ᑯᐯᒃ ᓯᑎ, ᓇᑦᔪᐃᔭᕐᕕᒃ 13, 2025 – ᑯᐯᒃ ᓯᑎ, ᓇᑦᔪᐃᔭᕐᕕᒃ 13, 2025 – ᒪᑭᕝᕕᒃᑯ ᐅᓪᓗᑕᒫᕐᓯᐅᑎᓕᕆᔨᖏᑦ ᑲᑎᖕᖓᔩᑦ ᐊᒻᒪᓗ ᑲᑎᖕᖓᔨᖏᑦ ᑲᑎᓯᓚᐅᕐᑐᑦ ᑯᐯᒃ ᐊᖓᔪᕐᖄᖓᓂᒃ ᓕᑰᒥᒃ, MNA ᐄᐊᓐ ᓚᕗᕆᓂᐁᕐᒥᒃ (ᐃᓄᓐᓂᒃ ᐊᒻᒪᓗ ᓄᓇᖃᕐᖄᓯᒪᔪᓂᒃ ᐱᓇᓱᐊᖃᑎᖃᕐᓂᒧᑦ, ᓇᐅᓕᒫᑦ ᐊᑦᑕᓇᕐᑐᒨᕐᑌᓕᒍᑎᖏᓐᓄᑦ, ᑯᐯᒃ ᑕᕐᕋᖓᓂᒃ ᑐᕐᖃᑕᕐᕕᒃ), ᐊᒻᒪᓗ ᐊᖓᔪᕐᖄᖅ ᓇᑕᓕ ᕈᐊᒥᒃ ᑯᐯᒃ ᐅᖃᕐᕕᒪᕆᖓᓂ ᕿᑎᕋᓕᐅᑉ ᑭᖑᓂᖓᓂ ᐅᓪᓗᒥ ᑲᑎᒍᑎᖃᕐᑎᓗᒋᑦ 50 ᐊᕐᕌᒍᑦ ᐊᓂᒍᕐᓂᖏᓐᓂᒃ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ (ᐊᖏᖃᑎᒌᓐᓂᖅ) ᐊᑎᓕᐅᕐᑕᐅᓂᕕᓂᖓᑕ ᑭᖑᓂᐊᒍᑦ. ᑲᑎᒪᓂᖅ ᑖᓐᓇ ᐃᓕᑕᕐᓯᒍᑎᐅᓚᐅᕐᑐᖅ ᐊᕙᑎᑦ ᒪᕐᕉᒃ ᖁᓕᓪᓗ ᐊᕐᕌᒍᓂᒃ ᑯᐯᒃᓗ ᓄᓇᕕᐅᓪᓗ ᐱᓇᓱᐊᖃᑎᒌᓐᓂᕆᓯᒪᓕᕐᑕᖏᓐᓂᒃ ᓱᓕᓂᕃᒋᐊᓪᓚᓱᓂᓗ ᑖᑦᓱᒪ ᐊᖏᖃᑎᒌᓐᓂᐅᑉ ᐱᒻᒪᕆᐅᒍᑎᖃᖏᓐᓇᓂᖓᓂᒃ ᐃᓄᐃᑦ ᐱᔪᓐᓇᐅᑎᖏᓐᓄᑦ ᐊᒻᒪᓗ ᐊᐅᓚᑦᓯᓂᖏᓐᓄᐊᖓᔪᓄᑦ.
