ᑰᑦᔪᐊᖅ, ᑎᓯᒻᐱᕆ 2, 2025 – ᒪᑭᕝᕕᒃ ᐊᓕᐊᓱᑉᐳᖅ ᐅᓐᓂᓯᐅᕈᑎᖃᕆᐊᒥᒃ ᓄᑖᑉ ᐱᓂᐊᕈᑎᐅᑉ ᐱᒋᐊᕐᑎᑕᐅᓂᖓᓂᒃ, ᐅᖃᕐᑕᐅᔪᒥᒃ ᓕᓕᐅᑉ ᑮᓇᐅᔭᖏᓐᓂᒃ, ᑮᓇᐅᔭᑎᒍᑦ ᐃᑲᔪᕐᓯᒍᑕᐅᓚᖓᔪᓂᒃ ᓄᓇᕕᒻᒥᐅᓂᒃ ᐃᓄᓐᓂᒃ ᐱᒻᒪᕆᓐᓂᒃ ᐊᒻᒪᓗ ᑌᒣᖏᓐᓇᓂᐊᕐᑐᓂᒃ ᑎᒥᒥᒍᑦ ᐃᓱᒪᒥᒍᓪᓘᓃᑦ ᐱᒡᒐᓘᑎᓕᓐᓂᒃ ᑖᒃᑯᐊᓗ ᐃᓚᖏᓐᓂᒃ. ᐊᑦᓯᑕᐅᓯᒪᔪᑦ ᐅᐱᒍᓲᑕᐅᑦᓱᑎᒃ ᐃᓄᒃᔪᐊᒥᐅᒥᒃ ᓕᓕ ᒣᓇᒥᒃ ᐊᒻᒪᓗ ᐃᓅᓯᓕᒫᖅ ᐊᔭᐅᕐᑐᓂᖓᓂᒃ ᐃᑲᔪᕐᓯᒪᑦᓱᓂ ᓄᓇᕕᒻᒥᐅᓂᒃ ᐱᒡᒐᓘᑎᓕᓐᓂᒃ ᐱᓕᐅᒥᑦᓯᒐᓱᑦᓱᓂᓗ ᐊᑦᓱᕈᕐᓇᑐᐃᑦ ᓵᖕᖓᔭᐅᔪᑦ ᐃᓚᖏᓐᓄᑦ ᐊᒻᒪᓗ ᑲᒪᔨᖏᓐᓄᑦ ᐃᑉᐱᒋᔭᐅᓂᖓᓂᒃ. ᓕᓕᐅᑉ ᑮᓇᐅᔭᑎᒍᑦ ᐃᑲᔪᕐᓯᐅᑎᖏᑦ ᑐᕌᖓᕗᑦ ᐃᑯᓪᓚᐅᒥᑦᓯᓂᕐᒧᑦ ᐅᖁᒣᓪᓕᐅᓇᕐᑐᓂᒃ ᑌᒣᑎᑕᐅᔪᓂᒃ ᐱᑕᖃᖕᖏᓂᕐᒧᑦ ᐃᓂᑦᓴᓂᒃ ᐊᒻᒪᓗ ᑮᓇᐅᔭᑎᒍᑦ ᐃᑲᔪᕐᑕᐅᒍᑎᓂᒃ ᐃᓄᐃᑦ ᐊᒥᓱᑦ ᓵᖕᖓᔭᖓᓂᒃ ᓄᓇᕕᐅᑉ ᓄᓇᓕᖏᑦᑕ ᐃᓗᐊᓂ.
