᕈᐊᕐᑐᓕᕆᔨᒃᑯᑦ ᐃᓕᑕᕐᓯᓂᕆᓚᐅᕐᑕᖏᑦ ᓄᓇᓕᒻᒥ ᓂᕈᐊᕐᑎᓯᔨᒻᒪᕆᐅᑉ ᐱᓇᓱᐊᕐᑎᑕᐅᖕᖏᓂᕕᓂᖓᓂᒃ ᐊᒻᒪᓗ ᑲᓇᑕᒥ ᓂᕈᐊᕐᑐᓕᕆᔨᒃᑯᑦ ᐊᓪᓚᕕᒻᒪᕆᖓᑕ ᖃᓄᐃᓕᒋᐊᕈᑎᖃᒻᒣᑑᓂᕕᓂᖓᓂ, ᑕᒪᕐᒥᒃ ᑖᒃᑯᐊ ᑎᑭᐅᑎᓚᕿᒍᑎᕕᓂᐅᑦᓱᑎᓗ ᓄᓇᕕᒻᒥ ᓂᕈᐊᕐᓂᒥ ᐱᒍᑦᔨᐅᑎᓄᑦ ᐊᕐᖁᑎᑦᓴᖃᑦᓯᐊᖏᓐᓂᒧᑦ. ᑌᒣᓕᖓᓂᖓ ᑕᒪᑦᓱᒪ ᑕᑯᑦᓴᐅᑫᓪᓚᕆᑦᑐᖅ ᑲᕙᒪᒥ ᐃᓄᐃᑦ ᓄᑭᖃᕈᑎᒋᒋᐊᓕᖏᑦᑕ ᐊᑐᖕᖏᓚᕆᑦᑎᑕᐅᓂᕕᓂᖓᓂᒃ ᖃᖓᓘᓐᓃᓗ ᑕᒪᓐᓇ ᐊᑑᑎᓕᕐᕿᒋᐊᖃᖕᖏᒪᕆᑦᓱᓂ.
ᓇᓗᓀᕆᒋᐊᕈᒪᕗᒍᑦ, ᑭᓯᐊᓂ, ᐃᒫᒃ ᐃᒣᒻᒪᑦ ᑖᒃᑯᐊ ᑐᓴᕐᑎᓯᒍᑎᖏᑦ ᐱᓇᓱᒍᑎᑦᓴᓄᑦ ᓂᕈᐊᕐᑎᓯᕕᑦᓴᐅᒍᓐᓇᑐᓂᒃ ᓄᓇᓕᓐᓂ ᓂᕈᐊᕐᓂᖃᕐᑎᓯᒍᑎᑦᓴᓄᑦ ᐱᑕᖃᑦᓯᐊᓂᕃᑦᓱᑎᒃ ᓇᓗᓀᕐᓯᔫᒐᓗᐊᑦ, ᒪᑭᕝᕕᒃ ᑎᒥᐅᔪᐃᓪᓗ ᐊᓯᖏᑦ ᑲᔪᓯᑎᑦᓯᓂᐊᕐᑐᑦ ᖃᓄᕐᑑᕈᑦᔨᒍᑎᓂᒃ ᑲᓇᑕᐅᑉ ᑲᕙᒪᖓᓂᒃ ᐃᑲᔪᕐᓯᖁᔨᒍᑎᓄᑦ ᑕᕐᕋᒥ ᓄᓇᓕᓐᓂᑦ ᓂᕈᐊᕐᕕᖃᕐᑎᓯᒍᑎᑦᓭᑦ ᐱᐅᓯᒋᐊᕐᑕᐅᖁᑦᓱᒋᑦ. ᓄᓇᕕᒻᒥ ᑲᓇᑕᓕᒫᒥᓗ ᐃᓄᐃᑦ ᓄᓇᓕᖏᓐᓂᑦ ᓂᕈᐊᕐᑎᓯᕕᑦᓴᖃᖕᖏᓂᖓᑕ ᐅᖃᓕᒪᒍᑎᐅᖃᑦᑕᓂᖓ ᑲᔪᓯᑎᑕᐅᒋᐊᓕᒃ.