ᐊᑎᓕᐅᕐᑕᕕᓂᐅᑦᓱᓂ 1975-ᒥ ᑯᐯᒃ ᑕᕐᕋᖓᓂ ᐃᓄᐃᑦ ᑲᑐᑦᔨᖃᑎᒌᓐᓂᖓᓄᑦ, ᐄᔫᒃᑯᑦ ᑲᑎᖕᖓᔨᒻᒪᕆᖏᓐᓄᑦ, ᑯᐯᒃ ᐊᒻᒪᓗ ᑲᓇᑕᐅᑉ ᑲᕙᒪᖏᓐᓄᑦ, ᐊᒻᒪᓗ ᑯᐯᒃ ᐃᑯᒪᓕᕆᔨᖏᓐᓄᑦ, ᑖᓐᓇ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓ ᑲᓇᑕᐅᑉ ᐱᓂᐊᕐᓂᕆᓯᒪᔭᖏᑦᑕ ᓴᖑᒋᐊᕐᓂᕆᓯᒪᔭᖓ. ᐃᓄᐃᑦ ᐊᒻᒪᓗ ᐄᔫᒃᑯᑦ ᑯᐯᒃ ᑕᕐᕋᖓᓂ ᐱᖁᔭᑎᒍᑦ ᐱᔪᓐᓇᐅᑎᖏᓐᓂᒃ ᑐᑭᖃᕐᑎᓯᒍᑎᐅᑦᓱᓂ ᓯᕗᓪᓕᐸᐅᓯᒪᔪᖅ ᐅᓪᓗᒥᓯᐅᑎᐅᓕᕐᑐᓂ ᐊᖏᖃᑎᒌᓐᓂᐅᓯᒪᔪᓂᑦ. ᑕᒡᒐᖓᑦ ᒪᑭᕝᕕᐅᑉ ᓄᐃᑕᐅᓂᖓ ᐱᓯᒪᕗᖅ, ᑖᓐᓇᓗ ᑲᒪᒋᔭᖃᕐᓱᓂ ᑕᐅᕐᑎᒋᔭᐅᑎᑕᐅᑦᓱᑎᒃ ᑮᓇᐅᔭᕐᑖᕆᔭᐅᓯᒪᔪᓂᒃ ᐊᒻᒪᓗ ᓯᕗᓕᕐᓱᓂ ᓄᓇᕕᒻᒥ ᐃᓄᐃᑦ ᒪᑭᑉᐸᓕᐊᒐᓱᓐᓂᒧᑦ ᐃᓅᖃᑎᒌᓄᐊᖓᔪᓄᓪᓗ ᐱᕙᓪᓕᐊᓂᖏᓐᓂᒃ.
ᐊᕐᕌᒍᑦ ᐊᕙᑎᑦ ᒪᕐᕉᒃ ᖁᓕᓪᓗ ᐊᓂᒍᕐᑎᓗᒋᑦ, ᑖᓐᓇ ᐊᖏᖃᑎᒌᓐᓂᖅ ᓄᓇᕕᒻᒥ ᐅᓪᓗᒥᐅᓕᕐᑐᖅ ᐊᐅᓚᑦᓯᒍᓯᐅᓕᕐᑐᒧᑦ ᑐᖕᖓᕕᒋᔭᐅᓪᓚᕆᖏᓐᓇᑐᖅ. ᐅᖄᖃᑎᒌᓐᓂᕆᑫᓐᓇᑕᖏᑦ ᐅᓪᓗᒥ ᑯᐯᒃᒥ ᐅᖃᐅᓯᖃᕆᐊᓪᓚᑫᓐᓇᑐᑦ ᐃᒫᒃ ᐃᓄᐃᑦ ᐱᔪᓐᓇᐅᑎᖏᑦ ᐊᑦᑕᓀᓕᑎᑕᐅᒋᐊᓪᓚᑐᐃᓐᓇᖏᓪᓗᑎᒃ ᑭᓯᐊᓂ ᓲᓱᒋᔭᐅᓪᓚᕆᒋᐊᖃᕐᓂᖏᓐᓂᒃ ᐅᖃᐅᓯᖃᕐᓱᑎᒃ ᓄᓇᕕᒃ ᐱᕈᕐᐸᓕᐊᒋᐊᓪᓚᑎᓪᓗᒍ ᐱᕙᓪᓕᐊᒋᐊᓪᓚᑎᓪᓗᒍᓗ.