ᓯᕗᓕᕐᑕᐅᓱᓂ ᒪᑭᕝᕕᐅᑉ ᐊᖓᔪᕐᖄᒪᕆᖓᓄᑦ ᐱᑕ ᐋᑕᒥᒧᑦ, ᑖᓐᓇ ᐱᒋᐊᕐᑎᑕᐅᔪᖅ ᑕᕐᓯᕈᑕᐅᕗᖅ ᐊᖏᔪᒧᑦ ᓯᕗᒧᑦ ᐊᓪᓗᕆᐊᕐᓂᒧᑦ ᐃᓱᕐᕆᓕᐅᒥᑎᑦᓯᓚᖓᓗᓂ ᐱᒡᒐᓘᑎᓖᑦ ᑲᒪᒋᔭᐅᒍᑎᖏᓐᓂᒃ ᓇᓂᑐᐃᓐᓇᖅ ᓄᓇᕕᒻᒥ. ᓈᒻᒪᓈᑦᓯᐊᓱᓂ ᐱᒋᐊᕐᑎᑕᐅᓂᖃᓚᖓᔪᖅ ᓯᕗᓪᓕᐅᕌᐱᓪᓂ ᓄᓇᕐᔪᐊᓕᒫᓂ ᐃᓄᐃᑦ ᐱᒡᒐᓘᑎᓖᑦ ᐅᓪᓗᖓᓄᑦ, ᐃᓕᑕᕆᔭᐅᓂᖃᓲᒧᑦ ᑎᓯᒻᐱᕆ 3-ᒥ, ᒪᑭᕝᕕᒃ ᓂᕆᐅᑦᑐᖅ ᓕᓕᐅᑉ ᑮᓇᐅᔭᖏᑦᑕ ᐃᑯᓪᓚᐅᒥᑎᑦᓯᓂᐊᕐᓂᖓᓂᒃ ᐊᑦᓱᕈᕐᓇᑐᐃᑦ ᐃᓚᖏᓐᓂᒃ ᓵᖕᖓᔭᐅᔪᓂᒃ ᓄᓇᓕᒻᒥᐅᓄᑦ ᐃᓅᔪᓄᑦ ᐱᒡᒐᓘᑎᖃᕐᓱᑎᒃ ᐃᑲᔪᕐᓗᑎᓪᓗ ᓱᓕ ᐱᑕᖃᖕᖏᓗᐊᕐᑐᓂᒃ ᑌᒣᑦᑐᑎᒍᑦ ᐱᒍᑦᔨᒍᑎᓂᒃ ᐊᒻᒪᓗ ᑲᒪᒋᔭᐅᕕᑦᓴᓂᒃ ᓇᑉᐸᑎᕐᓯᒪᔪᓂᒃ ᓄᓇᖁᑎᐅᑉ ᐃᓗᐊᓂ.
ᑭᓇᒃᑯᑦ ᑐᑦᓯᕋᐅᑎᖃᕈᓐᓇᑐᑦ?
ᑐᑦᓯᕋᐅᑎᓕᐅᕐᓂᖅ ᐅᒃᑯᐃᖔᕐᑐᖅ ᓄᓇᕕᒻᒥ ᐃᓄᓐᓄᑦ ᐅᑯᓂᖓ ᓂᐳᕐᑎᒥᔪᓄᑦ:
-ᐃᓚᐅᔫᒋᐊᓕᒃ JBNQA ᐊᑖᒍᑦ
-ᐃᓅᔪᖅ ᐱᒻᒪᕆᒻᒥᒃ ᐊᒻᒪᓗ ᑌᒣᖏᓐᓇᓚᖓᔪᒥᒃ ᐱᒡᒐᓘᑎᖃᕐᓱᓂ ᑕᒪᑐᒪ ᐃᓗᓯᓕᕆᓂᕐᒥᒃ ᐱᓇᓱᑦᑎᒪᕆᒻᒧᑦ ᓇᓗᓀᕐᑕᐅᓂᖓ ᒪᓕᓪᓗᒍ
-ᐅᑭᐅᖃᕆᐊᓕᒃ 64-ᓂᒃ ᐊᑖᓄᓪᓘᓃᑦ
-ᐊᖓᔪᕐᖄᕆᔭᐅᔪᑦ ᐅᕝᕙᓘᓐᓃᑦ ᑲᒪᔨᐅᔪᑦ ᑐᑦᓯᕋᐅᑎᖃᕈᓐᓇᑐᑦ ᐃᓄᒻᒪᕆᐅᖕᖏᑐᑦ ᐱᒍᑦᔨᓗᒋᑦ
ᖃᓄᖅ ᑐᑦᓯᕋᐅᑎᖃᕈᓐᓇᖁᖓ?
ᑐᑦᓯᕋᐅᑎᒥᒃ ᐊᓪᓚᕕᑦᓴᔭᖅ ᑎᒍᒍᓐᓇᑐᖅ ᒪᑭᕝᕕᑯᑦ ᒪᑉᐱᕕᖓᓂᒃ ᖃᕆᑕᐅᔦᑦ ᐱᑐᕝᕕᒪᕆᖓᓂ ᑎᑭᑎᑕᐅᓗᓂᓗ ᐅᕗᖓ lillysfund@makivvik.ca. ᑐᑦᓯᕋᐅᑎᓕᐅᕈᓐᓇᑐᓯ ᑎᑭᓪᓗᒍ ᑎᓯᒻᐱᕆ 2–ᒧᑦ 2025-ᒥ.
