ᑌᒪᓕ ᐅᔭᕋᓐᓂᐊᕕᑦᓴᓯᐅᕐᑐᓗ ᐅᔭᕋᓐᓂᐊᑐᓪᓗ ᐱᓇᓱᑦᑕᖏᑦ ᐅᓄᕐᓯᐅᒥᓚᖓᒍᓇᐅᑎᓪᓗᒋᑦ ᐊᕐᕌᒍᓂ ᓯᕗᓂᑦᑎᓃᑦᑐᓂ, ᓄᓇᕕᒻᒥᐅᑦ ᐃᓄᑐᐃᓐᓀᑦ ᐃᓱᒫᓗᒍᑎᖃᓕᕐᐳᑦ ᐅᔭᕋᓐᓂᐊᑐᑦ ᐱᕙᓪᓕᐊᑎᑦᓯᒍᑎᖏᑕ ᓱᕐᕃᓂᕆᖃᑦᑕᓚᖓᔭᖏᓐᓂᒃ ᐃᓄᑐᐃᓐᓇᑎᒍᑦ ᐃᓅᓯᖏᓐᓂᒃ ᓄᓇᖏᑕᓗ ᓂᕐᔪᑎᖁᑎᖏᓐᓂ, ᑕᒫᓂ ᐊᕐᕌᒍᒐᓵᓗᓐᓂ ᓄᓇᓯᒪᕕᖃᕐᓱᑎᒃ ᐊᓐᓇᐅᒪᒍᑎᑦᓴᒥᓐᓂᒃ ᐊᓐᓂᑐᐊᖃᕐᕕᒋᓲᕆᑦᓱᒍ ᑖᒃᑯᐊ ᓄᓀᑦ ᓴᐳᑦᔭᐅᒪᒋᐊᓖᑦ, ᓴᐳᑎᔭᐅᒪᖃᑕᐅᒻᒥᑎᓪᓗᒋᑦ, ᐃᑦᓴᓂᑕᕐᑕᖏᑦ ᐱᐅᓯᑐᖃᕐᒥᒍᓪᓗ ᑐᖁᖓᔪᓂᒃ ᐃᓗᕕᕐᓯᕕᒋᖃᑦᑕᓯᒪᔭᖏᑦ.
ᓄᓇᕕᐅᑉ ᓄᓇᖓᑕ ᖃᓄᐃᑦᑑᓂᖓ ᐱᑕᖃᖕᖏᓂᐅᔭᖕᖏᑐᖅ ᐅᔭᕋᓐᓂᒃ ᐱᑦᓴᖑᕈᓐᓇᑐᓂᒃ ᑮᓇᐅᔭᑦᓴᔭᓂᓪᓗ, 1950-ᓃᑦᑐᓂᑦ ᐊᕐᕌᒍᖃᑦᑕᓯᒪᔪᓂᑦ ᐱᒋᐊᕐᓱᓂ, ᓄᓇᖁᑕᐅᔪᖅ ᑕᑯᕕᑦᓴᐅᖃᑦᑕᓯᒪᓕᕐᖁᖅ ᐅᔭᕋᓐᓂᐊᕋᑦᓴᓯᐅᕐᑐᓂᒃᓗ ᐅᔭᕋᓐᓂᐊᑐᓂᒃᓗ. 2014-ᖑᑎᓪᓗᒍ ᓲᕐᓗ ᒪᕐᕈᐃᓂᒃ ᐅᔭᕋᓐᓂᐊᕖᓐᓂᒃ ᐃᖏᕐᕋᑎᑕᐅᔪᖃᓕᓚᐅᔪᒻᒪᑦ ᓄᓇᕕᖕᒥ, ᐊᒥᓱᑲᓪᓓᓗ ᐅᔭᕋᓐᓂᐊᓂᕐᓂᒃ ᐱᓇᓱᑉᐸᓕᐊᒍᑎᐅᔪᑦ ᐱᕙᓪᓕᐊᑎᑕᐅᓕᕐᓱᑎᒃ, ᐊᒻᒪᓗ ᒥᑦᓯᑎᓐᓂ 40,000 ᐅᔭᕋᓐᓂᐊᓛᕐᑕᕌᕐᑕᐅᒪᔪᑦ ᓄᓀᑦ ᐃᓐᓄᐃᒍᑎᐅᒪᓕᕐᓱᑎᒃ.