ᐊᑎᓕᐅᕐᓯᒪᓂᕐᒧᑦ ᐊᖏᖃᑎᒌᓐᓂᒥᒃ ᓱᕐᕃᓂᕆᓯᒪᔭᖓᓂᒃ ᓄᓇᕕᒻᒥ ᐱᓂᐊᕐᓂᓕᕆᒍᓯᐅᓲᓂᒃ ᐃᓱᒪᒋᔭᒥᓂᒃ ᐅᖃᐅᓯᖃᕐᓱᓂ, ᐊᖓᔪᕐᖄᖅ ᐋᑕᒥ ᑌᒃᑯᐊ ᐃᓄᐃᑦ ᖃᓄᕐᑑᓯᑦᓱᑎᒃ ᐱᔪᓐᓇᐅᑎᒥᓂᒃ ᐊᔪᐃᓐᓇᕈᑎᖃᓚᐅᕐᑐᕕᓃᑦ ᑲᑉᐱᐊᑌᑦᑐᕕᓂᐅᓂᖏᓐᓂᒃ ᐅᖃᐅᓯᖃᓚᐅᕐᑐᖅ:
“ᐊᕐᕌᒍᑦ ᐊᕙᑎᑦ ᒪᕐᕉᒃ ᖁᓪᓗ ᖄᖏᕐᑐᑦ ᑌᑦᓱᒪᓂᐅᑎᓪᓗᒍ, ᐃᓄᐃᑦ ᐊᐅᓚᑦᔭᓯᒪᔪᑦ ᓄᓇᕗᓐᓂᒃ, ᐅᖃᐅᓯᕗᓐᓂᒃ, ᐊᒻᒪᓗ ᓯᕗᓂᑦᓴᕗᓐᓂᒃ ᓴᐳᒻᒥᒋᐊᕐᓂᒧᑦ. ᑌᑲᓂᐅᓯᒪᔪᖅ ᓱᓪᓕᑕᐅᑎᑦᓯᒋᐊᓪᓚᓯᒪᔪᖅ ᐃᓂᖃᕐᓂᑎᓐᓂᒃ ᑕᒫᓂ ᓄᓇᖁᑎᒥ ᐊᒻᒪᓗ ᑐᕌᕐᑕᖓᓂᒃ ᑖᑦᓱᒪ ᑲᓇᑕᐅᑉ ᐊᓯᑦᔩᓚᕆᑦᓯᒪᑦᓱᓂ. ᑖᓐᓇ ᐱᓇᓱᐊᕐᑕᐅᒋᐊᖃᕐᑎᓯᓯᒪᔪᖅ ᐃᒫᒃ: ᑐᑭᑖᕐᑕᐅᓂᐊᕐᑐᑦ ᓄᓇᑦᑎᓄᐊᖓᔪᑦ ᑐᑭᑖᕐᑕᐅᕙᓐᓂᐊᑎᓪᓗᒋᑦ ᓯᕗᓕᕐᑎᕗᓐᓄᑦ ᑕᓯᐅᕐᓯᒍᑎᐅᖏᓐᓇᓱᓂᓗ ᐅᓪᓗᒥ ᐱᓇᓱᐊᕐᑕᕗᓐᓂᒃ.”
ᓇᓗᓀᕆᑦᓱᓂ ᑖᑦᓱᒪ ᐊᖏᖃᑎᒌᓐᓂᐅᑉ ᐊᑎᓕᐅᕐᑕᐅᓂᖓ ᐃᓄᓐᓄᑦ ᑎᑭᐅᑎᔭᐅᒋᐅᕐᑐᒥᒃ ᓇᓗᓀᕐᓯᓯᒪᔪᖅ:
“ᐊᑑᑎᔭᐅᕙᓚᖓᓕᕐᑐᓄᑦ ᒪᓕᑦᑕᐅᖃᑦᑕᓂᐊᕐᓱᓂ ᐆᑦᑐᕋᐅᑎᒋᔭᐅᖃᑦᑕᓯᒪᔪᖅ ᐊᓯᖏᓐᓄᑦ ᓄᓇᖃᕐᖄᓯᒪᔪᓄᑦ ᐊᓯᑦᔩᓱᓂᓗ ᓄᓇᖃᕐᖄᓯᒪᔪᐃᑦ ᐊᒻᒪᓗ ᑲᓇᑕᐅᑉ ᑲᓇᑕᒥᓗ ᐊᕕᑦᑐᓯᒪᔪᑦ ᑲᕙᒪᖏᓐᓂᒃ ᐱᓇᓱᖃᑎᒌᒍᓯᕆᓲᖏᓐᓂᒃ. ᑖᓐᓇ ᐊᖏᖃᑎᒌᓐᓂᖅ ᓱᓕ ᐃᓅᔪᓄᑦ ᑐᓂᒪᒍᑎᐅᔪᖅ ᑐᑭᓯᓇᕐᑎᓯᒍᑎᐅᑦᓱᓂ ᖃᓄᐃᓘᕐᓗᑕ ᐊᐅᓚᑦᓯᒍᓯᖃᕐᑐᓴᐅᒻᒪᖔᑦᑕ ᖃᓄᕐᓗ ᑲᕙᒣᑦ ᑲᒪᒋᔭᕆᐊᓕᒻᒥᒃ ᐱᓇᓱᐊᕐᑐᓴᐅᒻᒪᖔᑕ.”