ᑖᒃᑯᐊ ᑐᓴᕐᑎᓯᒍᑏᑦ ᐱᓀᓗᑕᕐᓂᒃ ᑕᒪᒃᑯᓂᖓ ᐋᕐᕿᓱᐃᒍᑎᐅᑦᓯᐊᕈᓐᓇᑐᓂᒃ ᒪᓂᔨᒐᓗᐊᕐᑎᓗᒋᑦ, ᓇᓗᓇᖕᖏᓯᐊᕐᑐᖅ ᐱᓇᓱᐊᕐᑕᐅᒋᐊᖃᖏᓐᓇᓂᖏᑦ ᑲᓇᑕᐅᑉ ᓂᕈᐊᕐᑐᓕᕆᔨᖏᓐᓄᑦ ᒪᑭᕝᕕᑯᓐᓂᒃ ᓄᓇᕕᐅᓪᓗ ᓄᓇᓕᓕᒫᓄᐊᖓᔪᓂᒃ ᑎᒥᐅᔪᖏᓐᓂᒃ ᓯᕗᒧᐊᒋᐊᕐᑎᓯᒍᑎᑦᓴᓄᑦ ᐱᓇᓱᐊᖃᑎᖃᕐᓗᑎᒃ. ᑕᒪᓐᓇ ᐱᓪᓗᒍ ᐱᓇᓱᐊᖃᑎᒌᒍᑎᒋᖏᓐᓇᓚᖓᒋᐊᖅ ᕿᓚᓈᕐᐳᒍᑦ ᑭᖑᓪᓕᒥ ᓂᕈᐊᕐᓂᐅᓛᕐᑐᑦ ᑲᔪᓯᑦᓯᐊᓛᖁᓗᒋᑦ ᐊᕝᕕᐊᓗᑕᐅᓚᐅᕐᑐᑦ ᑕᒡᒐᓂ ᐊᕐᕌᒍᒥ ᓄᖑᑎᕐᑕᐅᓯᒪᓕᕐᑎᓗᒋᑦ ᐊᒻᒪᓗ ᐊᑐᐃᓐᓇᐅᑎᑦᓯᓯᐊᕐᓂᐊᑎᓪᓗᒋᑦ ᐊᑦᔨᒌᑦᑎᓯᑦᓯᐊᑐᓂᒃ ᓄᓇᕕᒻᒥ ᐃᓄᓐᓄᑦ ᐅᑭᐅᒥᑎᒍᑦ ᓂᕈᐊᕈᓐᓇᑐᓕᒫᓄᑦ ᐊᑐᕐᑕᐅᒍᓐᓇᕕᓕᓐᓂᒃ.
–30 –
ᐅᖄᕕᐅᒍᓐᓇᑐᖅ:
Katharine Morrill
ᑐᓴᐅᒪᖃᑎᒌᑦᑎᓯᓂᕐᓂᒃ ᑐᑭᒧᐊᑦᑎᓯᔨ, ᒪᑭᕝᕕᑯᓐᓂ
ᖃᕆᑕᐅᔭᑎᒍᑦ ᑐᕌᒍᑎᖓ ᐊᓪᓚᕕᐅᒍᒪᑐᐊᕈᓂ: kmorrill@makivvik.ca ᖃᕆᑕᐅᔭᑎᒍᑦ ᑕᑯᒐᓱᐊᕐᑕᐅᒍᓐᓇᒥᔪᑦ ᐅᕘᓇ: www.makivvik.ca
ᒪᑭᕝᕕᒃ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕐᓯᒪᓂᖓᓄᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᐅᑎᖃᕐᓱᓂ ᑮᓇᐅᔭᕐᑖᕆᔭᐅᓯᒪᔪᓂᒃ ᑲᒪᔨᐅᑦᓱᓂ ᐃᓄᐃᑦ ᓄᓇᕕᒻᒥᐅᑦ ᑮᓇᐅᔭᕐᑖᕕᓂᖏᓐᓂᒃ ᐊᖏᖃᑎᒌᓐᓂᐅᓯᒪᔪᖅ ᔦᒥᔅ ᐯᒥ ᑯᐯᒃᓗ ᑕᕐᕋᐊᓂ ᑮᓇᐅᔭᕐᑖᕈᑕᐅᓚᐅᕐᓯᒪᒻᒪᑦ. ᒪᑭᕝᕕᒃᑯᑦ ᑮᓇᐅᔦᑦ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕋᓱᐊᕈᑎᓂᓪᓗ ᑲᒪᒋᔭᖃᓲᑦ ᐊᒻᒪᓗ ᐱᕈᕐᓭᒐᓱᐊᕐᓱᑎᒃ ᐃᓄᓐᓄᑦ ᐊᐅᓚᑕᐅᓗᑎᒃ ᑮᓇᐅᔭᓕᐅᕋᓱᐊᕈᑎᖏᓐᓂᒃ, ᐊᔪᕐᓴᑐᓂᓪᓗ ᐃᑲᔪᕐᓯᒪᐅᑎᖃᕋᓱᐊᓱᒍᑦᓱᑎᒃ , ᐊᒻᒪᓗ ᐃᓕᓐᓂᐊᑎᑦᓯᒐᓱᐊᕐᐸᓱᑎᒃ ᐃᓄᓐᓂᒃ ᓄᓇᓕᓐᓂ.