ᑕᒪᓐᓇ ᐅᔭᕋᓐᓂᐊᕕᑦᓴᓯᐅᕐᓂᓗ ᐅᔭᕋᓐᓂᐊᓂᕐᓗ ᑕᒪᕐᒥᒃ ᐱᓇᓱᒐᑦᓴᓂᒃ ᓄᐃᑎᕆᔪᒻᒪᕆᐅᔫᒃ, ᐱᒋᐅᕐᓴᑎᑦᓯᓂᕐᓂᓗ, ᐱᓇᓱᒐᕐᓂᓗ ᐊᒻᒪᓗ ᑮᓇᐅᔭᓕᐅᕋᓱᒍᑎᑦᓴᖏᓐᓂᒃ ᓄᓇᕕᐅᑉ ᐃᓄᑐᐃᓐᓇᖏᑕ.
ᓄᓇᕕᒻᒥᐅᑦ ᐃᓄᑐᐃᓐᓀᑦ ᑐᑭᓯᓂᐊᕐᑕᐅᖃᑦᑕᓚᐅᕐᑎᓗᒋᑦ ᐃᓘᓐᓇᖏᓐᓂ ᓄᓇᓕᓕᒫᓂ ᐊᒻᒪᓗ ᓄᓇᓕᓕᒫᓄᓕᖓᔪᑦ ᐱᓇᓱᒐᖃᕐᕖᑦ ᑐᑭᓯᓂᐊᕐᕕᐅᖃᑕᐅᓚᐅᑲᒻᒥᑎᓪᓗᒋᑦ, ᒪᑭᕝᕕᒃ ᓄᐃᑦᓯᒍᑎᖃᓕᓚᐅᔪᕗᖅ ᑖᒃᑯᓂᖓ ᐅᔭᕋᓐᓂᐊᑐᓕᕆᓂᕐᓄᑦ ᒪᓕᒐᖃᕐᑎᓯᒍᑎᑦᓴᒥᓂᒃ ᐅᖃᐅᓯᖃᕈᑎᒋᓂᐊᓕᕐᓗᓂᒋᑦ ᖃᓄᐃᓕᖓᖁᔨᒍᑎᒥᓂᒃ ᓴᐳᑦᔨᓯᒪᓚᖓᓂᕐᒥᓂᒃᓗ ᐅᔭᕋᓐᓂᐊᑐᓕᕆᓂᑎᒍᑦ ᐱᕙᓪᓕᐊᑎᑦᓯᒍᑎᐅᓕᕐᑐᓂᒃ ᓄᓇᕕᖕᒥ.
ᑖᒃᑯᐊ ᐅᔭᕋᓐᓂᐊᑐᓕᕆᓂᕐᓄᑦ ᒪᓕᒐᖃᕐᑎᓯᒍᑏᑦ, ᓄᐃᑕᐅᓚᐅᔪᑦ 2014-ᖑᑎᓪᓗᒍ, ᐃᓕᖓᕗᑦ ᓄᓇᖁᑕᐅᔪᒧᑦ ᑕᕐᕋᒥ 55 ᐃᑳᖓᔪᑯᑖᑉ ᖁᓛᓂᕐᑐᒧᑦ ᑯᐯᒃ ᑕᕐᕋᖓᓂ ᐅᓕᑕᐅᒪᔪᓄᑦ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᓄᑦ ᐊᖏᖃᑎᒌᒍᑎᓄᑦ. ᑖᒃᑯᐊ ᐊᓪᓚᓯᒪᔪᖕᖑᐃᒍᑎᐅᒪᔪᑦ ᐅᖃᐅᓯᕐᓂ ᐃᓄᒃᑎᑐᑦ, ᖃᓪᓗᓈᕐᑎᑐᑦ ᒍᐃᒍᐃᑎᑐᓪᓗ ᐊᓪᓚᓯᒪᔪᖁᑕᐅᕗᑦ.
OR