ᑯᐯᒃ ᓯᑎᒥ ᑲᑎᖕᖓᓂᖅ ᑖᓐᓇ ᑭᖑᓪᓕᕆᔭᐅᓚᐅᕐᑐᖅ ᑰᒃᔪᐊᒥ ᐊᑦᑐᑕᐅᓐᓇᑐᒻᒪᕆᒥᒃ ᐃᕐᖃᐅᒪᑦᓯᓂᕐᒧᑦ ᐱᓂᐊᕐᓂᖃᓚᐅᕐᑎᓗᒋᑦ ᐁᑉᐸᖓᓐᓂᐅᑎᓪᓗᒍ, ᓇᑦᔪᐃᔭᕐᕕᒃ 11-ᒥ, ᑌᑲᓂ ᒪᑭᕝᕕᑯᑦ ᐅᓪᓗᑕᒫᕐᓯᐅᑎᓕᕆᔨᖏᑦ ᐅᐱᒋᔭᖃᓚᐅᕐᑎᓗᒋᑦ ᐊᖏᖃᑎᒌᓐᓂᒥᒃ ᐊᑎᓕᐅᕐᓯᒪᔪᓂᒃ ᑌᒃᑯᐊᓗ ᐃᓅᒍᓐᓀᓯᒪᓕᕐᑐᑦ ᐃᓚᖏᓐᓂᒃ ᐃᓕᑕᕐᓯᓂᖃᕐᒥᓱᑎᒃ. ᑲᑎᑦᑕᕕᒻᒥ ᐊᑑᑎᔭᐅᑦᓱᓂ, ᑖᓐᓇ ᐱᓂᐊᕐᓂᖅ ᐱᑕᖃᕐᑎᓯᓚᐅᕐᒥᔪᖅ ᓄᓇᕕᒻᒥ ᐊᕐᕌᒍᓂᒃ ᐊᕙᑎᑦ ᒪᕐᕉᒃ ᖁᓕᓪᓗᓂᑦ ᐊᑑᑎᓯᒪᔪᓂᒃ ᐃᓄᓐᓂᓗ ᐱᓇᓱᐊᖃᑎᐅᓯᒪᓪᓚᕆᑦᑐᓂᒃ ᑕᑯᑦᓴᐅᑎᑦᓯᔪᓂᒃ. ᐱᓂᐊᕐᓂᖃᕈᑎᒥ ᐃᓚᒋᔭᐅᓚᐅᕐᑐᑦ ᐱᑕ ᐋᑕᒥᓗ ᐊᖏᖃᑎᒌᓐᓂᒥᓪᓗ ᐊᑎᓕᐅᕐᑎᐅᓯᒪᔪᑦ ᐅᖃᓕᒪᑎᓪᓗᒋᑦ ᐃᓚᖃᕐᒥᓱᓂ ᐃᕐᖃᐅᒪᔭᐅᒍᑎᖓᓄᑦ ᑕᕐᕋᓕᔮᓕᐊᖑᓯᒪᔫᑉ ᑕᑯᑦᓴᐅᒋᐊᖕᖓᕈᑎᖓᓂᒃ “ᓄᓇᖃᕐᕕᐅᔪᖅ ᑕᕐᕋᒥ: ᓄᓇᕕᒃ 50-ᖃᓕᕐᓱᓂ,” ᒪᑭᕝᕕᑯᑦ ᑕᕐᕋᓕᔮᑦᓴᓕᐊᕕᓂᖓᑦ. ᐅᓐᓄᖃᕈᑎᐅᓂᖓ ᐃᓱᓕᒍᑎᖃᓚᐅᕐᑐᖅ ᑐᓴᐅᒪᔭᐅᔪᒻᒪᕆᐅᓕᕐᑐᒥᒃ ᐃᖕᖏᑎᒥᒃ ᑐᓴᕐᓂᔮᕐᑎᓯᔪᖃᕐᑎᓗᒍ ᐃᓕᓴᐱ ᐁᓯᒃᒥᒃ, ᑕᑯᑦᓴᐅᓱᓂ ᐅᐱᒋᔭᖃᕐᓂᒧᑦ ᓄᓇᕕᐅᑉ ᓴᐱᕐᑌᑑᑦᓱᓂ ᓄᑭᖃᕐᓂᖓᓂᒃ ᐃᓅᓯᖃᕐᓂᖓᓂᓪᓗ.