ᑕᑯᓚᖓᓗᑎᑦ ᖃᐅᔨᒪᒍᑎᒋᐊᓪᓚᓂᒃ ᑕᒪᑐᒪ ᐃᑲᔪᕐᓯᒍᑎᐅᑉ ᐱᕙᓪᓕᐊᓂᕆᓯᒪᔭᖓᓂᒃ, ᐃᓚᐅᕕᐅᒍᓐᓇᓂᖓᓂᒃ ᐊᒻᒪᓗ ᕿᒥᕐᕈᒍᑕᐅᓂᖓᑕ ᓂᐳᕐᑎᒋᐊᓕᖁᑎᖏᓐᓂᒃ, ᐅᓇ ᐱᑐᕝᕕᒃ ᐃᑎᕐᓗᒍ: ᓕᓕᐅᑉ ᑮᓇᐅᔭᖃᕐᑎᓯᒍᑎᖏᑦ – ᒪᑭᕝᕕᒃ ᓴᐳᑦᔨᕗᑦ ᐃᑲᔪᕐᓯᒍᑎᓂᒃ ᐃᓄᓐᓂᒃ ᐃᓚᒌᓂᒃ ᐱᒻᒪᕆᑦᑐᒥᒃ ᐊᑌᓐᓇᑐᒥᓗ ᓱᕐᖃᔦᕐᓯᒪᒍᑎᓕᓐᓂᒃ – ᒪᑭᕝᕕᒃ – Makivvik
–30 –
ᐅᖄᕕᐅᒍᓐᓇᑐᖅ:
Katharine Morrill
ᑐᓴᐅᒪᖃᑎᒌᑦᑎᓯᓂᕐᓂᒃ ᑐᑭᒧᐊᑦᑎᓯᔨ, ᒪᑭᕝᕕᑯᓐᓂ
ᖃᕆᑕᐅᔭᑎᒍᑦ ᑐᕌᒍᑎᖓ ᐊᓪᓚᕕᐅᒍᒪᑐᐊᕈᓂ: kmorrill@makivvik.ca ᖃᕆᑕᐅᔭᑎᒍᑦ ᑕᑯᒐᓱᐊᕐᑕᐅᒍᓐᓇᒥᔪᑦ ᐅᕘᓇ: www.makivvik.ca
ᒪᑭᕝᕕᒃ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕐᓯᒪᓂᖓᓄᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᐅᑎᖃᕐᓱᓂ ᑮᓇᐅᔭᕐᑖᕆᔭᐅᓯᒪᔪᓂᒃ ᑲᒪᔨᐅᑦᓱᓂ ᐃᓄᐃᑦ ᓄᓇᕕᒻᒥᐅᑦ ᑮᓇᐅᔭᕐᑖᕕᓂᖏᓐᓂᒃ ᐊᖏᖃᑎᒌᓐᓂᐅᓯᒪᔪᖅ ᔦᒥᔅ ᐯᒥ ᑯᐯᒃᓗ ᑕᕐᕋᐊᓂ ᑮᓇᐅᔭᕐᑖᕈᑕᐅᓚᐅᕐᓯᒪᒻᒪᑦ. ᒪᑭᕝᕕᒃᑯᑦ ᑮᓇᐅᔦᑦ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕋᓱᐊᕈᑎᓂᓪᓗ ᑲᒪᒋᔭᖃᓲᑦ ᐊᒻᒪᓗ ᐱᕈᕐᓭᒐᓱᐊᕐᓱᑎᒃ ᐃᓄᓐᓄᑦ ᐊᐅᓚᑕᐅᓗᑎᒃ ᑮᓇᐅᔭᓕᐅᕋᓱᐊᕈᑎᖏᓐᓂᒃ, ᐊᔪᕐᓴᑐᓂᓪᓗ ᐃᑲᔪᕐᓯᒪᐅᑎᖃᕋᓱᐊᓱᒍᑦᓱᑎᒃ , ᐊᒻᒪᓗ ᐃᓕᓐᓂᐊᑎᑦᓯᒐᓱᐊᕐᐸᓱᑎᒃ ᐃᓄᓐᓂᒃ ᓄᓇᓕᓐᓂ.