ᒪᑭᕝᕕᒃ ᐅᐱᒍᓱᑉᐳᖅ 1975-ᒥᓂᑦ ᐱᕙᓪᓕᐊᓂᕆᓯᒪᔭᒥᓂᒃ ᓴᐳᑦᔨᓂᕐᒥᒃ ᓯᕗᒧᐊᕐᑎᓯᓂᕐᒥᓗ ᐃᓄᐃᑦ ᐱᔪᓐᓇᐅᑎᖏᓐᓂᒃ ᐊᒻᒪᓗ ᑐᓂᒪᒍᑎᙯᓐᓇᓱᓂᓗ ᑕᒪᓐᓇ ᑐᖕᖓᕕᑦᑖᕆᔭᐅᓯᒪᔪᖅ ᐱᕈᕐᐸᓕᐊᑦᓯᐊᖏᓐᓇᖁᓗᒍ ᐊᑦᑕᓀᓕᒋᐊᓪᓚᓗᓂ ᐊᕐᕌᒍᓂ ᓯᕗᓂᕐᒥ ᙯᔪᓂ.
ᑐᑭᓯᒋᐊᓪᓚᒍᑎᑦᓴᓄᑦ ᔦᒻᔅ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᓐᓂᖓᓂᒃ, ᑕᑯᓗᒋᑦ ᐅᑯᐊ:
https://www.canada.ca/en/impact-assessment-agency/corporate/james-bay-northern-quebec-agreement.html
–30 –
ᐅᖄᕕᐅᒍᓐᓇᑐᖅ:
Katharine Morrill
ᑐᓴᐅᒪᖃᑎᒌᑦᑎᓯᓂᕐᓂᒃ ᑐᑭᒧᐊᑦᑎᓯᔨ, ᒪᑭᕝᕕᑯᓐᓂ
ᖃᕆᑕᐅᔭᑎᒍᑦ ᑐᕌᒍᑎᖓ ᐊᓪᓚᕕᐅᒍᒪᑐᐊᕈᓂ: kmorrill@makivvik.ca
ᖃᕆᑕᐅᔭᑎᒍᑦ ᑕᑯᒐᓱᐊᕐᑕᐅᒍᓐᓇᒥᔪᑦ ᐅᕘᓇ: www.makivvik.ca
ᒪᑭᕝᕕᒃ ᓄᓇᕕᒻᒥᐅᑦ ᐃᓄᐃᑦ ᓄᓇᑖᕐᓯᒪᓂᖓᓄᑦ ᑎᒥᖁᑎᒋᔭᐅᕗᖅ ᑎᓕᔭᐅᒪᐅᑎᖃᕐᓱᓂ ᑮᓇᐅᔭᕐᑖᕆᔭᐅᓯᒪᔪᓂᒃ ᑲᒪᔨᐅᑦᓱᓂ ᐃᓄᐃᑦ ᓄᓇᕕᒻᒥᐅᑦ ᑮᓇᐅᔭᕐᑖᕕᓂᖏᓐᓂᒃ ᐊᖏᖃᑎᒌᓐᓂᐅᓯᒪᔪᖅ ᔦᒥᔅ ᐯᒥ ᑯᐯᒃᓗ ᑕᕐᕋᐊᓂ ᑮᓇᐅᔭᕐᑖᕈᑕᐅᓚᐅᕐᓯᒪᒻᒪᑦ. ᒪᑭᕝᕕᒃᑯᑦ ᑮᓇᐅᔦᑦ ᐊᐅᓚᑕᐅᓂᖏᓐᓂᒃ ᑮᓇᐅᔭᓕᐅᕋᓱᐊᕈᑎᓂᓪᓗ ᑲᒪᒋᔭᖃᓲᑦ ᐊᒻᒪᓗ ᐱᕈᕐᓭᒐᓱᐊᕐᓱᑎᒃ ᐃᓄᓐᓄᑦ ᐊᐅᓚᑕᐅᓗᑎᒃ ᑮᓇᐅᔭᓕᐅᕋᓱᐊᕈᑎᖏᓐᓂᒃ, ᐊᔪᕐᓴᑐᓂᓪᓗ ᐃᑲᔪᕐᓯᒪᐅᑎᖃᕋᓱᐊᓱᒍᑦᓱᑎᒃ , ᐊᒻᒪᓗ ᐃᓕᓐᓂᐊᑎᑦᓯᒐᓱᐊᕐᐸᓱᑎᒃ ᐃᓄᓐᓂᒃ ᓄᓇᓕᓐᓂ.